មន្ត្រីជាន់ខ្ពស់គណបក្សសង្គ្រោះជាតិ អំពាវនាវកុំឱ្យអ្នកនយោបាយខ្មែរយកពលរដ្ឋចូលរួមក្នុងជម្លោះបុគ្គល និងជម្លោះក្រុមគ្រួសាររបស់ខ្លួន ព្រោះគឺជាការបំបែកបំបាក់ផ្ទៃក្នុងជាតិឯងយ៉ាងធ្ងន់ធ្ងរ។
អតីតអ្នកទោសនយោបាយ និងជាមន្ត្រីជាន់ខ្ពស់បក្សប្រឆាំង លោក មាជ សុវណ្ណារ៉ា បានលើកឡើងក្នុងកម្មវិធី Idea Talk នៃសារព័ត៌មាន The Cambodia Daily កាលពីរាត្រីថ្ងៃទី២៧ តុលា ថា ជម្លោះរបស់អ្នកនយោបាយនៅកម្ពុជា នឹងមិនប៉ះពាល់ដល់កិច្ចប្រជុំកំពូលអាស៊ាន-អឺរ៉ុបនៅដើមខែវិច្ឆិកា ខាងមុខនេះទេ ប៉ុន្តែជម្លោះបែកបាក់ផ្ទៃក្នុងជាតិបែបនេះ នឹងធ្វើឱ្យកម្ពុជាបាក់មុខនៅលើឆាកអន្តរជាតិខ្លាំងណាស់ ជាពិសេសខ្លួនកំពុងធ្វើប្រធានអាស៊ានប្តូរវេននៅពេលនេះ។
លោក មាជ សុវណ្ណារ៉ា លើកឡើងថា ចំណែកការអំពាវនាវរបស់មេដឹកនាំបក្សកាន់អំណាច លោក ហ៊ុន សែន ឱ្យប្រជាពលរដ្ឋ ព្រះសង្ឃ ជាពិសេសគណបក្សភ្លើងទៀនចេញសេចក្តីថ្លែងការណ៍ថ្កោលទោសលោក សម រង្ស៊ី នៅពេលនេះ គ្រាន់តែជាវិធីក្នុងការឈ្លោះគ្នាដណ្តើមយកឈ្នះលើគូជម្លោះរបស់ខ្លួនប៉ុណ្ណោះ។ ចំណែកបក្សភ្លើងទៀនក៏មិនបានថ្កោលទោសលោក សម រង្ស៊ី តាមការអំពាវនាវរបស់លោក ហ៊ុន សែន នោះដែរ ដូច្នេះរឿងជម្លោះបុគ្គលផ្ទាល់ខ្លួនរបស់អ្នកដឹកនាំទាំងនោះ គួរទុកឱ្យពួកគេឈ្លោះគ្នាចុះ ព្រោះរឿងនេះមិនមានផលចំណេញដល់សង្គមជាតិឡើយ។
មន្ត្រីជាន់ខ្ពស់គណបក្សសង្គ្រោះជាតិរូបនេះបញ្ជាក់ថា សេចក្តីថ្លែងការណ៍របស់គណបក្សភ្លើងទៀនបានបង្កប់ខ្លឹមសារថ្កោលទោសលោក ហ៊ុន សែន ទៅវិញប៉ុណ្ណោះ ដែលបានរំលេចថា មានតែលោក ហ៊ុន សែន ម្នាក់គត់ដែលជាមេដឹកនាំហ៊ានរំលោភព្រះរាជតួនាទីរបស់ព្រះមហាក្សត្រ និងប្រមាថលើព្រះកិត្តិយស និងព្រះកិត្តិនាមរបស់ព្រះអង្គ។
ចាប់តាំងពីថ្ងៃទី១០ ខែតុលា ឆ្នាំ២០២២ ដែលតុលាការបារាំងប្រកាសសាលក្រមក្នុងជម្លោះរបស់លោក ហ៊ុន សែន និងលោក សម រង្ស៊ី មក បុរសខ្លាំងដែលគេចាត់ទុកថាជាមេដឹកនាំតាមកម្ទេចក្រុមប្រឆាំង លោក ហ៊ុន សែន បានឆ្លើយឆ្លងសម្ដីគ្នាដោយការប្រមាថដល់ពូជអំបូរជាមួយអតីតមេដឹកនាំប្រឆាំង លោក សម រង្ស៊ី រហូតរាលដាលដល់មានការប្រើពាក្យពេចន៍មិនគួរគប្បីលើព្រះមហាក្សត្រខ្មែរថែមទៀត។
ជុំវិញរឿងនេះ លោក ហ៊ុន សែន បានអំពាវនាវឱ្យព្រះសង្ឃ ប្រជាពលរដ្ឋ និងជាពិសេសគណបក្សភ្លើងទៀនដែលគេដឹងថាមានលោក សម រង្ស៊ី បញ្ជាពីក្រោយ បានចេញមុខថ្កោលទោសអ្នកប្រមាថព្រះមហាក្សត្រផងដែរ។
កាលពីថ្ងៃទី២៦ ខែតុលា ឆ្នាំ២០២២ គណបក្សភ្លើងទៀនបានចេញសេចក្តីថ្លែងការណ៍ថា ខ្លួនមិនមានទំនាក់ទំនងនឹងអតីតមេដឹកនាំប្រឆាំង លោក សម រង្ស៊ី នោះទេ។ គណបក្សនេះក៏បានបញ្ជាក់ជំហរដែរថា ខ្លួននឹងថ្កោលទោសបុគ្គលទាំងឡាយណាដែលមានចេតនាប្រមាថព្រះមហាក្សត្រ ឬរំលោភបំពានដល់ព្រះអង្គ ប៉ុន្តែបក្សមួយនេះមិនបានបញ្ជាក់ថា លោក សម រង្ស៊ី ប្រមាថព្រះមហាក្សត្រតាមការអះអាងរបស់លោក ហ៊ុន សែន នោះឡើយ។
អ្នកស្រាវជ្រាវការអភិវឌ្ឍសង្គម បណ្ឌិត សេង សារី បានសរសេរលើគណនីហ្វេសប៊ុករបស់លោកកាលពីថ្ងៃទី២៧ តុលា ថា ការចេញសេចក្តីថ្លែងការណ៍របស់បក្សភ្លើងទៀន តាមការស្នើសុំរបស់លោក ហ៊ុន សែន និងការឆ្លើយតបរបស់មេដឹកនាំបក្សកាន់អំណាច គឺជាឥរិយាបថនយោបាយមួយដែលអាចជួយកាត់បន្ថយកម្តៅនយោបាយដែលកំពុងកើតមានឡើងថ្មីៗនេះយ៉ាងមានប្រសិទ្ធភាព។
លោកអះអាងថា ប្រសិនបើឥរិយាបថនយោបាយបែបនេះត្រូវបានអ្នកនយោបាយប្រើបន្តទៀត នោះបរិយាកាសនយោបាយនៅមុនការបោះឆ្នោត នឹងមានស្ថានភាពល្អប្រសើរ ហើយបើបន្តដល់ក្រោយការបោះឆ្នោត នោះវប្បធម៌សន្ទនានឹងដុះត្រួយឡើងវិញជាមិនខាន។
បណ្ឌិត សេង សារី បញ្ជាក់ថា ទោះបីមធ្យោបាយចរចាមិនមែនជាមធ្យោបាយល្អឥតខ្ចោះ និងមិនអាចធ្វើឱ្យគ្រប់គ្នាសប្បាយចិត្តក៏ដោយ តែវាជាមធ្យោបាយតែមួយគត់ដែលអាចបញ្ចប់វិបត្តិនយោបាយនៅកម្ពុជាបាន។
ប៉ុន្តែអនុប្រធានវេទិកាពលរដ្ឋ លោក ម៉ែន ណាត បានប្រាប់សារព័ត៌មាន The Cambodia Daily ថា សេចក្តីថ្លែងការណ៍របស់បក្សភ្លើងទៀនពិតមែនតែបង្ហាញហេតុផលត្រឹមត្រូវមែន ប៉ុន្តែមិនមែនមានន័យថា បក្សមួយនេះជាបក្សប្រកួតប្រជែងស្មើមុខស្មើមាត់ជាមួយបក្សកាន់អំណាចនោះទេ ហើយលោក ហ៊ុន សែន បានប្រាប់ទៅមេដឹកនាំគណបក្សភ្លើងទៀនឲ្យបញ្ជាក់ជំហរច្បាស់លាស់អំពីការពាក់ព័ន្ធជាមួយលោក សម រង្ស៊ី នោះ ក៏មិនមែនជាការស្នើសុំដែរ ប៉ុន្តែគឺជាការគំរាមកំហែង និងដាក់បទបញ្ជាយ៉ាងជាក់លាក់ ដើម្បីបញ្ចៀសការរំលាយគណបក្សភ្លើងទៀននោះចោលតាមច្បាប់បោះឆ្នោតថ្មីរបស់លោក ហ៊ុន សែន ទៅវិញទេ។ ដូច្នេះ លិខិតរបស់គណបក្សភ្លើងទៀនអាចសម្រួលជាមួយលោក ហ៊ុន សែន បានបន្តិចបន្តួចប៉ុណ្ណោះ ពោលគឺមិនអាចទៅដោះស្រាយបញ្ហាធំដុំបាននោះទេ ឬក៏ឈានទៅដល់ការបង្កើតវប្បធម៌សន្ទនាថ្មីណាមួយឲ្យស្មើមុខស្មើមាត់ជាមួយលោក ហ៊ុន សែន នោះដែរ។
លោក ម៉ែន ណាត អះអាងថា រឿងអយុត្តិធម៌វានៅតែអយុត្តិធម៌ដដែល ដែលគណបក្សភ្លើងទៀនខ្លួនឯងនៅតែស្ទាក់ស្ទើរមិនហ៊ានចេញមុខតវ៉ាពេញលេញផងនោះ។ ជាក់ស្តែង ដូចជាករណីបណ្តឹងលើលោក សុន ឆ័យ អនុប្រធានបក្សភ្លើងទៀន រួមទាំងសកម្មជនរបស់ខ្លួនជាច្រើនរូបទៀត។ លោកបន្តថា ជារួម បក្សភ្លើងទៀនត្រូវបានបង្ខំឲ្យចូលស៊ង និងចូលអន្ទាក់របស់លោក ហ៊ុន សែន កាន់តែជ្រៅ ហើយបក្សមួយនេះនឹងធ្វើអ្វីៗដើម្បីថ្នមចិត្តលោក ហ៊ុន សែន ដើម្បីបានអង្គុយក្នុងរដ្ឋសភាដែលគ្មានយុត្តិធម៌។
ទោះជាបែបនេះក្តី ក្រុមអ្នកសង្កេតការណ៍រិះគន់ថា ការចេញមុខប្រមាថព្រះមហាក្សត្រពីសំណាក់អតីតមេដឹកនាំបក្សប្រឆាំង លោក សម រង្ស៊ី និងការចេញមុខតាមកម្ទេចពីសំណាក់បុរសខ្លាំង លោក ហ៊ុន សែន ចំពោះអ្នកប្រមាថព្រះមហាក្សត្រ គ្រាន់តែបង្ហាញថា ពួកគេជាអ្នកដឹកនាំពូកែខាងបង្កជម្លោះ និងជាអ្នកនយោបាយដែលគ្មានសមត្ថភាពបង្រួបបង្រួមជាតិ ដោះស្រាយបញ្ហាជាតិ និងមិនអាចបម្រើសេចក្ដីត្រូវការរបស់ពលរដ្ឋតែប៉ុណ្ណោះ៕