27 C
Phnom Penh

អ្នក​ឃ្លាំមើល​រិះគន់​ថា​កម្ពុជា​ក្នុង​ឋានៈ​ប្រធាន​អាស៊ាន​ដឹកនាំ​ការងារ​បរាជ័យ បាន​ត្រឹម​អួត​នាឡិកា​ដៃ

ដោយ ឌឹ ខេមបូឌា ដេលី

បទវិភាគ

ក្រុម​អ្នក​សង្កេតការណ៍​រិះគន់​ប្រមុខ​រដ្ឋាភិបាល​កម្ពុជា លោក ហ៊ុន សែន ថា​ចាប់តាំងពី​បាន​ទទួល​តួនាទី​ជា​ប្រធាន​អាស៊ាន​ឆ្នាំ​២០២២ រហូត​ដល់​ប្រគល់​ញញួរ​ឱ្យ​ទៅ​ប្រធាន​អាស៊ាន​ថ្មី បាន​ត្រឹមតែ​អួត​ពី​ការ​ប្រគល់​វត្ថុ​អនុស្សាវរីយ៍​ជា​នាឡិកា​ដៃ​ឱ្យ​មេដឹកនាំ​អាស៊ាន​ប៉ុណ្ណោះ ខណៈ​គ្រប់​កិច្ចការ​របស់​អាស៊ាន​បាន​ទទួល​បរាជ័យ​ទៅ​ហើយ​នោះ។

អនុប្រធាន​វេទិកា​ពលរដ្ឋ លោក ម៉ែន ណាត បាន​ប្រាប់​សារព័ត៌មាន The Cambodia Daily នៅ​ថ្ងៃទី​៨ វិច្ឆិកា នេះ​ថា លោក ហ៊ុន សែន ប្រឹង​អួត​នាឡិកា​ដៃ​ដែល​គាត់​នឹង​ចែក​ឱ្យ​មេដឹកនាំ​អាស៊ាន ថា​ខ្មែរ​ធ្វើ​បាន ប៉ុន្តែ​នាឡិកា​នេះ​គ្រាន់តែ​យក​បំណែក​អេឡិចត្រូនិក​ពី​បរទេស​មក​ផ្គុំ​តែប៉ុណ្ណោះ មិនមែន​កម្ពុជា​មាន​រោងចក្រ​ផលិត​ឧបករណ៍​អេឡិចត្រូនិក​ណា​មួយ​បាន​នោះ​ទេ។ ដូច្នេះ បើ​និយាយ​ថា ខ្មែរ​ធ្វើ​បាន ដោយសារ​នាឡិកា​នេះ គឺជា​រឿង​ដែល​គួរ​ឱ្យ​អស់​សំណើច​ទៅវិញ​ប៉ុណ្ណោះ ព្រោះ​គាត់​បរាជ័យ​រឿង​ដឹកនាំ​អាស៊ាន ប៉ុន្តែ​មក​ប្រឹង​អួត​នាឡិកា​ដែល​មិនមែន​ជា​តួនាទី​របស់​គាត់ និង​មិន​ជាប់​ពាក់ព័ន្ធ​អ្វី​បន្តិច​សោះ​ជាមួយ​នឹង​កិច្ចការ​របស់​អាស៊ាន។

បញ្ញវន្ត​ខ្មែរ​រូប​នេះ​អះអាង​ថា បើ​លោក ហ៊ុន សែន ចង់​អួត​ថា​ខ្មែរ​ធ្វើ​បាន ទាល់តែ​កម្ពុជា​អាច​ដោះស្រាយ​វិបត្តិ​នៅ​ភូមា​ឱ្យ​ចប់​សព្វគ្រប់​ជា​មុន​សិន ព្រោះ​ថា​វិបត្តិ​នៅ​ភូមា​ជា​បញ្ហា​ដ៏​ធំ​មួយ​ដែល​មេដឹកនាំ​អាស៊ាន​រង់ចាំ​មើល​វិធីសាស្ត្រ​ក្នុង​ការ​ដោះស្រាយ​របស់​កម្ពុជា​គ្រប់ៗ​គ្នា ប៉ុន្តែ​នៅ​ទីបំផុត កម្ពុជា​ត្រូវ​បរាជ័យ​ទាំងស្រុង។

លោក ម៉ែន ណាត លើកឡើង​ថា ក្រោយ​ថ្ងៃ​ប្រគល់​ញញួរ​អាស៊ាន​ឱ្យ​ទៅ​ប្រធានាធិបតី​ឥណ្ឌូនេស៊ី នៅ​ថ្ងៃ​បញ្ចប់​នៃ​កិច្ចប្រជុំ​អាស៊ាន​ខាងមុខ​នេះ លោក ហ៊ុន សែន នឹង​អស់​ភារកិច្ច​ត្រូវ​ធ្វើ​ក្នុង​ការ​ដឹកនាំ​អាស៊ាន​បន្ត​ទៀត​ហើយ ដូច្នេះ​គេ​អាច​វាយតម្លៃ​ពី​កិច្ចការ​របស់​លោក ហ៊ុន សែន ក្នុង​នាម​ជា​ប្រធាន​អាស៊ាន​នៅ​ឆ្នាំ​២០២២ នេះ​ថា លទ្ធផល​ការងារ​របស់​គាត់​ពេញ​មួយ​ឆ្នាំ​នេះ គឺ​បាន​ត្រឹម​បង្ក​ភាព​ស្មុគស្មាញ​ដល់​អាស៊ាន​ដែល​នាំ​ឱ្យ​អាស៊ាន​ខូច​នយោបាយ​ការទូត និង​បែកបាក់​ផ្ទៃក្នុង​របស់​អាស៊ាន​ប៉ុណ្ណោះ។

