ក្រោយពីចុះពីយន្តហោះយោធារបស់សហរដ្ឋអាមេរិកនៅក្រុងវ៉ាស៊ីនតោន លោក វ៉ូឡូឌីមៀរ ហ្សេឡេនស្គី បានរូតរះទៅកាន់សេតវិមានដែលលោក បៃដិន បានរង់ចាំលោកហើយនោះ។
ជំនួបនៃមេដឹកនាំទាំងពីរបានចាប់ផ្ដើមភ្លាមៗក្រោយពីលោក បៃដិន ចេញមកទទួលលោក ហ្សេឡេនស្គី នៅច្រកទ្វារចូលការិយាល័យរបស់លោក។ លោក ចូ បៃដិន បានអមដំណើរលោក ហ្សេឡេនស្គី ចូលទៅកាន់ការិយាល័យរបស់លោកក្នុងសេតវិមាន ហើយកិច្ចសន្ទនាក៏ចាប់ផ្ដើម។
ក្រោយពីជួបគ្នាជាច្រើននាទី លោក បៃដិន និងលោក ហ្សេឡេនស្គី បានធ្វើសន្និសីទសារព័ត៌មានរួមគ្នានៅខាងក្រៅអគារសេតវិមាន។ លោក បៃដិន បានថ្លែងអំពីឆន្ទៈរបស់រដ្ឋការរបស់លោកក្នុងការប្ដេជ្ញាចិត្តជួយដល់ប្រជាជនអ៊ុយក្រែន ដែលពលីជីវិតដើម្បីសេរីភាព។ លោក បៃដិន អះអាងថា សង្គ្រាមរបស់លោក ពូទីន គឺវាអាក្រក់ខ្លាំងដែលសូម្បីសហគមន៍ស៊ីវិល ក៏រុស្ស៊ីបាញ់កម្ទេចដែរ។ កុមារស្លាប់រាប់ពាន់នាក់ ហើយរាប់ម៉ឺននាក់ទៀតក្លាយជាកុមារកំព្រា។
លោក បៃដិន អះអាងថា សហរដ្ឋអាមេរិកមានការប្ដេជ្ញាចិត្តខ្ពស់ជួយអ៊ុយក្រែន ព្រោះប្រជាជនអ៊ុយក្រែនមានឧត្តមគតិការពារមាតុភូមិ និងសេរីភាពរបស់ខ្លួន។ លោក បៃដិន ហៅប្រជាជនអ៊ុយក្រែន កងទ័ពអ៊ុយក្រែន ថាជាវីរជនដើម្បីសេរីភាព។ ជាមួយគ្នានេះ លោក បៃដិន បានប្រកាសបន្តបញ្ជូនជំនួយយោធាថ្មីទៀតនូវសាច់ប្រាក់ ១៨០០លានដុល្លារ។
បើតាមប្រធានាធិបតីអាមេរិករូបនេះ ជំនួយអាមេរិកលើកនេះមានប្រព័ន្ធមីស៊ីល Patriot គ្រាប់កាំភ្លើង និងគ្រាប់រ៉ុក្កែត។ ទោះជាយ៉ាងណា លោក បៃដិន ប្រកាសសន្យាជួយប្រជាជនអ៊ុយក្រែនរហូតដល់ពេលវេលាដែលរុស្ស៊ីបញ្ចប់សង្គ្រាម ហើយដកទ័ពទៅប្រទេសរុស្ស៊ីវិញ។
មុនបិទបញ្ចប់សន្និសីទសារព័ត៌មាន លោក បៃដិន បានហៅរុស្ស៊ី និងលោក ពូទីន ថាជាចក្រព័ត្រថ្មីដែលបំពានធ្ងន់ធ្ងរដល់សណ្ដាប់ធ្នាប់ពិភពលោក និងធម្មនុញ្ញអង្គការសហប្រជាជាតិ។
កាលពីថ្ងៃថ្ងៃពុធ ទី២១ ធ្នូ ប្រធានាធិបតីអ៊ុយក្រែន លោក ហ្សេឡេនស្គី បានធ្វើដំណើរទស្សនកិច្ចជាប្រវត្តិសាស្ត្រទៅសហរដ្ឋអាមេរិក។ បន្ទាប់ពីលោកបានជួបលោកប្រធានាធិបតីអាមេរិក ចូ បៃដិន នៅសេតវិមានហើយ លោកក៏បានថ្លែងសុន្ទរកថានៅមុខសភាអាមេរិក។ ទស្សនកិច្ចផ្លូវការនៅក្រុងវ៉ាស៊ីនតោនរបស់ប្រធានាធិបតីអ៊ុយក្រែន គឺជាដំណើរចេញទៅក្រៅប្រទេសជាលើកទី១ ចាប់តាំងពីប្រទេសអ៊ុយក្រែនរងសង្គ្រាមឈ្លានពានពីរុស្ស៊ី រយៈពេលជាង ៣០០ថ្ងៃមកហើយនេះ។
ប្រធានាធិបតីអ៊ុយក្រែន លោក ហ្សេឡេនស្គី បានថ្លែងថា ជំនួយរាប់ពាន់លានដុល្លារដែលសភាអាមេរិកអនុម័តផ្ដល់ឱ្យប្រទេសរបស់លោក គឺដើម្បីប្រយុទ្ធប្រឆាំងការឈ្លានពានរបស់រុស្ស៊ី មិនមែនជាជំនួយសប្បុរសធម៌នោះទេ ប៉ុន្តែជាការវិនិយោគមួយនៅលើសន្តិសុខសកល។ លោកក៏បានអរគុណដល់ពលរដ្ឋអាមេរិកាំងទាំងអស់ដែលបានជួយការពារសេរីភាពប្រជាជនអ៊ុយក្រែន ក្នុងការទប់ទល់នឹងអ្នកឈ្លានពាន។
លោក ហ្សេឡេនស្គី ធ្វើការកត់សម្គាល់ដូចនេះនៅក្នុងពេលលោកថ្លែងសុន្ទរកថាទៅកាន់សភាអាមេរិក។
លោក ហ្សេឡេនស្គី បញ្ជាក់ថា៖ «ថវិការបស់អ្នកមិនមែនជាជំនួយសប្បុរសធម៌នោះទេ ប៉ុន្តែវាជាការវិនិយោគមួយដើម្បីសន្តិសុខសកល ប្រជាធិបតេយ្យ និងសេរីភាព»។
នៅចំពោះមុខសភាអាមេរិក លោក ហ្សេឡេនស្គី ក៏បានរំឭកឡើងវិញផងដែរថា កិច្ចចរចាសន្តិភាពជាមួយរុស្ស៊ី លោកថាមិនអាចធ្វើការសម្រុះសម្រួលពាក់ព័ន្ធនឹងអធិបតេយ្យភាព និងបូរណភាពទឹកដីអ៊ុយក្រែនជាដាច់ខាត។
លោកប្រធានាធិបតីអ៊ុយក្រែនរូបនេះបានបន្តថា មុនលោកមកដល់ទឹកដីអាមេរិក លោកបានទៅសមរភូមិ Bakmut នៅភាគខាងកើតប្រទេស ដែលនៅទីនោះ សង្គ្រាមឆេះពេញទំហឹង។ តែលោកអះអាងថា កងទ័ពអ៊ុយក្រែនបានបង្ហាញឆន្ទៈដ៏រឹងមាំក្នុងការវាយការពារតំបន់នេះមិនឱ្យធ្លាក់នៅក្រោមរុស្ស៊ីវិញជាដាច់ខាត។
លោកថា កងទ័ពអ៊ុយក្រែនស្មោះត្រង់នឹងជាតិ គឺហ៊ានលះបង់ដើម្បីមាតុភូមិ និងសេរីភាពរបស់ពួកគេ។ លោកបន្តថា នៅទីតាំងទាំងអស់ដែលកងទ័ពអ៊ុយក្រែនវាយយកបានវិញ គឺប្រជាជននៅទីនោះគេមិនស្វាគមន៍កងទ័ពរុស្ស៊ីនោះទេ។ លោកថា ប្រជាជននៅតំបន់នោះចាត់ទុកកងទ័ពរុស្ស៊ីដូចចោរប្លន់ទ្រព្យសម្បត្តិ និងទឹកដីរបស់អ៊ុយក្រែន។
លោកបានប្រាប់សភាអាមេរិកថា អ៊ុយក្រែននឹងមិនចុះចាញ់ ឬចុះញ៉មនោះទេ តែក៏សង្ឃឹមដែរថា គណបក្សទាំងពីររបស់សហរដ្ឋអាមេរិកនឹងបន្តគាំទ្រអ៊ុយក្រែនរហូតប្រជាជនអ៊ុយក្រែនមានសេរីភាពពីការឈ្លានពានពីសំណាក់ប្រទេសរុស្ស៊ី។
ក្នុងចំណោមជំនួយរបស់ប្រទេសបស្ចិមលោក គឺសហរដ្ឋអាមេរិក ជាអ្នកផ្តល់ជំនួយធំ និងច្រើនជាងគេ។ ពេលនេះ បើតាមប្រភពព័ត៌មានសុំមិនបញ្ចេញអត្តសញ្ញាណពីសំណាក់អ្នកទទួលខុសត្រូវជាន់ខ្ពស់អាមេរិក គឺរដ្ឋបាលអាមេរិកនឹងផ្តល់ជំនួយជាង ២ពាន់លានដុល្លារបន្ថែមទៀតដល់អ៊ុយក្រែន ហើយនឹងផ្តល់ប្រព័ន្ធបាញ់មីស៊ីល និងគ្រាប់មីស៊ីល Patriot ដ៏មានប្រសិទ្ធភាពរបស់អាមេរិកថែមទៀត។ អាវុធនេះ គឺជាប្រព័ន្ធការពារដែនអាកាសដែលអ៊ុយក្រែនបានទាមទារចង់បានជាយូរណាស់មកហើយ ដើម្បីយកទៅទប់ទល់ការបាញ់ស្រោចមីស៊ីលរបស់រុស្ស៊ី។
ប្រធានាធិបតីអ៊ុយក្រែន បង្ហាញប្រាប់សាធារណជនថា លោកទៅសហរដ្ឋអាមេរិកដើម្បីពង្រឹងសមត្ថភាពប្រយុទ្ធ និងការពារជាតិអ៊ុយក្រែន។
ដំណើរទស្សនកិច្ចរបស់ប្រធានាធិបតីអ៊ុយក្រែនទៅសហរដ្ឋអាមេរិក គឺជាការពង្រឹងសហប្រតិបត្តិការនយោបាយ និងពង្រឹងស្មារតីកងទ័ពអ៊ុយក្រែន។
អ្នកនាំពាក្យវិមានក្រឹមឡាំង លោក ឌីមីទ្រី ប៉េស្កូវ បានប្រាប់អ្នកកាសែតនៅរដ្ឋធានីមូស្គូ ថា ការផ្តល់អាវុធទៅអ៊ុយក្រែនដោយក្រុមបស្ចិមប្រទេស និងណាតូ នឹងនាំឲ្យសង្គ្រាមកាន់តែដុនដាបធ្ងន់ធ្ងរ និងកាន់តែសាហាវឡើង ហើយអ៊ុយក្រែននឹងមិនអាចឈ្នះសង្គ្រាមបានឡើយ។
តាមដំណឹងមកថា លោក ហ្សេឡេនស្គី មិនស្នាក់នៅវ៉ាស៊ីនតោនយូរនោះទេ។ លោកអាចនឹងត្រឡប់មកអ៊ុយក្រែនវិញនៅយប់ថ្ងៃព្រហស្បតិ៍នេះហើយ។
ក្រុមអ្នកសង្កេតការណ៍បានហៅទស្សនកិច្ចផ្លូវការរបស់លោក ហ្សេឡេនស្គី ទៅសហរដ្ឋអាមេរិក ជាការចេញដំណើរក្រៅប្រទេសជាលើកដំបូងរបស់មេដឹកនាំអ៊ុយក្រែនរូបនេះ ថាជាកំណត់ត្រាប្រវត្តិសាស្ត្រពិភពលោក ហើយជាសញ្ញាប្រាប់ទៅក្រុងមូស្គូ ថា អ៊ុយក្រែនមិនងាយចុះចាញ់នឹងសង្គ្រាមឈ្លានពានដាច់ខាត ហើយអាមេរិក គឺជាឆ្អឹងខ្នងដ៏រឹងមាំនៃសេរីភាព អធិបតេយ្យភាព និងប្រជាធិបតេយ្យនៅអ៊ុយក្រែន៕