បុរសខ្លាំងកម្ពុជា លោក ហ៊ុន សែន គំរាមថា លោកនឹងប្តឹងទៅតុលាការឲ្យរំលាយគណបក្សនយោបាយណាដែលហ៊ានភ្ជាប់ខ្លួននឹងអតីតមេដឹកនាំបក្សប្រឆាំង លោក សម រង្ស៊ី ប៉ុន្តែអ្នកដែលស្ម័គ្រចិត្តចាកចេញពីលោក សម រង្ស៊ី នឹងទទួលបានសិទ្ធិធ្វើនយោបាយឡើងវិញដោយស្របច្បាប់។
មេដឹកនាំខ្មែរដែលរងការរិះគន់ពីគ្រប់ទិសទីថាកំពុងអនុវត្តច្បាប់តាមរបៀបកុម្មុយនីស្តផ្ដាច់ការរូបនេះ បានលើកឡើងក្នុងពិធីជួបជុំមួយជាមួយពលរដ្ឋដែលផ្លាស់ទីលំនៅពីតំបន់អង្គរទៅរស់នៅភូមិរុនតាឯក ស្រុកបន្ទាយស្រី ខេត្តសៀមរាប នៅថ្ងៃទី២១ ខែតុលា នេះ ដោយគំរាមថា បក្សនយោបាយនៅក្នុងស្រុក និងអ្នកនយោបាយនៅក្រៅស្រុក មិនត្រូវភ្ជាប់ខ្លួនជាមួយលោក សម រង្ស៊ី នោះទេ ប្រសិនបើពួកគេមិនចង់ប្រឈមមុខនឹងផ្លូវច្បាប់នោះ។
លោក ហ៊ុន សែន លើកឡើងថា លោកនឹងចុះហត្ថលេខាលើកលែងទោសចំពោះបុគ្គលណាក៏ដោយដែលសម្រេចដកខ្លួនចេញពីអតីតមេដឹកនាំប្រឆាំង លោក សម រង្ស៊ី នៅពេលនេះ ហើយពួកគេនឹងមានឱកាសវិលចូលស្រុក និងធានាបាននូវសិទ្ធិធ្វើនយោបាយឡើងវិញថែមទៀតផង។
មេដឹកនាំបក្សកាន់អំណាចដែលសល់ពីរបបវាលពិឃាតរូបនេះ នៅតែបង្ហាញជំហរដដែលថា អ្នកដែលងើបមួយត្រូវតែវ៉ៃមួយ បើងើបពីរត្រូវតែវ៉ៃពីរ ដើម្បីសេចក្តីសុខរបស់ពលរដ្ឋនៅក្នុងប្រទេសដែលលោកបានប្ដេជ្ញាថា នឹងកម្ចាត់ចោលឱ្យអស់នូវមនោគមន៍វិជ្ជាជ្រុលនិយមដែលមានបំណងបំផ្លាញសន្តិភាព ដែលលោកកសាងឡើងដោយលំបាកនាពេលកន្លងមក។
ប្រធានវេទិកាពលរដ្ឋ លោក គឹម សុខ បានសរសេរលើគណនីហ្វេសប៊ុករបស់លោកនៅថ្ងៃទី២១ តុលា នេះថា ការប្រឹងបង្កជម្លោះដូចដែលមេដឹកនាំបក្សកាន់អំណាច លោក ហ៊ុន សែន ធ្វើដូចសព្វថ្ងៃនេះ មើលមួយភ្លែតឃើញថាគាត់ជាអ្នកឈ្នះ ប៉ុន្តែតាមការពិត គាត់ជាអ្នកចាញ់ងាប់ក្រឡាពិតប្រាកដ។
លោក គឹម សុខ អះអាងថា ដំណោះស្រាយជូនជាតិដែលលោក ហ៊ុន សែន គួរតែធ្វើនៅពេលនេះ គឺត្រូវចូលតុចរចាជាមួយលោក សម រង្ស៊ី និងលោក កឹម សុខា ដោយនាំគ្នាធ្វើពិធីអបអរសាទរកិច្ចព្រមព្រៀងសន្តិភាពទីក្រុងប៉ារីស ២៣ តុលា ឆ្នាំ១៩៩១ ជាមួយគ្នា នោះវិបត្តិនានារបស់កម្ពុជានឹងត្រូវបានដោះស្រាយទាំងអស់ជាមិនខាន។
ប្រធានវេទិកាពលរដ្ឋរូបនេះបញ្ជាក់ថា ប្រសិនបើមេដឹកនាំនយោបាយល្បីៗរបស់កម្ពុជាអាចចរចាគ្នាបានមែននោះ កុំថាឡើយវិបត្តិជាតិដែលជាប់គាំង សូម្បីគំនុំដែលពួកគាត់គុំកួនគ្នាមួយពូជដូចសព្វថ្ងៃនេះ ក៏ត្រូវរលត់ទៅវិញដែរ។ លោកបន្តថា អ្នកដែលឈ្នះលើឧបសគ្គទាំងនេះ គឺលោក ហ៊ុន សែន ចំណែកអ្នកដែលបានផលប្រយោជន៍ធំជាងគេ គឺប្រជាជាតិខ្មែរទាំងមូល ដូច្នេះដើម្បីជាតិ និងពលរដ្ឋរបស់ខ្លួន ពួកគេគួរតែងាករកការចរចា ជាជាងការឈ្លោះហែកហួរគ្នាបន្តទៀត។
ក្រុមអ្នកសង្កេតការណ៍លើកឡើងថា មេដឹកនាំនយោបាយធំៗនៅកម្ពុជាបច្ចុប្បន្ននេះមានតែលោក ហ៊ុន សែន លោក កឹម សុខា និងលោក សម រង្ស៊ី ប៉ុណ្ណោះដែលអាចធ្វើឱ្យមានការប្រែប្រួលស្ថានការណ៍នយោបាយនៅកម្ពុជាទាំងមូលបាន ប៉ុន្តែកម្ពុជាដែលក្រោមឥទ្ធិពលនយោបាយរបស់លោក ហ៊ុន សែន បានរុញឱ្យប្រទេសមួយនេះធ្លាក់ទៅរកវិបត្តិមិនចេះចប់មិនចេះហើយ តាមរយៈនៃការលេងល្បែងនយោបាយប្រជាភិថុតិគ្រប់រូបភាព ដើម្បីការពារអំណាចរបស់ខ្លួន។
យ៉ាងណាក៏ដោយ ល្បែងនយោបាយរវាងលោក ហ៊ុន សែន និងលោក សម រង្ស៊ី ត្រូវគេមើលឃើញថា ពេលខ្លះជាសត្រូវស៊ីសាច់ហុតឈាមនឹងគ្នាយ៉ាងព្រៃផ្សៃ ប៉ុន្តែពេលខ្លះទៀត ពួកគេក៏ជាមិត្តដ៏ផ្អែមល្ហែមត្រជាក់នឹងគ្នាស្ទើរតែមិនគួរឱ្យជឿផងដែរ៕