បុរសខ្លាំងកម្ពុជា លោក ហ៊ុន សែន ថាអ្នកវិភាគតាំងខ្លួនជាអ្នកចេះដឹងលើកិច្ចព្រមព្រៀងសន្តិភាពទីក្រុងប៉ារីស គឺនិយាយខុសពីការពិត និងផ្ទុយពីសាច់រឿងពិតទាំងស្រុង ព្រោះកិច្ចព្រមព្រៀងសន្តិភាពទីក្រុងប៉ារីស ពុំបានបញ្ចប់សង្គ្រាមស៊ីវិលនៅកម្ពុជានោះទេ។
បុរសខ្លាំងដែលសល់ពីសង្គ្រាម លោក ហ៊ុន សែន បានលើកឡើងក្នុងពិធីចែកស្រូវពូជដល់ប្រជាពលរដ្ឋនៅខេត្តបន្ទាយមានជ័យ កាលពីថ្ងៃទី២៣ ខែតុលា ឆ្នាំ២០២២ នេះ ដោយនិយាយឌឺដងថា លោកសុំសរសើរដោយស្មោះអ្នកដែលហ៊ាននិយាយរឿងដែលមិនត្រឹមត្រូវ ហើយចាត់ទុកថាជារឿងត្រឹមត្រូវ ចំពោះការនិយាយពីសន្ធិសញ្ញាអន្តរជាតិដែលលោកបានចូលរួមកិច្ចប្រជុំគ្រប់ដំណាក់កាលនោះ គឺខុសពីការពិតទាំងអស់។
លោក ហ៊ុន សែន លើកឡើងថា អ្វីដែលកម្ពុជាចង់បានពីកិច្ចព្រមព្រៀងទីក្រុងប៉ារីស គឺការបញ្ចប់ភ្លើងសង្គ្រាម ប៉ុន្តែអង្គការសហប្រជាជាតិតាមរយៈអាជ្ញាធរបណ្ដោះអាសន្នរបស់ខ្លួននៅកម្ពុជា (United Nation Transitional Authority in Cambodia) ដែលហៅកាត់ថាអ៊ុនតាក់ (UNTAC) មិនបានជួយកម្ពុជាឱ្យដល់គោលដៅដូចដែលកម្ពុជាចង់បាន និងវត្ថុបំណងនៃកិច្ចព្រមព្រៀងនេះឡើយ។
មេដឹកនាំខ្មែរដែលគេរិះគន់ថាចូលចិត្តបង្កសង្គ្រាម លោក ហ៊ុន សែន អះអាងថា ទោះបីមានកិច្ចព្រមព្រៀងសន្តិភាពទីក្រុងប៉ារីស ២៣ តុលា ១៩៩១ ក៏ពិតមែន ប៉ុន្តែសង្គ្រាមស៊ីវិលនៅកម្ពុជានៅបន្ត ដែលបង្កដោយភាគី ប៉ុល ពត ប៉ុន្តែក្រោមនយោបាយឈ្នះឈ្នះ ឆ្នាំ១៩៩៨ របស់លោក កម្ពុជាបានបញ្ចប់សង្គ្រាមនេះទាំងស្រុង ដោយមិនចំណាយគ្រាប់កាំភ្លើងសូម្បីតែមួយគ្រាប់ ខណៈអ្នករិះគន់លោកជុំវិញកិច្ចព្រមព្រៀងនេះ គឺផ្ទុយពីសាច់រឿងពិតទាំងស្រុង។
ជុំវិញខួបលើកទី៣១ឆ្នាំនៃកិច្ចព្រមព្រៀងសន្តិភាពទីក្រុងប៉ារីស ទាំងអ្នកវិភាគ អ្នកសង្កេតការណ៍ អ្នកឃ្លាំមើលសង្គម និងអង្គការសង្គមស៊ីវិល បាននាំគ្នាបញ្ចេញទស្សនៈ និងរៀបចំពិធីផ្សេងៗដើម្បីរំឭកឡើងវិញនូវស្មារតីនៃកិច្ចព្រមព្រៀងនេះសម្រាប់កម្ពុជា។
ស្ថាបនិកអង្គការអភិវឌ្ឍន៍ផ្នត់គំនិត លោក សេក សុជាតិ បានសរសេរលើគណនីហ្វេសប៊ុករបស់លោកកាលពីថ្ងៃទី២៣ តុលា ថា កម្ពុជាទទួលបានសមិទ្ធផលវិជ្ជមានទាំងអស់ដូចសព្វថ្ងៃ គឺកើតចេញពីកិច្ចព្រមព្រៀងសន្តិភាពទីក្រុងប៉ារីស ឆ្នាំ១៩៩១ តែមួយគត់ ចំណែកបញ្ហាប្រឈមនានាដែលកំពុងកើតមាននៅក្នុងសង្គមបច្ចុប្បន្ន គឺដោយសារមេដឹកនាំនយោបាយខ្មែរមួយចំនួនបានដើរប្រាសចាកពីគន្លងប្រជាធិបតេយ្យ និងផែនទីបង្ហាញផ្លូវនៃកិច្ចព្រមព្រៀងសន្តិភាពទីក្រុងប៉ារីស ថ្ងៃទី២៣ ខែតុលា ឆ្នាំ១៩៩១ នេះតែប៉ុណ្ណោះ។
លោក សេក សុជាតិ លើកឡើងថា បើកិច្ចព្រមព្រៀងសន្តិភាពទីក្រុងប៉ារីស ថ្ងៃទី២៣ ខែតុលា ឆ្នាំ១៩៩១ អស់សុពលភាពដូចការលើកឡើងរបស់មន្ត្រីរដ្ឋាភិបាលបក្សកាន់អំណាចមែននោះ កម្ពុជាក៏នឹងបាត់បង់សន្តិភាពវិញដែរ។
លោកបន្តថា អ្នកដែលដើរប្រាសចាកពីគោលគំនិតដើមនៃកិច្ចព្រមព្រៀងដែលជួយឱ្យខ្លួនមានសន្តិភាពនេះ គឺប្រៀបដូចអ្នកដែលឆ្លងស្ពានផុតគ្រោះថ្នាក់ហើយ កំពុងតែនាំគ្នារុះរើស្ពានចោលដូច្នោះឯង ដែលត្រូវគេចាត់ទុកថាជាមនុស្សរមិលគុណជាទីបំផុត។
ចំណែកឯអ្នកស្រាវជ្រាវការអភិវឌ្ឍសង្គម បណ្ឌិត ឡៅ ម៉ុងហៃ បានអះអាងក្នុងទិវាខួបទី៣១ឆ្នាំនៃកិច្ចព្រមព្រៀងនេះដែរថា សន្និសីទទីក្រុងប៉ារីស បានអនុម័តកិច្ចព្រមព្រៀងសន្តិភាពទីក្រុងប៉ារីសឆ្នាំ១៩៩១ ដើម្បីបញ្ចប់សង្គ្រាម គឺក្នុងបំណងដើម្បីធានាឲ្យប្រជាពលរដ្ឋខ្មែរមានសេចក្ដីសុខសន្តិភាព មានសិទ្ធិសេរីភាពពេញលេញជារៀងរហូត ប៉ុន្តែរយៈពេល ៣១ឆ្នាំនៃវត្តមានកិច្ចព្រមព្រៀងអន្តរជាតិនេះក្រោមការដឹកនាំរបស់បក្សកាន់អំណាច ត្រូវគេមើលឃើញថា បានរងនូវការរំលោភបំពានយ៉ាងធ្ងន់ធ្ងរពីមេដឹកនាំកំពូលនៃប្រទេសនេះ។
ទាក់ទិននឹងទិវានេះ តំណាងសមាគម សហគមន៍ សហព័ន្ធ សហជីព និងអង្គការមិនមែនរដ្ឋាភិបាល បានធ្វើពិធីអបអរសាទរខួបលើកទី៣១ឆ្នាំនៃទិវាកិច្ចព្រមព្រៀងសន្តិភាពទីក្រុងប៉ារីស កាលពីថ្ងៃទី២៣ ខែតុលា ឆ្នាំ២០២២ ក្រោមប្រធានបទ «ធានាការបោះឆ្នោតដោយសេរី និងយុត្តិធម៌ ដើម្បីគោរពសិទ្ធិមនុស្សក្នុងការកំណត់អនាគត និងនយោបាយរបស់ពួកគេ» ក្នុងគោលបំណងរួម ដើម្បីអបអរ និងលើកកម្ពស់ការផ្សព្វផ្សាយកិច្ចព្រមព្រៀងសន្តិភាពទីក្រុងប៉ារីស ស្ដីពីជម្លោះនយោបាយកម្ពុជា។
ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា លោក អាត់ ធន់ បានលើកឡើងថា បើគ្មានកិច្ចព្រមព្រៀងសន្តិភាពទីក្រុងប៉ារីស កម្ពុជាក៏គ្មានទីផ្សារសេរី គ្មានការបោះឆ្នោត គ្មានពហុបក្សដែរ។ ជាងនេះទៅទៀត កិច្ចព្រមព្រៀងនេះក៏ដើម្បីធានានូវសិទ្ធិរបស់ពលរដ្ឋក្នុងសង្គមប្រជាធិបតេយ្យ តាមរយៈនៃការបោះឆ្នោតដែលត្រូវតែធ្វើឡើងដោយសេរី ត្រឹមត្រូវ និងយុត្តិធម៌ថែមទៀតផង។
កិច្ចព្រមព្រៀងសន្តិភាពទីក្រុងប៉ារីស (Paris Peace Accords) គឺជាកិច្ចព្រមព្រៀងមួយស្ដីពីដំណោះស្រាយនយោបាយដើម្បីបញ្ចប់ជម្លោះនៅកម្ពុជា ធ្វើឡើងនៅទីក្រុងប៉ារីស ប្រទេសបារាំង កាលពីថ្ងៃទី២៣ ខែតុលា ឆ្នាំ១៩៩១ ក្នុងគោលបំណងឈានទៅរកការរៀបចំឲ្យមានសន្តិភាពឡើងវិញនៅប្រទេសកម្ពុជា ជំរុញឱ្យប្រទេសកម្ពុជាមានការដឹកនាំតាមបែបលទ្ធិប្រជាធិបតេយ្យ ការពារអធិបតេយ្យ ឯករាជ្យ បូរណភាព និងឯកភាពជាតិសម្រាប់ប្រទេសកម្ពុជាទាំងមូល៕