កូនប្រុសលោក ឌិត មុន្ទី ប្រធានតុលាការកំពូល ត្រូវបានរដ្ឋាភិបាលផ្តល់សេចក្តីទុកចិត្តឱ្យធ្វើជារដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ជំនួសលោក វេង សាខុន ដែលត្រូវបានបុរសខ្លាំងលោក ហ៊ុន សែន ដកចេញពីតំណែងកាលពីពេលថ្មីៗនេះ។
នៅក្នុងលិខិតដែលចុះហត្ថលេខាដោយលោក ហ៊ុន សែន កាលពីថ្ងៃទី០៨ ខែតុលា ឆ្នាំ២០២២ បានស្នើទៅលោក ហេង សំរិន ប្រធានរដ្ឋសភា ឲ្យរៀបចំការបោះឆ្នោតផ្តល់សេចក្តីទុកចិត្តលើការបំពេញបន្ថែមនៃសមាសភាពសមាជិករាជរដ្ឋាភិបាលដល់លោក ឌិត ទីណា ធ្វើជារដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ។
ក្រោយពីមានសំណើនេះ ប្រធានរដ្ឋសភា លោក ហេង សំរិន បានប្រកាស និងដាក់ចេញរបៀបវារៈដោយនឹងបើកកិច្ចប្រជុំគណៈកម្មាធិការអចិន្ត្រៃយ៍នៅថ្ងៃព្រហស្បតិ៍ ទី១៣ ខែតុលា ឆ្នាំ២០២២ ខាងមុខនេះ។
រដ្ឋសភាបញ្ជាក់ថា ការបើកកិច្ចប្រជុំនេះ ដើម្បីពិនិត្យលើសំណើរបស់លោក ហ៊ុន សែន ក្នុងការស្នើឲ្យបោះឆ្នោតផ្តល់សេចក្តីទុកចិត្តរបស់រដ្ឋសភាលើការបំពេញបន្ថែមសមាសភាពសមាជិកនៃរាជរដ្ឋាភិបាលដល់លោក ឌិត ទីណា ជារដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ។
កាលពីថ្ងៃទី៨ ខែតុលា ឆ្នាំ២០២២ លោក ហ៊ុន សែន ស្នើឲ្យព្រះមហាក្សត្របញ្ចប់មុខតំណែងលោក វេង សាខុន ពីរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ប៉ុន្តែមិនបានបញ្ជាក់ពីមូលហេតុឡើយ។
តែកាលពីខែកុម្ភៈ ឆ្នាំ២០២២ លោក វេង សាខុន ក៏ធ្លាប់ត្រូវបានលោក ហ៊ុន សែន ស្ដីបន្ទោសខ្លាំងៗថាជារដ្ឋមន្ត្រីដែលមិនចេះធ្វើការងារសហការជាមួយក្រសួង-ស្ថាប័នផ្សេងៗ ព្រមទាំងព្រមានថាបើលោកដករដ្ឋមន្ត្រីណាមួយចេញពីតំណែង គឺប្រើពេលត្រឹម ២៤ម៉ោងប៉ុណ្ណោះ។
ក្រោយបញ្ចប់តំណែងលោក វេង សាខុន បានពីរថ្ងៃ លោកក៏បានស្នើឲ្យសភាបោះឆ្នោតផ្តល់សេចក្តីទុកចិត្តលោក ឌិត ទីណា ដែលបច្ចុប្បន្នមានតួនាទីជារដ្ឋលេខាធិការក្រសួងរ៉ែ និងថាមពល ធ្វើជារដ្ឋមន្ត្រីក្រសួងកសិកម្ម ជំនួសលោក វេង សាខុន។
លោក ឌិត ទីណា ជាកូនប្រុសរបស់លោក ឌិត មុន្ទី ប្រធានតុលាការកំពូលកម្ពុជា និងជាសមាជិកគណៈអចិន្ត្រៃយ៍គណបក្សប្រជាជនកម្ពុជាដែលកំពុងគ្រប់គ្រងអំណាចបច្ចុប្បន្ននេះ។ លោក ឌិត មុន្ទី ក៏ជាប្រធានក្រុមប្រឹក្សាជំនុំជម្រះមួយរូបក្នុងចំណោមចៅក្រម ៩រូប ដែលបានរំលាយគណបក្សសង្គ្រោះជាតិកាលពីថ្ងៃទី១៦ ខែវិច្ឆិកា ឆ្នាំ២០១៧ ដែរ៕