អតីតមន្ត្រីជាន់ខ្ពស់គណបក្សសង្គ្រោះជាតិនៅក្រៅប្រទេស រិះគន់អតីតមេដឹកនាំប្រឆាំង លោក សម រង្ស៊ី ថាជាមេដឹកនាំដែលមានភាពខ្ជីខ្ជា និងខ្វះភាពហ្មត់ចត់ក្នុងការដឹកនាំកិច្ចការរបស់ខ្លួន ដែលធ្វើឱ្យមានការបែកបាក់ផ្ទៃក្នុងរហូតមិនអាចវិលត្រឡប់ទៅដឹកនាំនយោបាយនៅប្រទេសកម្ពុជាវិញបាន។
អតីតអគ្គលេខាធិការគណបក្សសង្គ្រោះជាតិក្រៅប្រទេស ឬ CNRP-O លោក ប៉ុន សៅរី បានសរសេរលើគណនីហ្វេសប៊ុករបស់លោកកាលពីថ្ងៃទី៤ ធ្នូ ថា លោក សម រង្ស៊ី ជាមេដឹកនាំដែលគ្មានសមត្ថភាពសូម្បីតែថែរក្សាកិច្ចការដែលរូបលោក និងសមាជិកជាន់ខ្ពស់ដទៃទៀតបានជួយជ្រោមជ្រែងនាពេលកន្លងមក ដូចជាការបង្កើតព្រឹត្តិការណ៍ពិភពលោកនៅចុងឆ្នាំ២០១៨ លើទឹកដីសហរដ្ឋអាមេរិក ជាដើម ឱ្យមានភាពយូរអង្វែង ក៏គាត់មិនអាចធ្វើបាន។
លោក ប៉ុន សៅរី អះអាងថា ដើម្បីជាការដឹងគុណចំពោះលោក សម រង្ស៊ី ដែលបានតស៊ូលះបង់ដើម្បីសេរីភាព និងលទ្ធិប្រជាធិបតេយ្យនៅប្រទេសកម្ពុជាតាំងពីឆ្នាំ១៩៩៣ មក លោកបានប្រឹងប្រែងចំណាយពេលវេលា និងប្រើប្រាស់ធនធានផ្ទាល់ខ្លួនយ៉ាងច្រើនក្នុងការជួយឱ្យលោក សម រង្ស៊ី មានឥទ្ធិពល និងការគាំទ្រកាន់តែច្រើនឡើងវិញ ដើម្បីឱ្យគាត់អាចវិលត្រឡប់ទៅដឹកនាំនយោបាយនៅប្រទេសកម្ពុជាវិញ ប៉ុន្តែជាលទ្ធផល គាត់មិនអាចគ្រប់គ្រងការងារទាំងនោះបានជោគជ័យឡើយ។
លោក ប៉ុន សៅរី បន្តថា រូបលោកផ្ទាល់ក៏ដូចជាសមាជិកគណបក្សសង្គ្រោះជាតិនៅក្រៅប្រទេសដទៃទៀតដែរ មិនមានសមត្ថភាពធ្វើកិច្ចការផ្សេងទៀតឱ្យលើសពីអ្វីដែលខ្លួនធ្លាប់បានធ្វើកន្លងមកនោះទេ ប៉ុន្តែបើលោក សម រង្ស៊ី មិនយល់ពីតម្លៃនៃការលះបង់របស់អ្នកដែលបានជួយលោកកន្លងមក និងមិនចេះថែរក្សាសមិទ្ធផលទាំងនោះ វាគ្រាន់តែជាភស្តុតាងបញ្ជាក់ថា គាត់គឺជាអ្នកដឹកនាំមួយរូបដែលមានភាពខ្ជីខ្ជា និងគ្មានការទទួលខុសត្រូវចំពោះអ្នកគាំទ្ររបស់ខ្លួនប៉ុណ្ណោះ ហើយក៏ជាមូលហេតុនៃការបរាជ័យរបស់គាត់លើឆាកនយោបាយដែរ។
កាលពីដើមខែធ្នូ ឆ្នាំ២០១៨ លោក សម រង្ស៊ី បានដឹកនាំឱ្យមានសមាជគណបក្សសង្គ្រោះជាតិដ៏ធំមួយនៅទីក្រុងអាត្លង់តា (Atlanta) រដ្ឋចចា (Georgia) លើទឹកដីសហរដ្ឋអាមេរិក ដែលមានការជួយជ្រោមជ្រែងទាំងស្រុងពីអតីតអគ្គលេខាធិការគណបក្សសង្គ្រោះជាតិក្រៅប្រទេស ឬ CNRP-O លោក ប៉ុន សៅរី និងសមាជិកដទៃទៀតដែលបានយកការិយាល័យធ្វើការរបស់ខ្លួនធ្វើជាកន្លែងជួបជុំ ក្នុងបំណងជួយឱ្យលោក សម រង្ស៊ី មានឥទ្ធិពលនយោបាយឡើងវិញ ដើម្បីទាក់ទាញការស្វាគមន៍គាំទ្រពីសហគមន៍ជាតិ និងអន្តរជាតិ ខណៈពេលដែលលោកកំពុងនិរទេសខ្លួននៅឯក្រៅប្រទេស។
ក្នុងពិធីសមាជគណបក្សសង្គ្រោះជាតិលើកទី២ ដែលគ្មានការអនុញ្ញាតពីប្រធានគណបក្សសង្គ្រោះជាតិ លោក កឹម សុខា នៅពេលនោះ លោក សម រង្ស៊ី បានប្រកាសបង្កើតសាខាគណបក្សសង្គ្រោះជាតិប្រចាំសហរដ្ឋអាមេរិក (CNRP-A) និងប្រកាសតែងតាំងមន្ត្រីជាន់ខ្ពស់គណបក្សសង្គ្រោះជាតិជាច្រើនរូបនៅក្រៅប្រទេសផងដែរ ប៉ុន្តែក្រោយមក អ្នកដែលលោក សម រង្ស៊ី បានប្រកាសតែងតាំងនៅពេលនោះ បាននាំគ្នាលាឈប់ជាបន្តបន្ទាប់ ដោយសារតែពួកគេបាត់បង់ជំនឿលើការដឹកនាំរបស់លោកបន្តទៀត។
ជាក់ស្តែង អគ្គជំនួយការជាន់ខ្ពស់ទី១ នៃគណបក្សសង្គ្រោះជាតិនៅសហរដ្ឋអាមេរិក អ្នកស្រី Nalen Smith បានដាក់ពាក្យលាឈប់ពីមុខនាទីកាលពីថ្ងៃទី៣១ ខែកក្កដា ឆ្នាំ២០២១ ចំណែកប្រធានសាខាគណបក្សសង្គ្រោះជាតិប្រចាំសហរដ្ឋអាមេរិក CNRP-A និងជាអនុប្រធានប្រចាំក្រៅប្រទេស CNRP-O លោក ឡោ ឡៃសូ ក៏បានដាក់លិខិតលាលែងពីមុខនាទីរបស់ខ្លួនកាលពីថ្ងៃទី១១ ខែសីហា ឆ្នាំ២០២១ ផងដែរ។
បញ្ហាក្នុងគណបក្សសង្គ្រោះជាតិទាក់ទងនឹងរបៀបដឹកនាំបក្សនយោបាយ អ្នកសង្កេតតាមដាននយោបាយខ្មែរបានធ្វើការព្យាករ និងសន្និដ្ឋានជាច្រើនឆ្នាំកន្លងទៅហើយថា បក្សប្រឆាំងនេះនឹងមានវាសនាដូចគណបក្សរាជានិយមហ៊្វុនស៊ិនប៉ិច មិនខានឡើយ រង់ចាំតែពេលវេលាប៉ុណ្ណោះ ប៉ុន្តែសមាជិកសកម្មជនដើរតាមបក្សនេះដែលប្រគល់វាសនាទាំងស្រុងលើមេដឹកនាំបក្សសង្គ្រោះជាតិ ចេញមុខការពារព្រោងព្រាត ចោទគេចោទឯងថា ជាបរិវារបក្សប្រជាជនកម្ពុជាទៅវិញ។ នេះជាលទ្ធផលនៃការមិនប្រើវិចារណញ្ញាណត្រេះរិះគិតពិចារណាល្អិតល្អន់តាមសម្មាទិដ្ឋិ ឬសេចក្តីយល់ឃើញត្រូវ។ ទោះជាយ៉ាងដូច្នេះក្តី បក្សប្រឆាំងបើច្បាស់ជាប្រឆាំងពិតមែនទែន នៅមានឱកាសនៅឡើយទេ៕