ក្រុមសង្គមស៊ីវិល សហជីព និងសហព័ន្ធជាច្រើន សម្ដែងការខកចិត្តចំពោះសាលដីកាតុលាការកំពូល កាលពីដើមខែឧសភា ដែលបានតម្កល់សេចក្តីសម្រេចផ្ដន្ទាទោសថ្នាក់ដឹកនាំ និងសមាជិកសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ ឱ្យពួកគេមានទោសបន្តទៀត។
ក្រុមអង្គការក្រៅរដ្ឋាភិបាលចំនួន ៥០ស្ថាប័ន ដូចជា មជ្ឈមណ្ឌលសិទ្ធិមនុស្សកម្ពុជា (CCHR) សហព័ន្ធសហជីពកម្ពុជា (CATU) និងសមាគមការពារសិទ្ធិមនុស្ស និងអភិវឌ្ឍន៍កម្ពុជា (ADHOC) ជាដើម បានចេញសេចក្តីថ្លែងការណ៍រួមគ្នាមួយកាលពីថ្ងៃទី៦ ខែឧសភា ឆ្នាំ២០២៤ នេះថា មកដល់ពេលនេះ អាជ្ញាធរ និងតុលាការនៅតែមិនទាន់អាចផ្តល់នូវយុត្តិធម៌ជូនសកម្មជនសហជីពណាហ្គាវើលដ៍នៅឡើយទេ។
ប្រភពដដែលបន្ថែមថា អាជ្ញាធរត្រូវតែដោះលែងប្រធានសហជីពណាហ្គាវើលដ៍ កញ្ញា ឈឹម ស៊ីថរ និងផ្តល់នូវសេរីភាពពេញលេញដល់ជនជាប់ចោទទាំងអស់នៅក្នុងសំណុំរឿងនេះដោយឥតលក្ខខណ្ឌ។
ក្រុមសង្គមស៊ីវិលខាងលើលើកឡើងថា ថ្នាក់ដឹកនាំ និងសមាជិកសហជីពខាងលើ ក្រៅពីទទួលរងនូវការរំលោភបំពានតាមរយៈប្រព័ន្ធតុលាការ ពួកគេក៏ទទួលរងនូវការរំលោភបំពានតាមគ្រប់រូបភាពពីកងសន្តិសុខ និងអាជ្ញាធររាជធានីភ្នំពេញនាពេលកន្លងមកដែរ ដោយការរំលោភបំពានលើរូបរាងកាយ និងផ្លូវភេទ ជាដើម។
ប្រភពខាងលើបន្ថែមថា អាជ្ញាធរតែងចាប់ខ្លួនកម្មករ និងដាក់អ្នកទាំងនោះនៅក្នុងទីតាំងមួយចំនួន ក្រោមហេតុផលអនុវត្តច្បាប់ស្ដីពីវិធានការទប់ស្កាត់ការឆ្លងរាលដាលជំងឺកូវីដ-១៩ ដែលសកម្មភាពនេះបង្ហាញថា អាជ្ញាធរព្យាយាមបំភិតបំភ័យ គំរាមកំហែង រំលោភបំពាន និងធ្វើទុក្ខបុកម្នេញលើក្រុមកូដករដោយហិង្សា ជាជាងជួយដោះស្រាយបញ្ហាដែលសហជីព និងសហព័ន្ធសហជីពកំពុងជួបប្រទះ ដើម្បីធ្វើឱ្យប្រសើរឡើងនូវលក្ខខណ្ឌការងាររបស់ពួកគេ។
ក្រុមអង្គការក្រៅរដ្ឋាភិបាលទាំង ៥០ស្ថាប័ន អំពាវនាវឱ្យអាជ្ញាធរដោះលែងកញ្ញា ឈឹម ស៊ីថរ ដោយឥតលក្ខខណ្ឌ និងផ្តល់នូវសេរីភាពពេញលេញដល់ជនជាប់ចោទផ្សេងទៀត ដោយលុបបំបាត់នូវការភ័យខ្លាចពីការចាប់ខ្លួនដាក់ពន្ធនាគារ ឬធ្វើទុក្ខបុកម្នេញលើពួកគេបន្តទៀត។
ក្រុមសង្គមស៊ីវិលដដែលនេះបញ្ជាក់ថា ការធ្វើដូច្នេះ គឺជាមធ្យោបាយមួយដើម្បីផ្តល់នូវដំណោះស្រាយចំពោះការចោទប្រកាន់ និងការធ្វើទុក្ខបុកម្នេញមិនត្រឹមត្រូវទៅលើសមាជិកសហជីពដែលកំពុងតស៊ូមតិដើម្បីសិទ្ធិកម្មករសព្វថ្ងៃនេះ ចំណែកអាជ្ញាធរត្រូវតែគោរពសិទ្ធិសេរីភាពជាមូលដ្ឋានរបស់កម្មករនិយោជិត និងបញ្ឈប់ការចាត់ទុកសកម្មភាពអហិង្សារបស់សហជីពជាបទល្មើសព្រហ្មទណ្ឌតទៅទៀតដែរ។
ឧត្ដមស្នងការអង្គការសហប្រជាជាតិទទួលបន្ទុកសិទ្ធិមនុស្ស បានចេញសេចក្ដីថ្លែងការណ៍កាលពីថ្ងៃទី៣ ខែឧសភា កន្លងទៅ ដោយសម្ដែងក្ដីព្រួយបារម្ភ និងស្នើដល់អាជ្ញាធរកម្ពុជាទម្លាក់ចោលបទចោទប្រឆាំងនឹងក្រុមកូដករណាហ្គាវើលដ៍ផងដែរ បន្ទាប់ពីតុលាការកំពូលតម្កល់ការផ្ដន្ទាទោសលើថ្នាក់ដឹកនាំ និងសមាជិកសហជីពចំនួន ៩នាក់ឱ្យជាប់ពន្ធនាគារចន្លោះពី ១ឆ្នាំដល់ ២ឆ្នាំ ក្រោមបទចោទ «ញុះញង់» ទាំងអយុត្តិធម៌នោះ។
កាលពីថ្ងៃទី៣ ខែឧសភា ឆ្នាំ២០២៤ តុលាការកំពូលក្រុងភ្នំពេញ សម្រេចបើកសវនាការប្រកាសសាលក្រមលើសំណុំរឿងប្រធានសហជីពក្រុមហ៊ុនណាហ្គាវើលដ៍ និងសមាជិកសហជីព ៦នាក់ផ្សេងទៀត ដោយសម្រេចតម្កល់សាលដីការបស់សាលាឧទ្ធរណ៍ផ្ដន្ទាទោសលើថ្នាក់ដឹកនាំសហជីពទាំង ៧នាក់ពីបទ «ញុះញង់ឱ្យមានភាពវឹកវរធ្ងន់ធ្ងរដល់សន្តិសុខសង្គម» ទុកជាបានការដដែល។
កាលពីថ្ងៃទី២៥ ខែឧសភា ឆ្នាំ២០២៣ សាលាដំបូងរាជធានីភ្នំពេញបានប្រកាសសាលក្រមផ្ដន្ទាទោសប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ កញ្ញា ឈឹម ស៊ីថរ ដាក់ពន្ធនាគាររយៈពេល ០២ឆ្នាំ ចំណែកសមាជិកសហជីពដទៃទៀត ដូចជា កញ្ញា ឈឹម សុខន និងអ្នកស្រី សុន ស្រីពេជ្រ ជាដើម ត្រូវតុលាការផ្ដន្ទាទោសដាក់ពន្ធនាគាររយៈពេល ១៨ខែ។ ដោយឡែកអ្នកស្រី រី សុវណ្ណឌី លោក សុខ ណារិទ្ធិ និងលោក សុខ គង្គា ក៏ត្រូវបានតុលាការផ្ដន្ទាទោសរយៈពេល ១ឆ្នាំដែរ ប៉ុន្តែពួកគេតម្រូវឱ្យស្ថិតក្រោមការត្រួតពិនិត្យរបស់តុលាការ ក្នុងនោះ សាលាឧទ្ធរណ៍ភ្នំពេញក៏បានសម្រេចតម្កល់សាលក្រមរបស់សាលាដំបូងរាជធានីភ្នំពេញកាលពីថ្ងៃទី១៩ ខែតុលា ឆ្នាំ២០២៣ ទុកជាបានការផងដែរ៕