25 C
Phnom Penh

សង្គម​ស៊ីវិល​និង​សាធារណជន​រិះគន់​សម្ដេច​សង្ឃ​ចេញ​ញត្តិ​ថ្កោលទោស​លោក សម រង្ស៊ី

ដោយ ឌឹ ខេមបូឌា ដេលី

បទវិភាគ

សង្គម​ស៊ីវិល និង​សាធារណជន​នាំគ្នា​រិះគន់​មន្ត្រី​សង្ឃ​ជាន់ខ្ពស់​ដែល​បាន​ចេញ​ញត្តិ​ថ្កោលទោស​លោក សម រង្ស៊ី តាម​បញ្ជា​របស់​លោក ហ៊ុន សែន ដែល​ហៅ​លោក សម រង្ស៊ី ថា​ជា «ពូជ​ក្បត់​ជាតិ ៣​ជំនាន់»។

សម្តេច​ព្រះ​មហាសង្ឃរាជ សម្តេច​សង្ឃ​នាយក និង​ជា​មន្ត្រី​សង្ឃ​ជាន់ខ្ពស់​នៃ​ប្រទេស​កម្ពុជា​គណៈ​មហានិកាយ កាលពី​ថ្ងៃទី​២០ ខែ​តុលា ឆ្នាំ​២០២២ បាន​ចេញ​ញត្តិ​គាំទ្រ​ការ​ថ្លែង​របស់​លោក ហ៊ុន សែន ដោយ​បាន​ប្រកាស​ប្រឆាំង និង​បាន​ព្រមាន​កម្ទេច​លោក សម រង្ស៊ី និង​សកម្មជន​បក្ស​ប្រឆាំង​ដែល​មាន​ពាក់ព័ន្ធ​ជាមួយ​លោក សម រង្ស៊ី។

ញត្តិ​ថ្កោលទោស​ដែល​មាន​ហត្ថលេខា​ដោយ​សម្តេច​សង្ឃ​មហានិកាយ ទេព វង្ស និង​មន្ត្រី​សង្ឃ​នាយក​ចំនួន ១១​អង្គ ព្រមាន​ថា សម្តេច​សង្ឃ និង​ថ្នាក់​ដឹកនាំ​សង្ឃ​ប្រឆាំង​ដាច់អហង្ការ​ចំពោះ​ទង្វើ​អសីលធម៌​របស់​លោក សម រង្ស៊ី មេ​ក្រុម​ឧទ្ទាម​ជា​ពូជ​ក្បត់​ជាតិ ៣​ជំនាន់ ដែល​ញុះញង់ អំពាវនាវ​ឲ្យ​ពលរដ្ឋ និង​កងកម្លាំង​ប្រដាប់​អាវុធ​ចូលរួម​ធ្វើការ​បះបោរ​ប្រឆាំង និង​ផ្តួល​រំលំ​រដ្ឋាភិបាល​ស្រប​ច្បាប់។

នាយក​មជ្ឈមណ្ឌល​សម្ពន្ធភាព​ការងារ និង​សិទ្ធិមនុស្ស (សង់ត្រាល់) លោក មឿន តុលា បាន​សរសេរ​លើ​គណនី​ហ្វេសប៊ុក​របស់​លោក​ដោយ​ភ្ជាប់​នឹង​ញត្តិ​ថ្កោលទោស​របស់​សម្ដេច​សង្ឃ​កម្ពុជា​ថា «សាសនា គួរ​ដើរ​តួនាទី​សម្របសម្រួល និង​បង្រួបបង្រួម​ឲ្យ​មាន​ឯកភាព​ជាតិ នៅ​ក្នុង​បរិបទ​ដែល​ស្រុក​ទេស​មាន​ការ​បែកបាក់»

ក្រៅពី​លោក មឿន តុលា សាធារណជន​ផ្សេង​ទៀត ក្នុង​នោះ​ក៏​មាន​សកម្មជន​គណបក្ស​ក្រៅ​រដ្ឋាភិបាល​ផង​ដែរ បាន​នាំគ្នា​បង្ហោះ​សារ​លើ​បណ្ដាញ​សង្គម​ហ្វេសប៊ុក ដោយ​ភ្ជាប់​ជាមួយ​ញត្តិ​នោះ​ថា ស្ថាប័ន​សង្ឃ​គួរតែ​ប្រកាន់ខ្ជាប់​គោលការណ៍​កណ្តាល​តាមរយៈ​ការ​ទេសនា​អប់រំ​ភាគី​ទាំង​ពីរ​ទៅ​តាម​មាគ៌ា​នៃ​ព្រះពុទ្ធសាសនា ក្នុង​នាម​ជា​អ្នក​បួស​ដើម្បី​ផ្សះផ្សា រម្ងាប់​នូវ​ចិត្ត​ទោសៈ ចិត្ត​មោហៈ និង​ចិត្ត​លោភៈ នេះ​ទើប​បាន​គេ​ហៅថា​ជា​ស្ថាប័ន​ដ៏​ប្រសើរ។

ចំណែក​ហ្វេសប៊ុក​ឈ្មោះ Sareth Seng ចាត់ទុក​ការ​ចេញ​ញត្តិ​ថ្កោលទោស​លោក សម រង្ស៊ី ដែល​ចេញ​ដោយ​សម្តេច​សង្ឃ​មហានិកាយ ទេព វង្ស និង​មន្ត្រី​សង្ឃ​នាយក​ចំនួន ១១​អង្គ​ផ្សេង​ទៀត​នោះ ថា​ជា​ការ​ជាន់​ពន្លិច​វិស័យ​ពុទ្ធសាសនា​នៅ​កម្ពុជា។

ប៉ុន្តែ​គណនី​ហ្វេសប៊ុក​ឈ្មោះ Punleur Pao បាន​បញ្ចេញមតិ​ថា «ប្រសិន​បើ​ញាតិញោម​ស្អប់​នោះ គឺ​ស្អប់​តែ​សម្ដេច​សង្ឃ​ប៉ុន្មាន​អង្គ​នោះ​បាន​ហើយ ប៉ុន្តែ​សម្រាប់​សង្ឃ​តូចតាច រួម​ទាំង​ព្រះអង្គ​ជាដើម សូម​កុំ​ស្អប់​អី»

ការ​ចេញ​ញត្តិ​ថ្កោលទោស​លោក សម រង្ស៊ី អតីត​ប្រធាន​គណបក្ស​សង្គ្រោះ​ជាតិ​ជា​បន្តបន្ទាប់​តាំងពី​ក្រសួង​អប់រំ ក្រសួង​ការពារ​ជាតិ ពី​គ្រហស្ថ​រហូត​ដល់​ព្រះសង្ឃ​នេះ ធ្វើឡើង​បន្ទាប់ពី​លោក ហ៊ុន សែន បាន​ប្រកាស​ជា​សាធារណៈ​កាលពី​ថ្ងៃទី​១៧ ខែ​តុលា ចោទ​លោក សម រង្ស៉ី ថា​ជា «ត្រកូល​ក្បត់​ជាតិ​បី​ជំនាន់» និង​មាន​គម្រោង​ផ្តួល​រំលំ​រដ្ឋាភិបាល​របស់​លោក​សាជាថ្មី​ទៀត​តាមរយៈ​ការ​អំពាវនាវ​ឲ្យ​កងកម្លាំង​ប្រដាប់​អាវុធ​ប្រឆាំង​រដ្ឋាភិបាល៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស