30 C
Phnom Penh

មន្ត្រី​បក្ស​ប្រឆាំង​ថា​អំណាច​រដ្ឋសភា​កម្ពុជា​មាន​តែ​នៅ​លើ​ក្រដាស​តែប៉ុណ្ណោះ

ដោយ ឌឹ ខេមបូឌា ដេលី

បទវិភាគ

មន្ត្រី​ជាន់ខ្ពស់​គណបក្ស​សង្គ្រោះ​ជាតិ ព្រមាន​ថា រដ្ឋសភា​ឯក​បក្ស​របស់​បក្ស​កាន់​អំណាច​សព្វថ្ងៃ​មាន​តែ​នៅ​លើ​ក្រដាស​ប៉ុណ្ណោះ ព្រោះ​លោក ហ៊ុន សែន ជា​មេ​បក្ស​ដែល​មាន​សិទ្ធិ​ដក​សមាជិក​បក្ស​ដែល​ជា​សមាជិក​រដ្ឋសភា។

អតីត​អ្នកទោស​នយោបាយ និង​ជា​មន្ត្រី​ជាន់ខ្ពស់​គណបក្ស​សង្គ្រោះ​ជាតិ លោក មាជ សុវណ្ណារ៉ា បាន​ប្រាប់​សារព័ត៌មាន The Cambodia Daily នៅ​ថ្ងៃទី​១ វិច្ឆិកា នេះ​ថា នៅ​កម្ពុជា ការ​កាន់​អំណាច​របស់​លោក ហ៊ុន សែន ធំ​លើស​អំណាច​រដ្ឋសភា អំណាច​រដ្ឋាភិបាល និង​អំណាច​តុលាការ​ទៅ​ទៀត។ ដូច្នេះ បើ​ទោះបីជា​កម្ពុជា​អនុវត្ត​តាម​របប​ប្រជាធិបតេយ្យ​ដែល​ព្រះមហាក្សត្រ​អាស្រ័យ​ធម្មនុញ្ញ​ដូច​ប្រទេស​អង់គ្លេស ក៏ដោយ ប៉ុន្តែ​ខ្លឹមសារ​ពិតប្រាកដ គឺ​មិន​ដូច​គ្នា​នោះ​ឡើយ ព្រោះ​ថា​អង់គ្លេស​អនុវត្ត​តាម​ច្បាប់ ប៉ុន្តែ​កម្ពុជា​អនុវត្ត​តាម​បក្ស​ប៉ុណ្ណោះ។

លោក មាជ សុវណ្ណារ៉ា លើកឡើង​ថា ស្ថាប័ន​កំពូល​របស់​ជាតិ​ទាំង​បី គឺ​ស្ថាប័ន​រដ្ឋសភា ស្ថាប័ន​រដ្ឋាភិបាល និង​ស្ថាប័ន​តុលាការ ត្រូវ​បាន​បក្ស​កាន់​អំណាច​ក្តោប​ក្តាប់​ទាំងស្រុង​តាមរយៈ​នៃ​ការ​តែងតាំង​តួនាទី​មន្ត្រី​ជាន់ខ្ពស់​របស់​ពួកគេ​ចូល​ទៅ​គ្រប់គ្រង​ស្ថាប័ន​ទាំងនោះ ជាពិសេស​លោក ហ៊ុន សែន បាន​គ្រប់គ្រង​ស្ថាប័ន​នីតិប្រតិបត្តិ លោក ហេង សំរិន គ្រប់គ្រង​ស្ថាប័ន​នីតិប្បញ្ញត្តិ លោក ឌិត មុន្ទី គ្រប់គ្រង​ស្ថាប័ន​តុលាការ ចំណែក​លោក សាយ ឈុំ គ្រប់គ្រង​ស្ថាប័ន​ព្រឹទ្ធសភា ជាដើម។

មន្ត្រី​ជាន់ខ្ពស់​គណបក្ស​សង្គ្រោះ​ជាតិ​រូប​នេះ​បញ្ជាក់​ថា អំណាច​រដ្ឋសភា​កម្ពុជា​មិន​អាច​ប្រៀបធៀប​ជាមួយ​អំណាច​រដ្ឋសភា​របស់​អង់គ្លេស​បាន​ទេ ព្រោះ​ប្រទេស​អង់គ្លេស​គ្មាន​បក្ស​ណា​មួយ​អាច​គ្រប់គ្រង​លើ​ស្ថាប័ន​ជាតិ​របស់​គេ​បាន​ឡើយ ប៉ុន្តែ​កម្ពុជា​វិញ បក្ស​កាន់​អំណាច​បាន​ប្រើ​ឥទ្ធិពល​របស់​ខ្លួន​គ្រប់គ្រង​លើ​ក្រសួង​ស្ថាប័ន​ជាតិ​គ្រប់​ច្រក​ទាំងអស់។ លោក​បន្ថែម​ថា ដោយសារតែ​បញ្ហា​នេះ​ហើយ​ទើប​កម្ពុជា​ជួប​វិបត្តិ​ជាប់​គាំង​នយោបាយ​មិន​ចេះ​ចប់​មិន​ចេះ​ហើយ​ដូច​សព្វថ្ងៃ​នេះ។

កាលពី​ថ្ងៃទី​២៨ ខែ​កក្កដា ឆ្នាំ​២០២២ រដ្ឋសភា​ឯក​បក្ស​នៃ​បក្ស​កាន់​អំណាច​របស់​លោក ហ៊ុន សែន បាន​អនុម័ត​កែប្រែ​រដ្ឋធម្មនុញ្ញ​ចំនួន ៨​មាត្រា ដូចជា​មាត្រា ១៩​ថ្មី(មួយ) មាត្រា​៨៩ និង​មាត្រា ១១៩​ថ្មី(មួយ) ជាដើម ក្រោម​ហេតុផល​ថា ដើម្បី​បំពេញ​ភាព​ចន្លោះ​ប្រហោង​របស់​ច្បាប់​នេះ។

យ៉ាងណាក៏ដោយ ការ​កែប្រែ​ខ្លឹមសារ​នៃ​រដ្ឋធម្មនុញ្ញ​ដល់​ទៅ ៨​មាត្រា​នេះ ត្រូវ​គេ​មើល​ឃើញ​ថា​ជា​ចេតនា​ដើម្បី​ទប់ស្កាត់​សំឡេង​ប្រឆាំង​ណា​មួយ​ពី​រដ្ឋសភា ក្នុង​ពេល​បង្កើត​រដ្ឋាភិបាល​របស់​បក្ស​កាន់​អំណាច​ប៉ុណ្ណោះ។ ជាក់ស្តែង បើ​ប្រៀបធៀប​លើ​ខ្លឹមសារ​នៃ​មាត្រា​១១៩​ចាស់ ចែង​ថា តាម​សេចក្តី​ស្នើសុំ​ពី​ប្រធាន​ដោយ​មាន​មតិ​ឯកភាព​ពី​អនុប្រធាន​ទាំង​ពីរ​នៃ​រដ្ឋសភា ព្រះមហាក្សត្រ​ទ្រង់​ចាត់តាំង​វរជន​មួយ​រូប​ក្នុង​ចំណោម​តំណាងរាស្ត្រ​នៃ​គណបក្ស​ដែល​ឈ្នះ​ឆ្នោត ឲ្យ​បង្កើត​រាជរដ្ឋាភិបាល។

ប៉ុន្តែ​ខ្លឹម​ដែល​បាន​កែប្រែ​ថ្មី​នេះ បាន​ចែង​ផ្ទុយ​ពី​ខ្លឹមសារ​ចាស់​ទៅវិញ ដោយ​កំណត់​ថា តាម​សេចក្តី​ស្នើសុំ​ពី​គណបក្ស​ដែល​មាន​អាសនៈ​ច្រើន​ជាងគេ​ក្នុង​រដ្ឋសភា ព្រះមហាក្សត្រ​ទ្រង់​ចាត់តាំង​វរជន​មួយ​រូប​ជា​នាយករដ្ឋមន្ត្រី​ឲ្យ​បង្កើត​រាជរដ្ឋាភិបាល។

ក្នុង​ខ្លឹមសារ​នេះ បាន​បង្ហាញ​ពី​ការ​ប្រគល់​សិទ្ធិ​អំណាច​ទាំងស្រុង​លើ​មេដឹកនាំ​គណបក្ស​កាន់​អំណាច​ដែល​មាន​ចេតនា​បំបិទ​ចោល​នូវ​ការ​ជំទាស់​របស់​អនុប្រធាន​រដ្ឋសភា​ណា​មួយ ដែល​អាច​កើតឡើង​នៅ​ពេល​បង្កើត​រដ្ឋាភិបាល​ថ្មី។

ទាក់ទិន​នឹង​បញ្ហា​នេះ កាល​ថ្ងៃទី​១៣ ខែ​កញ្ញា ឆ្នាំ​២០២២ លោក ហ៊ុន សែន ធ្លាប់​បាន​គំរាម​ថា លោក​មាន​សិទ្ធិ​ដក​តំណែង​សមាជិក​បក្ស​កាន់​អំណាច​គ្រប់​ពេល​ទាំងអស់ ព្រោះ​ថា​នៅ​កម្ពុជា ពលរដ្ឋ​បោះឆ្នោត​ឲ្យ​គណបក្ស ដូច្នេះ​បក្ស​ត្រូវតែ​មាន​សិទ្ធិ​ពេញលេញ​ក្នុង​ការ​ដក​អ្នក​ទាំងនោះ។ ក្នុង​ន័យ​នេះ សមាជិក​រដ្ឋសភា​ដែល​ជា​សមាជិក​បក្ស​កាន់​អំណាច ក៏​នឹង​ត្រូវ​ដក​ចេញពី​តំណែង​ដែរ បើ​ពួកគេ​មិន​ធ្វើ​តាម​បញ្ជា​របស់​លោក​នោះ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស