28 C
Phnom Penh

កម្ពុជា​មិន​បាន​ធ្វើ​ឱ្យ​មាន​លទ្ធផល​ណា​មួយ​ចំពោះ​វិបត្តិ​នៅ​ភូមា​ក្នុង​ឋានៈ​ជា​ប្រធាន​អាស៊ាន​ឆ្នាំ​២០២២

ដោយ ឌឹ ខេមបូឌា ដេលី

បទវិភាគ

នៅ​ពេល​លោក ហ៊ុន សែន ប្រគល់​ញញួរ​ប្រធាន​អាស៊ាន​ទៅ​ឱ្យ​ប្រទេស​ឥណ្ឌូនេស៊ី បន្ត​វេន​ជា​ប្រធាន​អាស៊ាន​ឆ្នាំ​២០២៣ លោក ហ៊ុន សែន មិន​បាន​អួតអាង​មួយ​ម៉ាត់​ថា កម្ពុជា​បាន​ធ្វើ​ឱ្យ​មាន​ការ​វិវឌ្ឍ​ល្អ​ចំពោះ​វិបត្តិ​នៅ​ភូមា នោះ​ទេ ដែល​វា​ផ្ទុយ​ទាំងស្រុង​ចំពោះ​ការ​អួត​ក្អេងក្អាង​នៅ​ពេល​លោក​កាន់​ញញួរ​ជា​ប្រធាន​អាស៊ាន​សម្រាប់​ឆ្នាំ​២០២២ កាលពី​ខែ​វិច្ឆិកា ឆ្នាំ​២០២១។

គេ​នៅ​ចាំ​បាន​ថា ពេល​នោះ​លោក ហ៊ុន សែន បុរស​ខ្លាំង​នៅ​កម្ពុជា​លើក​ញញួរ​ដោយ​ថត​បង្ហាញ​ប្រាប់​ប្រជាជន​កម្ពុជា​ផង និង​ប្រាប់​អ្នក​នយោបាយ​អាស៊ាន រួម​ទាំង​ពិភពលោក​ផង​ថា រូបលោក​ផ្ទាល់​មាន​សុទិដ្ឋិនិយម​ក្នុង​ការ​នាំ​ភូមា​ត្រឡប់​មក​ចូល​សមាគម​អាស៊ាន​វិញ​ជាមួយ​នឹង​ការ​ឱ្យ​របប​សឹក​ចេះ​បត់បែន​ការ​ដឹកនាំ​ប្រទេស​ទៅ​តាម​កាលៈទេសៈ​ជាក់ស្ដែង។

មិន​តែប៉ុណ្ណោះ លោក ហ៊ុន សែន បាន​ថ្លែង​ថា លោក​នឹង​ជួយ​ឱ្យ​ភូមា ជាពិសេស​គឺ​មេ​រដ្ឋប្រហារ មីន អ៊ុងឡាំង មក​អង្គុយ​ប្រជុំ​ជាមួយ​មេដឹកនាំ​អាស៊ាន​ដែល​លោក​ថា​អាស៊ាន​មិនមែន ៩​ប្រទេស​នោះ​ទេ គឺ​អាស៊ាន ១០​ប្រទេស ទើប​ហៅថា​អាស៊ាន។ លោក​បាន​ថ្លែង​ថា ពេលនេះ​កម្ពុជា​អាច​មាន​លទ្ធភាព​ជួយ​ផ្សះផ្សា​វិបត្តិ​នៅ​ភូមា ព្រោះ​កម្ពុជា​ឆ្លងកាត់​វិបត្តិ​ផ្ទៃក្នុង​ខ្លួនឯង​យ៉ាង​ធ្ងន់ធ្ងរ​បំផុត ហើយ​ទីបំផុត​កម្ពុជា​ដោះស្រាយ​បាន​ដោយ​ឈរ​លើ​គោលការណ៍​នយោបាយ​ឈ្នះ​ឈ្នះ​របស់​លោក។

គ្រាន់តែ​កាន់​ញញួរ​ជា​ប្រធាន​អាស៊ាន​ភ្លាម លោក ហ៊ុន សែន អួតអាង​អំពី​ការ​រើស​ពេល​ទៅ​ជួប​មេ​រដ្ឋប្រហារ​នៅ​ភូមា ឧត្តមសេនីយ៍ មីន អ៊ុងឡាំង គឺ​នៅ​ខែ​មករា ឆ្នាំ​២០២២ ដោយ​កំណត់​យក​ថ្ងៃ​ទី​៧ មករា តែម្ដង​ជា​ថ្ងៃ​ដែល​លោក​អះអាង​ថា​ដឹកនាំ​ទ័ព​រំដោះ​កម្ពុជា​ចេញពី​របប​កម្ពុជា​ប្រជាធិបតេយ្យ​ខ្មែរក្រហម។

អ្វី​ដែល​គួរ​ឱ្យ​ភ្ញាក់ផ្អើល​ពេល​នោះ លោក​ទៅ​ជួប​មេ​រដ្ឋប្រហារ មីន អ៊ុងឡាំង ហើយ​បាន​ហៅ​លោក មីន អ៊ុងឡាំង ថា​ជា​នាយករដ្ឋមន្ត្រី​នៅ​ពេល​ដែល​ប្រទេស​អាស៊ាន​ជាច្រើន​មិន​បាន​ហៅ​បុរស​នេះ​ក្នុង​ឋានៈ​នេះ​ផង​នោះ។

សេចក្ដី​ប្រកាស​រួម​របស់​លោក ហ៊ុន សែន និង​លោក មីន អ៊ុងឡាំង បាន​ធ្វើ​ឡើង​ដោយ​បាន​បង្ហាញ​ថា សេចក្ដី​ថ្លែងការណ៍​រួម​ចាប់​ពី​ពេលនេះ​តទៅ វា​ជា​ការ​ត្រួសត្រាយ​ផ្លូវ​ឆ្ពោះ​ទៅ​រក​ការ​ដោះស្រាយ​វិបត្តិ​នៅ​ភូមា។ អ្វី​ដែល​លោក ហ៊ុន សែន អួតអាង​នោះ គឺ​លោក​អូស​ទាញ​បាន​របប​សឹក​ភូមា​ទទួល​យក​បទ​ឈប់​បាញ់​គ្នា​ជាមួយ​នឹង​កម្លាំង​ប្រឆាំង។ នៅ​ពេល​មក​ដល់​ព្រលាន​យន្តហោះ​ភ្នំពេញ​អន្តរជាតិ លោក ហ៊ុន សែន មិន​បាន​ធ្វើ​សន្និសីទ​សារព័ត៌មាន​ទៅ​កាន់​អ្នក​សារព័ត៌មាន​នោះ​ទេ ដោយ​លោក​ទុក​ឱ្យ​លោក ប្រាក់ សុខុន រដ្ឋមន្ត្រី​ការបរទេស និង​ជា​ប្រេសិត​អាស៊ាន​ជា​អ្នក​បកស្រាយ និង​បង្ហាញ​សមិទ្ធផល​នៃ​ជំនួប​របស់​លោក​ជាមួយ​មេដឹកនាំ​របប​សឹក​ប្រាប់​ទៅ​អ្នក​សារព័ត៌មាន។

ក្នុង​សន្និសីទ​សារព័ត៌មាន​នោះ គេ​នៅ​ចាំ​បាន​ថា លោក ប្រាក់ សុខុន អួតអាង​អំពី​នយោបាយ​ឈ្នះ​ឈ្នះ​របស់​លោក ហ៊ុន សែន ដែល​សុំ​ឱ្យ​ភូមា គឺ​ឧត្តមសេនីយ៍ មីន អ៊ុងឡាំង ធ្វើ​តាម​កម្ពុជា។ តែ​អ្វី​ដែល​ជា​ភាព​អាម៉ាស់​បំផុត​នៅ​ពេល​នោះ គឺ​នៅ​ពេល​ដែល​លោក​មក​ដល់​ភ្នំពេញ​បាន​តែ​ប៉ុន្មាន​ម៉ោង​ប៉ុណ្ណោះ របប​សឹក​ភូមា​បាន​បើក​ប្រតិបត្តិការ​វាយប្រហារ​ពី​លើ​អាកាស​យ៉ាង​ខ្លាំង​ទៅ​លើ​កម្លាំង​ប្រឆាំង​របស់​ខ្លួន បណ្ដាល​ឲ្យ​ស្លាប់​ជនស៊ីវិល​រាប់​សិប​នាក់ ហើយ​ប្រទេស​សមាគម​អាស៊ាន​រួម​ទាំង​អន្តរជាតិ ថ្កោលទោស​យ៉ាង​ខ្លាំង​ចំពោះ​របប​សឹក។

តែ​យ៉ាងណា លោក ហ៊ុន សែន និង​លោក ប្រាក់ សុខុន នៅតែ​មាន​អំនួត​ថា​ពេលវេលា​ច្រើន​ទៅ​មុខ​ទៀត​ដែល​នឹង​ធ្វើ​ឱ្យ​កម្ពុជា​ជា​ប្រធាន​អាស៊ាន​អាច​ជួយ​រក​ដំណោះស្រាយ​បាន​នៅ​ប្រទេស​ភូមា។ ដំណោះស្រាយ​ដំបូង គឺ​លោក​ចង់​ឃើញ​ភូមា​អនុវត្ត​គោលការណ៍​មេដឹកនាំ​អាស៊ាន ៥​ចំណុច គឺ​ការ​ដោះលែង​អ្នកទោស​នយោបាយ បើក​ផ្លូវ​ទៅ​រក​ការ​ចរចា​រវាង​ភាគី​ពាក់ព័ន្ធ​ក្នុង​ជម្លោះ​ទាំងអស់​ជាមួយ​នឹង​ការ​បើក​ផ្លូវ​ឱ្យ​មាន​ជំនួយ​អន្តរជាតិ​ចូល​ទៅ​ជួយ​ប្រជាជន​ភូមា ដែល​ធ្លាក់​ខ្លួន​វេទនា​ដោយសារតែ​របប​សឹក​គាប​សង្កត់ និង​ជិះជាន់។

ទីបំផុត លោក ប្រាក់ សុខុន ក្នុង​នាម​ជា​ប្រេសិត​អាស៊ាន​ធ្វើ​ដំណើរ​ម្ដង​ទៀត​ទៅ Lobby របប​សឹក​ភូមា ដើម្បី​ឱ្យ​លោក​អាច​ជួប​នឹង​ក្រុម​តំណាង​របស់​អ្នកស្រី អ៊ុងសាន ស៊ូជី ប៉ុន្តែ​នៅតែ​មិន​បាន​ជួប ហើយ​ពេល​ដែល​ត្រឡប់​មក​កម្ពុជា​វិញ លោក​បាន​ប្រាប់​អ្នក​សារព័ត៌មាន​ថា​វា​ជា​សិទ្ធិ​របស់​ម្ចាស់​ផ្ទះ។

ប៉ុន្មាន​ខែ​ក្រោយ​មក​ទៀត លោក​ត្រឡប់​ទៅ​ភូមា​ជា​លើក​ទី​២ ដើម្បី​បញ្ចុះបញ្ចូល​ឱ្យ​ភូមា បើក​ផ្លូវ​សម្រាប់​ជំនួយ​សហគមន៍​អន្តរជាតិ។ ចុងក្រោយ លោក ប្រាក់ សុខុន ប្រេសិត​អាស៊ាន​ដែល​អះអាង​ថា​នឹង​ធ្វើ​ដំណើរ​ទៅ​ភូមា​មុន​កម្ពុជា​អស់​សុពលភាព​ជា​ប្រធាន​អាស៊ាន ក៏​លោក​សម្រេច​លុប​ចោល​ការ​ធ្វើ​ទស្សនកិច្ច​របស់​លោក។

ក្រសួង​ការបរទេស​កម្ពុជា​ធ្លាប់​អះអាង​ថា លោក ប្រាក់ សុខុន មាន​ការ​មមាញឹក​ជា​ខ្លាំង​ព្រោះ​ត្រូវ​រៀបចំ​ខ្លួន​ទៅ​ចូលរួម​ប្រជុំ​អាស៊ាន-សហភាព​អឺរ៉ុប​នៅ​ប្រទេស​បែលហ្សិក។

ត្រង់​ចំណុច​នេះ អ្នក​សង្កេតការណ៍​មើល​ឃើញ​ថា ការពិត​លោក ប្រាក់ សុខុន ប្រហែល​ជា​ដឹង​ថា​របប​សឹក​ភូមា​មើល​ឃើញ​កម្ពុជា​អស់​ឥទ្ធិពល​ដែល​គ្មាន​អ្វី​ទៅ​និយាយ​ឱ្យ​របប​សឹក​ធ្វើ​តាម​ខ្លួន​នោះ​ទេ ព្រោះ​ពេល​ដែល​កម្ពុជា​កំពុង​ជា​ប្រធាន​អាស៊ាន ក៏​របប​សឹក​គេ​មិន​ស្ដាប់​ទៅ​ហើយ ដូចនេះ​រឿង​អ្វី​ដែល​ពួក​យោធា​ត្រូវ​ស្ដាប់​កម្ពុជា​ទៀត​នោះ បើ​កម្ពុជា​អស់​តួនាទី​ជា​ប្រធាន​អាស៊ាន​ទៅ​ហើយ។

សរុប​ទៅ មួយ​ឆ្នាំ​ដែល​កម្ពុជា​ជា​ប្រធាន​អាស៊ាន និង​ការ​អួតអាង​របស់​លោក ហ៊ុន សែន គឺ​ស្មើ​នឹង​សូន្យ គ្មាន​លទ្ធផល​អ្វី​ជា​ដុំ​កំភួន​នោះ​ទេ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស