29 C
Phnom Penh

បុរស​ខ្លាំង​ជំរុញ​ឱ្យ​រឹបអូស​ទ្រព្យសម្បត្តិ​អ្នក​ជឿ​ការ​ញុះញង់​របស់​មន្ត្រី​បក្ស​ប្រឆាំង​មិន​សង​លុយ​ធនាគារ

ដោយ ឌឹ ខេមបូឌា ដេលី

បទវិភាគ

បុរស​ខ្លាំង​កម្ពុជា លោក ហ៊ុន សែន ជំរុញ​ឲ្យ​ធនាគារ និង​គ្រឹះស្ថាន​មីក្រូហិរញ្ញវត្ថុ​រឹបអូស​ទ្រព្យសម្បត្តិ​អ្នក​ដែល​លោក​ចាត់ទុក​ថា «ជឿ​តាម​ការ​ញុះញង់​របស់​មន្ត្រី​គណបក្ស​ប្រឆាំង​មួយ​ចំនួន​មិន​ចង់​សង​ប្រាក់​ត្រឡប់​ទៅ​ធនាគារ​វិញ»

ថ្លែង​នៅ​ក្នុង​ពិធី​ប្រគល់​សញ្ញាបត្រ​ដល់​និស្សិត​វិទ្យាស្ថាន វ៉ាន់ដា ជិត ៤​ពាន់​នាក់​នា​ព្រឹក​ថ្ងៃ​ចន្ទ​ដើម​សប្ដាហ៍​នេះ លោក ហ៊ុន សែន អះអាង​ថា បេក្ខជន​មេឃុំ-ចៅសង្កាត់​មកពី​គណបក្ស​ប្រឆាំង​មួយ​ចំនួន បាន​ដើរ​ខ្សឹប​ប្រាប់​ពលរដ្ឋ​ថា នៅ​ពេល​ដែល​គណបក្ស​ខ្លួន​ឈ្នះ​ឆ្នោត​ជាប់​ជា​មេឃុំ ឬ​ចៅសង្កាត់ គឺ​មិន​តម្រូវ​ឲ្យ​ពលរដ្ឋ​ដែល​ជំពាក់​បំណុល​ធនាគារ​សង​ប្រាក់​ទៅ​ធនាគារ និង​មីក្រូហិរញ្ញវត្ថុ​នោះ​ទេ។

លោក​បន្ត​ថា ការ​ដើរ​ខ្សឹប​ណែនាំ​របស់​ពួកគេ ធ្វើឡើង​តាម​ការ​ញុះញង់​របស់​មេខ្លោង​ដែល​លោក ហ៊ុន សែន ហៅ​ថា​ក្រុម​ឧទ្ទាម​ក្រៅ​ច្បាប់​នៅ​ខាងក្រៅ​ប្រទេស។

បុរស​ខ្លាំង​រូប​នេះ​អះអាង​ថា លោក​ជំរុញ​ឲ្យ​ធនាគារ​រឹបអូស​ទ្រព្យសម្បត្តិ​ចំពោះ​អ្នក​ដែល​អ្នក​ដើរ​ខ្សឹប​ទៅ​ពលរដ្ឋ​កុំ​ឲ្យ​សង​ប្រាក់​ត្រឡប់​មក​ធនាគារ ប្រសិនបើ​មិន​ប្រញាប់​រក​លុយ​សង ខណៈ​ពួកគេ​ក៏​បាន​ទៅ​ខ្ចី​ប្រាក់​ពី​ធនាគារ​ដើម្បី​ទិញ​សម្ភារៈ ឬ​យក​ប្រើប្រាស់​អ្វី​ផ្សេងៗ ប៉ុន្តែ​បែរ​ជា​មាន​ចេតនា​អាក្រក់​មិន​ព្រម​សង​ប្រាក់​ទៅ​ម្ចាស់​បំណុល​ទៅវិញ។

បុរស​ខ្លាំង​រូប​នេះ​អះអាង​ថា កន្លងមក រូបលោក​ខំ​ទទូច​សុំ​ដល់​ធនាគារ និង​គ្រឹះស្ថាន​មីក្រូហិរញ្ញវត្ថុ​ទាំងអស់​យោគយល់ ដោយ​ធ្វើការ​រៀបចំ​ឥណទាន​ឡើងវិញ​ចំពោះ​កូនបំណុល​ដែល​ជំពាក់​ធនាគារ ហើយ​អនុវត្ត​បាន​ត្រឹមត្រូវ​តាម​កិច្ចសន្យា​ខ្ចីប្រាក់។ លោក ហ៊ុន សែន អះអាង​ថា មូលហេតុ​ដែល​ស្នើសុំ​បែប​នេះ ដោយសារ​កម្ពុជា​កំពុង​រង​ការ​រាតត្បាត​នៃ​ជំងឺ​កូវីដ-១៩។

បើ​តាម​របាយការណ៍​សិក្សា​មួយ​ដែល​គាំទ្រ​ដោយ​ក្រសួង​សហព័ន្ធ​អាល្លឺម៉ង់ សម្រាប់​សហប្រតិបត្តិការ​សេដ្ឋកិច្ច និង​ការ​អភិវឌ្ឍ (BMZ) រក​ឃើញ​ថា ពលរដ្ឋ​ខ្មែរ​ជាង ១​សែន ៦​ម៉ឺន ៧​ពាន់​នាក់ (១៦៧០០០​នាក់) កំពុង​លក់​ដី​ដើម្បី​បង់​សង​បំណុល​ធនាគារ​ក្នុង​រយៈពេល ៥​ឆ្នាំ​ចុងក្រោយ​នេះ។

របាយការណ៍​ចេញ​ផ្សាយ​កាលពី​ថ្ងៃទី​១៤ ខែ​កញ្ញា កន្លងទៅ​បញ្ជាក់​ថា ការ​រីក​រាលដាល​បញ្ហា​ជំពាក់​បំណុល​ច្រើន​លើសលប់​នៅ​កម្ពុជា ដែល​នាំ​ឱ្យ​មាន​ការ​លក់​ដី​ដោយ​បង្ខំ​ជាច្រើន​ករណី ពោល​ក្នុង​កម្រិត​មួយ “ខ្ពស់​ខ្លាំង” និង “មិន​អាច​ទទួល​យក​បាន” ក្នុង​នោះ​ការ​លក់​ដី​ដោយសារ​បំណុល​ចំនួន​ជាង ៣​ម៉ឺន​នាក់ (៣៣៥៨០​នាក់) ឬ​ស្មើ​នឹង ១៣% ក្នុង​មួយ​ឆ្នាំ។

បើ​តាម​អង្គការ​លីកាដូ ឱ្យ​ដឹង​ថា ចាប់ពី​ពាក់កណ្ដាល​ឆ្នាំ​២០១៩ មក អង្គការ​សិទ្ធិមនុស្ស​កម្ពុជា​មួយ​ចំនួន​បាន​ចេញ​របាយការណ៍​ជាច្រើន ដោយ​បង្ហាញ​ពី​ផល​ប៉ះពាល់​យ៉ាង​ធ្ងន់ធ្ងរ​នៃ​វិបត្តិ​ជាប់​ជំពាក់​បំណុល​មីក្រូហិរញ្ញវត្ថុ​ច្រើន​លើសលប់ ដែល​កំពុង​កើត​មាន​នៅ​កម្ពុជា។

ចំពោះ​វិបត្តិ​សេដ្ឋកិច្ច​ដែល​បណ្ដាល​មកពី​ជំងឺ​រាតត្បាត​កូវីដ-១៩ វិញ បាន​គំរាមកំហែង​ដល់​ជីវភាព​រស់នៅ​របស់​ប្រជាជន​កម្ពុជា។ ដូច្នេះ ដើម្បី​កាត់បន្ថយ​ការ​ប៉ះពាល់​សេដ្ឋកិច្ច​របស់​ប្រជាជន​ងាយ​រងគ្រោះ រដ្ឋាភិបាល​បាន​បង្គាប់​ឲ្យ​ធនាគារ​ជាតិ​បង្កើត​គោលការណ៍​បន្ធូរបន្ថយ​បំណុល​ដោយ​ណែនាំ​គ្រឹះស្ថាន​មីក្រូហិរញ្ញវត្ថុ ឲ្យ​ផ្លាស់ប្ដូរ​លក្ខខណ្ឌ​នៃ​កិច្ចព្រមព្រៀង​ប្រាក់កម្ចី ដូចជា​ការ​លើកលែង​ថ្លៃ​សេវា ឬ​លើកលែង​ការ​ផាក​ពិន័យ ជាដើម។

តែ​យ៉ាងណា គោលការណ៍​បន្ធូរបន្ថយ​នេះ​ហាក់​មិន​មាន​ប្រសិទ្ធភាព ឬ​មិន​សម្រេច​បាន​លទ្ធផល​ដូច​ដែល​ចង់​បាន​ឡើយ។

បើ​តាម​អង្គការ​សិទ្ធិមនុស្ស Human Rights Watch រក​ឃើញ​ថា គ្រឹះស្ថាន​មីក្រូហិរញ្ញវត្ថុ​ដែល​បាន​គាំទ្រ​អនុវត្ត​សារាចរ​របស់​ធនាគារ​ជាតិ មាន​មួយ​ចំនួន​តែប៉ុណ្ណោះ ខណៈ​គ្រឹះស្ថាន​មីក្រូហិរញ្ញវត្ថុ​មួយ​ចំនួន​ទៀត ដំណើរការ​បន្ធូរបន្ថយ​បំណុល​បរាជ័យ និង​គ្រឹះស្ថាន​មីក្រូហិរញ្ញវត្ថុ​ខ្លះ​ទៀត​មិន​បាន​គោរព និង​អនុវត្ត​តាម​សារាចរ​ធនាគារ​ជាតិ​ទេ។ ជាក់ស្ដែង គេ​ក៏​ពុំ​ឃើញ​មាន​ការ​បង្កើត​ភ្នាក់ងារ​ថ្មី ឬ​ការ​ចាត់តាំង​ស្ថាប័ន​ដែល​មាន​ស្រាប់ ដើម្បី​ធ្វើការ​ត្រួតពិនិត្យ​ការ​អនុវត្ត​គោលការណ៍​រៀបចំ​ប្រាក់កម្ចី​ឡើងវិញ (restructuring loan) នោះ​ទេ ខណៈ​ការ​ផ្អាក​ចំពោះ​ការ​ប្រមូល​បំណុល​អំឡុង​ពេល​នោះ វា​គ្រាន់តែ​ជា​ការ​លួងលោម​កូនបំណុល​តែប៉ុណ្ណោះ ប៉ុន្តែ​វា​មិន​មែន​ជា​ដំណោះស្រាយ​ដ៏​មាន​ប្រសិទ្ធភាព ក្នុង​ការ​ធានា​ជីវភាព និង​ទ្រព្យសម្បត្តិ​របស់​ប្រជាជន​កម្ពុជា​ក្រីក្រ​ឡើយ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស