លោក ហ៊ុន សែន និងលោក សម រង្ស៊ី បានឈ្នះក្តីរៀងៗខ្លួនលើបណ្តឹង «បរិហារកេរ្តិ៍ជាសាធារណៈចំពោះបុគ្គល» ពីតុលាការទីក្រុងប៉ារីស ប្រទេសបារាំង ជុំវិញមរណភាពរបស់លោក ហុក ឡង់ឌី។
ថ្លែងក្នុងពិធីប្រគល់សញ្ញាបត្រជូននិស្សិតសាកលវិទ្យាល័យភ្នំពេញអន្តរជាតិ (PPIU) នៅថ្ងៃទី១១ តុលា លោក ហ៊ុន សែន បានប្រកាសពីភាពជោគជ័យរបស់ខ្លួនលើបណ្ដឹងទៅលោក សម រង្ស៊ី មេដឹកនាំគណបក្សប្រឆាំងជុំវិញមរណភាពលោក ហុក ឡង់ឌី នៅតុលាការប្រទេសបារាំង។
លោក ហ៊ុន សែន អះអាងថា តុលាការបារាំងបានរកភាពស្អាតស្អំឱ្យខ្លួន ដោយមិនជាប់ពាក់ព័ន្ធនឹងករណីស្លាប់របស់លោក ហុក ឡង់ឌី ដោយសារការធ្លាក់ឧទ្ធម្ភាគចក្រកាលពីឆ្នាំ២០០៨ នោះទេ។ លោកថា នៅក្នុងសវនាការបារាំង លោក សម រង្ស៊ី គ្មានភស្តុតាងអ្វីចោទមកលោកនោះទេជុំវិញនៃការស្លាប់របស់លោក ហុក ឡង់ឌី។ លោកបន្តថា ការចោទប្រកាន់នេះជាការបរិហារកេរ្តិ៍ហើយដែលភាគីចុងចោទ (លោក សម រង្ស៊ី) មិនបានបដិសេធនោះទេ។
បើទោះបីជាលោក ហ៊ុន សែន ជោគជ័យលើរឿងក្តីនេះ តែមិនទទួលបានសំណងទាមទារ ១អឺរ៉ូពីលោក សម រង្ស៊ី នោះទេ ប៉ុន្តែលោកពេញចិត្តនឹងការសម្រេចរបស់សាលក្រមតុលាការបារាំងនេះ ព្រោះលោកបានសម្អាតខ្លួនដោយតុលាការបារាំង (រកភាពត្រឹមត្រូវ)។
ដោយឡែកលោក សម រង្ស៊ី បានសរសេរលើហ្វេសប៊ុកផ្ទាល់ខ្លួនប្រកាសពីភាពជោគជ័យរបស់ខ្លួនលើរឿងក្ដីនេះដែរ ដោយអះអាងថាលោកគ្មានទោសកំហុសអ្វីទេ។ តុលាការប្រទេសបារាំងទទួលស្គាល់ជាឱឡារិកថា ការតស៊ូរបស់លោកជាការតស៊ូត្រឹមត្រូវ។
លោក សម រង្ស៊ី អះអាងថា សេចក្តីសម្រេចរបស់តុលាការបារាំងមិនមែនគ្រាន់តែជាជ័យជម្នះផ្ទាល់ខ្លួនរបស់លោកនោះទេ ប៉ុន្តែជាការនាំមកផងដែរនូវសេចក្តីសង្ឃឹមដល់អ្នកការពារសេរីភាព និងយុត្តិធម៌នៅកម្ពុជា និងប្រទេសដទៃទៀត។
មេធាវីការពារក្តីឱ្យលោក ហ៊ុន សែន គឺលោក គី តិច បានអះអាងក្នុងខ្សែអាត់សំឡេងជិត ៨នាទីកាលពីថ្ងៃទី១០ តុលា ថា តុលាការបារាំងបានសម្រេចថា លោក ហ៊ុន សែន មិនស្ថិតនៅពីក្រោយនៃការស្លាប់របស់លោក ហុក ឡង់ឌី នោះឡើយ ហើយការចោទប្រកាន់របស់លោក សម រង្ស៊ី ដែលថាលោក ហ៊ុន សែន នៅពីក្រោយនៃការស្លាប់នោះ គឺជាការលើកឡើងដោយគ្មានភស្តុតាងគ្រប់គ្រាន់។
លោក គី តិច និយាយថា តុលាការយល់ឃើញថា ដើមបណ្ដឹងជាបុគ្គលដែលមានអំណាចក្នុងប្រទេស ចំណែកជនជាប់ចោទគឺជាគូបដិបក្ខដែលមានភាពទន់ខ្សោយជាង ហើយការលើកឡើងរបស់លោក សម រង្ស៊ី ដែលថាលោក ហ៊ុន សែន នៅពីក្រោយនៃការស្លាប់របស់លោក ហុក ឡង់ឌី នោះ ដូច្នេះតុលាការបារាំងបានសម្រេចឱ្យលោក សម រង្ស៊ី រួចទោសពីបទចោទនេះ និងមិនតម្រូវឱ្យបង់ប្រាក់ ១អឺរ៉ូទៅឱ្យលោក ហ៊ុន សែន ដែលបានទាមទារសំណងក្នុងពាក្យបណ្តឹងនោះឡើយ។
អ្នកវិភាគនយោបាយ និងសង្គម បណ្ឌិត ឡៅ ម៉ុងហៃ បានសរសេរនៅលើហ្វេសប៊ុករបស់លោកថា អ្នកដែលឈ្នះក្នុងរឿងក្ដីនេះ គឺ «ការពិត» ទៅវិញទេដែលឈ្នះ។
លោកអះអាងថា តុលាការឯករាជ្យ និងឥតលម្អៀងនៃប្រទេសបារាំង បានឃើញការពិតសព្វគ្រប់ ហើយសម្រេចលើកលែងការចោទប្រកាន់ទៅលើលោក សម រង្ស៊ី ឈរលើមូលដ្ឋាននៃការពិតនោះ។ លោកបន្តទៀតថា តុលាការខ្មែរចាំបាច់ត្រូវរៀនសូត្រពីតុលាការបារាំង ហើយបង្ហាញឲ្យគេឃើញ និងផ្តល់ការទុកចិត្តដល់មហាជនថាជាតុលាការឯករាជ្យ ឥតលម្អៀង រកការពិត ទទួលយកការពិត និងធ្វើការសម្រេចឈរលើមូលដ្ឋាននៃការពិតសព្វគ្រប់។
ចំណែកប្រធានវេទិកាពលរដ្ឋ លោក គឹម សុខ បានប្រាប់សារព័ត៌មាន The Cambodia Daily នៅថ្ងៃទី១១ តុលា នេះថា រឿងក្តីក្តាំរវាងលោក ហ៊ុន សែន និងលោក សម រង្ស៊ី នៅតុលាការបារាំងនេះ ភាគីទាំងសងខាងសុទ្ធតែបានអ្វីដែលពួកគេចង់បាន ក្នុងនោះ តុលាការបញ្ជាក់ថា លោក សម រង្ស៊ី មានសិទ្ធិពេញលេញក្នុងការបញ្ចេញមតិ។ នេះគឺជាចំណុចមួយដែលលោក សម រង្ស៊ី ចង់បាន ប៉ុន្តែតុលាការក៏បានបង្ហាញដែរថា ការលើកឡើងរបស់លោក សម រង្ស៊ី ដែលចោទថាលោក ហ៊ុន សែន នៅពីក្រោយការស្លាប់របស់លោក ហុក ឡង់ឌី នោះ គឺគ្មានភស្តុតាងបញ្ជាក់នោះទេ ដូច្នេះនេះក៏ជាចំណុចដែលលោក ហ៊ុន សែន ចង់បានដែរ។
ប្រធានវេទិកាពលរដ្ឋរូបនេះបញ្ជាក់ថា រវាងលោក ហ៊ុន សែន និងលោក សម រង្ស៊ី ពុំមានភាគីណាមួយអាម៉ាស់បាក់មុខពេកនោះទេចំពោះរឿងក្តីក្ដាំនេះ ហើយភាគីទាំងសងខាងក៏គ្មានបានកិត្តិយសអ្វីដែរ ប៉ុន្តែអ្នកដែលអាម៉ាស់បំផុត គឺប្រជាជាតិខ្មែរទាំងមូល ព្រោះថាមេដឹកនាំរបស់ខ្លួនគឺលោក ហ៊ុន សែន បានយករឿងតូចតាចទៅឈ្លោះគ្នានៅតុលាការបរទេស ដែលបង្ហាញយ៉ាងច្បាស់ថា របបនយោបាយគ្រប់គ្រងនៅកម្ពុជានៅតែមានភាពទន់ខ្សោយខាងប្រព័ន្ធច្បាប់នៅឡើយ។
កាលពីខែសីហា ឆ្នាំ២០១៩ លោក ហ៊ុន សែន និងលោក ឌី វិជ្ជា ដែលជាកូនប្រុសបង្កើតរបស់លោក ហុក ឡង់ឌី និងត្រូវជាកូនប្រសារបស់លោក ហ៊ុន សែន សព្វថ្ងៃនេះ បានដាក់ពាក្យបណ្តឹងទៅតុលាការបារាំងប្តឹងលោក សម រង្ស៉ី ពីបទបរិហារកេរ្តិ៍ជាសាធារណៈចំពោះបុគ្គល ដែលបានចោទថា លោក ហ៊ុន សែន នៅពីក្រោយនៃការស្លាប់របស់លោក ហុក ឡង់ឌី ក្នុងហេតុការណ៍ធ្លាក់ឧទ្ធម្ភាគចក្រក្នុងខេត្តស្វាយរៀង កាលពីថ្ងៃទី៩ ខែវិច្ឆិកា ឆ្នាំ២០០៨ កន្លងទៅ៕