31 C
Phnom Penh

មហាអំណាច​រុស្ស៊ី​និង​ចិន​បាក់​អំនួត​ដែល​អួត​ថា​ខ្លួនឯង​ជា​អ្នក​កសាង​សណ្ដាប់ធ្នាប់​ពិភពលោក

ដោយ ឌឹ ខេមបូឌា ដេលី

បទវិភាគ

មហាសន្និបាត​អង្គការ​សហប្រជាជាតិ​លើក​ទី​៧៧ ដែល​បាន​បិទ​បញ្ចប់​កាលពី​ថ្ងៃទី​២៧ កញ្ញា បាន​បន្សល់​ទុក​នូវ​រឿងរ៉ាវ​ជាច្រើន​ដែល​មិន​អាច​ដោះស្រាយ​បាន។

សំណុំរឿង​មហា​អំណាច​រុស្ស៊ី លើក​ទ័ព​ឈ្លានពាន​អ៊ុយក្រែន បាន​ក្លាយ​ជា​ផ្ទាំង​ស៊ីប​របស់​មេដឹកនាំ​បស្ចិម​ប្រទេស និង​មេដឹកនាំ​នៃ​ប្រទេស​ដែល​ប្រកាន់​ប្រជាធិបតេយ្យ និង​ការ​គោរព​សិទ្ធិមនុស្ស។ មេដឹកនាំ​ប្រទេស​ទាំងនោះ​បាន​ឡើង​វាយប្រហារ​ប្រទេស​មហាអំណាច​រុស្ស៊ី និង​ចិន ជាពិសេស​ប្រទេស​រុស្ស៊ី ដែល​បង្ក​វិនាសកម្ម​យ៉ាង​ធ្ងន់ធ្ងរ​ទៅ​លើ​ពលរដ្ឋ​អ៊ុយក្រែន។

គេ​នៅ​ចាំ​បាន​ថា នៅ​ពេល​មេដឹកនាំ​ចិន និង​រុស្ស៊ី​ជួប​គ្នា​នៅ​ក្នុង​ប្រទេស​អ៊ូបេគីស្ថាន នៅ​ក្រៅ​វេទិកា​នៃ​កិច្ច​សហប្រតិបត្តិការ​សៀងហៃ ពេល​នោះ លោក វ៉្លាឌីមៀរ ពូទីន និង​លោក ស៊ី ជីនពីង បាន​វាយប្រហារ​សហរដ្ឋ​អាមេរិក និង​ពួក​បស្ចិម​ប្រទេស ដោយ​ចោទ​ថា​ជា​ប្រទេស​ដែល​បំផ្លាញ​សណ្ដាប់ធ្នាប់​ពិភពលោក ហើយ​ជា​ប្រទេស​រុញ​ឲ្យ​មាន​អសន្តិសុខ​ជាច្រើន​នៅ​លើ​ពិភពលោក។

ដើមឡើយ លោក ស៊ី ជីនពីង បាន​ហៅ​សង្គ្រាម​នៅ​លើ​ទឹកដី​អ៊ុយក្រែន ថា​បណ្តាល​មកពី​សហរដ្ឋ​អាមេរិក និង​អង្គការ​ណាតូ គំរាម​អធិបតេយ្យភាព​រុស្ស៊ី ហើយ​ចិន​បាន​ទាមទារ​ឲ្យ​ណាតូ និង​អាមេរិក​បន្ថយ​ការ​គំរាមកំហែង​ទៅ​លើ​រុស្ស៊ី។

តែ​ទីបំផុត រុស្ស៊ី​លើក​ទ័ព​ឈ្លានពាន​អ៊ុយក្រែន​មក​ដល់​សព្វថ្ងៃ​នេះ គឺ​ក្រោម​លេស​ថា ពួក​ណាតូ​គំរាម​សន្តិសុខ​របស់​រុស្ស៊ី​ដល់​មាត់​ផ្ទះ​របស់​រុស្ស៊ី ដោយសារតែ​ចង់​ស្ទូច​យក​អ៊ុយក្រែន​ជា​សមាជិក​ណាតូ។ បន្ថែម​លើ​នេះ លោក ពូទីន បើក​ប្រតិបត្តិការ​សឹក​លុកលុយ​អ៊ុយក្រែន​ក្រោម​ហេតុផល​មួយ​ដែល​ទីក្រុង​មូស្គូ ចោទ​កងទ័ព​អ៊ុយក្រែន ថា​កងទ័ព​របស់​ប្រទេស​នេះ​ប្រកាន់​របប​ណាហ្ស៊ី​និយម គឺ​សម្លាប់​ជាតិ​សាសន៍​រុស្ស៊ី។

