32 C
Phnom Penh

រដ្ឋមន្ត្រី​សេដ្ឋកិច្ច​ថា​កម្ពុជា​នៅ​អាច​គ្រប់គ្រង​បាន​លើ​បំណុល​ជិត​១០​ពាន់​លាន​ដុល្លារ​អាមេរិក

ដោយ ឌឹ ខេមបូឌា ដេលី

បទវិភាគ

រដ្ឋមន្ត្រី​ក្រសួង​សេដ្ឋកិច្ច និង​ហិរញ្ញវត្ថុ លោក អូន ព័ន្ធមុនីរ័ត្ន អះអាង​ថា ស្ថានភាព​បំណុល​សាធារណៈ​បច្ចុប្បន្ន​មាន​ចំនួន​សរុប ៩៤៧៤​លាន​ដុល្លារ​អាមេរិក គឺ​ស្ថិត​ក្នុង​ភាព​អាច​គ្រប់គ្រង​បាន បើ​ទោះបីជា​សេដ្ឋកិច្ច​កម្ពុជា​ទទួល​រង​នូវ​ផល​ប៉ះពាល់​ពី​ការ​រីក​រាលដាល​នៃ​ជំងឺ​កូវីដ-១៩ ក៏ដោយ។

លោក​ថា បំណុល​ទាំងនោះ​នៅតែ​មាន​ចីរភាព និង​ហានិភ័យ​កម្រិត​ទាប បើ​ទោះបីជា​សេដ្ឋកិច្ច​កម្ពុជា​ទទួល​រង​នូវ​ផល​ប៉ះពាល់​ពី​ការ​រីក​រាលដាល​នៃ​ជំងឺ​កូវីដ-១៩ និង​ពី​កត្តា​ខាងក្រៅ​ផ្សេង​ទៀត​ក្តី។

លោក អូន ព័ន្ធមុនីរ័ត្ន អះអាង​ថា ការ​រក្សា​បាន​នូវ​ចីរភាព​បំណុល​សាធារណៈ​នេះ គឺ​ដោយសារ​កម្ពុជា​មាន​ប្រព័ន្ធ​គ្រប់គ្រង​បំណុល​សាធារណៈ​មួយ​ដ៏​រឹងមាំ គឺ​ទី​១ ក្របខ័ណ្ឌ​ច្បាប់ ទី​២ គោល​នយោបាយ យុទ្ធសាស្ត្រ និង​នីតិវិធី​គ្រប់គ្រង​ប្រតិបត្តិការ​គ្រប់​ជ្រុងជ្រោយ ទី​៣ សមត្ថភាព​ស្ថាប័ន និង​ធនធាន​មនុស្ស​គ្រប់គ្រាន់ ទី​៤ ប្រព័ន្ធ​ព័ត៌មានវិទ្យា​សម្រាប់​គ្រប់គ្រង​ប្រតិបត្តិការ និង​រក្សា​ទុក​ទិន្នន័យ ដើម្បី​ជា​មូលដ្ឋាន​នៃ​ការ​វិភាគ និង​តាមដាន​ហានិភ័យ​បំណុល។ល។

លោក​អះអាង​ថា រដ្ឋាភិបាល​កំពុង​អនុវត្ត​ប្រកប​ដោយ​ភាព​ម៉ឺងម៉ាត់ និង​ប្រយ័ត្ន​ខ្ពស់​បំផុត​នូវ​វិធានការ​ជា​យុទ្ធសាស្ត្រ​នានា ដែល​ដាក់​ចេញ​ក្នុង​យុទ្ធសាស្ត្រ​ស្ដីពី​ការ​គ្រប់គ្រង​បំណុល​សាធារណៈ​ឆ្នាំ​២០១៩-២០២៣។

យោង​តាម​ព្រឹត្តិបត្រ​ស្ថិតិ​បំណុល​សាធារណៈ​កម្ពុជា ដែល​ចេញ​ផ្សាយ​ដោយ​ក្រសួង​សេដ្ឋកិច្ច បាន​បង្ហាញ​ថា ក្នុង​ចំណោម​បំណុល​ក្រៅ​ប្រទេស​ចំនួន ៩៤៦៤​លាន​ដុល្លារ គឺ​មាន​ជាង ៦៤៣៥​លាន​ដុល្លារ ឬ​ស្មើ​នឹង​ប្រមាណ ៦៨% ជា​បំណុល​ក្នុង​ក្របខ័ណ្ឌ​ទ្វេភាគី។ រីឯ​បំណុល ៣០២៨​លាន​ដុល្លារ ឬ​ស្មើ​នឹង​ប្រមាណ ៣២% ទៀត ជា​បំណុល​ក្នុង​ក្របខ័ណ្ឌ​ពហុភាគី។

ប្រភព​ដដែល​បាន​បញ្ជាក់​ថា បំណុល​ក្រៅ​ប្រទេស​ដែល​កម្ពុជា​ជំពាក់​ច្រើន​ជាងគេ គឺជា​បំណុល​ចិន ដែល​មាន​ទៅ​ដល់ ៤១% ស្មើ​នឹង​ទំហំ​ទឹកប្រាក់ ៣៨៨០​លាន​ដុល្លារ​នៃ​បំណុល​ក្រៅ​ប្រទេស​សរុប។ ក្រៅ​ពី​នេះ កម្ពុជា​ជំពាក់​ជប៉ុន ៩៤៦,៤​លាន​ដុល្លារ ដែល​ស្មើ​នឹង ១០% ជំពាក់​កូរ៉េខាងត្បូង​ចំនួន ៤៧៣,២​លាន​ដុល្លារ ដែល​ស្មើ​នឹង ៥% ជំពាក់​បារាំង​ចំនួន ៤៧៣,២​លាន​ដុល្លារ ស្មើ​នឹង ៥% បំណុល​មរតក​មាន ៦៦២,៤​លាន​ដុល្លារ ដែល​ស្មើ​នឹង ៧% និង​បំណុល​ទ្វេភាគី​ផ្សេងៗ​ទៀត​មាន ១% ផង​ដែរ។

ចំពោះ​បំណុល​ពហុភាគី​វិញ កម្ពុជា​ជំពាក់​ធនាគារ​អភិវឌ្ឍន៍​អាស៊ី (ADB) ចំនួន ១៨៩២,៨​លាន​ដុល្លារ ដែល​ស្មើ​នឹង ២០% ជំពាក់​ធនាគារ​ពិភពលោក​ចំនួន ៨៥១,៧​លាន​ដុល្លារ ដែល​ស្មើ​នឹង ៩% និង​បំណុល​ពហុ​ទ្វេភាគី​ផ្សេងៗ​ទៀត​មាន ១៨៩,២​លាន​ដុល្លារ ដែល​ស្មើ​នឹង ២% ផង​ដែរ​នៃ​បំណុល​ក្រៅ​ប្រទេស​របស់​កម្ពុជា​សរុប​ចំនួន ៩៤៦០​លាន​ដុល្លារ។

ប្រធាន​វេទិកា​ពលរដ្ឋ លោក គឹម សុខ ប្រាប់ The Cambodia Daily នៅ​ពេល​កន្លងមក​ថា ករណី​បំណុល​ដែល​កម្ពុជា​ជំពាក់​បរទេស​ប្រមាណ ៤០% នៃ​ទំហំ​សេដ្ឋកិច្ច​ទាំងមូល​របស់​ខ្លួន បើ​គិត​ត្រឹមតែ​តួលេខ​នេះ គឺ​មិន​មាន​ហានិភ័យ​នោះ​ទេ ប៉ុន្តែ​ស្ថានភាព​បំណុល​នេះ​បាន​ធ្វើ​ឲ្យ​កម្ពុជា​ប្រឈម​នឹង​ហានិភ័យ​នៅ​ថ្ងៃ​អនាគត ជាពិសេស​បំណុល​ដែល​ពុំ​មាន​តម្លាភាព​ជាមួយ​ចិន​សព្វថ្ងៃ​នេះ។

លោក គឹម សុខ អះអាង​ថា ស្ថានភាព​បំណុល​ដែល​កម្ពុជា​កំពុង​ជំពាក់​បរទេស​ក្នុង​ពេល​បច្ចុប្បន្ន​នេះ គឺ​មិនមែន​តិចតួច​នោះ​ទេ។ លោក​បន្ត​ថា បំណុល​នេះ​មាន​ចំនួន​ប្រមាណ ១០​ពាន់​លាន​ដុល្លារ​អាមេរិក បើ​ប្រៀបធៀប​នឹង​ទំហំ​សេដ្ឋកិច្ច​កម្ពុជា​ដែល​មាន​ប្រមាណ​ជាង ២០​ពាន់​លាន​ដុល្លារ​អាមេរិក​នោះ។

លោក​បន្ត​ថា ចំ​ពេល​ដែល​កម្ពុជា​កំពុង​មាន​វិបត្តិ​លើ​គ្រប់​វិស័យ​ថែម​ទៀត ដូចជា​វិបត្តិ​នយោបាយ វិបត្តិ​សិទ្ធិមនុស្ស និង​វិបត្តិ​ប្រជាធិបតេយ្យ ធ្វើ​ឱ្យ​កម្ពុជា​រង​នូវ​គំនាប​សេដ្ឋកិច្ច​ពី​មហាអំណាច ដូចជា​សហគមន៍​អឺរ៉ុប និង​សហរដ្ឋ​អាមេរិក ជាដើម តាមរយៈ​នៃ​ការ​ផ្តាច់​ប្រព័ន្ធ​អនុគ្រោះ​នានា​ក្នុង​ពេល​​បច្ចុប្បន្ន​នេះ។

សម្រាប់​ឆ្នាំ​២០២៣ កម្ពុជា​គ្រោង​ខ្ចី​ពី​បរទេស​ប្រមាណ ១៥០០​លាន​ដុល្លារ ដើម្បី​បំពេញ​ចំណាយ​ជាតិ​ប្រចាំ​ឆ្នាំ​ដែល​មាន​ដល់ ៩,៦​ពាន់​លាន​ដុល្លារ។ ក្រៅ​ពី​នេះ រដ្ឋ​នឹង​ខ្ចី​អ្នក​ក្នុង​ស្រុក​ចំនួន ២០០​លាន​ដុល្លារ​ផង​ដែរ​តាម​ការ​បោះ​ផ្សាយ​មូលប័ត្រ​រដ្ឋ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស