30 C
Phnom Penh

មេដឹកនាំ​ជុំវិញ​ពិភពលោក​ចូលរួម​រំលែក​ទុក្ខ​ចំពោះ​ឧបទ្ទវហេតុ​នៃ​សោកនាដកម្ម​រត់​ជាន់​គ្នា​នៅ​កូរ៉េ

ដោយ ឌឹ ខេមបូឌា ដេលី

បទវិភាគ

មេដឹកនាំ​ជុំវិញ​ពិភពលោក រួម​ទាំង​លោក​នាយករដ្ឋមន្ត្រី ហ៊ុន សែន ផង បាន​នាំគ្នា​ចូលរួម​រំលែក​មរណទុក្ខ​ជាមួយ​ប្រធានាធិបតី​កូរ៉េ​ខាងត្បូង លោក យូន ស៊ុកយុល (Yoon Suk-yeol) ចំពោះ​ឧបទ្ទវហេតុ​នៃ​សោកនាដកម្ម​រត់​ជាន់​គ្នា​របស់​ពលរដ្ឋ​កូរ៉េ​ខាងត្បូង អំឡុង​ពេល​នៃ​ការ​ប្រារព្ធ​ពិធី​បុណ្យ Halloween នៅ​ក្នុង​សង្កាត់​អ៊ីថេវ៉ុន នៃ​ទីក្រុង​សេអ៊ូល សាធារណរដ្ឋ​កូរ៉េ កាលពី​យប់​ថ្ងៃទី​២៩ ខែ​តុលា ឆ្នាំ​២០២២ នេះ។

ប្រធានាធិបតី​សហរដ្ឋ​អាមេរិក លោក ចូ បៃដិន (Joe Biden) ប្រធានាធិបតី​ចិន លោក ស៊ី ជីនពីង (Xi Jinping) ប្រធានាធិបតី​បារាំង លោក Emmanuel Macron និង​មេដឹកនាំ​ខ្មែរ លោក ហ៊ុន សែន ជាដើម បាន​ចេញ​លិខិត​រំលែក​មរណទុក្ខ​ជូន​ប្រធានាធិបតី​កូរ៉េ​ខាងត្បូង កាលពី​ថ្ងៃទី​៣០ ខែ​តុលា ឆ្នាំ​២០២២ នេះ ដើម្បី​សម្ដែង​នូវ​ទុក្ខ​ក្រៀមក្រំ និង​ក្តី​អាណិត​អាសូរ​ជូន​ចំពោះ​ប្រជាជន​នៃ​សាធារណរដ្ឋ​កូរ៉េ ជាពិសេស​ក្រុម​គ្រួសារ​ដែល​បាត់បង់​មនុស្ស​ជា​ទី​ស្រឡាញ់​ក្នុង​ឧបទ្ទវហេតុ​នៃ​ការ​រត់​ជាន់​គ្នា​នា​ចុង​សប្តាហ៍​កន្លងទៅ​នេះ។

កាលពី​យប់​ថ្ងៃ​សៅរ៍ ទី​២៩ ខែ​តុលា ឆ្នាំ​២០២២ អំឡុង​ពេល​ដែល​ពលរដ្ឋ​កូរ៉េ​ខាងត្បូង ជាពិសេស​យុវវ័យ​ប្រមាណ​ជា ១០​ម៉ឺន​នាក់ កំពុង​ដើរ​លេង​កម្សាន្ត​នៅ​ពេល​រាត្រី​ក្នុង​ទីក្រុង​សេអ៊ូល ដើម្បី​អបអរ​ពិធី​បុណ្យ Halloween ក៏​បង្ក​ឱ្យ​មាន​ឧបទ្ទវហេតុ​រត់​ជាន់​គ្នា​កើតឡើង​ដែល​បណ្តាល​ឱ្យ​មនុស្ស​ប្រុស​ស្រី​ស្លាប់ និង​រង​របួស​ជាច្រើន​នាក់។

ជុំវិញ​ហេតុការណ៍​នេះ អាជ្ញាធរ​កូរ៉េ​ខាងត្បូង បាន​បង្ហាញ​របាយការណ៍​ថា មនុស្ស​យ៉ាងហោច​ណាស់ ១៥៣​នាក់​បាន​ស្លាប់ និង ៨២​នាក់​បាន​រង​របួស ក្នុង​នោះ ១៩​នាក់​បាន​របួស​ធ្ងន់​ផង​ដែរ។

យ៉ាងណាក៏ដោយ មន្ត្រី​ប៉ូលិស​របស់​កូរ៉េ អះអាង​ថា ខ្លួន​កំពុង​បន្ត​ស៊ើប​អង្កេត​ជុំវិញ​ករណី​នេះ​បន្ថែម​ទៀត ដើម្បី​កំណត់​ពី​មូលហេតុ​ពិតប្រាកដ​ដែល​បណ្តាល​ឱ្យ​ឧបទ្ទវហេតុ​នេះ​កើតឡើង។

របាយការណ៍​ដដែល​បញ្ជាក់​ថា ក្នុង​ចំណោម​អ្នក​បាត់បង់​ជីវិត​មាន​ជនបរទេស​ចំនួន ២២​នាក់​ដែល​ភាគច្រើន​ជា​ស្ត្រី ដូចជា​ជនជាតិ​ចិន ជនជាតិ​អ៊ីរ៉ង់ ជនជាតិ​រុស្ស៊ី ជនជាតិ​អាមេរិក ជនជាតិ​បារាំង ជនជាតិ​អូស្ត្រាលី ជនជាតិ​វៀតណាម ជនជាតិ​អ៊ូបេគីស្ថាន ជនជាតិ​ន័រវែស ជនជាតិ​កាហ្សាក់ស្ថាន ជនជាតិ​ស្រីលង្កា ជនជាតិ​ថៃ និង​ជនជាតិ​អូស្ត្រាលី ផង​ដែរ ខណៈ​ជនបរទេស​ម្នាក់​ចុងក្រោយ​មិនទាន់​ត្រូវ​បាន​កំណត់​អត្តសញ្ញាណ​នៅឡើយ។

សោកនាដកម្ម​នៃ​ការ​រត់​ជាន់​គ្នា​នេះ ត្រូវ​គេ​ចាត់ទុក​ថា​ជា​សោកនាដកម្ម​ដ៏​អាក្រក់​បំផុត​នៅ​ក្នុង​ប្រទេស​កូរ៉េ​ខាងត្បូង ចាប់តាំងពី​ការ​លិច​សាឡាង Sewol ក្នុង​អំឡុង​ឆ្នាំ​២០១៤ មក ដែល​បាន​សម្លាប់​មនុស្ស​ចំនួន ៣០៤​នាក់ ដែល​ភាគច្រើន​ជា​សិស្ស​វិទ្យាល័យ។

ជុំវិញ​ឧបទ្ទវហេតុ​នេះ មន្ត្រី​គោល​នយោបាយ​ការបរទេស​របស់​សហភាព​អឺរ៉ុប លោក Josep Borrell បាន​សរសេរ​លើ​បណ្ដាញ​សង្គម​ធ្វីតធឺ​របស់​លោក​កាលពី​ថ្ងៃទី​៣០ ខែ​តុលា ថា លោក​សោកស្ដាយ​ខ្លាំង​ណាស់​ចំពោះ​ព្រឹត្តិការណ៍​ដ៏​អាក្រក់​នេះ ហើយ​ពួក​យើង​ដែល​ជា​សហភាព​អឺរ៉ុប តែងតែ​នៅ​ជាមួយ​ប្រជាជន​កូរ៉េ​ជានិច្ច។

ជុំវិញ​ការ​ស្លាប់​ពលរដ្ឋ​កូរ៉េ​ខាងត្បូង​ក្នុង​ពិធី​បុណ្យ Halloween នេះ រដ្ឋាភិបាល​សាធារណរដ្ឋ​កូរ៉េ​បាន​សម្រេច​ប្រកាស​កាន់ទុក្ខ​រយៈពេល ១​សប្តាហ៍ គឺ​ចាប់ពី​ថ្ងៃ​ចន្ទ ទី​៣១ ខែ​តុលា រហូត​ដល់​ដល់​ថ្ងៃ​សៅរ៍ ទី​៥ ខែ​វិច្ឆិកា ឆ្នាំ​២០២២ ខាងមុខ​នេះ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស