រយៈពេលចុងក្រោយនេះ ប្រទេសមហាអំណាចចំនួនពីរប្រឈមមុខគ្នាជាខ្លាំងអំពីលទ្ធភាពនៃការផ្ទុះសង្គ្រាមនុយក្លេអ៊ែរ។ រុស្ស៊ី ដែលផុងខ្លួនក្នុងសង្គ្រាមឈ្លានពានអ៊ុយក្រែន គឺប្រទេសមហាអំណាចមួយនេះកំពុងស្ថិតក្នុងភាពទាល់ច្រកយ៉ាងខ្លាំង។
ប្រទេសដែលមានអាវុធនុយក្លេអ៊ែរនេះ បានគំរាមប្រើអាវុធប្រល័យលោកដើម្បីកម្ទេចកងទ័ពអ៊ុយក្រែន និងកងទ័ពប្រទេសណាដែលចូលដល់ដែនដីនៃតំបន់ស្វយ័តរបស់ខ្លួន។ តំបន់ស្វយ័តនេះមានខេត្ត Kherson និង Zaporizhzhia នៅភាគខាងត្បូង។ ចំណែកតំបន់ Luhansk និង Donetsk Zaporizhzhia នៅឯភាគខាងកើត គឺតំបន់ទាំង ៤ នេះ ត្រូវបានកងទ័ពរុស្ស៊ី វាយកាន់កាប់ប្រហែល ១៥% នៃទឹកដីរបស់អ៊ុយក្រែន ហើយសម្រេចដាក់ក្នុងឧបសម្ពន្ធរបស់ខ្លួន។
ការបោះឆ្នោតប្រជាមតិរបស់រុស្ស៊ី បានចាប់ផ្តើមកាលពីថ្ងៃសុក្រ ហើយនឹងត្រូវបញ្ចប់នៅថ្ងៃអង្គារនេះ ដោយសភារុស្ស៊ី អាចនឹងអនុម័តការបញ្ចូលឧបសម្ពន្ធនេះក្នុងរយៈពេលប៉ុន្មានថ្ងៃខាងមុខ។ នៅពេលតំបន់ទាំង ៤ នេះ ត្រូវបានសភាអនុម័តហើយ ប្រធានាធិបតីរុស្ស៊ី លោក វ៉្លាឌីមៀរ ពូទីន បានចុះក្រឹត្យឱ្យក្លាយជាដែនដីរបស់រុស្ស៊ី។
រុស្ស៊ី បានគំរាមក្នុងការប្រើអាវុធធុនធ្ងន់ ដោយរួមទាំងអាវុធនុយក្លេអ៊ែរ។ ការដែលរុស្ស៊ីបង្ហាញការបង្កសង្គ្រាមនុយក្លេអ៊ែរ នាំឲ្យប្រទេសជាច្រើនថ្កោលទោស និងភ័យខ្លាចជាខ្លាំង។ ប្រទេសដែលប្រឆាំងខ្លាំងជាងគេចំពោះការគំរាមរបស់រុស្ស៊ី គឺអាមេរិក ដែលជាប្រទេសធំទី២ មានគ្រាប់នុយក្លេអ៊ែរជាង ៥៥៥០គ្រាប់ បន្ទាប់ពីរុស្ស៊ីមានជាង ៦២០០គ្រាប់។ ប្រទេសទាំងពីរនេះមានសន្ធិសញ្ញាជាមួយគ្នាស្ដីពីការហាមសាយភាយអាវុធនុយក្លេអ៊ែរ។
តែអ្នកវិភាគម្នាក់មើលឃើញថា ពុំមានច្បាប់ណាអាចចាប់បង្ខំប្រទេសណាមួយត្រូវតែគោរព និងអនុវត្តសន្ធិសញ្ញានេះបានទាំងស្រុងនោះទេ ហើយសូម្បីរុស្ស៊ី ក៏មិនអាចចាប់បង្ខំអាមេរិកបានដែរ បើអាមេរិកត្រូវប្រើអាវុធនេះដើម្បីអំណាចយោធារបស់ខ្លួន។
អ្នកវិភាគម្នាក់មើលឃើញថា បើទោះជាអង្គការសហប្រជាជាតិមានច្បាប់នេះក៏ដោយ ក៏មិនអាចឃាត់ឃាំងបានដែរ។ ក្នុងស្ថានភាពនេះ អ្នកវិភាគម្នាក់បាននិយាយថា មិនមានសន្ធិសញ្ញាច្រើនទេដែលអាចគ្រប់គ្រង ឬដាក់កម្រិតលើប្រទេសរុស្ស៊ី ប្រសិនបើប្រធានាធិបតីរុស្ស៊ី លោក វ្ល៉ាឌីមៀរ ពូទីន សម្រេចចិត្តប្រើប្រាស់អាវុធនុយក្លេអ៊ែរនៅក្នុងសង្គ្រាមរបស់ខ្លួននៅអ៊ុយក្រែន។
លោក Sharon Ann Squassoni សាស្ត្រាចារ្យស្រាវជ្រាវនៃកិច្ចការអន្តរជាតិនៃសាកលវិទ្យាល័យ George Washington បានប្រាប់សារព័ត៌មាន CNA ថា៖ «មានតែវិធីមួយគត់ដែលអាចរារាំងរុស្ស៊ីពីការប្រើប្រាស់អាវុធនុយក្លេអ៊ែរបាន គឺមានតែបទដ្ឋានហាមឃាត់មិនប្រើប្រាស់អាវុធនេះចាប់តាំងពីសហរដ្ឋអាមេរិកបានប្រើអាវុធនុយក្លេអ៊ែរប្រឆាំងនឹងទីក្រុងហ៊ីរ៉ូស៊ីម៉ា និងណាហ្គាសាគី ក្នុងសង្គ្រាមលោកលើកទីពីរ»។
តាមអ្នកវិភាគរូបនេះ ការដែលអាមេរិកវាយប្រហារលើប្រទេសជប៉ុនក្នុងសង្គ្រាមលោកលើកទី២ ដោយអាវុធប្រភេទនេះ គឺជាសញ្ញាដែលរុស្ស៊ីចង់ប្រើដែរ។ អ្នកវិភាគរូបនេះថា មិនមានសន្ធិសញ្ញាច្រើនទេដែលអាចគ្រប់គ្រង ឬកំណត់ការប្រើប្រាស់អាវុធនុយក្លេអ៊ែររបស់រុស្ស៊ី ហើយរឿងនេះស្ថិតនៅក្នុងដៃរបស់ប្រធានាធិបតី ពូទីន។
លោកបញ្ជាក់ថា នេះហើយជារឿងដ៏គួរឱ្យភ័យខ្លាច ព្រោះលោក ពូទីន ជាមេដឹកនាំដែលអាចធ្វើអ្វីក៏បានដែរ ដោយសារតែពុំមានមេដឹកនាំវិមានក្រឹមឡាំងណាម្នាក់ហ៊ានជំទាស់ជាមួយបុរសខ្លាំងនេះទេ។
ក្នុងស្ថានភាពតានតឹង សហរដ្ឋអាមេរិកគំរាមរុស្ស៊ីយ៉ាងខ្លាំងមិនឲ្យក្រុងមូស្គូ បង្កសង្គ្រាមប្រល័យលោកនោះទេ។ តែទោះជាបែបនេះក្ដី កាលពីសប្តាហ៍មុន លោក ពូទីន ដែលបានបញ្ជាឱ្យកេណ្ឌទ័ពបម្រុងចំនួន ៣០ម៉ឺននាក់នោះ លោកមិនបានលាក់កំបាំងពីការគំរាមកំហែងបញ្ឆេះសង្គ្រាមនុយក្លេអ៊ែររបស់លោកនោះទេ។ បន្ថែមពីនេះទៀត លោកបាននិយាយថា រុស្ស៊ីនឹង «ប្រើគ្រប់មធ្យោបាយ» ដើម្បីការពារទឹកដីរបស់ខ្លួន។
តែក្រុងវ៉ាស៊ីនតោន នៅតែបន្តគំរាមប្រឆាំងនឹងរុស្ស៊ី។ នៅក្នុងបទសម្ភាសន៍ជាមួយទូរទស្សន៍ CBS News កាលពីថ្ងៃទី២៥ កញ្ញា លោក អង់តូនី ប្លីងកិន រដ្ឋមន្ត្រីក្រសួងការបរទេសអាមេរិកអះអាងថា អាមេរិកបានទាក់ទងជាមួយរុស្ស៊ីជាលក្ខណៈឯកជន។ នាឱកាសនោះ លោកថាអាមេរិកបានប្រាប់ឱ្យរុស្ស៊ីឲ្យបញ្ឈប់ការគំរាមប្រើអាវុធនុយក្លេអ៊ែរក្នុងសង្គ្រាមនៅអ៊ុយក្រែន ដោយព្រមានថា ការប្រើអាវុធប្រភេទនេះអាចនឹងបង្កមហន្តរាយធ្ងន់ធ្ងរខ្លាំងណាស់។
លោករដ្ឋមន្ត្រីការបរទេសអាមេរិកអះអាងថា មន្ត្រីអាមេរិកពិតជាបាននិយាយទាក់ទងដោយផ្ទាល់ជាមួយថ្នាក់ដឹកនាំជាន់ខ្ពស់រុស្ស៊ី ដើម្បីប្រាប់ដោយចំៗអំពីអ្វីដែលអាមេរិកចង់ឱ្យរុស្ស៊ីដឹងថា អាមេរិកអាចឆ្លើយតបនឹងរុស្ស៊ី បើការវាយប្រហារដោយអាវុធនុយក្លេអ៊ែរពីសំណាក់ក្រុងមូស្គូ ផ្ទុះឡើងនោះ។
ជាមួយគ្នានេះ លោក អង់តូនី ប្លីងកិន បានប្រកាសថា នៅក្នុងការទាក់ទងដោយផ្ទាល់ជាមួយរុស្ស៊ី អាមេរិកបានព្រមានកុំឱ្យរុស្ស៊ីប្រើអាវុធនុយក្លេអ៊ែរដែលអាចបង្កមហន្តរាយសម្រាប់ប្រទេសអ្នកបាញ់ផ្ទាល់ផង និងមនុស្សជាតិជាច្រើនផ្សេងទៀត គឺច្បាស់ណាស់រុស្ស៊ីនឹងអាចដឹងអំពីផលវិបាកនៃការប្រើប្រាស់អាវុធនុយក្លេអ៊ែរ។
កាលពីថ្ងៃពុធ ទី២១ កញ្ញា ក្នុងសុន្ទរកថាតាមកញ្ចក់ទូរទស្សន៍ទៅកាន់ប្រជាជាតិ លោកប្រធានាធិបតីរុស្ស៊ី ពូទីន បានព្រលយថា រុស្ស៊ីត្រៀមប្រើគ្រប់មធ្យោបាយរាប់ទាំងអាវុធនុយក្លេអ៊ែរផងដែរ។
ជាមួយគ្នានេះ នៅលើវេទិកាអង្គការសហប្រជាជាតិ ប្រមុខការទូតរុស្ស៊ី លោក ស៊ែរហ្គៃឡាវ្រូស បានបញ្ជាក់ថា រុស្ស៊ីមានសិទ្ធិប្រើអាវុធនុយក្លេអ៊ែរដើម្បីការពារប្រទេស និងដែនដីរណបថ្មីទាំង៤ នេះ ព្រោះជាសិទ្ធិរបស់រុស្ស៊ី។
ស្របពេលជាមួយគ្នានេះ ប្រធានាធិបតីអ៊ុយក្រែន លោក វ៉ូឡូឌីមៀ ហ្សេឡេនស្គី និយាយថា លោកមិនគិតថា លោក ពូទីន ប្រធានាធិបតីរុស្ស៊ី កំពុងតែព្រងើយកន្តើយនោះទេចំពោះបំណងរបស់រុស្ស៊ី ក្នុងការគំរាមបង្កសង្គ្រាមនុយក្លេអ៊ែរ។ លោក ហ្សេឡេនស្គី អះអាងថា ទីក្រុងមូស្គូត្រៀមខ្លួនរួចជាស្រេចដើម្បីប្រើប្រាស់អាវុធប្រល័យលោកមួយក្នុងការការពារប្រទេសរបស់ខ្លួននោះ។ លោកថា គេមិនត្រូវមើលរំលងនូវភាពអំនួតរបស់រុស្ស៊ីនោះទេ៕