អនុប្រធាន​វេទិកា​ពលរដ្ឋ​រូប​នេះ​ព្យាករ​ថា តាម​សមត្ថភាព​របស់​លោក ហ៊ុន សែន កុំ​ថា​ឡើយ​វិបត្តិ​នៅ​ភូមា គាត់​មិន​អាច​ដោះស្រាយ​បាន សូម្បី​ក្រម​ប្រតិបត្តិ​សម្រាប់​សមុទ្រ​ចិន​ខាងត្បូង ឬ​ហៅ​កាត់​ថា COC ដែល​ជាប់​គាំង​ដោយសារ​គាត់​កាលពី ១០​ឆ្នាំ​មុន ក៏​គាត់​នៅតែ​មិន​អាច​ដោះស្រាយ​បាន​ផង​នៅ​ក្នុង​កិច្ចប្រជុំ​កំពូល​អាស៊ាន​ខាងមុខ​នេះ បើ​ទោះបីជា​គាត់​ធ្លាប់​អះអាង​ថា​នឹង​ទម្លាយ​ក្រម​ប្រតិបត្តិ​សមុទ្រ​ចិន​ខាងត្បូង ពេល​ខ្លួន​ដឹកនាំ​អាស៊ាន​កាល​ពី​ចុងខែ​ធ្នូ ឆ្នាំ​២០២១ ក៏ដោយ។

កាលពី​ថ្ងៃទី​៧ ខែ​វិច្ឆិកា ឆ្នាំ​២០២២ បុរស​ខ្លាំង លោក ហ៊ុន សែន បាន​អះអាង​ថា លោក​នឹង​ពាក់​នាឡិកា​ដែល​មាន​ផ្លាក​សញ្ញា​អាស៊ាន​ផលិត​នៅ​កម្ពុជា​មុន​គេ សម្រាប់​ជា​វត្ថុ​អនុស្សាវរីយ៍​ជូន​មេដឹកនាំ​ដែល​អញ្ជើញ​មក​ចូលរួម​ប្រជុំ​កំពូល​អាស៊ាន​នៅ​កម្ពុជា ឆ្នាំ​២០២២ នៅ​សប្តាហ៍​ក្រោយ​នេះ។

លោក ហ៊ុន សែន បញ្ជាក់​ថា នាឡិកា​ដៃ​ដែល​កម្ពុជា​ផលិត​ជូន​មេដឹកនាំ​អាស៊ាន​ជា​វត្ថុ​អនុស្សាវរីយ៍​មាន​ចំនួន ២៥​គ្រឿង ដែល​ជា​ការ​បង្ហាញ​ឱ្យ​ឃើញ​ពី​ផ្នែក​មួយ​នៃ​ការ​រីកចម្រើន​ខាង​វិទ្យាសាស្ត្រ និង​បច្ចេកទេស​របស់​កម្ពុជា​ផង​ដែរ។

កាលពី​អំឡុង​ខែ​ធ្នូ ឆ្នាំ​២០២១ មេដឹកនាំ​បក្ស​កាន់​អំណាច លោក ហ៊ុន សែន អះអាង​ថា លោក​នឹង​ធ្វើ​ឱ្យ​ពិភពលោក​ភ្ញាក់ផ្អើល​អំពី​យុទ្ធសាស្ត្រ​របស់​លោក​ក្នុង​ការ​ដោះស្រាយ​វិបត្តិ​នៅ​ភូមា នៅ​ពេល​ដែល​លោក​ឡើង​ធ្វើ​ជា​ប្រធាន​អាស៊ាន​ប្តូរ​វេន​ឆ្នាំ​២០២២ ប៉ុន្តែ​ចាប់ពី​លោក​ធ្វើ​ជា​ប្រធាន​អាស៊ាន​តាំងពី​ដើម​ខែ​មករា ឆ្នាំ​២០២២ មក វិបត្តិ​ភូមា នៅតែ​បន្ត​កើតមាន​ដដែល ហើយ​មាន​សភាព​ធ្ងន់ធ្ងរ​ជាង​មុន​ថែម​ទៀត។

កាលពី​ថ្ងៃទី​៤ ខែ​វិច្ឆិកា ឆ្នាំ​២០២២ ក្រសួង​ការបរទេស និង​សហប្រតិបត្តិការ​អន្តរជាតិ​កម្ពុជា បាន​ចេញ​សេចក្តី​ប្រកាស​ព័ត៌មាន​នៅ​ក្នុង​ពិធី​បិទ​បញ្ចប់​ជា​ផ្លូវការ​នៃ​កិច្ចប្រជុំ​កំពូល​អាស៊ាន​នៅ​ថ្ងៃទី​១៣ ខែ​វិច្ឆិកា ខាងមុខ​នេះ លោក ហ៊ុន សែន ដែល​ជា​ប្រធាន​អាស៊ាន​ប្តូរ​វេន​ឆ្នាំ​២០២២ នឹង​ប្រគល់​ញញួរ​ប្រធាន​អាស៊ាន​ទៅ​ឱ្យ​ប្រធានាធិបតី​ឥណ្ឌូនេស៊ី លោក ចូកូ វីដូដូ ដែល​នឹង​ធ្វើ​ជា​ប្រធាន​អាស៊ាន​ប្តូរ​វេន​នៅ​ឆ្នាំ​២០២៣ ខាងមុខ​នេះ ដើម្បី​ដោះស្រាយ​បញ្ហា​នានា​ដែល​ប្រធាន​អាស៊ាន​ឆ្នាំ​២០២២ លោក ហ៊ុន សែន ដោះស្រាយ​មិន​ចេញ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស