29 C
Phnom Penh

អ្នក​ឃ្លាំមើល​ថា​ការ​ដក​តំណែង​លោក វេង សាខុន ជា​វិធី​កម្ចាត់​បន្លា​ចេញពី​កែវភ្នែក​នៅ​មុន​បោះឆ្នោត​ឆ្នាំ​២០២៣

ដោយ ឌឹ ខេមបូឌា ដេលី

បទវិភាគ

អ្នក​ឃ្លាំមើល​និយាយ​ថា ការ​ដក​អតីត​រដ្ឋមន្ត្រី​ក្រសួង​កសិកម្ម រុក្ខាប្រមាញ់ និង​នេសាទ លោក វេង សាខុន អាច​ជា​វិធី​កម្ចាត់​បន្លា​ចេញពី​កែវភ្នែក​របស់​មេដឹកនាំ​បក្ស​កាន់​អំណាច លោក ហ៊ុន សែន នៅ​មុន​ការ​បោះឆ្នោត​ជាតិ​ឆ្នាំ​២០២៣ ខាងមុខ​នេះ។

ស្ថាបនិក​អង្គការ​អភិវឌ្ឍន៍​ផ្នត់គំនិត លោក សេក សុជាតិ ប្រាប់​សារព័ត៌មាន The Cambodia Daily នៅ​ថ្ងៃទី​១០ តុលា នេះ​ថា ក្នុង​តំណែង​ជា​រដ្ឋមន្ត្រី​ក្រសួង​កសិកម្ម លោក វេង សាខុន ធ្លាប់​ធ្វើ​សកម្មភាព​ក្នុង​ការ​ទប់ស្កាត់​ទំនិញ និង​ផលិតផល​គ្មាន​គុណភាព​ពី​ប្រទេស​វៀតណាម ចូល​មក​កម្ពុជា​ជាច្រើន ដូចជា ជ្រូក ត្រី និង​ទំនិញ​ផ្សេងៗ​ទៀត​ដែល​ធ្វើ​ឲ្យ​កម្ពុជា​ប្រឈម​នឹង​ទំនិញ​ឡើង​ថ្លៃ ដូចជា​តម្លៃ​សាច់​ជ្រូក និង​តម្លៃ​ត្រី ជាដើម។

លោក សេក សុជាតិ លើក​ឡើង​ថា បញ្ហា​នេះ​ទំនង​ជា​បក្ស​កាន់​អំណាច​ដឹង​ច្បាស់​ណាស់​ថា បើ​មិន​ដក​លោក វេង សាខុន មុន​ពេល​បោះឆ្នោត​ទេ វា​នឹង​ក្លាយ​ជា​ប្រធានបទ​ក្ដៅ​មួយ​នៅ​មុន​ពេល​បោះឆ្នោត ចំពោះ​បញ្ហា​ទំនិញ​ឡើង​ថ្លៃ​ផង និង​ការ​បង្ហាញ​ឲ្យ​ឃើញ​ពី​ការ​នាំ​ទំនិញ​ពី​ប្រទេស​វៀតណាម​ចូល​មក​កម្ពុជា​ដែល​មាន​ទំហំ​ធំ​ផង។ លោក​បន្ត​ថា ការ​នាំ​ទំនិញ​ពី​ប្រទេស​វៀតណាម ចូល​មក​កម្ពុជា គឺជា​ចំណុច​ខ្សោយ​មួយ​របស់​រដ្ឋាភិបាល​ដែល​អសមត្ថភាព​ក្នុង​ការ​ជំរុញ​ឲ្យ​មាន​ការ​ផលិត​ទំនិញ​នៅ​ក្នុង​ស្រុក។

ស្ថាបនិក​អង្គការ​អភិវឌ្ឍន៍​ផ្នត់គំនិត​រូប​នេះ​បញ្ជាក់​ថា ការ​ដក​លោក វេង សាខុន ក៏​អាច​ជា​សារ​ព្រមាន​ដល់​រដ្ឋមន្ត្រី​ផ្សេងៗ​ទៀត​ផង​ដែរ ក្នុង​ការ​រៀប​យុទ្ធសាស្ត្រ​ពង្រឹង​គណបក្ស​កាន់​អំណាច​តាមរយៈ​រូបភាព​សម្លាប់​មាន់​មួយ​ក្បាល បន្លាច​ស្វា​ពេញ​មួយ​ព្រៃ ក្នុង​ស្ថានការណ៍​ដែល​លោក ហ៊ុន សែន កំពុង​រៀប​ផែនការ​ផ្ទេរ​អំណាច​ទៅ​ឱ្យ​កូនប្រុស​របស់​គាត់ គឺ​លោក ហ៊ុន ម៉ាណែត នា​ពេល​ខាងមុខ​នេះ។

កាលពី​ថ្ងៃទី​៨ ខែ​តុលា ឆ្នាំ​២០២២ ព្រះករុណា​ព្រះបាទ នរោត្តម សីហមុនី បាន​ត្រាស់​បង្គាប់​បញ្ចប់​មុខតំណែង​លោក វេង សាខុន ពី​រដ្ឋមន្ត្រី​ក្រសួង​កសិកម្ម រុក្ខាប្រមាញ់ និង​នេសាទ ក្រោយពី​លោក ហ៊ុន សែន បាន​ដាក់​លិខិត​ថ្វាយ​ព្រះមហាក្សត្រ​កាលពី​ពេល​កន្លងទៅ។

កាលពី​ថ្ងៃទី​២៣ ខែ​កុម្ភៈ លោក ហ៊ុន សែន បាន​ស្ដីបន្ទោស​ខ្លាំងៗ​ទៅ​កាន់​លោក វេង សាខុន ថា​ការ​ប្រឹង​ផ្គាប់ចិត្ត​កសិករ ៤ ទៅ ៥​ពាន់​គ្រួសារ​នៅ​ក្នុង​ស្រុក ដោយ​ផ្អាក​ការ​នាំចូល​សាច់​ជ្រូក​ពី​វៀតណាម មិនមែន​ជា​ដំណោះស្រាយ​នោះ​ទេ​សម្រាប់​ទីផ្សារ​កម្ពុជា ហើយ​ការ​ធ្វើ​បែប​នេះ​បាន​ធ្វើ​ឱ្យ​ទំនិញ​នានា ដូចជា សាច់​ជ្រូក ជាដើម នៅ​លើ​ទីផ្សារ​ឡើង​ថ្លៃ​ខ្ពស់​កប់​ពពក​ដោយសារតែ​ការ​ផ្គត់ផ្គង់​មិន​ឆ្លើយតប​នឹង​តម្រូវការ។

លោក ហ៊ុន សែន ស្ដីបន្ទោស​លោក វេង សាខុន ធ្ងន់ៗ​ថា លោក វេង សាខុន គឺជា​រដ្ឋមន្ត្រី​ដែល​ធ្វើ​ការងារ​មិន​ចេះ​សហការ​ជាមួយ​ក្រសួង-ស្ថាប័ន​ដទៃ និង​ជា​រដ្ឋមន្ត្រី​ដែល​ជិះ​សេះ​មើល​ផ្កាយ ក្នុង​នោះ លោក ហ៊ុន សែន ក៏​ព្រមាន​ដក​រដ្ឋមន្ត្រី​ក្រសួង​កសិកម្ម​រូប​នេះ​ចេញពី​តំណែង​ផង​ដែរ ដោយ​លោក​អះអាង​ថា លោក​នឹង​ប្រើ​ពេល​ត្រឹមតែ ២៤​ម៉ោង​ប៉ុណ្ណោះ​ក្នុង​ការ​ដក​រដ្ឋមន្ត្រី​ដែល​ធ្វើការ​មិន​កើត។

ទោះជា​បែប​នេះ​ក្តី អ្នកវិភាគ​ឯករាជ្យ និង​ជា​ប្រធាន​វេទិកា​ពលរដ្ឋ លោក គឹម សុខ បាន​ប្រាប់ The Cambodia Daily នៅ​ថ្ងៃទី​១០ តុលា នេះ​ដែរ​ថា លោក វេង សាខុន ក្នុង​តួនាទី​ជា​រដ្ឋមន្ត្រី​ក្រសួង​កសិកម្ម រុក្ខាប្រមាញ់ និង​នេសាទ បាន​សកម្ម​គួរសម​ដែរ​ក្នុង​ការ​ទប់ស្កាត់​ទំនិញ​ខូច​គុណភាព​ដែល​ហូរ​ចេញពី​ប្រទេស​វៀតណាម និង​ប្រទេស​ថៃ ហើយ​បញ្ហា​នេះ​បាន​ធ្វើ​ឲ្យ​លោក ហ៊ុន សែន ទាស់​ចិត្ត​ជា​ខ្លាំង។

លោក គឹម សុខ លើកឡើង​ថា ក្រុមហ៊ុន​ដែល​នាំចូល​ទំនិញ​ទាំងនោះ​សុទ្ធសឹងតែ​ជា​ក្រុមហ៊ុន​របស់​គ្រួសារ និង​ខ្សែ​បណ្ដាញ​បក្ខពួក​របស់​ត្រកូល «ហ៊ុន» ទាំងអស់ ដូច្នេះ​សកម្មភាព​របស់​លោក វេង សាខុន ដែល​ទប់ស្កាត់​ការ​នាំចូល​ទំនិញ​ខូច​គុណភាព​ពី​ប្រទេស​វៀតណាម​ទាំងនោះ បាន​ធ្វើ​ឱ្យ​ខាត​ទាំង​ប្រយោជន៍​បណ្ដាញ​ក្រុម​គ្រួសារ​ត្រកូល «ហ៊ុន» ធ្ងន់ធ្ងរ​ផង និង​ធ្វើ​ឱ្យ​ខាត​សេដ្ឋកិច្ច​ជាតិ​របស់​វៀតណាម​កាន់តែ​ខ្លាំង​ផង​ដែរ។

ប្រធាន​វេទិកា​ពលរដ្ឋ​រូប​នេះ​បញ្ជាក់​ថា ការ​ដក​លោក វេង សាខុន នេះ​គឺ​មាន​ផលប្រយោជន៍​ពីរ​សម្រាប់​លោក ហ៊ុន សែន គឺ​ទី​១ បញ្ឈប់​ការ​រាំងស្ទះ​ផែនការ​ប្រមូល​លុយ​បក្ខពួក​របស់​គាត់​ដោយ​ប្រើ​ទីផ្សារ​កម្ពុជា​ជា​ខ្នងបង្អែក ហើយ​ទី​២ ជម្រះ​ចោល​នូវ​មន្ត្រី​ដែល​អាច​ជា​ឆ្អឹង​ទទឹង​ក​សម្រាប់​លោក ហ៊ុន ម៉ាណែត ដែល​នឹង​ឡើង​ធ្វើជា​នាយករដ្ឋមន្ត្រី​ដោយ​ការ​លើក​បន្តុប​ពី​ឪពុក​ទៅ​ថ្ងៃ​មុខ​ផង​ដែរ។

សារព័ត៌មាន The Cambodia Daily នៅ​មិនទាន់​អាច​ទាក់ទង​អតីត​រដ្ឋមន្ត្រី​ក្រសួង​កសិកម្ម រុក្ខាប្រមាញ់ និង​នេសាទ លោក វេង សាខុន ដើម្បី​បំភ្លឺ​ជុំវិញ​ការ​ដក​តំណែង​នេះ​បាន​នៅឡើយ​ទេ​រហូត​មក​ទល់​នឹង​ម៉ោង​ផ្សាយ​នេះ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស