 ដែលមានទំនាក់ទំនងជាមួយអ្នកស្រី ហ៊ុន ម៉ាណា។){kind=link}
លោក ហ៊ុន សែន កាត់ផ្ទៃដីបឹងតាមោកទំហំ ៦៧ហិកតារបន្ថែមទៀតប្រគល់ទៅឱ្យនាយកក្រុមហ៊ុន អ័រគីដេ វីឡា (Orkide Villa) ដែលមានទំនាក់ទំនងជាមួយអ្នកស្រី ហ៊ុន ម៉ាណា។
យោងតាមអនុក្រឹត្យមួយដែលចុះហត្ថលេខាដោយលោក ហ៊ុន សែន កាលពីខែឧសភា ឆ្នាំ២០២២ នេះ បានសម្រេចកាត់ផ្ទៃដីបឹងតាមោកទំហំ ៦៧ហិកតារ នៅសង្កាត់ពន្សាំង ខណ្ឌព្រែកព្នៅ ក្នុងរាជធានីភ្នំពេញ ប្រគល់ទៅឲ្យលោក នុត តុន ដែលជានាយកក្រុមហ៊ុន អ័រគីដេ វីឡា (Orkide Villa)។
លោក នុត តុន កាលពីពេលកន្លងទៅ ក៏ធ្លាប់ទទួលបានដីទំហំ ៩៣ហិកតារនៅក្នុងស្រុកស្ទឹងហាវ ខេត្តព្រះសីហនុ ខណៈអាពាហ៍ពិពាហ៍របស់លោកកាលពីខែកុម្ភៈ ក៏មានការចូលរួមដោយក្រុមគ្រួសារលោក ហ៊ុន សែន និងអ្នកមានអំណាចជាច្រើននៅក្នុងប្រទេសផងដែរ។
ក្រុមហ៊ុន អ័រគីដេ វីឡា ដែលដឹកនាំដោយកូនស្រីរបស់លោក ហ៊ុន សែន គឺអ្នកស្រី ហ៊ុន ម៉ាណា នោះ ក៏មាននាយកក្រុមហ៊ុនផ្សេង គឺអ្នកស្រី ខៀវ សស៊ីលៀប ដែលជាម្ចាស់ភាគហ៊ុនរបស់ក្រុមហ៊ុនកាប់ឈើដ៏ល្បីឈ្មោះ Timbergreen ផងដែរ។
បឹងតាមោក ឬបឹងកប់ស្រូវ មានផ្ទៃដីសរុប ៣២៣៩ហិកតារ ជាអាងស្ដុកទឹកកខ្វក់ និងរំដោះទឹកចេញពីរាជធានីភ្នំពេញ ហើយបឹងមួយនេះត្រូវបានរដ្ឋាភិបាលចេញអនុក្រឹត្យកាលពីដើមខែកុម្ភៈ ឆ្នាំ២០១៦ ដោយកំណត់យកបឹងធម្មជាតិមួយនេះជាសម្បត្តិសាធារណៈរបស់រដ្ឋ។
ប៉ុន្តែចាប់តាំងពីឆ្នាំ២០១៨ ដល់ឆ្នាំ២០២២ នេះ ផ្ទៃដីបឹងតាមោកជាង ២ពាន់ហិកតារហើយត្រូវបានលោក ហ៊ុន សែន កាត់ និងដោះដូរទៅឲ្យសែស្រឡាយមន្ត្រីជាន់ខ្ពស់ជាបន្តបន្ទាប់ ក្នុងនោះមានសមាជិកព្រឹទ្ធសភា លោក កុក អាន លោកស្រី ជា សុផាម៉ាដែន កូនស្រីបង្កើតលោក ជា សុផារ៉ា រដ្ឋមន្ត្រីក្រសួងរៀបចំដែនដី អគ្គមេបញ្ជាការនៃកងយោធពលខេមរភូមិន្ទ លោក វង្ស ពិសេន និងអគ្គមេបញ្ជាការរងនៃកងយោធពលខេមរភូមិន្ទ លោក សៅ សុខា។
ក្រៅពីកាត់ឲ្យសាច់ញាតិ និងថ្នាក់ដឹកនាំជាន់ខ្ពស់គណបក្សកាន់អំណាចហើយ ផ្ទៃដីបឹងតាមោកជាង ២ពាន់ហិកតារ ត្រូវបានលោក ហ៊ុន សែន កាត់ និងដោះដូរប្រគល់ឲ្យស្ថាប័នរដ្ឋ និងក្រុមហ៊ុនឯកជនផងដែរ។
បច្ចុប្បន្ននេះ សកម្មភាពនៃការចាក់ដីលុបគគ្រឹកគគ្រេងនៅលើផ្ទៃដីបឹងតាមោក កំពុងកើតឡើងបន្ទាប់ពីលោក ហ៊ុន សែន ចេញអនុក្រឹត្យកាត់ និងដោះដូរទៅឲ្យអ្នកជំនួញ សាច់ញាតិរបស់លោក ព្រមទាំងថ្នាក់ដឹកនាំធំៗ និងស្ថាប័នរដ្ឋទាំងនោះ ខណៈប្រជាពលរដ្ឋដែលរស់នៅ និងអាស្រ័យផ្ទៃបឹងតាមោកជាង ២០០គ្រួសារ កំពុងប្រឈមនឹងការបណ្ដេញពីលំនៅឋាន៕