32 C
Phnom Penh

សមាគម​ខ្មែរ​នៅ​អូស្ត្រាលី​គ្រោង​ធ្វើ​បុណ្យ​ផ្កាប្រាក់​ប្រមូល​ថវិកា​ជួយ​ក្រុម​កូដករ​ណាហ្គា​ដែល​កំពុង​ដាច់​ស្បៀង

ដោយ ឌឹ ខេមបូឌា ដេលី

បទវិភាគ

អតីត​តំណាងរាស្ត្រ​អូស្ត្រាលី​ដើម​កំណើត​ខ្មែរ​ប្រចាំ​រដ្ឋ​វិចតូរីយ៉ា លោក ហុង លីម ធ្វើ​បុណ្យ​ផ្កាប្រាក់​ដើម្បី​ប្រមូល​ថវិកា​ជួយ​ដល់​ក្រុម​កូដករ​ណាហ្គា​វើលដ៍ ដែល​កំពុង​ដាច់​ស្បៀង​នៅ​ពេលនេះ បន្ទាប់ពី​ពួកគេ​ត្រូវ​បាន​ភាគី​ខាង​ក្រុមហ៊ុន​រំលោភ​សិទ្ធិ​ការងារ​បញ្ឈប់​ដោយ​គ្មាន​ដំណោះស្រាយ​អស់​រយៈពេល​ជិត ១​ឆ្នាំ​កន្លងមក។

អតីត​តំណាងរាស្ត្រ​អូស្ត្រាលី​ដើម​កំណើត​ខ្មែរ​ប្រចាំ​រដ្ឋ​វិចតូរីយ៉ា និង​ជា​ប្រធាន​សហព័ន្ធ​ខ្មែរ​អូស្ត្រាលី​សាជីវកម្ម លោក ហុង លីម បាន​ប្រកាស​ជា​សាធារណៈ​នៅ​ថ្ងៃទី​១ ខែ​ធ្នូ ឆ្នាំ​២០២២ នេះ​ថា សមាគម​ខ្មែរ​វិចតូរីយ៉ា និង​សហព័ន្ធ​ខ្មែរ​អូស្ត្រាលី នឹង​ប្រារព្ធ​ពិធីបុណ្យ​ផ្កាប្រាក់​ទ្រទ្រង់​ទិវា​សិទ្ធិមនុស្ស​អន្តរជាតិ​ដែល​នឹង​ប្រព្រឹត្ត​ទៅ​នៅ​ថ្ងៃទី​១០ ខែ​ធ្នូ ឆ្នាំ​២០២២ ខាងមុខ​នេះ។

លោក ហុង លីម លើកឡើង​ថា បុណ្យផ្កា​ប្រាក់​ទ្រទ្រង់​ទិវា​សិទ្ធិមនុស្ស​អន្តរជាតិ នឹង​ធ្វើ​ឡើង​នៅ​សមាគម​ខ្មែរ​វិចតូយ៉ា (Cambodian Association of Victoria) ដែល​នឹង​ចាប់ផ្តើម​ពី​ម៉ោង ៩​នាទី​ព្រឹក​ដល់​ម៉ោង ២​រសៀល ក្នុង​នោះ​នៅ​វេលា​ម៉ោង ៩​ព្រឹក ត្រូវ​ជួបជុំ​ភ្ញៀវ​កិត្តិយស ម៉ោង ១០​ព្រឹក​ធ្វើ​ពិធី​រាប់បាត្រ ម៉ោង ១០ និង ៣០​នាទី ធ្វើ​ពិធី​បង្សុកូល នៅ​ម៉ោង ១១ និង ១០​នាទី សុន្ទរកថា​របស់​ប្រធាន​អង្គការ​នានា និង​ភ្ញៀវ​កិត្តិយស និង​ម៉ោង ១២​ថ្ងៃត្រង់​ទទួលទាន​អាហារ​សាមគ្គី​ជុំគ្នា​ផង​ដែរ។

ប្រធាន​សហព័ន្ធ​ខ្មែរ​អូស្ត្រាលី​សាជីវកម្ម លោក ហុង លីម អំពាវនាវ​ឱ្យ​អង្គការ​ខ្មែរ​នានា​ក្នុង​រដ្ឋ​វិចតូរីយ៉ា​ចូលរួម​ឱ្យ​បាន​ច្រើន​កុះករ ដើម្បី​បង្ហាញ​នូវ​ការ​គាំទ្រ និង​រួម​ចំណែក​ក្នុង​បុព្វហេតុ​ការពារ​សិទ្ធិមនុស្ស​នៅ​កម្ពុជា​ដោយ​ការ​បរិច្ចាគ​ថវិកា​ជួយ​ដល់​បុគ្គលិក និង​កម្មករ​ដែល​ត្រូវ​ក្រុមហ៊ុន​ណាហ្គា​វើលដ៍​បញ្ឈប់​ពី​ការងារ​ដោយ​គ្មាន​ដំណោះស្រាយ​តាំងពី​ខែ​មេសា ឆ្នាំ​២០២១ មក។

លោក ហុង លីម បញ្ជាក់​ថា ការ​ធ្វើ​ពិធីបុណ្យ​ផ្កាប្រាក់​នេះ គឺ​បន្ទាប់ពី​មាន​ការ​ជួប​ពិភាក្សា​គ្នា​ជាមួយ​តំណាង​សមាគម​ខ្មែរ​រដ្ឋ​វិចតូរីយ៉ា​ជាមួយ​មេដឹកនាំ​សហជីព កញ្ញា ឈឹម ស៊ីថរ ដែល​មក​ចូលរួម​កិច្ចប្រជុំ​នៅ​ប្រទេស​អូស្ត្រាលី​កាលពី​ពេល​ថ្មីៗ​នេះ និង​ត្រូវ​បាន​អាជ្ញាធរ​ក្រុង​ភ្នំពេញ​ចាប់​ខ្លួន​អំឡុង​ពេល​ដែល​កញ្ញា​ត្រឡប់​ទៅ​ដល់​ប្រទេស​កម្ពុជា​វិញ ដូច្នេះ​អង្គការ​នានា​ដែល​មាន​បំណង​ចូលរួម​ក្នុង​ពិធីបុណ្យ​ផ្កាប្រាក់​នេះ សូម​ធ្វើការ​ទាក់ទង​ទៅ​លោក ហុង លីម លោក តាក ម៉េងហ៊ាង និង​លោក ជា យូហ៊ន ដែល​ជា​អ្នក​តំណាង​សម្រាប់​ពិធីបុណ្យ​នេះ។

ការ​ធ្វើ​ពិធីបុណ្យ​ផ្កាប្រាក់​នេះ ធ្វើឡើង​ដើម្បី​រៃអង្គាស​ថវិកា​ជួយ​ដល់​កម្មករ​និយោជិត​នៃ​ក្រុមហ៊ុន​ណាហ្គា​វើលដ៍​ដែល​ត្រូវ​បាន​ថៅកែ​ក្រុមហ៊ុន​រំលោភ​សិទ្ធិ​ការងារ​បញ្ឈប់​ទាំង​បង្ខំ​ដោយ​គ្មាន​សំណង​តាម​ច្បាប់​ចាប់តាំងពី​ខែ​មេសា ឆ្នាំ​២០២១ មក។

កាលពី​ថ្ងៃទី​៨ ខែ​មេសា ឆ្នាំ​២០២១ ក្រុមហ៊ុន​ណាហ្គា​វើលដ៍ បាន​ប្រកាស​គម្រោង​កាត់បន្ថយ​បុគ្គលិក​ចំនួន​ជាង ១៣០០​នាក់​ក្រោម​ហេតុផល​ជួប​វិបត្តិ​កូវីដ-១៩ ប៉ុន្តែ​ការ​បញ្ឈប់​បុគ្គលិក​ទាំងនេះ ត្រូវ​កម្មករ​ទាំងនោះ​អះអាង​ថា ក្រុមហ៊ុន​មាន​ចេតនា​រំលាយ​ថ្នាក់​ដឹកនាំ​សហជីព​ដែល​តែង​ប្រឆាំង​នឹង​ការ​រំលោភ​សិទ្ធិ​ការងារ​របស់​ក្រុមហ៊ុន​លើ​បុគ្គលិក​នៃ​ក្រុមហ៊ុន​ណាហ្គា​វើលដ៍​រហូត​មក។

