29 C
Phnom Penh

ភាពយន្ត​ចម្រៀង​លើក​តម្កើង​លោក ហ៊ុន សែន លប់​លើ​ព្រះមហាក្សត្រ​ត្រូវ​បាន​សម្ពោធ​ដាក់​បញ្ចាំង​ជា​សាធារណៈ

ដោយ ឌឹ ខេមបូឌា ដេលី

បទវិភាគ

ភាពយន្ត​ចម្រៀង «ជីវិត​ក្មេង​វត្ត» ដែល​រៀបរាប់​ពី​ឆាកជីវិត​មេដឹកនាំ​បក្ស​កាន់​អំណាច លោក ហ៊ុន សែន កាលពី​ទសវត្ស​ឆ្នាំ​១៩៦០ ក្នុង​ជីវិត​កុមារភាព​រស់នៅ​ឃ្លាត​ឆ្ងាយ​ពី​ឪពុក​ម្តាយ​មក​ផ្ញើ​ខ្លួន​នឹង​ព្រះសង្ឃ ស្នាក់​ក្នុង​ទី​អារាម ដែល​លើក​តម្កើង​ខ្លួនឯង​ឲ្យ​លប់​លើ​ព្រះមហាក្សត្រ បាន​សម្ពោធ​ចាក់​បញ្ចាំង​ជា​សាធារណៈ​ទូទាំង​ប្រទេស​ហើយ។

ខ្សែភាពយន្ត​នេះ​នឹង​មាន​ចាក់​នៅ​តាម​បណ្ដាញ​ផ្សព្វផ្សាយ​ស្ថានីយ​ទូរទស្សន៍​ទាំងអស់​នៅ​ថ្ងៃទី​២៨ ខែ​កញ្ញា ឆ្នាំ​២០២២ នេះ បន្ទាប់ពី​ប្រើ​ពេល​ផលិត​អស់​រយៈពេល​ជិត ១​ឆ្នាំ។

ភាពយន្ត​ចម្រៀង «ជីវិត​ក្មេង​វត្ត» ត្រូវ​បាន​និពន្ធ​ឡើង​ដោយ​លោក ហ៊ុន សែន ផ្ទាល់ មាន​ប្រវែង​ជាង ៣០​នាទី ដែល​បាន​បង្ហាញ​ពី​ឆាកជីវិត​របស់​លោក​កាលពី​នៅ​កុមារភាព​ដែល​រស់នៅ​ឃ្លាត​ឆ្ងាយ​ពី​ឪពុក​ម្តាយ និង​ភូមិ​ស្រុក មក​ផ្ញើ​ខ្លួន​នឹង​ព្រះសង្ឃ ស្នាក់​ក្នុង​ទី​អារាម​ក្នុង​ទីក្រុង​ភ្នំពេញ កាលពី​អំឡុង​ទសវត្ស​ឆ្នាំ​១៩៦០។

ខ្សែភាពយន្ត​នេះ​ត្រូវ​បាន​ចាក់​បញ្ចាំង​នៅ​ថ្ងៃ​ពុធ​នេះ​ទូទាំង​ប្រទេស តាម​បណ្ដាញ​ផ្សព្វផ្សាយ​ស្ថានីយ​ទូរទស្សន៍​ទាំងអស់ បន្ទាប់ពី​បាន​ធ្វើ​ពិធី​សម្ពោធ​នៅ​ឯ​ទីស្ដីការ​ក្រសួង​រៀបចំ​ដែនដី នគរូបនីយកម្ម និង​សំណង់ ដោយ​មាន​ការ​ចូលរួម​ពី​រដ្ឋមន្ត្រី​ក្រសួង​វប្បធម៌ និង​វិចិត្រសិល្បៈ អ្នកស្រី ភឿង សកុណា និង​តារា​សម្ដែង​ប្រុស​ស្រី​ជាច្រើន​រូប​ផ្សេង​ទៀត។

ការ​ផលិត និង​ចាក់​ផ្សាយ​ភាពយន្ត​ចម្រៀង «ជីវិត​ក្មេង​វត្ត» ដែល​លាតត្រដាង​ពី​ឆាកជីវិត​របស់​មេដឹកនាំ​ខ្មែរ លោក ហ៊ុន សែន នេះ ត្រូវ​បាន​គេ​រិះគន់​ថា​ជា​ការ​ព្យាយាម​លើក​តម្កើង​ខ្លួនឯង​តាម​បែប​រាជវង្ស។

អ្នកវិភាគ​ឯករាជ្យ និង​ជា​ប្រធាន​វេទិកា​ពលរដ្ឋ លោក គឹម សុខ បាន​ប្រាប់​សារព័ត៌មាន The Cambodia Daily នៅ​ថ្ងៃទី​២៨ កញ្ញា នេះ​ថា ការ​និពន្ធ​ភាពយន្ត​ដែល​គ្មាន​ការ​វាយតម្លៃ​ថា​ជា​ប្រវត្តិ​ពិត​របស់​លោក ហ៊ុន សែន មែន​ឬ​ក៏​អត់​នេះ អាច​ជា​របៀប​ប្រឹង​ប្រតិដ្ឋ​រឿង​តាមរយៈ​ភាពយន្ត​តម្រង់​គោលដៅ​ធំ​ក្នុង​ជីវិត​ចុងក្រោយ​របស់​គាត់ ជាពិសេស​ការ​ខំ​ប្រឹងប្រែង​លើក​តម្កើង​ខ្លួនឯង​ឲ្យ​លប់​លើ​ព្រះមហាក្សត្រ នៅ​ពេល​ដែល​លោក ហ៊ុន សែន បាន​រំលោភ​ព្រះរាជ​តួនាទី​ព្រះមហាក្សត្រ​ទាំងស្រុង​ទៅ​ហើយ​នោះ។

លោក​បន្ថែម​ថា ការ​ព្យាយាម​ផ្សព្វផ្សាយ​រំលេច​ពី​សកម្មភាព​ខ្លួនឯង​បែប​នេះ គឺជា​ចេតនា​បំភ័ន្ត​ភ្នែក​មហាជន​ឲ្យ​មើល​ឃើញ​លោក ហ៊ុន សែន តែ​ម្នាក់​អំពី​ការ​តស៊ូ​របស់​គាត់ ដើម្បី​ឲ្យ​ពលរដ្ឋ​ទទួលស្គាល់​ខ្លួន​ដូច​វីរបុរស​ជាតិ​មុនៗ​ដែរ។

លោក គឹម សុខ លើកឡើង​ថា កាលណា​ប្រទេស​មួយ​ប្រកាន់​យក​របប​រាជា​និយម ប៉ុន្តែ​មិន​លើក​តម្កើង​ពី​ព្រះរាជ​តួនាទី ឬ​សកម្មភាព​របស់​ព្រះមហាក្សត្រ​ដូច​ប្រទេស​ថៃ ដែល​គេ​ធ្លាប់​ធ្វើ ប៉ុន្តែ​បែរ​ជា​ខំ​ប្រឹង​ផ្សព្វផ្សាយ និង​ប្រតិដ្ឋ​រឿង​លើក​តម្កើង​លោក ហ៊ុន សែន និង​ក្រុម​គ្រួសារ «ហ៊ុន» ដូច​សព្វថ្ងៃ​នេះ គឺ​មិន​ខុស​អ្វី​ពី​លោក ហ៊ុន សែន កំពុង​ជ្រែក​រាជ្យ​តាំង​ខ្លួន​ជា​ស្ដេច​នោះ​ឡើយ។

ប្រធាន​វេទិកា​ពលរដ្ឋ​រូប​នេះ​បញ្ជាក់​ថា រឿង​ដែល​គួរ​ឲ្យ​កត់សម្គាល់​មួយ​ទៀត​នោះ គឺ​មាន​ការ​ប្រឹងប្រែង​ប្រតិដ្ឋ​រឿង​ភាពយន្ត​សរសើរ​លោក ហ៊ុន សែន ផង ស្រប​ពេល​ដែល​របៀប​ធ្វើ​ពិធីការ​របស់​មន្ត្រី​ហែហម​លោក ហ៊ុន សែន បាន​រៀបចំ​ដូច​គ្នា​ទៅ​នឹង​ពិធីការ​របស់​រាជវង្ស​ដែរ​ទៅ​ហើយ​នោះ។

លោក​បន្ត​ថា ជាក់ស្តែង​នៅ​ក្នុង​មហាសន្និបាត​អង្គការ​សហប្រជាជាតិ លោក ហ៊ុន សែន បាន​អនុញ្ញាត​ឲ្យ​ចៅស្រី​ពីរ​នាក់​របស់​គាត់​អង្គុយ​ក្បែរ​ខ្លួន មុន​មន្ត្រី​រាជការ​ជាន់ខ្ពស់​នៃ​ស្ថាប័ន​រដ្ឋ​នានា​ដែល​បាន​ទៅ​ចូលរួម​ក្នុង​មហាសន្និបាត​នោះ ដែល​ការ​រៀបចំ​នេះ គឺ​មាន​តែ​នៅ​ក្នុង​ពិធីការ​របស់​រាជវង្ស​តែប៉ុណ្ណោះ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស