26.8 C
Phnom Penh

កូដករ​ណាហ្គា​ស្នើ​មេដឹកនាំ​ប្រទេស​ប្រជុំ​អាស៊ាន​ជំរុញ​រដ្ឋាភិបាល​កម្ពុជា​ដោះស្រាយ​វិវាទ​ការងារ

ដោយ ឌឹ ខេមបូឌា ដេលី

បទវិភាគ

ក្រុម​កូដករ​ជិត ១០០​នាក់ នា​ថ្ងៃ​សុក្រ ទី​១១ វិច្ឆិកា នេះ បាន​នាំគ្នា​បន្ត​ចេញ​ធ្វើ​កូដកម្ម និង​ស្នើ​ឲ្យ​មេដឹកនាំ​នៃ​បណ្ដា​ប្រទេស​ផ្សេងៗ​ដែល​ចូលរួម​ប្រជុំ​អាស៊ាន ជួយ​ជំរុញ​រដ្ឋាភិបាល​កម្ពុជា​ដោះស្រាយ​វិវាទ​ការងារ​ឲ្យ​ពួកគេ។

ការ​ចេញ​ធ្វើ​កូដកម្ម​នា​ថ្ងៃ​នេះ ក្រុម​កូដករ​បាន​នាំគ្នា​ស្លៀក​សម្លៀកបំពាក់​បែប​ប្រពៃណី ដៃ​កាន់​បដា​ដោយ​សរសេរ​ថា «ប្រទេស​ជា​សមាជិក​អាស៊ាន​មិន​ត្រូវ​រំលោភ​សេរីភាព​សហជីព​ដូច​ជនជាតិ​ម៉ាឡេស៊ី ដែល​ជា​ថៅកែ​ណាហ្គា​នោះ​ឡើយ»។ ពួកគេ​ក៏​បាន​នាំគ្នា​ទូង​ស្គរ​ដោយ​ស្រែក​ទាមទារ​ឲ្យ​ថៅកែ​ក្រុមហ៊ុន​ចេញ​ដោះស្រាយ​វិវាទ​ការងារ​ជូន​កូដករ។

កូដករ គឺ​អ្នកនាង ម៉ម សុវឌ្ឍិន បាន​លើកឡើង​ថា ការ​ដែល​ពួកគេ​ស្លៀកពាក់​ប្រពៃណី​ធ្វើ​កូដកម្ម​នា​ថ្ងៃ​នេះ ចង់​បង្ហាញ​អំពី​អត្តសញ្ញា​ថា ពួកគាត់​ជា​កម្មករ​ខ្មែរ ហើយ​ធ្វើការ​នៅ​ស្រុក​ខ្មែរ ប៉ុន្តែ​បែរ​ជា​ត្រូវ​ក្រុមហ៊ុន​ណាហ្គា​បញ្ឈប់​ពី​ការងារ​ទាំង​អយុត្តិធម៌។ មួយ​វិញ​ទៀត ពួកគាត់​ក៏​ចង់​ឲ្យ​មេដឹកនាំ​នៃ​បណ្ដា​ប្រទេស​ផ្សេងៗ​បាន​ដឹង​ផង​ដែរ​ថា ពួកគាត់​ជា​ពលរដ្ឋ​ខ្មែរ​កំពុង​រងគ្រោះ​ដោយ​ការ​បញ្ឈប់​ពី​ការងារ​ជាង ១​ឆ្នាំ​មក​នេះ មិន​ទាន់​បាន​ដោះស្រាយ និង​ទទួល​បាន​យុត្តិធម៌​នៅឡើយ​ទេ។

អ្នកនាង ម៉ម សុវឌ្ឍិន សង្ឃឹម​ថា មេដឹកនាំ​នៃ​បណ្ដា​ប្រទេស​ផ្សេងៗ​ដែល​មក​ចូលរួម​កិច្ចប្រជុំ​អាស៊ាន នឹង​បាន​ឃើញ​សារ​របស់​ពួកគាត់​ទាំងអស់​គ្នា និង​ជួយ​ជំរុញ​ឲ្យ​រដ្ឋាភិបាល​កម្ពុជា​ដោះស្រាយ​វិវាទ​ការងារ​ជូន​កូដករ ព្រមទាំង​ឲ្យ​ថៅកែ​ក្រុមហ៊ុន​គោរព​ច្បាប់​ជាតិ និង​អន្តរជាតិ ដែល​កម្ពុជា​បាន​ផ្ដល់​សច្ចាប័ន។

ការ​ធ្វើ​កូដកម្ម​របស់​ក្រុម​កូដករ​នៅ​ខាង​មុខ​ក្រុមហ៊ុន​ណាហ្គា​វើលដ៍​២ នេះ ក៏​មាន​សង្គម​ស៊ីវិល​ដែល​ធ្វើការ​លើក​កម្ពស់​សិទ្ធិមនុស្ស ក៏​បាន​ចុះ​ឃ្លាំមើល និង​តាមដាន ខណៈ​ក្រុម​សមត្ថកិច្ច​ស្លៀកពាក់​ស៊ីវិល និង​ឯកសណ្ឋាន តាមដាន និង​ថត​រូបភាព​ពួកគេ​ទាំង​អំឡុង​តវ៉ា និង​ធ្វើ​ដំណើរ​ផង​ដែរ។

កាលពី​ថ្ងៃទី​៥ ខែ​វិច្ឆិកា សាលា​រាជធានី​ភ្នំពេញ​បាន​ចេញ​សេចក្ដី​ប្រកាស​មួយ​ដោយ​ហាម​ក្រុម​កូដករ​ក្រុមហ៊ុន​ណាហ្គា​វើលដ៍​ផ្អាក​ធ្វើ​កូដកម្ម​ចាប់ពី​ថ្ងៃទី​០៦ ដល់​ថ្ងៃទី​១៣ ខែ​វិច្ឆិកា នេះ ប៉ុន្តែ​ប្រសិន​បើ​ពួកគេ​មិន​ផ្អាក សាលា​រាជធានី​ភ្នំពេញ​បាន​ព្រមាន​វិធានការ​ច្បាប់​ក្រោម​ហេតុផល​ថា ការ​បន្ត​តវ៉ា​ដែល​ធ្វើ​ឲ្យ​ប៉ះពាល់​ដល់​សន្តិសុខ និង​សណ្ដាប់ធ្នាប់​សង្គម ខណៈ​កម្ពុជា​ជា​ម្ចាស់​ផ្ទះ​រៀបចំ​កិច្ចប្រជុំ​កំពូល​អាស៊ាន។

ក្រុម​កូដករ​អះអាង​ថា ការ​ធ្វើ​កូដកម្ម​របស់​ពួកគេ​មិន​បាន​បង្ក​ផល​ប៉ះពាល់​សណ្ដាប់ធ្នាប់​សាធារណៈ​ឡើយ ហើយ​ការ​ចេញ​ធ្វើ​កូដកម្ម​អហិង្សា​នេះ ដោយសារ​ថៅកែ និង​ក្រសួង​ការងារ​មិន​ព្រម​ដោះស្រាយ​វិវាទ​ការងារ​ជូន​ពួកគេ​ឲ្យ​មាន​យុត្តិធម៌ និង​តម្លាភាព ដោយ​ទទួល​យក​សហជីព​ចូល​ធ្វើការ​វិញ និង​ទម្លាក់​ចោល​បទ​ចោទ​ប្រកាន់​ទាំងអស់​ដែល​ក្រុមហ៊ុន​ប្ដឹង​ទៅ​តុលាការ។

រយៈពេល​ជាង ១​ឆ្នាំ​នេះ កូដករ​ចេញ​ធ្វើ​កូដកម្ម​ប្រមាណ ១០​នាក់​ត្រូវ​បាន​ក្រុមហ៊ុន​ល្បែង​មួយ​នេះ​ប្ដឹង​ទៅ​តុលាការ ខណៈ​ថ្នាក់​ដឹកនាំ និង​សកម្មជន​សហជីព​ចំនួន ១១​នាក់​ដែល​ជា​តំណាង​របស់​ក្រុម​កូដករ​ណាហ្គា​វើលដ៏ ក៏​ត្រូវ​បាន​តុលាការ​ចោទប្រកាន់ និង​ឃុំ​ខ្លួន​ជា​បណ្ដោះអាសន្ន ក្រោម​ការ​ចោទ​ពី​បទ «ញុះញង់​ឱ្យ​ប្រព្រឹត្ត​បទឧក្រិដ្ឋ​ជាអាទិ៍» និង​បទ «រារាំង​ការ​អនុវត្ត​វិធានការ​ទប់ស្កាត់​ការ​រាលដាល​ជំងឺ​កូវីដ-១៩»។

ប៉ុន្តែ​ថ្នាក់​ដឹកនាំ និង​សកម្មជន​សហជីព​ចំនួន ១១​នាក់​ត្រូវ​បាន​ដោះលែង​ឲ្យ​នៅ​ក្រៅ​ឃុំ​បណ្ដោះអាសន្ន​ក្រោយពី​ឃុំ​ខ្លួន​ក្នុង​ពន្ធនាគារ​ជាង ២​ខែ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស