26 C
Phnom Penh

លោក ហ៊ុន ម៉ានី ថា​កម្ពុជា​ជា​ប្រទេស​គោរព​សិទ្ធិមនុស្ស​ប្រជាធិបតេយ្យ​និង​មាន​នីតិរដ្ឋ​យ៉ាង​ពិតប្រាកដ

ដោយ ឌឹ ខេមបូឌា ដេលី

បទវិភាគ

លោក ហ៊ុន ម៉ានី កូនប្រុស​បង្កើត​របស់​លោក ហ៊ុន សែន ដែល​តែង​ចង់​ធ្វើជា​នាយករដ្ឋមន្ត្រី​ដែរ​នោះ អះអាង​ថា ក្រោម​ការ​ដឹកនាំ​ដ៏​ឈ្លាសវៃ និង​ប៉ិនប្រសព្វ​របស់​ឪពុក​លោក កម្ពុជា​គឺជា​ប្រទេស​មាន​ការ​អភិវឌ្ឍ​លើ​គ្រប់​វិស័យ ដែល​គោរព​សិទ្ធិមនុស្ស ប្រជាធិបតេយ្យ និង​មាន​នីតិរដ្ឋ​យ៉ាង​ពិតប្រាកដ។

លោក ហ៊ុន ម៉ានី បាន​សរសេរ​លើ​គណនី​ហ្វេសប៊ុក​របស់​លោក​កាលពី​ថ្ងៃ​ព្រហស្បតិ៍ ទី​១០ វិច្ឆិកា ថា កម្ពុជា​បាន​ប្រែ​ក្លាយ​ពី​ប្រទេស​ដែល​ធ្លាប់​បាន​ញាំញី​ដោយ​ផេះផង់​នៃ​ភ្លើង​សង្គ្រាម និង​ជម្លោះ​ផ្ទៃក្នុង​ដ៏​រ៉ាំរ៉ៃ ភាព​អត់ឃ្លាន ការ​រំលោភ​សិទ្ធិមនុស្ស មក​ជា​ប្រទេស​ដែល​មាន​ការ​អភិវឌ្ឍ​លើ​គ្រប់​វិស័យ ការ​គោរព​សិទ្ធិមនុស្ស ប្រជាធិបតេយ្យ រហូត​បាន​ក្លាយ​ជា​ប្រទេស​មាន​នីតិរដ្ឋ​យ៉ាង​ពិតប្រាកដ។

លោក ហ៊ុន ម៉ានី លើកឡើង​ថា កម្ពុជា​កំពុង​ដើរ​លើ​ផ្លូវ​ដ៏​ត្រឹមត្រូវ​បំផុត ក្រោម​ការ​ដឹកនាំ​ដ៏​ឈ្លាសវៃ និង​ប៉ិនប្រសព្វ​របស់​លោក ហ៊ុន សែន ដែល​ធ្វើ​ឲ្យ​កម្ពុជា​មាន​សន្តិភាព​ពេញលេញ​រហូត​មាន​លទ្ធភាព​គ្រប់គ្រាន់​ក្នុង​ការ​ទទួល​ស្វាគមន៍​នូវ​រាល់​វត្តមាន​របស់​ថ្នាក់​ដឹកនាំ​កំពូលៗ​របស់​ពិភពលោក និង​តំបន់ ក៏ដូចជា​ប្រធាន​ស្ថាប័ន និង​អង្គការ​អន្តរជាតិ​ធំៗ​នានា​រហូត​មក។

តំណាងរាស្ត្រ​មណ្ឌល​ខេត្ត​កំពង់ស្ពឺ ដែល​ខកបំណង​មិន​បាន​ជាប់​ជា​បេក្ខជន​នាយករដ្ឋមន្ត្រី​រូប​នេះ​បញ្ជាក់​ថា សព្វថ្ងៃ​នេះ កម្ពុជា​មាន​សិទ្ធិ និង​អំណាច​ស្មើ​មុខ​ស្មើ​មាត់​ដូច​បណ្តា​ប្រទេស​នានា​ក្នុង​ពិភពលោក​ដែរ ដូចជា​សិទ្ធិ​ក្នុង​ការ​ផ្ដួចផ្ដើម​កំណត់​ចក្ខុវិស័យ​បង្កើត​យន្តការ​ដោះស្រាយ​បញ្ហា​តំបន់ និង​ពិភពលោក ជាដើម។ ដូច្នេះ កម្ពុជា​ត្រូវតែ​ពួត​ដៃ​គ្នា​ក្នុង​ការ​រក្សា​សន្តិភាព និង​បន្ត​ជំរុញ​នូវ​ភាព​រុងរឿង​នេះ​ត​ទៅ​មុខ​ទៀត ដើម្បី​ជាតិ និង​មាតុភូមិ​កម្ពុជា​ទាំងមូល។

ស្ថាបនិក​អង្គការ​អភិវឌ្ឍន៍​ផ្នត់គំនិត លោក សេក សុជាតិ បាន​ប្រាប់​សារព័ត៌មាន The Cambodia Daily នៅ​ថ្ងៃទី​១១ វិច្ឆិកា នេះ​ថា ការ​លើកឡើង​របស់​លោក ហ៊ុន ម៉ានី មិន​បាន​ឆ្លុះបញ្ចាំង​ពី​ការពិត​ជាក់ស្តែង​ដែល​ពលរដ្ឋ​ខ្មែរ​កំពុង​តែ​ទទួល​រង​នូវ​ការ​ធ្វើ​ទុក្ខបុកម្នេញ​ពី​សំណាក់​រដ្ឋាភិបាល​ឯក​បក្ស កំពុង​ដឹកនាំ​ដោយ​បក្ស​ប្រជាជន​កម្ពុជា​សព្វថ្ងៃ​នេះ​ទេ។ ពួកគេ​តែង​ត្រូវ​បាន​ចាប់​ឃុំ​ខ្លួន​នៅ​ពេល​ប្រើ​សិទ្ធិ​បញ្ចេញមតិ​រិះគន់​រដ្ឋាភិបាល​កម្ពុជា​កន្លងមក។

លោក សេក សុជាតិ លើកឡើង​ថា បើ​និយាយ​អំពី​ការ​ទៅ​ចូលរួម​របស់​មេដឹកនាំ​នានា​នៅ​កម្ពុជា​នៅ​ពេលនេះ មិនមែន​មកពី​រដ្ឋាភិបាល​កម្ពុជា​ដឹកនាំ​បាន​ល្អ​នោះ​ទេ ប៉ុន្តែ​ដោយសារ​កម្ពុជា​គឺជា​សមាជិក​អាស៊ាន និង​ត្រូវ​ដឹកនាំ​អាស៊ាន​បើក​កិច្ចប្រជុំ​ក្នុង​នាម​ខ្លួន​ជា​ប្រធាន​ប៉ុណ្ណោះ។

លោក​បន្ត​ថា បើ​ទោះបីជា​កម្ពុជា​បាន​ធ្វើ​ឱ្យ​ខូច​សណ្ដាប់ធ្នាប់​គោលការណ៍​របស់​អាស៊ាន​ឱ្យ​មាន​ភាព​ច្របូកច្របល់​ក៏ដោយ ក៏​មេដឹកនាំ​ទាំងនោះ​នៅតែ​ត្រូវ​ទៅ​ចូលរួម​កិច្ចប្រជុំ​នេះ​ដែរ ព្រោះ​ថា​ពួកគេ​នឹង​មិន​បណ្តែតបណ្តោយ​ឱ្យ​បញ្ហា​នានា​កើតឡើង​ធ្វើ​ឱ្យ​អាស៊ាន​ជាប់​គាំង​នោះ​ឡើយ។

អ្នក​ស្រាវជ្រាវ​ការ​អភិវឌ្ឍ​សង្គម​រូប​នេះ​បញ្ជាក់​ថា ដើម្បី​ធានា​ថា​កម្ពុជា​ពិត​ជា​ប្រទេស​គោរព​សិទ្ធិមនុស្ស ប្រជាធិបតេយ្យ និង​មាន​នីតិរដ្ឋ​មែន​នោះ ទាល់តែ​រដ្ឋាភិបាល​កម្ពុជា​បើក​លំហ​សេរីភាព​បញ្ចេញមតិ ដោះលែង​អ្នកទោស​មនសិការ បើក​លំហ​សេរីភាព​អ្នក​នយោបាយ និង​ធានា​ឱ្យ​បាន​នូវ​ការ​អនុវត្ត​សិទ្ធិ​មូលដ្ឋាន​របស់​ប្រជាពលរដ្ឋ​ដូច​មាន​ចែង​ក្នុង​រដ្ឋធម្មនុញ្ញ ជាដើម។

កាលពី​ថ្ងៃទី​២៩ ខែ​មីនា ឆ្នាំ​២០២២ អ្នក​រាយការណ៍​ពិសេស​របស់​អង្គការ​សហប្រជាជាតិ​ទទួល​បន្ទុក​សិទ្ធិមនុស្ស​ប្រចាំ​នៅ​កម្ពុជា បាន​លើកឡើង​នៅ​ក្នុង​កិច្ចប្រជុំ​ក្រុមប្រឹក្សា​សិទ្ធិមនុស្ស​អង្គការ​សហប្រជាជាតិ​លើក​ទី​៤៩ នៅ​ទីក្រុង​ហ្សឺណែវ នៃ​ប្រទេស​ស្វីស ថា ទិដ្ឋភាព​សិទ្ធិមនុស្ស និង​លទ្ធិប្រជាធិបតេយ្យ​នៅ​កម្ពុជា​នៅតែ​បង្ក​ការ​ព្រួយបារម្ភ​ធ្ងន់ធ្ងរ​ដដែល ព្រោះ​ថា​លំហ​សេរីភាព​របស់​ពលរដ្ឋ និង​នយោបាយ​នៅ​កម្ពុជា​កាន់តែ​រួម​តូច និង​កំពុង​ដើរ​ថយ​ក្រោយ ដោយសារតែ​គ្រប់គ្រង​តាម​បែប​ឯក​បក្ស​សព្វថ្ងៃ​នេះ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស