លោកនាយករដ្ឋមន្ត្រី ហ៊ុន សែន លើកទឹកចិត្តឲ្យអាជ្ញាធរព្យាយាមដោះស្រាយបញ្ហា និងជម្លោះក្នុងចំណោមប្រជាជននៅក្រៅប្រព័ន្ធតុលាការ ដើម្បីលុបបំបាត់ឲ្យអស់នូវភាពអសកម្ម និងដោះស្រាយឱ្យបានរហ័ស និងមានប្រសិទ្ធភាព ចៀសវាងបង្កនូវបញ្ហានានា។
អ្នកសង្កេតការណ៍និយាយថា បើធ្វើដូច្នេះ តើគេទុក ឬប្រើច្បាប់ជាធរមានដើម្បីធ្វើអ្វីវិញ?
ការណែនាំនេះ ធ្វើឡើងក្នុងឱកាសជួបសំណេះសំណាលជាមួយមន្ត្រីគណបក្សប្រជាជនកម្ពុជា ចំនួន ៣៤៥៧នាក់ពីខេត្តកណ្ដាល ដែលពិធីនេះបានធ្វើឡើងនៅវិមាន ៧មករា នៅព្រឹកថ្ងៃសៅរ៍ ទី០៣ ខែធ្នូ ឆ្នាំ២០២២។
លោកនាយករដ្ឋមន្ត្រី ហ៊ុន សែន ថែមទាំងប្រាប់អាជ្ញាធរឲ្យដោះស្រាយជម្លោះដីធ្លីជូនប្រជាពលរដ្ឋឲ្យបានរហ័ស និងមានប្រសិទ្ធភាពផងដែរ។ ជាមួយគ្នានេះ លោកនាយករដ្ឋមន្ត្រីក៏បានក្រើនរម្លឹកអាជ្ញាធរឲ្យយកចិត្តទុកដាក់ក្នុងការផ្តល់សេវាសាធារណៈជូនប្រជាជន ខិតខំលុបបំបាត់ឲ្យអស់នូវភាពអសកម្ម និងចៀសវាងបង្កបញ្ហា។
លោក ហ៊ុន សែន ក៏បានក្រើនរំលឹកដល់សមាជិកសមាជិកាគណបក្សទាំងអស់ដែលមានមុខនាទីក្នុងរាជរដ្ឋាភិបាល ត្រូវបន្តយកចិត្តទុកដាក់បំពេញមុខនាទី ភារកិច្ចបម្រើជាតិ និងប្រជាជន ជាពិសេសបន្តយកចិត្តទុកដាក់រក្សាសន្តិសុខ សណ្ដាប់ធ្នាប់សង្គម ដោយអនុវត្តគោលនយោបាយភូមិ-ឃុំមានសុវត្ថិភាព រួមមានដូចជាការបង្ក្រាបនូវបទល្មើសផ្សេងៗ ដូចជាចោរឆក់ ចោរប្លន់ និងការជួញដូរគ្រឿងញៀនជាដើម ដើម្បីផ្តល់ភាពកក់ក្តៅ និងធានាដល់សុវត្ថិភាពនៃការរស់នៅសម្រាប់ប្រជាពលរដ្ឋ។
អ្នកសម្របសម្រួលគម្រោងធុរកិច្ចនៅមជ្ឈមណ្ឌលសិទ្ធិមនុស្សកម្ពុជា លោក វណ្ណ សុផាត បានប្រាប់សារព័ត៌មានក្នុងស្រុកកន្លងមកថា សារនយោបាយនេះជាជម្រើសល្អមួយ ខណៈអ្នកតវ៉ាដីធ្លីខ្លះត្រូវបានគេចាប់ដាក់ពន្ធនាគារក្រោមបទចោទប្រកាន់ផ្សេងៗ ក្រោយពីពួកគេតវ៉ាប្រឆាំងនឹងការបណ្ដេញចេញទាំងបង្ខំ នៅពេលគម្រោងអភិវឌ្ឍន៍ទៅដល់ ប៉ុន្តែលោកថា សារនយោបាយនេះនឹងមិនអាចធានាផលប្រយោជន៍ពលរដ្ឋទេ បើខ្វះប្រព័ន្ធតាមដានការអនុវត្តនោះ។
សេចក្តីរាយការណ៍ចេញផ្សាយកាលពីថ្ងៃទី៨ ខែកុម្ភៈ ឆ្នាំ២០២២ កម្រាស់ ៣៤ទំព័រ ក្រោមចំណងជើងថា «ការបន្តចោទប្រកាន់-ការចាប់ឃុំខ្លួនពលរដ្ឋក្នុងរឿងវិវាទដីធ្លី» បានលើកឡើងថា ក្នុងឆ្នាំ២០២១ ពលរដ្ឋចំនួនជាង ១ម៉ឺន ៧ពាន់គ្រួសារ (១៧០៣៣គ្រួសារ) ក្នុងនោះមានជនជាតិដើមភាគតិចជាង ១៣០០គ្រួសារ (១៣៤៧គ្រួសារ) បានរងផលប៉ះពាល់ដោយសារវិវាទដីធ្លីដែលមានទំហំជាង ៥ម៉ឺន ២ពាន់ហិកតារ (៥២៦០១,៨៧ហិកតារ)។
ការរំលោភដីធ្លីលើពលរដ្ឋពីសំណាក់បុគ្គលមានអំណាចចំនួន ៦៦ករណី និងបុគ្គលអ្នកមានទ្រព្យចំនួន ២៧ករណី។
សេចក្តីរាយការណ៍ដដែលថាក្នុងឆ្នាំ២០២១ វិវាទដីធ្លីធំៗបានកើនឡើងខ្ពស់មានលក្ខណៈធ្ងន់ធ្ងរ ដោយមានការប្រើអំពើហិង្សា វាយបង្ក្រាប ចាប់ខ្លួន ឃុំខ្លួន និងបាញ់ប្រហារទៅលើពលរដ្ឋ ដូចជាករណីវិវាទនៅស្រុកកណ្ដាលស្ទឹង ខេត្តកណ្ដាល រវាងក្រុមហ៊ុន OCIC គ្រប់គ្រងដោយក្រុមគ្រួសារឧកញ៉ា ពុង ឃាវសែ ដែលអភិវឌ្ឍធ្វើអាកាសយានដ្ឋានថ្មី ករណីវិវាទនៅក្នុងស្រុកស្អាង ក្នុងខេត្តកណ្ដាល ក៏មានសកម្មជនម្នាក់ស្លាប់ក្រោយពេលបញ្ជូនពីពន្ធនាគារដល់មន្ទីរពេទ្យ៕