អគ្គនាយកនៃអគ្គនាយកដ្ឋានប្រេងកាតក្រសួងរ៉ែ និងថាមពល អះអាងថា នៅដើមខែតុលា កម្ពុជានឹងទទួលបានចំណូលពីការទូទាត់លើការលក់ប្រេងឆៅដែលគេលួចជិត ៣០ម៉ឺនបារ៉ែល ឬស្មើជិត ៤៧លានលីត្រកាលពីខែមិថុនា ឆ្នាំ២០២១ កន្លងទៅ បន្ទាប់ពីប្រេងនេះត្រូវបានដោះស្រាយបញ្ចប់បញ្ហារួចរាល់កាលពីពេលថ្មីៗនេះ។
អគ្គនាយកនៃអគ្គនាយកដ្ឋានប្រេងកាតនៃក្រសួងរ៉ែ និងថាមពល លោក ជៀប សួរ ត្រូវបានសារព័ត៌មានដែលស្និទ្ធនឹងរដ្ឋាភិបាលកម្ពុជា Fresh News ចុះផ្សាយឲ្យដឹងថា ប្រេងឆៅរបស់កម្ពុជាដែលបានបាត់ទៅជិត ៣០ម៉ឺនបារ៉ែលកាលពីពេលមុន ហើយរកឃើញមកវិញនោះ បានផ្ទេរចេញពីកប៉ាល់ MT Strovolos ទៅកប៉ាល់មួយទៀតរួចរាល់ហើយ ប៉ុន្តែការទូទាត់តម្លៃប្រេងមានរយៈពេល ៣០ថ្ងៃក្រោយពីការផ្ទេរនេះ។ ចំណូលពីប្រេងទាំងនេះ កម្ពុជានឹងទទួលបាននៅដើមខែតុលា ឆ្នាំ២០២២។
លោក ជៀប សួរ បញ្ជាក់ថា ថ្លៃប្រេងដែលលក់នេះមិនទាន់កំណត់ច្បាស់លាស់នោះទេ ដោយសារតែមិនទាន់មានការឯកភាពគ្នាក្នុងការយកមធ្យមភាគនៅក្នុងខែកញ្ញា នេះ ប៉ុន្តែបើគិតជារួម ចំណូលពីការលក់ប្រេងនេះ កម្ពុជានឹងទទួលបានតម្លៃមធ្យមភាគខ្ពស់នៃប្រេងដែលលក់បាន ប៉ុន្តែកម្ពុជាក៏ត្រូវទូទាត់លើការចំណាយផ្សេងៗផងដែរ។
ការអះអាងនេះ ធ្វើឡើងបន្ទាប់ពីកម្ពុជាបានបញ្ចប់បញ្ហារួចរាល់ហើយចំពោះប្រេងឆៅចំនួន ២៩ម៉ឺន ៥ពាន់បារ៉ែល ដែលត្រូវគេលួចទៅកាលពីឆ្នាំ២០២១ កន្លងទៅនោះ។
ប្រេងឆៅរបស់កម្ពុជាចំនួន ២៩ម៉ឺន ៥ពាន់បារ៉ែល ត្រូវបានក្រុមហ៊ុន MT Strolovos លួចដឹកចេញពីដែនទឹកកម្ពុជា កាលពីថ្ងៃទី៤ ខែមិថុនា ឆ្នាំ២០២១ កន្លងទៅ ហើយការលួចដឹកប្រេងរបស់កម្ពុជានេះ ភាគីក្រុមហ៊ុននាវាដឹកប្រេងបានអះអាងថា ដោយសារតែក្រុមហ៊ុន KrisEnergy ដែលជាក្រុមហ៊ុនទទួលបានសិទ្ធិបូមប្រេងក្នុងប្លុក A របស់កម្ពុជា មិនបានបង់ប្រាក់មកឱ្យខ្លួនក្រោយពីក្រុមហ៊ុននេះប្រកាសក្ស័យធន។
ទាក់ទិននឹងបញ្ហានេះ រដ្ឋលេខាធិការក្រសួងរ៉ែ និងថាមពល លោក ម៉េង សក្តិធារ៉ា ធ្លាប់បានអះអាងកាលពីចុងខែសីហា ឆ្នាំ២០២២ ថា រដ្ឋាភិបាលកម្ពុជាបានខិតខំធ្វើការចរចាយ៉ាងសកម្មជាមួយភាគីម្ចាស់កប៉ាល់ MT Strovolos ដែលបានដឹកប្រេងកម្ពុជាយកទៅ និងម្ចាស់បំណុលធំរបស់ក្រុមហ៊ុន KrisEnergy រហូតឈានដល់ការចរចាចុះកិច្ចព្រមព្រៀងបែងចែកផលប្រយោជន៍ពីការលក់ប្រេងឆៅទាំង ២៩ម៉ឺន ៥ពាន់បារ៉ែលនៅដំណាច់ខែកញ្ញា ឆ្នាំ២០២២ នេះ ក្នុងនោះកម្ពុជានឹងទទួលបានចំណែក ៧០% នៃប្រេងឆៅនេះ។
សកម្មជនគណបក្សសង្គ្រោះជាតិ លោក ហ៊ុន កុសល បានប្រាប់សារព័ត៌មាន The Cambodia Daily នៅថ្ងៃទី៣០ កញ្ញា ថា លោកពិតជាចូលរួមត្រេកអ និងស្វាគមន៍នូវចំនួនប្រេងឆៅជិត ៣០ម៉ឺនបារ៉ែលដែលមានទំហំសាច់ប្រាក់ខ្ទង់ ២០លានដុល្លារអាមេរិក ដែលនឹងត្រឡប់ចូលមកជាទ្រព្យសម្បត្តិជាតិវិញនៅពេលនេះ។
លោក ហ៊ុន កុសល លើកឡើងថា លោកគ្មានជំនឿលើការបកស្រាយរបស់អាជ្ញាធរកម្ពុជាទេ ព្រោះថាការបកស្រាយរបស់ពួកគេកន្លងមកមិនបានបង្ហាញពីតម្លាភាពឱ្យបានច្បាស់លាស់នោះទេ ក្រៅតែពីទម្លាក់កំហុសទៅលើក្រុមនាវិកផ្ទុកប្រេង MT Strovolos ដែលលួចដឹកប្រេងចេញពីកម្ពុជានាពេលកន្លងមក។
សកម្មជនបក្សប្រឆាំងរូបនេះបញ្ជាក់ថា ការចេញ ឬចូលរបស់កប៉ាល់ខ្នាតអន្តរជាតិនីមួយៗសុទ្ធតែមានលេខសម្គាល់សិទ្ធិចូលចត និងមានច្បាប់គ្របគ្រងត្រឹមត្រូវ មិនមែនចូលចតដោយអនាធិបតេយ្យនោះទេ។ ផ្ទុយទៅវិញ សូម្បីតែកប៉ាល់មួយគ្រឿងក៏សមត្ថកិច្ចកម្ពុជាគ្មានសមត្ថភាពគ្រប់គ្រងបាន គឺជារឿងដែលស្ទើរតែមិនគួរឱ្យជឿថា ជាការលួចរបស់ក្រុមហ៊ុន MT Strovolos ទាល់តែសោះ។
លោក ហ៊ុន កុសល គូសបញ្ជាក់ថា លោកគ្មានជំនឿថា លុយខ្ទង់ ២០លានដុល្លារដែលបានមកពីការលក់ប្រេងនេះ នឹងធ្លាក់ចូលក្នុងកញ្ចប់ថវិកាជាតិទេ ព្រោះថាចាប់តាំងពីការបាត់ប្រេងរហូតដល់រកប្រេងឃើញត្រឡប់មកវិញ និងការលក់ប្រេងនេះ សុទ្ធតែជាការអះអាងរបស់មន្ត្រីរដ្ឋាភិបាលទាំងអស់ ប៉ុន្តែគ្មានការស៊ើបអង្កេតពីគណៈកម្មការឯករាជ្យណាមួយនោះឡើយ។
កាលពីខែមិថុនា ឆ្នាំ២០២១ កន្លងទៅ ក្រុមហ៊ុន គ្រីស អែនណឺជី ដែលមានទីតាំងនៅប្រទេសសិង្ហបុរី បានប្រកាសពីការក្ស័យធនរបស់ខ្លួនដោយសារជាប់បំណុល និងថាប្រេងដែលបូមបាននៅប្លុកអេ (A) នេះមានចំនួនតិចតួច មិនគ្រប់គ្រាន់ដូចការរំពឹងទុក៕