30 C
Phnom Penh

លោក ហ៊ុន សែន ច្រាន​ចោល​ព័ត៌មាន​ថា​លោក ចូ បៃដិន ស្នើ​ដោះលែង​កញ្ញា សេង ធារី និង​បើក​លំហ​សិទ្ធិ​នយោបាយ

ដោយ ឌឹ ខេមបូឌា ដេលី

បទវិភាគ

លោក​នាយករដ្ឋមន្ត្រី ហ៊ុន សែន ច្រាន​ចោល​នូវ​ការ​លើកឡើង​របស់​ប្រធានាធិបតី​សហរដ្ឋ​អាមេរិក លោក ចូ បៃដិន បាន​ស្នើ​ឱ្យ​ដោះលែង​សកម្មជន​សិទ្ធិមនុស្ស កញ្ញា សេង ធារី និង​អគ្គលេខាធិការ​អង្គការ​សហប្រជាជាតិ លោក អាន់តូនីញ៉ូ ហ្គូទែរ៉េស ជំរុញ​ឱ្យ​កម្ពុជា​គោរព​សិទ្ធិមនុស្ស និង​បើក​លំហ​សិទ្ធិ​នយោបាយ​ក្នុង​ជំនួប​ទ្វេភាគី​កាលពី​អំឡុង​កិច្ចប្រជុំ​អាស៊ាន បើ​ទោះបីជា​សហរដ្ឋ​អាមេរិក​អះអាង​ថា​ជា​ការពិត។

បុរស​ខ្លាំង​ក្រាញ​អំណាច​ជាង ៤​ទសវត្ស លោក ហ៊ុន សែន បាន​លើកឡើង​ក្នុង​ពិធី​បិទ​សន្និបាត​ជាតិ​ខួប ៣០​ឆ្នាំ​នៃ​សកម្មភាព​មីន​នៅ​កម្ពុជា នៅ​ថ្ងៃទី​២២ ខែ​វិច្ឆិកា ឆ្នាំ​២០២២ នេះ​ថា ក្នុង​កំណត់ហេតុ​នៃ​ជំនួប​ទ្វេភាគី​របស់​លោក​ជាមួយ​ប្រធានាធិបតី​សហរដ្ឋ​អាមេរិក លោក ចូ បៃដិន មិន​បាន​បង្ហាញ​ថា​លោក ចូ បៃដិន បាន​ស្នើ​ឱ្យ​ដោះលែង​កញ្ញា សេង ធារី នោះ​ទេ ហើយ​លោក​ក៏​មិន​បាន​ឮ​មេដឹកនាំ​អាមេរិក​លើកឡើង​ពី​បញ្ហា​នេះ​ដែរ។

បុរស​ខ្លាំង​ដែល​តែង​គំរាម​កម្ទេច​ក្រុម​ប្រឆាំង លោក ហ៊ុន សែន អះអាង​ថា ក្រៅពី​ការ​លើកឡើង​ថា​មេដឹកនាំ​អាមេរិក​ដែល​បាន​ស្នើ​ឱ្យ​លោក​ដោះលែង​កញ្ញា សេង ធារី ក៏​មាន​ការ​លើកឡើង​ដែរ​ថា អគ្គលេខាធិការ​អង្គការ​សហប្រជាជាតិ​បាន​មក​ស្ដីបន្ទោស​ឱ្យ​រូបលោក ជុំវិញ​ការ​រំលោភ​សិទ្ធិមនុស្ស​នៅ​កម្ពុជា គឺ​សុទ្ធតែ​ជា​រឿង​មិន​ពិត​ទាំងអស់ ព្រោះ​ថា​រាល់​ពេល​ដែល​លោក​ជួប​ជាមួយ​អគ្គលេខាធិការ​អង្គការ​សហប្រជាជាតិ​នា​ពេល​កន្លងមក គេ​មិន​ដែល​លើកឡើង​ពី​បញ្ហា​ផ្ទៃក្នុង​របស់​កម្ពុជា​នោះ​ទេ។

មេដឹកនាំ​បក្ស​កាន់​អំណាច​ដែល​ល្បី​ខាង​រំលោភ​សិទ្ធិមនុស្ស លោក ហ៊ុន សែន អំពាវនាវ​ឱ្យ​ក្រុម​អ្នកវិភាគ​ប្រកាន់ខ្ជាប់​នូវ​ក្រមសីលធម៌​ក្នុង​ការ​វិភាគ ជុំវិញ​ជំនួប​ទ្វេភាគី​រវាង​មេដឹកនាំ​កម្ពុជា និង​មេដឹកនាំ​អាមេរិក ព្រោះ​ថា​ការ​លើកឡើង​ជុំវិញ​ការ​ជំរុញ​ឱ្យ​មាន​ការ​ដោះលែង​កញ្ញា សេង ធារី គឺ​ឃ្លាត​ចាក​ពី​ខ្លឹមសារ​នៃ​ជំនួប​របស់​លោក​ជាមួយ​មេដឹកនាំ​អាមេរិក​ហួសហេតុ​ពេក ដែល​លោក​មិន​អាច​ទទួល​យក​បាន។

លោក ហ៊ុន សែន ថ្លែង​បន្ត​ទៀត​ថា ចំណែក​ក្នុង​ជំនួប​ពិភាក្សា​ជាមួយ​អគ្គលេខាធិការ​អង្គការ​សហប្រជាជាតិ លោក អាន់តូនីញ៉ូ ហ្គូទែរ៉េស មិន​បាន​ស្នើ​លោក​ឲ្យ​ធ្វើ​នេះ​ធ្វើ​នោះ​ទាក់ទង​នឹង​កិច្ចការ​ផ្ទៃក្នុង​កម្ពុជា​ឡើយ ប៉ុន្តែ​បែរ​ជា​សារព័ត៌មាន​មួយ​ចំនួន​ចុះផ្សាយ​ថា អគ្គលេខាធិការ​រូប​នេះ​ជំរុញ​ឲ្យ​កម្ពុជា​គោរព​សិទ្ធិមនុស្ស និង​បើក​លំហ​សិទ្ធិ​នយោបាយ​ឡើងវិញ។

បុរស​ខ្លាំង​កាន់​អំណាច​ជិត ៤០​ឆ្នាំ​រូប​នេះ​បាន​បង្ហាញ​ការ​ហួសចិត្ត ដោយ​ចាត់ទុក​ការ​ចុះផ្សាយ​ថា​ជា​ការ​បំផុស​ព័ត៌មាន​ដោយ​មនុស្ស​មួយ​ក្រុម ដោយសារ​ក្នុង​ជំនួប​នោះ លោក អាន់តូនីញ៉ូ ហ្គូទែរ៉េស មិន​បាន​និយាយ​រឿង​កិច្ចការ​ផ្ទៃក្នុង​កម្ពុជា​ទេ ប៉ុន្តែ​អគ្គលេខាធិការ​អង្គការ​សហប្រជាជាតិ​រូប​នេះ​បាន​លើក​បញ្ហា​មីន ទាក់ទង​នឹង​កិច្ច​សហប្រតិបត្តិការ​លើ​ការ​បញ្ជូន​កងកម្លាំង​រក្សា​សន្តិភាព​អង្គការ​សហប្រជាជាតិ លើ​បញ្ហា​ការ​កាត់ទោស​ខ្មែរក្រហម។

មន្ត្រី​ទំនាក់ទំនង​សាធារណៈ​របស់​ស្ថានទូត​អាមេរិក​ប្រចាំ​កម្ពុជា លោកស្រី លីហ្សា ឡាសុន (Lisa Lason) បាន​ឆ្លើយតប​សំណួរ​សារព័ត៌មាន​វីអូឌី (VOD) តាម​ប្រព័ន្ធ​ទំនាក់ទំនង​អ៊ីមែល​នៅ​ថ្ងៃទី​២២ ខែ​វិច្ឆិកា ថា សន្តិភាព និង​សន្តិសុខ​របស់​ពលរដ្ឋ​អាមេរិក​នៅ​ក្រៅ​ប្រទេស គឺជា​អាទិភាព​ខ្ពស់​បំផុត​របស់​រដ្ឋាភិបាល​ប្រទេស​លោក​សេរី​មួយ​នេះ។

លោកស្រី​បញ្ជាក់​ថា ក្នុង​អំឡុង​ពេល​ទស្សនកិច្ច​របស់​លោក​ប្រធានាធិបតី ចូ បៃដិន នៅ​កម្ពុជា លោក​ពិត​ជា​បាន​ស្នើ​ឱ្យ​ប្រមុខ​រដ្ឋាភិបាល​កម្ពុជា​ដោះលែង​សកម្មជន​នយោបាយ​បក្ស​ប្រឆាំង រួម​ទាំង​កញ្ញា សេង ធារី ផង​ដែរ។

កញ្ញា សេង ធារី ត្រូវ​បាន​ចាប់​ខ្លួន​នៅ​មុខ​សាលាដំបូង​រាជធានី​ភ្នំពេញ​ក្នុង​សម្លៀកបំពាក់​តំណាង​ឱ្យ «នាង​យុត្តិធម៌» ដោយ​ដៃ​ម្ខាង​ចងភ្ជាប់​ដោយ​ច្រវាក់ និង​ម្ខាង​ទៀត​កាន់​បដា​ដែល​មាន​សរសេរ​អក្សរ​រដ្ឋធម្មនុញ្ញ​កម្ពុជា និង​កិច្ចព្រមព្រៀង​ទីក្រុង​ប៉ារីស នៅ​ថ្ងៃទី​១៤ ខែ​មិថុនា ឆ្នាំ​២០២២។ (រូបថត៖ AFP)

ក្នុង​ជំនួប​រវាង​ប្រធានាធិបតី​សហរដ្ឋ​អាមេរិក លោក ចូ បៃដិន និង​មេដឹកនាំ​កម្ពុជា លោក ហ៊ុន សែន ក្នុង​កិច្ចប្រជុំ​កំពូល​អាស៊ាន​កាលពី​ថ្ងៃទី​១២ ខែ​វិច្ឆិកា ឆ្នាំ​២០២២ សេតវិមាន​បាន​ចេញ​សេចក្តី​ថ្លែងការណ៍​ថា លោក ចូ បៃដិន បាន​ជំរុញ​ឲ្យ​លោក ហ៊ុន សែន បើក​លំហ​សិទ្ធិ​នយោបាយ​សម្រាប់​ពលរដ្ឋ​ខ្មែរ​ឡើងវិញ​មុន​ការ​បោះឆ្នោត​ឆ្នាំ​២០២៣ ខាងមុខ​នេះ និង​អំពាវនាវ​ឲ្យ​មាន​ការ​ដោះលែង​សកម្មជន​ដែល​ត្រូវ​បាន​ឃុំ​ខ្លួន​ពី​បទ​ចោទប្រកាន់​ពាក់ព័ន្ធ​នឹង​រឿង​នយោបាយ ព្រមទាំង​អំពាវនាវ​ឱ្យ​ដោះលែង​ពលរដ្ឋ​ខ្មែរ​អាមេរិកាំង កញ្ញា សេង ធារី ផង​ដែរ។

សេតវិមាន​បញ្ជាក់​ថា លោក ចូ បៃដិន ក៏​បាន​រំលឹក​ឡើងវិញ​នូវ​ការ​ប្ដេជ្ញាចិត្ត​របស់​សហរដ្ឋ​អាមេរិក​ផង​ដែរ​ថា អាមេរិក​នៅតែ​ប្រកាន់​ជំហរ​ឥត​ងាករេ​ចំពោះ​ប្រជាពលរដ្ឋ​កម្ពុជា​សម្រាប់​បំណង​ប្រាថ្នា​របស់​ពួកគេ ដែល​ចង់​បាន​ប្រជាធិបតេយ្យ និង​ឯករាជភាព​ជាតិ​របស់​ខ្លួន។

ចំណែក​អគ្គលេខាធិការ​អង្គការ​សហប្រជាជាតិ លោក អាន់តូនីញ៉ូ ហ្គូទែរ៉េស (Antonio Guterres) ដែល​បាន​ទៅ​ចូលរួម​កិច្ចប្រជុំ​កំពូល​អាស៊ាន-អង្គការ​សហប្រជាជាតិ ក៏​បាន​អំពាវនាវ​ដល់​រដ្ឋាភិបាល​លោក ហ៊ុន សែន ឱ្យ​បើក​លំហ​សិទ្ធិ​សេរីភាព​ជា​មូលដ្ឋាន​ដល់​សកម្មជន​សិទ្ធិមនុស្ស សកម្មជន​បរិស្ថាន និង​សហការ​ធ្វើ​ការងារ​ជាមួយ​អង្គការ​សង្គម​ស៊ីវិល​ឡើងវិញ​ដែរ។

ប្រធាន​វេទិកា​ពលរដ្ឋ លោក គឹម សុខ បាន​ប្រាប់​សារព័ត៌មាន The Cambodia Daily នៅ​ថ្ងៃទី​២២ វិច្ឆិកា នេះ​ថា ការ​លើកឡើង​របស់​មេដឹកនាំ​កម្ពុជា​បែប​នេះ គឺជា​ការ​ប្រមាថ​ទៅ​លើ​ប្រធានាធិបតី​អាមេរិក​យ៉ាង​ធ្ងន់ធ្ងរ ព្រោះ​ថា​សេចក្តី​ថ្លែងការណ៍​របស់​សេតវិមាន​បាន​បញ្ជាក់​យ៉ាង​ច្បាស់។

ការ​សំអាង​តែ​ទៅ​លើ​ភាព​សម្ងាត់​របស់​គាត់​ដែល​បាន​ជជែក​ជាមួយ​ប្រធានាធិបតី​អាមេរិក ហើយ​ព្យាយាម​បដិសេធ​គ្រប់​រឿង​ជុំវិញ​ការ​ទាមទារ​របស់​សហរដ្ឋ​អាមេរិក​ក្នុង​ការ​ស្ដារ​លទ្ធិប្រជាធិបតេយ្យ​ឡើងវិញ​បែប​នេះ គ្រាន់តែ​បង្ហាញ​ថា លោក ហ៊ុន សែន គឺជា​មេដឹកនាំ​មួយ​រូប​ដែល​គ្មាន​សីលធម៌​នយោបាយ​ការទូត និង​ជា​មេដឹកនាំ​ដែល​គ្មាន​ការ​ទទួល​ខុសត្រូវ​ប៉ុណ្ណោះ។

លោក គឹម សុខ រិះគន់​ថា ព្រោះ​តែ​មិន​ចង់​ស្ដារ​ប្រជាធិបតេយ្យ ខ្លាច​ខូច​ផែនការ​ផ្ទេរ​អំណាច​ឲ្យ​កូនប្រុស​បង្កើត​របស់​ខ្លួន លោក ហ៊ុន សែន សុខចិត្ត​បិទ​ត្រចៀក បិទ​ភ្នែក មិន​ស្ដាប់ មិន​អាន មិន​គិត មិន​ព្រម​ទទួលស្គាល់​ការ​ជំរុញ​របស់​ប្រធានាធិបតី​អាមេរិក និង​អគ្គលេខាធិការ​អង្គការ​សហប្រជាជាតិ​ដែល​ទាមទារ​ឲ្យ​បើក​លំហ​សេរីភាព សិទ្ធិ​ពលរដ្ឋ សិទ្ធិ​សង្គម​ស៊ីវិល និង​សិទ្ធិ​នយោបាយ​របស់​ពលរដ្ឋ​ដូច​អ្វី​ដែល​គាត់​កំពុង​អនុវត្ត​សព្វថ្ងៃ​នេះ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស