31 C
Phnom Penh

ក្រុមហ៊ុន​ចិន​ប្ដេជ្ញា​ផលិត​មាស​នៅ​កម្ពុជា​ឱ្យ​បាន​៦០​គីឡូក្រាម​នៅ​ដំណាច់​ឆ្នាំ​២០២២​នេះ

ដោយ ឌឹ ខេមបូឌា ដេលី

បទវិភាគ

ក្រុមហ៊ុន​ចិន ប្ដេជ្ញា​ផលិត​មាស​ឲ្យ​បាន​ចំនួន ៦០​គីឡូក្រាម​ត្រឹម​ដំណាច់​ឆ្នាំ​២០២២ នេះ ក្រោយពី​ទទួល​បាន​អាជ្ញាប័ណ្ណ​អាជីវកម្ម​រ៉ែ​មាស​ពី​រដ្ឋាភិបាល​កម្ពុជា។

ក្រុម​យុវជន​គណបក្ស​ប្រជាជន​កម្ពុជា​ថ្នាក់​កណ្តាល បាន​សរសេរ​លើ​ហ្វេសប៊ុក​នៅ​ថ្ងៃ​ព្រហស្បតិ៍ ទី​១៣ តុលា នេះ​ថា ក្រុមហ៊ុន​រុករក​រ៉ែ​មាស​ថ្មី​មួយ​ទៀត​នៅ​ស្រុក​សំបូរ ខេត្ត​ក្រចេះ ប្ដេជ្ញា​ផលិត​មាស​ឲ្យ​បាន ៦០​គីឡូក្រាម​ត្រឹម​ដំណាច់​ឆ្នាំ​២០២២ ក្រោយ​ទទួល​បាន​អាជ្ញាប័ណ្ណ​ឧស្សាហកម្ម​អាជីវកម្ម​រ៉ែ​មាស​ពី​ក្រសួង​រ៉ែ និង​ថាមពល។

ប្រភព​ដដែល​ឲ្យ​ដឹង​ថា ក្រុមហ៊ុន Xing Yuan Kanng Yeak Co., Ltd ទទួល​បាន​អាជ្ញាប័ណ្ណ​ឧស្សាហកម្ម​អាជីវកម្ម​រ៉ែ​មាស​កាលពី​ខែ​សីហា ឆ្នាំ​២០១៨ លើ​ទំហំ​ដី​ចំនួន ២៨​គីឡូម៉ែត្រ​ក្រឡា ដើម្បី​ប្រតិបត្តិការ​អាជីវកម្ម​រ៉ែ​មាស​របស់​ខ្លួន​នៅ​ស្រុក​សំបូរ ខេត្ត​ក្រចេះ។ ក្រោយពី​ទទួល​បាន​អាជ្ញាប័ណ្ណ ក្រុមហ៊ុន​ចិន​នេះ​ក៏​បាន​ដំឡើង​ខ្សែ​សង្វាក់​ផលិតកម្ម​អាជីវកម្ម​របស់​ខ្លួន តែ​ដោយសារ​តែ​បញ្ហា​កូវីដ-១៩ ក្រុមហ៊ុន​ទើប​តែ​បាន​បញ្ចប់​ការ​សាងសង់ និង​រៀបចំ​ខ្សែ​សង្វាក់​ផលិតកម្ម​របស់​ខ្លួន​នៅ​ក្នុង​ខែ​តុលា ឆ្នាំ​២០២២។

តាម​គម្រោង​សាកល្បង​រយៈពេល ៣​ខែ​ដំបូង ក្រុមហ៊ុន​គ្រោង​ផលិត​ឱ្យ​បាន ២០​គីឡូក្រាម​ក្នុង​មួយ​ខែ ហើយ​បើ​គិត​ដល់​ត្រឹម​ខែ​ធ្នូ ឆ្នាំ​២០២២ ខាងមុខ​នេះ ក្រុមហ៊ុន​គ្រោង​នឹង​ផលិត​ឱ្យ​បាន​ចំនួន ៦០​គីឡូក្រាម។

ការ​លើកឡើង​របស់​តំណាង​ក្រុមហ៊ុន​នេះ ធ្វើឡើង​នៅ​ពេល​រដ្ឋមន្ត្រី​ក្រសួង​រ៉ែ និង​ថាមពល លោក ស៊ុយ សែម ចុះ​មើល​ដំណើរការ​កត់ត្រា​ទិន្នន័យ​ស្ល​រ៉ែ​មាស​លើក​ទី​១ របស់​ក្រុមហ៊ុន​នៅ​ថ្ងៃទី​១០ ខែ​តុលា ឆ្នាំ​២០២២។

គួរ​បញ្ជាក់​ដែរ​ថា ក្រុមហ៊ុន Xing Yuan Kanng Yeak Co., Ltd (ហ្ស៊ីង យ៉ាំន កាំង់ យ៉ាក) ទទួល​បាន​អាជ្ញាប័ណ្ណ​ឧស្សាហកម្ម​អាជីវកម្ម​រ៉ែ​មាស​ពី​ក្រសួង​រ៉ែ និង​ថាមពល កាលពី​ខែ​សីហា ឆ្នាំ​២០១៨ លើ​ដី​ទំហំ ២៨​គីឡូម៉ែត្រ​ក្រឡា ដើម្បី​ប្រតិបត្តិការ​អាជីវកម្ម​រ៉ែ​មាស​របស់​ខ្លួន​នៅ​ស្រុក​សំបូរ ខេត្ត​ក្រចេះ។

ក្រុមហ៊ុន XING YUAN KANNG YEAK CO.,LTD បាន​បរិច្ចាគ​ថវិកា​ចំនួន ៣០០០​ដុល្លារ​អាមេរិក​ចូលរួម​ជាមួយ​កាកបាទ​ក្រហម​កម្ពុជា ក្នុង​ឱកាស​ខួប​ទី​១៥៩ ទិវា​ពិភពលោក​កាកបាទក្រហម និង​អឌ្ឍចន្ទ​ក្រហម ថ្ងៃទី​៨ ខែ​ឧសភា ឆ្នាំ​២០២២។

នា​ពេល​កន្លងមក ក្រុមហ៊ុន XING YUAN KANNG YEAK CO.,LTD តែងតែ​ចូលរួម​បរិច្ចាគ​ថវិកា​ជា​រៀង​រាល់​ឆ្នាំ​ជាមួយ​កាកបាទក្រហម​កម្ពុជា ក្នុង​ឱកាស​ខួប​ទិវា​ពិភពលោក​កាកបាទក្រហម និង​អឌ្ឍចន្ទ​ក្រហម ៨ ឧសភា ហើយ​ក៏​តែងតែ​បាន​ចូលរួម​ឧបត្ថម្ភ​ថវិកា​ជួយ​ដល់​យុទ្ធនាការ​ផ្សេងៗ​របស់​លោក ហ៊ុន សែន ព្រមទាំង​បាន​ចូលរួម​ជួយ​ឧបត្ថម្ភ​ដល់​កម្មវិធី​សប្បុរស​ជាច្រើន​ទៀត។

កន្លងមក លោក ហ៊ុន សែន ធ្លាប់​លើកឡើង​ថា ក្រុមហ៊ុន​ធ្វើ​អាជីវកម្ម​រ៉ែ​មាស នឹង​ផ្តល់​ផលប្រយោជន៍​ជា​ចំណូល​មធ្យម​ប្រមាណ ១៨៥​លាន​ដុល្លារ​ក្នុង​មួយ​ឆ្នាំ ក្នុង​នោះ​ចំណូល​ថវិកា​ជាតិ​ពី​សួយសារ និង​សារពើពន្ធ​ផ្សេងៗ​ជា​មធ្យម​ប្រមាណ ៤០​លាន​ដុល្លារ​ក្នុង​មួយ​ឆ្នាំ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស