30 C
Phnom Penh

មន្ត្រី​បក្ស​ប្រឆាំង​ថា​អាមេរិក​នៅតែ​យកចិត្ត​ទុកដាក់​អំពី​ប្រជាធិបតេយ្យ​និង​សិទ្ធិមនុស្ស​នៅ​កម្ពុជា​ឥត​ងាករេ

ដោយ ឌឹ ខេមបូឌា ដេលី

បទវិភាគ

អតីត​អ្នកទោស​នយោបាយ​មួយ​រូប​អះអាង​ថា សេចក្តី​ថ្លែងការណ៍​របស់​សេតវិមាន​បង្ហាញ​យ៉ាង​ច្បាស់​ថា អាមេរិក​នៅតែ​បន្ត​យកចិត្ត​ទុកដាក់​បញ្ហា​ប្រជាធិបតេយ្យ និង​ការ​គោរព​សិទ្ធិមនុស្ស​នៅ​កម្ពុជា​ដោយ​ឥត​ងាករេ។

អតីត​អ្នកទោស​នយោបាយ និង​ជា​នាយក​បេសកកម្ម​ក្រៅ​ប្រទេស​នៃ​វិទ្យាស្ថាន​ស្រាវជ្រាវ​គោលនយោបាយ​ក្នុង​សហរដ្ឋ​អាមេរិក លោក មាជ សុវណ្ណារ៉ា បាន​ប្រាប់​សារព័ត៌មាន The Cambodia Daily នៅ​ថ្ងៃទី​១៤ វិច្ឆិកា នេះ​ថា ក្នុង​ខ្លឹមសារ​នៃ​សេចក្តី​ថ្លែងការណ៍​របស់​សេតវិមាន​ដែល​ជំរុញ​ឲ្យ​រដ្ឋាភិបាល​កម្ពុជា​បើក​លំហ​សេរីភាព​នយោបាយ​សម្រាប់​ការ​បោះឆ្នោត​ឆ្នាំ​២០២៣ ខាងមុខ​នេះ ទំនង​ជា​សំដៅ​ដល់​ការ​បើក​សិទ្ធិ​សេរីភាព​នយោបាយ​របស់​មេដឹកនាំ​បក្ស​ប្រឆាំង លោក កឹម សុខា ផង​ដែរ ព្រោះ​ថា​រដ្ឋមន្ត្រី​ការបរទេស​សហរដ្ឋ​អាមេរិក លោក អែនតូនី ប្លីងខិន (Antony Blinken) ក៏​ធ្លាប់​ជំរុញ​រដ្ឋាភិបាល​កម្ពុជា​ដោះស្រាយ​បញ្ហា​នេះ​រហូត​មក​ដែរ។

លោក​នាយករដ្ឋមន្ត្រី ហ៊ុន សែន ជួប​ពិភាក្សា​ជាមួយ​លោក ចូ បៃដិន (Joe Biden) ប្រធានាធិបតី​សហរដ្ឋ​អាមេរិក នា​រាជធានី​ភ្នំពេញ​នៅ​ល្ងាច​ថ្ងៃទី​១២ ខែ​វិច្ឆិកា ឆ្នាំ​២០២២។

លោក មាជ សុវណ្ណារ៉ា លើកឡើង​ថា ដើម្បី​ស្ដារ​មុខមាត់​កម្ពុជា​ឡើងវិញ កត្តា​សំខាន់ គឺ​កម្ពុជា​ជា​អ្នក​អនុវត្ត​ក្នុង​ការ​លើកស្ទួយ​សិទ្ធិមនុស្ស និង​ស្ដារ​លទ្ធិប្រជាធិបតេយ្យ​ដោយ​ខ្លួនឯង​ប៉ុណ្ណោះ ព្រោះ​ថា​អាមេរិក​ចង់​ឃើញ​កម្ពុជា​វិល​ទៅ​រក​ស្ថានភាព​មួយ​ដែល​ល្អ​ប្រសើរ​ជាង​ពេល​បច្ចុប្បន្ន​នេះ​ដែរ។ ប្រសិនបើ​កម្ពុជា​អាច​ស្ដារ​សិទ្ធិមនុស្ស និង​លទ្ធិប្រជាធិបតេយ្យ​ដូច​ការ​ចង់​បាន​របស់​ពលរដ្ឋ​ខ្មែរ និង​ប្រទេស​សេរី​ប្រជាធិបតេយ្យ​រំពឹង​ទុក​មែន​នោះ កម្ពុជា​នឹង​ទទួល​បាន​នូវ​អត្ថប្រយោជន៍​សម្រាប់​ខ្លួន​ជាច្រើន​ទៅ​ថ្ងៃ​មុខ។

លោក​បញ្ជាក់​ថា កម្ពុជា​នឹង​ទទួល​បាន​ការ​អនុគ្រោះ​ពន្ធ​ឡើងវិញ​ពី​សហរដ្ឋ​អាមេរិក និង​សហភាព​អឺរ៉ុប។ ជាង​នេះ​ទៀត ទណ្ឌកម្ម​នានា​ពី​ប្រទេស​មហាអំណាច​ដែល​សង្កត់​លើ​កម្ពុជា​ជុំវិញ​ការ​រំលោភ​សិទ្ធិមនុស្ស និង​អំពើពុករលួយ ជាដើម ក៏​ត្រូវ​លុប​ចេញ​ផង​ដែរ ប្រសិនបើ​កម្ពុជា​អាច​ងាក​ទៅ​រក​ការ​ដឹកនាំ​មួយ​ដែល​គ្មាន​ការ​រឹតត្បិត​សិទ្ធិ​សេរីភាព​របស់​ពលរដ្ឋ ស្រប​តាម​ប្រទេស​ដែល​ប្រកាន់​យក​នីតិរដ្ឋ​ពេញលេញ​នោះ។

ការ​អះអាង​នេះ ធ្វើឡើង​ដើម្បី​ជំរុញ​ឲ្យ​កម្ពុជា​ស្ដារ​លទ្ធិប្រជាធិបតេយ្យ និង​គោរព​សិទ្ធិមនុស្ស​ឡើងវិញ បន្ទាប់ពី​សហរដ្ឋ​អាមេរិក​ក៏​បាន​ទាមទារ​ឲ្យ​កម្ពុជា​ស្ដារ​លទ្ធិប្រជាធិបតេយ្យ​របស់​ខ្លួន​ឡើងវិញ​កាលពី​ពេល​ថ្មីៗ​នេះ​ដែរ​នោះ។

កិច្ចប្រជុំ​កំពូល​អាស៊ាន​លើក​ទី​៤០ និង​លើក​ទី​៤១ បាន​ប្រព្រឹត្ត​ទៅ​រយៈពេល ៤​ថ្ងៃ ដែល​កម្ពុជា​ធ្វើ​ជា​ម្ចាស់​ផ្ទះ​ចាប់ពី​ថ្ងៃទី​១០ ដល់​ថ្ងៃទី​១៣ ខែ​វិច្ឆិកា ឆ្នាំ​២០២២ នេះ ដែល​មាន​ការ​ចូលរួម​ពី​ប្រធានាធិបតី​អាមេរិក លោក ចូ បៃដិន ដើម្បី​ចូល​កិច្ចប្រជុំ​កំពូល​អាស៊ាន-សហរដ្ឋ​អាមេរិក លើក​ទី​១០ នៅ​ពេល​នោះ​ផង​ដែរ។

លោក​នាយករដ្ឋមន្ត្រី ហ៊ុន សែន ជួប​ពិភាក្សា​ជាមួយ​លោក ចូ បៃដិន (Joe Biden) ប្រធានាធិបតី​សហរដ្ឋ​អាមេរិក នា​រាជធានី​ភ្នំពេញ​នៅ​ល្ងាច​ថ្ងៃទី​១២ ខែ​វិច្ឆិកា ឆ្នាំ​២០២២។

ក្នុង​ជំនួប​រវាង​ប្រធានាធិបតី​សហរដ្ឋ​អាមេរិក លោក ចូ បៃដិន និង​មេដឹកនាំ​កម្ពុជា​ក្នុង​នាម​ប្រធាន​អាស៊ាន លោក ហ៊ុន សែន ក្នុង​កិច្ចប្រជុំ​កំពូល​អាស៊ាន​កាលពី​ថ្ងៃទី​១២ ខែ​វិច្ឆិកា ឆ្នាំ​២០២២ នេះ សេតវិមាន​បាន​ចេញ​សេចក្តី​ថ្លែងការណ៍​ថា លោក ចូ បៃដិន បាន​សម្ដែង​នូវ​ការ​ព្រួយ​កង្វល់​អំពី​ស្ថានភាព​នៅ​មូលដ្ឋាន​ទ័ព​ជើងទឹក​រាម​យ៉ាង​ខ្លាំង ដែល​រហូត​ដល់​ពេលនេះ កម្ពុជា​នៅតែ​ត្រូវ​បាន​សង្ស័យ​ពី​ការ​ឃុបឃិត​លួច​ផ្តល់​មូលដ្ឋាន​ទ័ព​ជើងទឹក​រាម​របស់​ខ្លួន​ឱ្យ​កងទ័ព​ជើងទឹក​ចិន (the People’s Republic of China (PRC)) ធ្វើជា​កន្លែង​ឈរ​ជើង​នៅឡើយ។

សេតវិមាន​លើកឡើង​ថា ប្រធានាធិបតី​អាមេរិក លោក ចូ បៃដិន ក៏​បាន​ជំរុញ​ឲ្យ​លោក ហ៊ុន សែន បើក​លំហ​សិទ្ធិ​នយោបាយ​សម្រាប់​ពលរដ្ឋ​ខ្មែរ​ឡើងវិញ​មុន​ការ​បោះឆ្នោត​ឆ្នាំ​២០២៣ ខាងមុខ​នេះ និង​អំពាវនាវ​ឲ្យ​មាន​ការ​ដោះលែង​សកម្មជន​ដែល​ត្រូវ​បាន​ឃុំ​ខ្លួន​ពី​បទ​ចោទប្រកាន់​ពាក់ព័ន្ធ​នឹង​រឿង​នយោបាយ ព្រមទាំង​អំពាវនាវ​ឱ្យ​ដោះលែង​ពលរដ្ឋ​ខ្មែរ​អាមេរិកាំង កញ្ញា សេង ធារី ផង​ដែរ។

សេតវិមាន​បញ្ជាក់​ថា លោក ចូ បៃដិន ក៏​បាន​រំឭក​ឡើងវិញ​នូវ​ការ​ប្ដេជ្ញាចិត្ត​របស់​សហរដ្ឋ​អាមេរិក​ផង​ដែរ​ថា អាមេរិក​ប្រកាន់​ជំហរ​ឥត​ងាករេ​ចំពោះ​ពលរដ្ឋ​ខ្មែរ​សម្រាប់​បំណង​ប្រាថ្នា​របស់​ពួកគេ​ដែល​ចង់​បាន​ប្រជាធិបតេយ្យ និង​ឯករាជភាព​ជាតិ​របស់​ខ្លួន។

ដោយឡែក​សេចក្តី​ប្រកាស​ព័ត៌មាន​របស់​រដ្ឋាភិបាល​ឯក​បក្ស លោក ហ៊ុន សែន កាលពី​ថ្ងៃទី​១២ ខែ​វិច្ឆិកា ឆ្នាំ​២០២២ មិន​បាន​លើកឡើង​ពី​ការ​ព្រួយបារម្ភ​របស់​សហរដ្ឋ​អាមេរិក និង​ការ​ចង់​បាន​របស់​អាមេរិក​ជុំវិញ​ការ​គោរព​សិទ្ធិមនុស្ស និង​ការ​ស្ដារ​លទ្ធិប្រជាធិបតេយ្យ និង​ការ​ព្រួយបារម្ភ​ពី​មូលដ្ឋាន​ទ័ព​ជើងទឹក​រាម​នោះ​ទេ ប៉ុន្តែ​សេចក្តី​ប្រកាស​ព័ត៌មាន​នោះ គ្រាន់តែ​លើកឡើង​អំពី​ចំណុច​ខ្លះៗ​ដែល​ប្រធានាធិបតី​អាមេរិក លោក ចូ បៃដិន បាន​លើកឡើង​ទៅ​កាន់​កម្ពុជា​ប៉ុណ្ណោះ ដូចជា​ថា លោក ចូ បៃដិន បាន​អបអរ​សាទរ​កម្ពុជា​ក្នុង​ការ​គាំទ្រ​លើ​ទំនាក់ទំនង​អាស៊ាន-អាមេរិក និង​ជំហរ​របស់​កម្ពុជា​លើ​វិបត្តិ​នៅ​អ៊ុយក្រែន ជាដើម។

ទោះជា​បែប​នេះ​ក្តី ប្រធានាធិបតី​សហរដ្ឋ​អាមេរិក លោក ចូ បៃដិន បាន​សរសេរ​លើ​ទំព័រ​ហ្វេសប៊ុក​របស់​លោក​កាលពី​ថ្ងៃ​អាទិត្យ ទី​១៣ វិច្ឆិកា ថា លោក​បាន​ជួប​ជាមួយ​លោក ហ៊ុន សែន ដើម្បី​ពិភាក្សា​អំពី​ការ​ដឹកនាំ​របស់​កម្ពុជា​ក្នុង​នាម​ជា​ប្រធាន​អាស៊ាន​ក្នុង​ឆ្នាំ​ដ៏​លំបាក​នេះ ក្នុង​នោះ លោក​បញ្ជាក់​ថា លោក​ក៏​បាន​រំឭក​ឡើងវិញ​នូវ​ការ​ប្ដេជ្ញាចិត្ត​របស់​អាមេរិក​ចំពោះ​ប្រជាជន​កម្ពុជា និង​បំណង​ប្រាថ្នា​របស់​ពួកគេ​ដែល​ចង់​បាន​ប្រទេស​មួយ​មាន​ភាព​រីកចម្រើន ប្រជាធិបតេយ្យ និង​ឯករាជ្យ​ផង​ដែរ។

ចំណែក​អគ្គលេខាធិការ​អង្គការ​សហប្រជាជាតិ លោក អាន់តូនីញ៉ូ ហ្គូទែរ៉េស (Antonio Guterres) ដែល​បាន​ទៅ​ចូលរួម​កិច្ចប្រជុំ​កំពូល​រវាង​អាស៊ាន-អង្គការ​សហប្រជាជាតិ ក៏​បាន​អំពាវនាវ​ដល់​រដ្ឋាភិបាល​របស់​លោក ហ៊ុន សែន ឱ្យ​បើក​លំហ​សិទ្ធិ​សេរីភាព​ជា​មូលដ្ឋាន​ដល់​សកម្មជន​សិទ្ធិមនុស្ស សកម្មជន​បរិស្ថាន និង​សហការ​ធ្វើ​ការងារ​ជាមួយ​អង្គការ​សង្គម​ស៊ីវិល​ឡើងវិញ​ដែរ។

ជុំវិញ​បញ្ហា​នេះ ក្រុម​អ្នក​សង្កេតការណ៍​លើកឡើង​ថា ជា​ទម្លាប់​អាក្រក់​របស់​មេដឹកនាំ​កម្ពុជា លោក ហ៊ុន សែន ទៅ​ហើយ​ក្រោម​ការ​ដឹកនាំ​របស់​គាត់​ជាង ៤០​ឆ្នាំ​មក​នេះ​ដែល​គ្មាន​ការ​ទទួល​ខុសត្រូវ​ចំពោះ​មុខ​ពលរដ្ឋ ព្រោះ​ថា​បើ​លោក ហ៊ុន សែន ចង់​បញ្ជាក់​ថា គាត់​គឺជា​មេដឹកនាំ​ដែល​មាន​ការ​ទទួល​ខុសត្រូវ​ចំពោះ​ជាតិ​ពិត​មែន​នោះ គាត់​ត្រូវតែ​ធ្វើការ​បំភ្លឺ​ជុំវិញ​ការ​ព្រួយបារម្ភ​របស់​អាមេរិក​ចំពោះ​ប្រជាពលរដ្ឋ​ខ្មែរ មិនមែន​ចេញ​សេចក្តី​ប្រកាស​ព័ត៌មាន​បិទ​បាំង​ការពិត​បែប​នេះ​ទេ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស