30 C
Phnom Penh

លោក ហ៊ុន សែន ថា​មិន​គួរ​ដាក់​បញ្ហា​នយោបាយ​មក​រាំង​ខ្ទប់​ពាណិជ្ជកម្ម​សេរី​អាស៊ាន-អឺរ៉ុប​ឡើយ

ដោយ ឌឹ ខេមបូឌា ដេលី

បទវិភាគ

លោក ហ៊ុន សែន អះអាង​ថា​កិច្ច​ខិតខំ​ប្រឹងប្រែង​ជាមួយ​នឹង​ការ​បង្កើត​ឱ្យ​មាន​កិច្ចព្រមព្រៀង​ពាណិជ្ជកម្ម​សេរី​អាស៊ាន-អឺរ៉ុប មិន​គួរ​ត្រូវ​បាន​រំខាន​ដោយ​សភាពការណ៍​នៅ​មីយ៉ាន់ម៉ា បញ្ហា​នយោបាយ ឬ​បញ្ហា​សិទ្ធិមនុស្ស​ផ្សេង​ទៀត​ឡើយ។

ការ​អះអាង​របស់​លោក ហ៊ុន សែន ធ្វើឡើង​ខណៈ​លោក​ចូលរួម​កិច្ចប្រជុំ​រំលឹក​ខួប​អនុស្សាវរីយ៍​អាស៊ាន-សហភាព​អឺរ៉ុប និង​អបអរ​សាទរ​ខួប ៤៥​ឆ្នាំ​នៃ​ដៃគូ​សន្ទនា​អាស៊ាន-អឺរ៉ុប កាលពី​ថ្ងៃ​ពុធ នៅ​ទីក្រុង​ប្រ៊ុចសែល ក្នុង​ដំណើរ​ទស្សនកិច្ច​ទៅ​កាន់​អឺរ៉ុប​ក្នុង​សប្តាហ៍​នេះ។

នៅ​ក្នុង​សន្និសីទ​រួម​នៃ​កិច្ចប្រជុំ​នោះ លោក​នាយករដ្ឋមន្ត្រី ហ៊ុន សែន មាន​ប្រសាសន៍​ថា កិច្ច​ខិតខំ​ប្រឹងប្រែង​ជាមួយ​នឹង​ការ​បង្កើត​ឱ្យ​មាន​ពាណិជ្ជកម្ម​សេរី​រវាង​តំបន់​ទាំង​ពីរ មិន​គួរ​ត្រូវ​បាន​រំខាន​ដោយ​សភាពការណ៍​នៅ​មីយ៉ាន់ម៉ា បញ្ហា​នយោបាយ ឬ​បញ្ហា​សិទ្ធិមនុស្ស​ផ្សេង​ទៀត​ឡើយ។ លោក​បាន​ចោទ​ជា​សំណួរ​ថា ទាក់ទិន​នឹង​សិទ្ធិមនុស្ស លោក​ចង់​សួរ​ថា តើ​អឺរ៉ុប​បាន​ចុះហត្ថលេខា​ជាមួយ​ប្រទេស​ណា​ខ្លះ​នៅ​ក្នុង​អាស៊ាន ហើយ​តើ​បញ្ហា​សិទ្ធិមនុស្ស​នៅ​ទីនោះ​វា​យ៉ាង​ម៉េច?

លោក​នាយករដ្ឋមន្ត្រី ហ៊ុន សែន សង្ឃឹម​ថា ចំណុច​នេះ​គឺជា​ចំណុច​ដាស់តឿន​អាស៊ាន​ឱ្យ​ខិតខំ​ប្រឹងប្រែង​ដើម្បី​ងើប​ឈរ​ឡើង​ធ្វើ​ជា​ដៃគូ​ស្មើ​ភាព និង​ស្មើ​សិទ្ធិ​ជាមួយ​សហភាព​អឺរ៉ុប។

លោក ហ៊ុន សែន អះអាង​ថា អាស៊ាន​មិន​ត្រូវ​ទន្ទឹង​រង់ចាំ​អ្វីៗ​ឲ្យ​អឺរ៉ុប​ជួយ​នោះ​ទេ ប៉ុន្តែ​ត្រូវ​ឃើញ​នូវ​ការ​បំពេញ​ឲ្យ​គ្នា​ទៅវិញ​ទៅមក​រវាង​សេដ្ឋកិច្ច​តំបន់​ទាំង​ពីរ​អាស៊ាន-អឺរ៉ុប។ លោក​បាន​ទទួលស្គាល់​ថា ពិត​ហើយ​បណ្ដា​ប្រទេស​នៅ​អឺរ៉ុប​មាន​សេដ្ឋកិច្ច​ជឿនលឿន​ជាង​អាស៊ាន ប៉ុន្តែ​អាស៊ាន​ក៏​មិន​មែន​ជា​កន្លែង​ដែល​ត្រូវតែ​រង់ចាំ​ទទួល​ជំនួយ​ពី​អឺរ៉ុប​នោះ​ដែរ។ លោក​ថា អាស៊ាន-អឺរ៉ុប​បាន​ឯកភាព​គ្នា​បង្កើត​ឲ្យ​មាន​កិច្ចព្រមព្រៀង​ពាណិជ្ជកម្ម​សេរី។

បណ្ឌិត ឆេង គឹមឡុង នាយក​នៃ​មជ្ឈមណ្ឌល​នវានុវត្តន៍​ផ្នែក​អភិបាលកិច្ច និង​ប្រជាធិបតេយ្យ​នៃ​វិទ្យាស្ថាន​ចក្ខុវិស័យ​អាស៊ី បាន​ប្រាប់​សារព័ត៌មាន​ក្នុង​ស្រុក​ថា អឺរ៉ុប​មិន​គួរ​យក​បញ្ហា​នយោបាយ​នៃ​បណ្ដា​ប្រទេស​អាស៊ាន​ណា​មួយ​មក​រាំង​ខ្ទប់​ដល់​កិច្ចព្រមព្រៀង​នេះ​ទេ។ លោក​ថា អឺរ៉ុប​ហាក់​អនុវត្ត​កិច្ចព្រមព្រៀង​ពាណិជ្ជកម្ម​សេរី​នេះ​មាន​ស្តង់ដារ​ពីរ ព្រោះ​បណ្ដា​ប្រទេស​អាស៊ាន​ដែល​អឺរ៉ុប​ចុះ​កិច្ចព្រមព្រៀង​ពាណិជ្ជកម្ម​សេរី​ជាមួយ ពុំ​មាន​ការ​គោរព​សិទ្ធិមនុស្ស និង​ពុំ​មាន​ការ​បោះឆ្នោត​ត្រឹមត្រូវ​ឡើយ។

នៅ​ក្រៅ​កិច្ចប្រជុំ ពលរដ្ឋ​កម្ពុជា​នៅ​អឺរ៉ុប រួម​ទាំង​អ្នក​នយោបាយ​បក្ស​ប្រឆាំង​ដែល​និរទេស​ខ្លួន ក៏​បាន​ធ្វើ​បាតុកម្ម​ទាមទារ​ឱ្យ​កម្ពុជា​គោរព​សិទ្ធិមនុស្ស លទ្ធិប្រជាធិបតេយ្យ និង​ដោះលែង​អ្នកទោស​នយោបាយ​ផង​ដែរ។

យោង​តាម​វីដេអូ​នៃ​ការ​ធ្វើ​បាតុកម្ម​នោះ គឺ​មាន​បាតុករ​ប្រមាណ​ជា ១០០​នាក់ ប៉ុន្តែ​អតីត​តំណាងរាស្ត្រ​គណបក្ស​សង្គ្រោះ​ជាតិ​ដែល​តុលាការ​បាន​រំលាយ លោក ម៉ែន សុថាវរិន្ទ្រ បាន​លើកឡើង​ថា បាតុករ​ដែល​ចូលរួម​មាន​ប្រមាណ​ជា ២០០​នាក់ បើ​ទោះបីជា​មាន​បញ្ហា​អាកាសធាតុ​មក​រំខាន​យ៉ាង​ណា​ក៏ដោយ។

ព្រះតេជព្រះគុណ លួន សុវ៉ាត ដែល​បាន​ចូលរួម​បាតុកម្ម​នោះ​ដែរ​មាន​សង្ឃ​ដីកា​ថា ព្រះអង្គ​បាន​ធ្វើ​ដំណើរ​ពី​ប្រទេស​ស្វីស ទៅ​កាន់​ប្រទេស​បែលហ្ស៊ិក ដើម្បី​ចូលរួម ព្រោះ​ថា​នេះ​ជា​កាតព្វកិច្ច​របស់​ព្រះអង្គ​ក្នុង​នាម​ជា​ពលរដ្ឋ​កម្ពុជា​មួយ​រូប​ដែល​ប្រឆាំង​នឹង​ការ​គាប​សង្កត់​សិទ្ធិ​នានា។

ទាក់ទិន​កិច្ចព្រមព្រៀង​ពាណិជ្ជកម្ម​សេរី​ជាមួយ​អឺរ៉ុប​នេះ គេ​កត់សម្គាល់​ឃើញ​ថា អឺរ៉ុប​នៅ​មិន​ទាន់​សម្រេច​ចុះ​កិច្ចព្រមព្រៀង​ពាណិជ្ជកម្ម​សេរី​រវាង​អាស៊ាន-អឺរ៉ុប​ឡើយ តែ​អឺរ៉ុប​ជ្រើសរើស​ប្រទេស​ពីរ​ក្នុង​សមាគម​អាស៊ាន ដើម្បី​ចុះ​កិច្ចព្រមព្រៀង​ពាណិជ្ជកម្ម​សេរី​ជាមួយ​ទៅវិញ។ ប្រទេស​ពីរ​នោះ គឺ​វៀតណាម និង​សិង្ហបុរី៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស