26 C
Phnom Penh

តំណាង​សមាជិក​សភា​អូស្ត្រាលី​អំពាវនាវ​ឱ្យ​រដ្ឋាភិបាល​កម្ពុជា​ដោះលែង​កញ្ញា ឈឹម ស៊ីថរ ជាបន្ទាន់​និង​គ្មាន​លក្ខខណ្ឌ

ដោយ ឌឹ ខេមបូឌា ដេលី

បទវិភាគ

តំណាង​សមាជិក​សភា​អូស្ត្រាលី អំពាវនាវ​ឲ្យ​រដ្ឋាភិបាល​កម្ពុជា​ដោះលែង​កញ្ញា ឈឹម ស៊ីថរ ប្រធាន​សហជីព​ប្រចាំ​ក្រុមហ៊ុន​ណាហ្គា​វើលដ៍​ជាបន្ទាន់ ដោយ​គ្មាន​លក្ខខណ្ឌ និង​ស្នើ​ឲ្យ​ដោះស្រាយ​បញ្ចប់​វិវាទ​ការងារ​ដ៏​គួរ​ឲ្យ​អស់​សំណើច​នេះ។

លោក Julian Hill តំណាង​សមាជិក​សភា​អូស្ត្រាលី បាន​ថ្លែង​នៅ​ក្នុង​កិច្ចប្រជុំ​តំណាង​សមាជិក​សភា​អូស្ត្រាលី ថា ស្ថានភាព​សិទ្ធិមនុស្ស​នៅ​កម្ពុជា​កាន់តែ​អាក្រក់​ទៅៗ ដែល​ធ្វើ​ឲ្យ​មាន​ការ​ព្រួយបារម្ភ​ចំពោះ​ដំណើរការ​បោះឆ្នោត​ថ្នាក់​ជាតិ​នៅ​ឆ្នាំ​ក្រោយ។

លោក​បាន​បន្ត​ថា ហេតុការណ៍​ដ៏​គួរ​ឲ្យ​រន្ធត់​ចុងក្រោយ​បំផុត គឺ​ករណី​ចាប់​ខ្លួន​កញ្ញា ឈឹម ស៊ីថរ ជា​ប្រធាន​សហជីព​នៅ​កាស៊ីណូ​ណាហ្គា​វើលដ៍។ លោក​មាន​ការ​ភ្ញាក់ផ្អើល​ដោយ​ផ្ទាល់​នឹង​ករណី​នេះ។ លោក​ថា កញ្ញា ស៊ីថរ គឺជា​នារី​វ័យក្មេង​ដ៏​អស្ចារ្យ​ម្នាក់​ដែល​បាន​មក​ញ៉ាំ​កាហ្វេ​ជាមួយ​លោក​កាលពី ៨​ថ្ងៃ​មុន នៅ​ទីក្រុង​មែលប៊ន។

លោក​បាន​ថ្លែង​ថា កញ្ញា ស៊ីថរ ត្រូវ​បាន​អាជ្ញាធរ​ចាប់​ខ្លួន​គាត់​ដោយ​ហេតុ​ថា​គាត់​បាន​ធ្វើ​ដំណើរ​ទៅ​ក្រៅ​ប្រទេស ហើយ​ការ​ធ្វើ​ដំណើរ​នេះ គឺ​ខុស​លក្ខខណ្ឌ​ធានា​របស់​គាត់។ ជាក់ស្តែង​គ្មាន​នរណា​ម្នាក់​ធ្លាប់​ប្រាប់​គាត់​អំពី​លក្ខខណ្ឌ​នោះ​ទេ វា​មិន​សម​ហេតុផល​ទាល់តែសោះ។

លោក​ថា ដូច​គ្នា​នឹង​ថ្នាក់​ដឹកនាំ​សហជីព​ដទៃ​ទៀត កញ្ញា ស៊ីថរ បាន​ទទួល​រង​ការ​គំរាមកំហែង​អស់​រយៈពេល​យូរ​ឆ្នាំ​ហើយ។

លោក​អះអាង​ថា គាត់​ត្រូវ​បាន​ចាប់​ដាក់​គុក​ដោយសារ​គាត់​បាន​ក្រោក​ឈរ​ឡើង​ដើម្បី​ការពារ​កម្មករ​និយោជិត ១៣០០​នាក់ ដែល​ក្រុមហ៊ុន​ណាហ្គា​វើលដ៍​បាន​បញ្ឈប់​ពី​ការងារ​ដោយ​ខុស​ច្បាប់​ដែល​ក្រុមហ៊ុន​នេះ​ជា​កម្មសិទ្ធិ​របស់​មហាសេដ្ឋី​ជនជាតិ​ម៉ាឡេស៊ី ដែល​មាន​ពាក្យ​ចចាមអារ៉ាម​ថា​មាន​ទំនាក់ទំនង​គ្នា​ជាមួយ​នឹង​ក្រុមហ៊ុន Blackstone ជា​ម្ចាស់​កាស៊ីណូ Crown ដែល​ពួកគេ​គ្រាន់តែ​ទាមទារ​ប្រាក់​សំណង​ត្រឹមត្រូវ​តាម​ច្បាប់ និង​ទាមទារ​ឲ្យ​មាន​ការងារ​ធ្វើ​សម្រាប់​បុគ្គលិក​ដែល​នៅតែ​ចង់​ធ្វើការ​នៅ​ទីនោះ។

លោក Julian Hill ថា​កញ្ញា ស៊ីថរ បាន​មក​អូស្ត្រាលី ជា​ប្រតិភូ​របស់​អង្គការ APHEDA ដើម្បី​ចូលរួម​មហាសន្និបាត​របស់​សហភាព​សហជីព​អន្តរជាតិ (ITUC) នៅ​ទីក្រុង​មែលប៊ន។ នៅ​ពេល​ដែល​លោក​បាន​ជួប​ជាមួយ​កញ្ញា ស៊ីថរ ក៏​គាត់​មិន​មាន​ផែនការ​ផ្តួល​រំលំ​របស់​ជើងកាង​របស់​លោក ហ៊ុន សែន ទេ ហើយ​គាត់​ក៏​គ្មាន​គោលបំណង​នាំ​មក​នូវ​ការ​ធ្លាក់​ចុះ​មូលធន​និយម ឬ​អំពើពុករលួយ​នៅ​ក្នុង​ប្រទេស​កម្ពុជា​ទេ។

គាត់​គ្រាន់តែ​និយាយ​អំពី​បទពិសោធន៍​ថ្មី​ដែល​បាន​មកពី​ទីក្រុង​មែលប៊ន ហើយ​និង​បញ្ហា​ប្រឈម​របស់​គាត់ រួម​ទាំង​ថ្នាក់​ដឹកនាំ​សហជីព​នៅ​ទូទាំង​ពិភពលោក។

លោក Julian Hill អំពាវនាវ​ឲ្យ​រដ្ឋាភិបាល​កម្ពុជា​ដោះលែង​កញ្ញា ឈឹម ស៊ីថរ ជាបន្ទាន់ ហើយ​ក៏​អំពាវនាវ​ឲ្យ​ម្ចាស់​ក្រុមហ៊ុន​ណាហ្គា​វើលដ៍​ប្រព្រឹត្ត​ទៅ​ដោយ​សមរម្យ និង​បញ្ចប់​វិវាទ​ការងារ​ដ៏​គួរ​ឲ្យ​អស់​សំណើច​នេះ។ លោក​នឹង​និយាយ​ជាមួយ​រដ្ឋមន្ត្រី​កិច្ចការ​បរទេស​របស់​ប្រទេស​អូស្ត្រាលី ដើម្បី​មើល​ថា ស្ថានទូត​យើង​អាច​ធ្វើ​អ្វី​បាន​ដើម្បី​និយាយ​នៅ​ក្នុង​ប្រទេស​កម្ពុជា។

ក្រុម​អង្គការ​សង្គម​ស៊ីវិល ជំរុញ​ឱ្យ​តុលាការ​ដោះលែង​កញ្ញា ឈឹម ស៊ីថរ ប្រធាន​សហជីព​ប្រចាំ​ក្រុមហ៊ុន​ណាហ្គា​វើលដ៍​ជាបន្ទាន់ និង​គ្មាន​លក្ខខណ្ឌ ដោយ​ពួកគេ​ចាត់ទុក​ថា​ការ​ចាប់​ខ្លួន​នេះ​មាន​ភាព​មិន​ច្បាស់លាស់​ក្នុង​ការ​អនុវត្ត​ច្បាប់ បន្ទាប់ពី​អាជ្ញាធរ​ចាប់​ឃុំ​ខ្លួន​ក្រោយពី​កញ្ញា​ត្រឡប់​មកពី​ប្រជុំ​នៅ​ប្រទេស​អូស្ត្រាលី វិញ​កាលពី​ថ្ងៃទី​២៦ ខែ​វិច្ឆិកា។

នាយក​ទទួល​បន្ទុក​កិច្ចការ​ទូទៅ​អង្គការ​សិទ្ធិមនុស្ស​លីកាដូ លោក អំ សំអាត ថ្លែង​ថា ការ​ចាប់ និង​ឃុំ​ខ្លួន​កញ្ញា ឈឹម ស៊ីថរ គឺជា​រឿង​មិន​សម​ហេតុផល ពីព្រោះ​កញ្ញា​មិន​ធ្លាប់​បាន​ផ្ដិត​មេដៃ​ទៅ​លើ​ដីកា ឬ​សេចក្តី​សម្រេច​ណា​មួយ​របស់​តុលាការ​ឡើយ។ លោក​ថា ការ​ចាប់​ខ្លួន​គួរតែ​ធ្វើ​នៅ​ពេល​កញ្ញា​រៀបចំ​ចេញពី​កម្ពុជា មិនមែន​ត្រឡប់​មក​វិញ ទើប​បាន​ចាប់​ខ្លួន​បែប​នេះ​ទេ ហើយ​កញ្ញា​ក៏​គ្មាន​ចេតនា​គេចវេះ​ពី​លក្ខខណ្ឌ​របស់​តុលាការ​នោះ​ដែរ។

ប្រធាន​សហជីព​ទ្រទ្រង់​សិទ្ធិ​ការងារ​បុគ្គលិក​កម្មករ​ខ្មែរ​នៃ​ក្រុមហ៊ុន​ណាហ្គា​វើលដ៍ កញ្ញា ឈឹម ស៊ីថរ ត្រូវ​បាន​តុលាការ​ចោទប្រកាន់​ពី​បទ «ញុះញង់» តាម​បញ្ញត្តិ​មាត្រា​៤៩៤ និង​មាត្រា​៤៩៥ នៃ​ក្រម​ព្រហ្មទណ្ឌ កាលពី​ខែ​មករា ឆ្នាំ​២០២២ ក្រោយ​ពេល​សហជីព​កញ្ញា​ចាប់​ផ្ដើម​ធ្វើ​កូដកម្ម​អហិង្សា​ទាមទារ​រក​ដំណោះស្រាយ​ការងារ​ពី​ភាគី​ក្រុមហ៊ុន​បនល្បែង​មួយ​នេះ។

កញ្ញា ឈឹម ស៊ីថរ ត្រូវ​បាន​ចាប់​ខ្លួន​យ៉ាង​ហិង្សា​កាលពី​រសៀល​ថ្ងៃទី​៤ ខែ​មករា ឆ្នាំ​២០២២ អំឡុង​ពេល​ព្យាយាម​ចូលរួម​ធ្វើ​កូដកម្ម​ជាមួយ​កូដករ​ផ្សេង​ទៀត ហើយ​ត្រូវ​បាន​ជាប់​ឃុំ​បណ្ដោះអាសន្ន​ក្នុង​ពន្ធនាគារ​អស់​រយៈពេល ២​ខែ ជាមួយ​នឹង​ថ្នាក់​ដឹកនាំ និង​សមាជិក​របស់​ខ្លួន​ចំនួន ១០​នាក់​ផ្សេង​ទៀត​មុន​ពេល​មាន​ការ​ដោះលែង​ឱ្យ​នៅ​ក្រៅ​ឃុំ​វិញ​កាលពី​ខែ​មីនា ឆ្នាំ​នេះ។

អង្គការ​ឃ្លាំមើល​សិទ្ធិមនុស្ស Human Rights Watch បាន​ចេញ​របាយការណ៍​មួយ​កាលពី​ថ្ងៃទី​២១ ខែ​វិច្ឆិកា ឆ្នាំ​២០២២ បាន​អះអាង​ថា នៅ​កម្ពុជា​មាន​តែ​សហជីព​ស្និទ្ធ​នឹង​ថៅកែ​ទេ ដែល​អាច​បន្ត​រស់​រាន​មាន​ជីវិត​បាន​ល្អ​ប្រសើរ ខណៈ​សហជីព​ឯករាជ្យ​ក្នុង​វិស័យ​កាត់ដេរ​សម្លៀកបំពាក់ និង​ទេសចរណ៍​រង​ការ​ធ្វើ​ទុក្ខបុកម្នេញ​ឥត​ស្រាកស្រាន្ត៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស