ព្រះមហាក្សត្រត្រាស់បង្គាប់តែងតាំងលោក វេង សាខុន ជារដ្ឋមន្ត្រីប្រតិភូអមនាយករដ្ឋមន្ត្រីក្រោយពេលលោក ហ៊ុន សែន ស្នើឲ្យព្រះមហាក្សត្របញ្ចប់មុខតំណែងលោកពីរដ្ឋមន្ត្រីក្រសួងកសិកម្ម កាលពីថ្ងៃទី៨ ខែតុលា កន្លងទៅ។
ព្រះរាជក្រឹត្យរបស់ព្រះករុណា ព្រះបាទ សម្តេចព្រះបរមនាថ នរោត្តម សីហមុនី ចុះថ្ងៃទី១១ ខែតុលា ឆ្នាំ២០២២ បានត្រាស់បង្គាប់តែងតាំងលោក វេង សាខុន ជារដ្ឋមន្ត្រីប្រតិភូអមនាយករដ្ឋមន្ត្រី ហើយលោក ហ៊ុន សែន ត្រូវទទួលបន្ទុកអនុវត្តអនុក្រឹត្យនេះចាប់ពីថ្ងៃឡាយព្រះហស្តលេខានេះតទៅ។
ការតែងតាំងនេះ ធ្វើឡើងបន្ទាប់ពីលោក ហ៊ុន សែន ដាក់លិខិតទូលថ្វាយព្រះមហាក្សត្រ។
ក្នុងពិធីចែកសញ្ញាបត្រដល់និស្សិតសាកលវិទ្យាល័យភ្នំពេញអន្តរជាតិ (PPIU) កាលពីថ្ងៃទី១១ តុលា លោក ហ៊ុន សែន ថ្លែងថាការស្នើនេះដោយសារលោក វេង សាខុន ក៏ជាមន្ត្រីរបស់រដ្ឋាភិបាល និងមិនបានប្រព្រឹត្តកំហុសធ្ងន់ធ្ងរហួសហេតុនោះដែរ។ លោកបញ្ជាក់ថា មូលហេតុដែលបញ្ចប់មុខតំណែង ដោយសារលោក វេង សាខុន មិនអាចធ្វើអ្វីទៅតាមការចង់បានរបស់លោក ជាពិសេសការជំរុញវិស័យកសិកម្ម។
លោក វេង សាខុន ត្រូវបានព្រះមហាក្សត្របញ្ចប់តំណែងពីរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ កាលពីថ្ងៃទី៨ ខែតុលា ឆ្នាំ២០២២ ក្រោយពីមានការស្នើពីលោក ហ៊ុន សែន។
អ្នកឃ្លាំមើលចាត់ទុកការដកលោក វេង សាខុន ចេញពីរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ អាចជាវិធីកម្ចាត់បន្លាចេញពីកែវភ្នែករបស់មេដឹកនាំបក្សកាន់អំណាច លោក ហ៊ុន សែន នៅមុនការបោះឆ្នោតជាតិឆ្នាំ២០២៣ ខាងមុខនេះ ខណៈលោក វេង សាខុន សកម្មក្នុងការទប់ស្កាត់ទំនិញ និងផលិតផលគ្មានគុណភាពពីប្រទេសវៀតណាម ចូលកម្ពុជា ក្នុងនោះមានដូចជា ជ្រូក ត្រី និងទំនិញផ្សេងៗទៀតដែលធ្វើឲ្យកម្ពុជាប្រឈមនឹងទំនិញឡើងថ្លៃ។
អ្នកវិភាគនយោបាយ និងជាប្រធានវេទិកាពលរដ្ឋ លោក គឹម សុខ អះអាងថា ក្រុមហ៊ុនដែលនាំចូលទំនិញទាំងនោះសុទ្ធសឹងតែជាក្រុមហ៊ុនរបស់គ្រួសារ និងខ្សែបណ្ដាញបក្ខពួករបស់ត្រកូល «ហ៊ុន» ទាំងអស់ ដូច្នេះសកម្មភាពរបស់លោក វេង សាខុន ដែលទប់ស្កាត់ការនាំចូលទំនិញខូចគុណភាពពីប្រទេសវៀតណាមទាំងនោះ បានធ្វើឲ្យខាតទាំងប្រយោជន៍បណ្ដាញក្រុមគ្រួសារត្រកូល «ហ៊ុន» ធ្ងន់ធ្ងរ និងធ្វើឲ្យខាតសេដ្ឋកិច្ចជាតិរបស់វៀតណាមកាន់តែខ្លាំងផងដែរ។
កាលពីថ្ងៃទី២៣ ខែកុម្ភៈ លោក ហ៊ុន សែន បានស្ដីបន្ទោសខ្លាំងៗទៅកាន់លោក វេង សាខុន ថាការប្រឹងផ្គាប់ចិត្តកសិករ ៤-៥ពាន់គ្រួសារនៅក្នុងស្រុក ដោយផ្អាកការនាំចូលសាច់ជ្រូកពីវៀតណាម មិនមែនជាដំណោះស្រាយនោះទេសម្រាប់ទីផ្សារកម្ពុជា ហើយការធ្វើបែបនេះ បានធ្វើឱ្យទំនិញនានា ដូចជាសាច់ជ្រូក ជាដើម នៅលើទីផ្សារឡើងថ្លៃខ្ពស់កប់ពពកដោយសារតែការផ្គត់ផ្គង់មិនឆ្លើយតបនឹងតម្រូវការ៕