នៅ​ពេល​ដែល​សង្គ្រាម​អូស​បន្លាយ​មក​ដល់​ពេលនេះ​មាន​រយៈពេល​ជាង ២៣០​ថ្ងៃ ពិភពលោក​កាន់តែ​មើល​ឃើញ​អំពី​ក្រុង​មូស្គូ បំផ្លាញ​សណ្ដាប់ធ្នាប់​ពិភពលោក ដែល​មាន​ទីក្រុង​ប៉េកាំង​នៅ​ពីក្រោយ។

នៅ​ឯ​កិច្ចប្រជុំ​នៃ​មហាសន្និបាត​អង្គការ​សហប្រជាជាតិ​ទើប​តែ​បិទ​បញ្ចប់​កាលពី​ថ្ងៃ​២៧ កញ្ញា គេ​សង្កេត​ឃើញ​ប្រទេស​មហាអំណាច​ពីរ​នេះ​ត្រូវ​បាន​ប្រទេស​ជាច្រើន​ថ្កោលទោស​យ៉ាង​ខ្លាំង ដោយ​ចាត់ទុក​ថា​ជា​ប្រទេស​បំផ្លាញ​សណ្ដាប់ធ្នាប់​ពិភពលោក​ករណី​សំណុំរឿង​សង្គ្រាម​នៅ​លើ​ទឹកដី​អ៊ុយក្រែន។

ទាំង​លោក ស៊ី ជីនពីង និង​លោក ពូទីន ពុំ​បាន​ទៅ​ចូលរួម​កិច្ចប្រជុំ​នេះ​ទេ។ មេដឹកនាំ​ទាំង​ពីរ​នេះ​បាន​ចាត់តាំង​រដ្ឋមន្ត្រី​ការបរទេស​របស់​ខ្លួន​ឱ្យ​ទៅ​ប្រជុំ​ជំនួស ដែល​នាំ​ឲ្យ​អ្នក​សង្កេតការណ៍​យល់​ថា បើ​មេដឹកនាំ​ពីរ​រូប​នេះ​ដែល​អះអាង​ថា​ជា​ប្រទេស​កសាង​សណ្ដាប់ធ្នាប់​ពិភពលោក ចុះ​ហេតុ​អ្វី​បាន​ជា​មិន​ចូលរួម​ប្រជុំ​របស់​ស្ថាប័ន​ពិភពលោក​នេះ ហើយ​ឡើង​ថ្លែង​បង្ហាញ​ឆន្ទៈ​របស់​ខ្លួន​ដែល​អះអាង​ថា គឺ​ជា​អ្នក​កសាង​សណ្ដាប់ធ្នាប់​ពិភពលោក បែរ​ជា​អវត្តមាន​ទៅវិញ។

នៅ​ពេល​ដែល​មេដឹកនាំ​ជាច្រើន​ព្រួត​គ្នា​វាយប្រហារ​របប​លោក ពូទីន នៅ​ឯ​មហាសន្និបាត គេ​សង្កេត​ឃើញ​រដ្ឋមន្ត្រី​ការបរទេស​រុស្ស៊ី និង​រដ្ឋមន្ត្រី​ការបរទេស​ចិន ស្ថិត​ក្នុង​ភាព​អៀនខ្មាស​យ៉ាង​ខ្លាំង ជាពិសេស​គឺ​រដ្ឋមន្ត្រី​ការបរទេស​រុស្ស៊ី។

អ្នក​សង្កេតការណ៍​មើល​ឃើញ​ថា ដោយសារតែ​របប​ទីក្រុង​មូស្គូ បំផ្លាញ​សណ្ដាប់ធ្នាប់​ពិភពលោក​ដែល​ទីក្រុង​ប៉េកាំង នៅ​ពី​ក្រោយ​នេះ បាន​រុញ​ឱ្យ​មេដឹកនាំ​យ៉ាងតិច ៣២​ប្រទេស​បាន​ធ្វើ​ញត្តិ​រួម​គ្នា​ទាមទារ​ឲ្យ​មាន​ការ​កែទម្រង់​ក្រុមប្រឹក្សា​សន្តិសុខ​អង្គការ​សហប្រជាជាតិ ជាពិសេស​គឺ​កាត់បន្ថយ​សិទ្ធិ​វេតូ​របស់​មហាអំណាច ៥​ប្រទេស ដែល​ប្រើ​សិទ្ធិ​វេតូ​ធ្វើ​ឲ្យ​រាំង​ខ្ទប់​សេចក្ដី​សម្រេច​របស់​ក្រុមប្រឹក្សា​សន្តិសុខ។

ប្រទេស​ដែល​ប្រើ​សិទ្ធិ​វេតូ​ច្រើន​ជាងគេ​ក្នុង​អំឡុង​ប៉ុន្មាន​ឆ្នាំ​ចុងក្រោយ​នេះ គឺ​រុស្ស៊ី និង​ប្រទេស​ចិន។ បន្ថែម​លើ​នេះ ប្រធាន​ក្រុមប្រឹក្សា​សហភាព​អឺរ៉ុប ដែល​តំណាង​ឲ្យ ២៧​ប្រទេស បាន​ទាមទារ​ឲ្យ​ដក​បុព្វសិទ្ធិ​មហាអំណាច​រុស្ស៊ី ចេញពី​ក្រុមប្រឹក្សា​សន្តិសុខ​អង្គការ​សហប្រជាជាតិ។

ប្រធាន​សហភាព​អឺរ៉ុប​រូប​នោះ​បាន​ថ្លែង​ទៀត​ថា មហាអំណាច​មួយ​នេះ​មិន​ស័ក្តិសម​ជា​ប្រទេស​កសាង​សណ្ដាប់ធ្នាប់​ពិភពលោក​ទៀត​នោះ​ទេ។ ចំណែក​នៅ​ឯ​កិច្ចប្រជុំ​ក្រុមប្រឹក្សា​សន្តិសុខ​អង្គការ​សហប្រជាជាតិ គឺ​លោក​រដ្ឋមន្ត្រី​ការបរទេស​រុស្ស៊ី ហ្សេហ្គេឡារ៉ូវ មិន​បាន​អង្គុយ​ប្រជុំ​ពេញ​ម៉ោង​នោះ​ទេ គឺ​លោក​បាន​ដើរ​ចេញពី​កិច្ចប្រជុំ​ជាបន្ទាន់ នៅ​ពេល​ដែល​ដឹង​ថា លោក​ទ្រាំ​ស្ដាប់​លែង​បាន​ចំពោះ​ការ​វាយប្រហារ​ធ្ងន់ៗ​ពី​សំណាក់​រដ្ឋមន្ត្រី​ការបរទេស​អាមេរិក លោក Antony Blinken និង​រដ្ឋមន្ត្រី​ការបរទេស​អង់គ្លេស។

លោក ឡារ៉ូវ បាន​ស្ទុះ​ចេញ​ជាបន្ទាន់​ពី​កិច្ចប្រជុំ នៅ​ខណៈ​ដែល​រដ្ឋមន្ត្រី​ចិន លោក Wang Yi ឱន​មុខ​ចុះ។ រដ្ឋមន្ត្រី​ការបរទេស​ទាំង​ពីរ​បាក់មុខ​យ៉ាង​ខ្លាំង ខណៈ​ដែល​ប្រទេស​សមាជិក​ក្រុមប្រឹក្សា​សន្តិសុខ​ព្រួត​គ្នា​វាយ​ទៅ​លើ​ប្រទេស​រុស្ស៊ី ករណី​ឈ្លានពាន​អ៊ុយក្រែន និង​បាន​វាយប្រហារ​ចិន ករណី​បង្ក​ភាព​តានតឹង​ជាច្រើន​នៅ​ច្រក​សមុទ្រ​តៃវ៉ាន់។

លោក ឡារ៉ូវ នៅ​ពេល​ត្រឡប់​មក​ដល់​ទីក្រុង​មូស្គូ វិញ លោក​ព្រមាន​យ៉ាង​ខ្លាំង​ទៅ​លើ​ពួក​បស្ចិម​ប្រទេស។ លោក​គំរាម​ថា បើ​រុស្ស៊ី​ដើរ​ដល់​ចំណុច​ទាល់ច្រក​នៃ​សង្គ្រាម​លើ​ទឹកដី​អ៊ុយក្រែន ហើយ​ការ​លូក​ដៃ​ចូល​ពាក់ព័ន្ធ​របស់​ពួក​បស្ចិម​ប្រទេស​កាន់តែ​ស៊ីជម្រៅ​ក្នុង​សង្គ្រាម​លើ​ទឹកដី​អ៊ុយក្រែន ដែល​រុស្ស៊ី​នឹង​អស់​ភាព​អត់ធ្មត់ ហើយ​នឹង​ធ្វើការ​វាយប្រហារ​ទៅ​លើ​គោលដៅ​ទាំងឡាយ​ណា​ដោយ​អាវុធ​នុយក្លេអ៊ែរ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស