ក្រុមស្ត្រីថ្ងៃសុក្រ ស្នើឲ្យមន្ត្រីស្ថានទូតអាមេរិកប្រចាំនៅកម្ពុជា ជួយសម្របសម្រួលឲ្យពួកគេបានជួបជាមួយប្រធានាធិបតីអាមេរិក លោក ចូ បៃដិន ដើម្បីបង្ហាញអំពីទុក្ខកង្វល់ និងសុំឲ្យជួយជំរុញទៅរដ្ឋាភិបាលកម្ពុជាដោះលែងស្វាមី និងអ្នកទោសនយោបាយផ្សេងទៀតដែលកំពុងជាប់ឃុំ។
ការស្នើសុំរបស់ក្រុមស្ត្រីថ្ងៃសុក្រនេះ ស្របពេលដែលប្រធានាធិបតីអាមេរិក លោក ចូ បៃដិន នឹងមកបំពេញទស្សនកិច្ចនៅកម្ពុជា ចាប់ពីថ្ងៃទី១២ និងទី១៣ ខែវិច្ឆិកា ដើម្បីចូលរួមកិច្ចប្រជុំកំពូលអាស៊ាន-អាមេរិក នាសប្តាហ៍ក្រោយនេះ។
ភរិយារបស់លោក កាក់ កុម្ភារ ដែលជាសកម្មជនបក្សសង្គ្រោះជាតិ គឺអ្នកស្រី ព្រំ ចាន់ថា បានប្រាប់ក្រុមអ្នកសារព័ត៌មានអំឡុងពេលដែលពួកគេប្រមូលផ្ដុំគ្នានៅមុខស្ថានទូតសហរដ្ឋអាមេរិកប្រចាំនៅកម្ពុជា ថា ការដែលសុំឲ្យមន្ត្រីទូតនេះជួយ ព្រោះពួកគាត់ចង់ជួបជាមួយប្រធានាធិបតីសហរដ្ឋអាមេរិក លោក ចូ បៃដិន ដោយផ្ទាល់ ដើម្បីប្រាប់ពីទុក្ខកង្វល់គ្រួសារពួកគាត់កំពុងជួប។
លោកស្រីក៏ចង់ស្នើសុំឲ្យលោក ចូ បៃដិន ជួយជំរុញទៅរដ្ឋាភិបាលកម្ពុជា ដោះលែងស្វាមី និងសាច់ញាតិ ព្រមទាំងអ្នកទោសនយោបាយផ្សេងទៀតដែលកំពុងជាប់ពន្ធនាគារទាំងអយុត្តិធម៌ ដោយសារការចោទប្រកាន់របស់រដ្ឋាភិបាលកម្ពុជា។
ក្រៅពីប្រមូលផ្ដុំ និងលើកបដាអមជាមួយនឹងសម្រែកទាមទារឲ្យដោះលែងអ្នកទោសនយោបាយនោះ ក្រុមស្ត្រីថ្ងៃសុក្រក៏បាននាំគ្នាព្យាយាមដើរលើកបដា ប៉ុន្តែត្រូវក្រុមប្រជាការពារខណ្ឌដូនពេញ រារាំង និងរុញច្រានពួកគេផងដែរ។
សារព័ត៌មាន ឌឹ ខេមបូឌា ដេលី នៅពុំទាន់អាចសុំការបញ្ជាក់ជុំវិញករណីនេះពីតំណាងស្ថានទូតអាមេរិកប្រចាំនៅកម្ពុជា និងអ្នកនាំពាក្យរបស់រដ្ឋបាលរាជធានីភ្នំពេញ លោក ម៉េត មាសភក្តី បាននៅឡើយទេ។
ការស្វែងរកកិច្ចអន្តរាគមន៍របស់ភរិយាសកម្មជនគណបក្សសង្គ្រោះជាតិនាពេលនេះ ធ្វើឡើងបន្ទាប់ពីស្វាមីពួកគេ និងអ្នកទោសនយោបាយផ្សេងទៀតត្រូវបានតុលាការកម្ពុជាកាត់ទោសឲ្យជាប់ពន្ធនាគារចន្លោះពី ៣ ទៅ ៧ឆ្នាំ ក្រោមបទចោទ «ញុះញង់ និងរួមគំនិតក្បត់» ពាក់ព័ន្ធនឹងដំណើរវិលត្រឡប់មកកម្ពុជារបស់លោក សម រង្ស៊ី កាលពីថ្ងៃទី៩ ខែវិច្ឆិកា ឆ្នាំ២០១៩។
ចំណែកអ្នកខ្លះទៀត ត្រូវបានសមត្ថកិច្ចចាប់ឃុំខ្លួនពាក់ព័ន្ធនឹងដំណើរវិលត្រឡប់ចូលកម្ពុជាលើកទី២ របស់អ្នកស្រី មូរ សុខហួរ កាលពីដើមខែមករា ឆ្នាំ២០២១ ដោយពួកគេត្រូវបានចោទប្រកាន់ពីបទ «រួមគំនិតក្បត់»៕