សង្គមស៊ីវិល លើកឡើងថា ពានរង្វាន់ «សមិទ្ធផលពេញមួយជីវិតរបស់មេដឹកនាំឆ្នើម» ដែលវិទ្យាស្ថានយុទ្ធសាស្ត្រសម្រាប់តំបន់អាស៊ី-ប៉ាស៊ីហ្វិក ប្រគល់ឲ្យលោក ហ៊ុន សែន មិនសូវមានតម្លៃ ដោយសារវិទ្យាស្ថាននេះមិនមានការទទួលស្គាល់ជាលក្ខណៈអន្តរជាតិ។
កាលពីថ្ងៃទី១៩ ខែធ្នូ នេះ វិទ្យាស្ថានយុទ្ធសាស្ត្រសម្រាប់តំបន់អាស៊ី-ប៉ាស៊ីហ្វិក (KSI) បានប្រគល់ពានរង្វាន់ «សមិទ្ធផលពេញមួយជីវិតរបស់មេដឹកនាំឆ្នើម» ឲ្យលោកនាយករដ្ឋមន្ត្រី ហ៊ុន សែន ដោយលើកហេតុផលថា លោកបានកសាងប្រទេសឲ្យកាន់តែប្រសើរឡើងនៅទូទាំងតំបន់អាស៊ី-ប៉ាស៊ីហ្វិក។
បើតាមហ្វេសប៊ុកលោក ហ៊ុន សែន សរសេរថា ពានរង្វាន់ដែលវិទ្យាស្ថាន KSI ប្រគល់ឲ្យលោក ហ៊ុន សែន បន្ទាប់ពីបានសិក្សា និងវាយតម្លៃយ៉ាងល្អិតល្អន់ទៅលើលក្ខណៈសម្បត្តិនៃការដឹកនាំ និងសមិទ្ធផលទាំងឡាយដែលកើតចេញពីការដឹកនាំរបស់លោក ហ៊ុន សែន។ វិទ្យាស្ថាននេះថា ខ្លួនបានកត់សម្គាល់ពីភាពប៉ិនប្រសព្វ ឈ្លាសវៃ និងពោរពេញដោយឆន្ទៈមនសិការ ភក្ដីភាពយ៉ាងមុតមាំចំពោះជាតិ និងប្រជាជន ហើយបានធ្វើពលិកម្មដោយមិនចេះនឿយហត់ ដើម្បីនាំមកនូវសុខសន្តិភាព ភាពក្សេមក្សាន្ត វឌ្ឍនភាព ភាពរីកចម្រើន និងវិបុលភាពសម្រាប់ជាតិ និងប្រជាជាតិកម្ពុជា។
ប៉ុន្តែប្រធានសហព័ន្ធខ្មែរអូស្ត្រាលី និងជាអតីតតំណាងរាស្ត្រអូស្ត្រាលីដើមកំណើតខ្មែរប្រចាំរដ្ឋវីកថូរៀ (Victoria) លោក ហុង លីម បានប្រាប់សារព័ត៌មាន The Cambodia Daily យ៉ាងខ្លីថា វិទ្យាស្ថានយុទ្ធសាស្ត្រសម្រាប់តំបន់អាស៊ី-ប៉ាស៊ីហ្វិកនេះមិនមានការទទួលស្គាល់ជាលក្ខណៈអន្តរជាតិនោះទេ។
ការទទួលបានពានរង្វាន់របស់លោក ហ៊ុន សែន នាពេលនេះ ធ្វើឡើងបន្ទាប់ពីសហគមន៍ជាតិ និងអន្តរជាតិមួយចំនួនបានរិះគន់ចំពោះការដឹកនាំរបស់លោកដែលបានធ្វើឲ្យស្ថានភាពសិទ្ធិមនុស្ស និងប្រជាធិបតេយ្យនៅកម្ពុជាធ្លាក់ចុះ។
បញ្ហានេះ បានធ្វើឲ្យសហភាពអឺរ៉ុប កាលពីខែសីហា ឆ្នាំ២០២០ បានដកប្រព័ន្ធអនុគ្រោះពន្ធ EBA ២០% ពីកម្ពុជា ក្រោយពួកគេរកឃើញថាកម្ពុជាមិនបានធ្វើឲ្យប្រសើរឡើងចំពោះការគោរពសិទ្ធិមនុស្ស សិទ្ធិការងារ និងស្ថានភាពនយោបាយឡើយ៕