តុលាការនឹងប្រកាសសាលក្រមសំណុំរឿងលោក កឹម សុខា នៅដើមខែមីនា ឆ្នាំ២០២៣ ខាងមុខ ខណៈមេធាវីការពារក្ដីឲ្យលោក កឹម សុខា ចាត់ទុកការប្រកាសនោះថាប៉ះពាល់សិទ្ធិកូនក្ដីដែលជាអ្នកនយោបាយ។
ការសម្រេចរបស់តុលាការ ធ្វើឡើងបន្ទាប់ពីភាគីពាក់ព័ន្ធក្នុងសំណុំរឿងលោក កឹម សុខា បានធ្វើសេចក្ដីសន្និដ្ឋានបិទបញ្ចប់កាលពីថ្ងៃទី២១ ខែធ្នូ ឆ្នាំ២០២២។
ប្រាប់អ្នកសារព័ត៌មាននៅមុខសាលាដំបូងរាជធានីភ្នំពេញ មេធាវីការពារក្ដីឲ្យលោក កឹម សុខា អ្នកស្រី ម៉េង សុភារី លើកឡើងថា សេចក្ដីសន្និដ្ឋានមេធាវីរដ្ឋាភិបាលចំនួន ៨៦ទំព័រនោះផ្ដោតសំខាន់លើការចោទប្រកាន់ថា លោក កឹម សុខា រៀបចំគម្រោងធ្វើបដិវត្តន៍ពណ៌ដើម្បីផ្ដួលរំលំរដ្ឋាភិបាល។
ក្នុងសេចក្ដីសន្និដ្ឋាននោះ ក៏បានយកយុទ្ធនាការថ្ងៃចន្ទពណ៌ខ្មៅមកភ្ជាប់ជាមួយនឹងកូនក្ដីរបស់អ្នកស្រី ទោះបីសាក្សីបានបដិសេធថាយុទ្ធនាការនេះមិនពាក់ព័ន្ធនឹងគណបក្សសង្គ្រោះជាតិឡើយ។
មេធាវីដដែលលើកឡើងថា លើសពីនេះ បាតុកម្មនៅកន្លែងផ្សេងៗក្នុងនោះមានបាតុកម្មលើផ្លូវវេងស្រេង និងបាតុកម្មនៅខេត្តកំពង់ចាម ជាដើម ក៏យកមកចោទប្រកាន់លើលោក កឹម សុខា ខណៈភស្តុតាងវីដេអូបានកាត់តខុសពីវីដេអូដើមដែលកូនក្ដីរបស់អ្នកស្រីបាននិយាយ។
អ្នកស្រី ម៉េង សុភារី អះអាងថា សេចក្ដីសន្និដ្ឋានមេធាវីរដ្ឋាភិបាលនៅតែចោទប្រកាន់កូនក្ដីរបស់អ្នកស្រីគប់គិតជាមួយសហរដ្ឋអាមេរិក និងអង្គការមួយចំនួនទៀត ខណៈករណីអាមេរិកនេះ លោក ហ៊ុន សែន ធ្លាប់អះអាងថាកូនក្ដីរបស់អ្នកស្រីមិនមានការពាក់ព័ន្ធក៏ដោយ។
មួយវិញទៀត មេធាវីរដ្ឋាភិបាលបានចោទប្រកាន់កូនក្ដីគប់គិតជាមួយជនបរទេស ប៉ុន្តែបែរជាមិនហ៊ានបញ្ចេញឈ្មោះជនបរទេសទាំងអស់នោះ ហើយមកសរសេរអក្សរ «ក ខ» ធ្វើជាតំណាងឈ្មោះអ្នកទាំងអស់ទៅវិញ។
អ្នកស្រីថា ភស្តុតាងដែលមេធាវីរដ្ឋាភិបាល និងតំណាងអយ្យការចោទប្រកាន់លោក កឹម សុខា មិនមានធាតុផ្សំគ្រប់គ្រាន់ឡើយ ដូច្នេះក្រុមមេធាវីបានស្នើទៅចៅក្រមឲ្យទម្លាក់ចោលបទចោទប្រកាន់ទាំងអស់ ដើម្បីឲ្យកូនក្ដីរបស់អ្នកស្រីមានសេរីភាពវិញ។
តែយ៉ាងណាក៏ដោយ អ្នកស្រី ម៉េង សុភារី ចាត់ទុកការប្រកាសសាលក្រមនៅថ្ងៃទី៣ ខែមីនា ឆ្នាំ២០២៣ ខាងមុខនេះ ថានឹងធ្វើឲ្យប៉ះពាល់ដល់សិទ្ធិកូនក្ដីរបស់អ្នកស្រីដែលជាអ្នកនយោបាយ។
ក្នុងពិធីជួបសំណេះសំណាលជាមួយពលរដ្ឋខ្មែររស់នៅសហរដ្ឋអាមេរិក និងកាណាដា ក្នុងរដ្ឋធានីវ៉ាស៊ីនតោន កាលពីថ្ងៃទី១២ ឧសភា កន្លងមក លោក ហ៊ុន សែន អះអាងថា រូបលោកមិនបានចោទអាមេរិកពាក់ព័ន្ធសំណុំរឿងសន្ទិដ្ឋភាពជាមួយរដ្ឋបរទេសរបស់លោក កឹម សុខា ដើម្បីផ្តួលរំលំរាជរដ្ឋាភិបាលកម្ពុជានោះទេ។
ប្រាប់អ្នកសារព័ត៌មានអំឡុងពេលវិលត្រឡប់ទៅគេហដ្ឋានវិញ លោក កឹម សុខា បានលើកឡើងថា ភស្តុតាងដែលចោទប្រកាន់លើរូបលោកជាភស្តុតាងក្លែងក្លាយ ហើយថាភស្តុតាងទាំងនោះត្រូវបានគេកាត់ខ្លឹមសារដែលគាត់បាននិយាយថែមទៀត។
ចំណែកកូនស្រីច្បងរបស់លោក កឹម សុខា គឺកញ្ញា កឹម មនោវិទ្យា បានសរសេរលើគណនីហ្វេសប៊ុករបស់កញ្ញាកាលពីថ្ងៃទី២១ ខែធ្នូ ដោយទាមទារឲ្យផ្ដល់សិទ្ធិសេរីភាពដល់ឪពុករបស់កញ្ញា ដើម្បីអាចឈរឈ្មោះបោះឆ្នោតនៅឆ្នាំ២០២៣ និងដើម្បីកម្ពុជាទទួលបានផលប្រយោជន៍ពីសហគមន៍អន្តរជាតិ ហើយជៀសវាងផលប៉ះពាល់បន្ថែមពីសហគមន៍អន្តរជាតិ។
សាលាដំបូងរាជធានីភ្នំពេញចាប់ផ្តើមបើកសវនាការក្នុងសំណុំរឿងលោក កឹម សុខា ក្រោមការចោទប្រកាន់ពីបទ «សន្ទិដ្ឋភាពត្រូវរ៉ូវដោយសម្ងាត់ជាមួយរដ្ឋបរទេស ឬភ្នាក់ងារបរទេស» ចង់ផ្តួលរំលំរដ្ឋាភិបាលកាលពីដើមខែមករា ឆ្នាំ២០២០។ តុលាការដំណើរការក្ដីនេះបានប្រមាណ ១ខែ ក៏បង្ខំចិត្តផ្អាកទៅវិញ មូលហេតុដោយសារមានវិបត្តិជំងឺកូវីដ-១៩។ ក្រោយពីផ្អាកអស់រយៈពេលជិត ២ឆ្នាំដោយសារជំងឺកូវីដ-១៩ សវនាការនេះក៏ចាប់ផ្តើមបន្តជំនុំជម្រះឡើងវិញនៅថ្ងៃទី២២ ខែមករា ឆ្នាំ២០២២។
គិតមកដល់ថ្ងៃដែលតុលាការប្រកាសបិទបញ្ចប់នីតិវិធីនៃការសួរដេញដោលគ្រប់អង្គហេតុ នៅថ្ងៃទី១៩ ខែតុលា គឺសវនាការនេះបានបន្តអូសបន្លាយលើកទី៦៣ មកហើយ។
តុលាការលើកឡើងអំឡុងពេលសវនាការថា សាក្សីចំនួន ២៧នាក់ត្រូវបានកោះហៅឱ្យមកផ្តល់សក្ខីកម្ម ប៉ុន្តែមានតែសាក្សី ៨នាក់ទេដែលចូលបំភ្លឺទៅតាមការកោះហៅរបស់តុលាការ។
គិតចាប់ពីថ្ងៃចាប់ខ្លួនទាំងពាក់កណ្តាលអធ្រាត្រកាលពីដើមខែកញ្ញា ឆ្នាំ២០១៧ អ្នកនយោបាយចាស់វស្សា លោក កឹម សុខា ត្រូវបានតុលាការដកសិទ្ធិធ្វើនយោបាយប្រមាណ ៥ឆ្នាំមកហើយ៕