ក្រោយ​ការ​បញ្ឈប់​អស់​រយៈពេល ៧​ខែ និង​មិន​មាន​ការ​ផ្តល់​សំណង​ត្រឹមត្រូវ​តាម​ច្បាប់​ការងារ ក្រុម​បុគ្គលិក​ដែល​ក្រុមហ៊ុន​បាន​បញ្ឈប់​ទាំង​ជាង ៣០០​នាក់​នោះ បាន​នាំគ្នា​ចេញ​ធ្វើ​កូដកម្ម​អហិង្សា​នៅ​ថ្ងៃទី​១៨ ខែ​ធ្នូ ឆ្នាំ​២០២១ ដែល​មាន​កម្មករ​និយោជិត​ចូលរួម​ជិត ១៣០០​នាក់ មាន​ទាំង​កម្មករ​និយោជិត​ជា​ស្ត្រី​មាន​ផ្ទៃពោះ​ផង បាន​ប្រមូល​ផ្តុំ​គ្នា​នៅ​មុខ​ក្រុមហ៊ុន​ណាហ្គា​វើលដ៍ ដើម្បី​ទាមទារ​ឱ្យ​ក្រុមហ៊ុន​ទទួល​យក​កម្មករ​និយោជិត​ចំនួន ៣៦៥​នាក់ ក្នុង​ចំណោម​កម្មករ​និយោជិត ១៣០០​នាក់​ដែល​ក្រុមហ៊ុន​បាន​បញ្ឈប់​ពី​ការងារ​ដោយ​គ្មាន​សំណង​ទាំងនោះ។

យ៉ាងណាក៏ដោយ បន្ទាប់ពី​មាន​ការ​តវ៉ា អាជ្ញាធរ​ក្រុង​ភ្នំពេញ​បាន​ចេញ​អន្តរាគមន៍​បង្ក្រាប​ទៅ​លើ​ហ្វូង​កូដករ​អហិង្សា​យ៉ាង​ធ្ងន់ធ្ងរ ក្រោម​ហេតុផល​ថា ពួកគេ​បាន​ធ្វើ​ឱ្យ​ខូច​សណ្ដាប់ធ្នាប់​សាធារណៈ ក្នុង​នោះ​មេដឹកនាំ​សហជីព​ចំនួន ៩​នាក់​ត្រូវ​បាន​ចាប់​ឃុំ​ខ្លួន ដូចជា​កញ្ញា ឈឹម ស៊ីថរ ជាដើម ក្រោម​បទ​ចោទ​ញុះញង់​បង្ក​ឱ្យ​មាន​ភាព​វឹកវរ​ដល់​សន្តិសុខ​សង្គម និង​ក្រោម​ផែនការ​ដែល​មាន​អង្គការ​ចាត់តាំង​ពី​បរទេស។

ចាប់តាំងពី​ថ្ងៃ​ចាប់ផ្តើម​ធ្វើ​កូដកម្ម​នៅ​ថ្ងៃទី​១៨ ខែ​ធ្នូ ឆ្នាំ​២០២១ រហូត​ដល់​ថ្ងៃទី​០១ ខែ​ធ្នូ ឆ្នាំ​២០២២ នេះ​មាន​រយៈពេល​ជិត ១​ឆ្នាំ​ហើយ ប៉ុន្តែ​វិវាទ​នេះ​នៅតែ​គ្មាន​ដំណោះស្រាយ​ដដែល ខណៈ​ប្រធាន​សហជីព កញ្ញា ឈឹម ស៊ីថរ ក៏​ត្រូវ​បាន​សមត្ថកិច្ច​ក្រុង​ភ្នំពេញ​ចាប់​ខ្លួន​សាជាថ្មី​ម្តង​ទៀត​កាលពី​ថ្ងៃទី​២៦ ខែ​វិច្ឆិកា ឆ្នាំ​២០២២ នេះ បន្ទាប់ពី​កញ្ញា​ត្រឡប់​ពី​ប្រទេស​អូស្ត្រាលី​វិញ ស្រប​ពេល​ដែល​ក្រុម​កូដករ​មួយ​ចំនួន​ផ្សេង​ទៀត​កំពុង​រង​នូវ​បណ្តឹង​នានា​តាម​ផ្លូវ​តុលាការ​ដែរ​នោះ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស