មេធាវីការពារក្ដីឲ្យអនុប្រធានគណបក្សភ្លើងទៀន ដាក់បណ្ដឹងសាទុក្ខទៅតុលាការកំពូល ដើម្បីប្រឆាំងនឹងសេចក្ដីសម្រេចតុលាការថ្នាក់ក្រោម ដែលបានសម្រេចឲ្យលោក សុន ឆ័យ ចាញ់ក្ដីគណបក្សប្រជាជនកម្ពុជា និងគណៈកម្មាធិការជាតិរៀបចំការបោះឆ្នោត (គ.ជ.ប)។
លោក ជូង ជូងី មេធាវីការពារក្ដីឲ្យអនុប្រធានគណបក្សភ្លើងទៀន លោក សុន ឆ័យ ប្រាប់សារព័ត៌មាន ឌឹ ខេមបូឌា ដេលី ថា បណ្ដឹងសាទុក្ខនេះ រូបលោកបានដាក់ទៅតុលាការកំពូលរួចហើយកាលពីថ្ងៃទី៣ មករា។
លោកបញ្ជាក់ថា មូលហេតុដែលប្ដឹងសាទុក្ខដោយសារមិនសុខចិត្តចំពោះការសម្រេចក្ដីក្នុងសាលាឧទ្ធរណ៍ ដែលបង្គាប់ឲ្យកូនក្តីរបស់លោកផ្តល់សំណងជំងឺចិត្តទៅបក្សកាន់អំណាចចំនួន ១លានដុល្លារ។ លោកចាត់ទុកការសម្រេចរបស់សាលាឧទ្ធរណ៍ថាជារឿងអយុត្តិធម៌ ដោយសារកូនក្ដីរបស់លោកមិនបានធ្វើខុសដូចតុលាការថ្នាក់ក្រោមធ្វើការចោទប្រកាន់ឡើយ។
កាលពីថ្ងៃទី១៤ ខែធ្នូ ឆ្នាំ២០២២ សាលាឧទ្ធរណ៍រាជធានីភ្នំពេញបានប្រកាសសាលដីកាដោយបានតម្កល់សេចក្ដីសម្រេចពីសាលាដំបូងរាជធានីភ្នំពេញ ក្នុងសំណុំរឿងពីររបស់លោក សុន ឆ័យ ទុកជាបានការដដែល។ ក្រៅពីតម្កល់ហើយ សាលាឧទ្ធរណ៍ភ្នំពេញក៏បានបង្កើនប្រាក់ពិន័យក្នុងសំណុំរឿងនីមួយៗរហូតដល់ ១០លានរៀល និងសំណងជំងឺចិត្តដល់បក្សកាន់អំណាចចំនួន ៤ពាន់លានរៀល ឬស្មើប្រមាណ ១លានដុល្លារ។
លោក សុន ឆ័យ អនុប្រធានគណបក្សភ្លើងទៀន ត្រូវបានគណៈកម្មាធិការជាតិរៀបចំការបោះឆ្នោត (គ.ជ.ប) និងគណបក្សប្រជាជនកម្ពុជាប្ដឹង បន្ទាប់ពីលោកថ្លែងរិះគន់អំពីការបោះឆ្នោតជ្រើសរើសក្រុមប្រឹក្សាឃុំ-សង្កាត់នៅក្នុងប្រទេសកាលពីថ្ងៃទី៥ ខែមិថុនា ដោយនិយាយថា លទ្ធផលបោះឆ្នោតមិនបានឆ្លុះបញ្ចាំងពីឆន្ទៈរបស់ពលរដ្ឋ មានការបំភិតបំភ័យ មានការទិញ និងមានការលួចសន្លឹកឆ្នោត។
សំណុំរឿងនេះ ត្រូវបានសាលាដំបូងរាជធានីភ្នំពេញកាលពីខែតុលា ឆ្នាំ២០២២ កន្លងទៅ បានប្រកាសសាលក្រមដោយសម្រេចឲ្យលោក សុន ឆ័យ ចាញ់ក្ដី គ.ជ.ប និងគណបក្សប្រជាជនកម្ពុជា ព្រមទាំងឲ្យលោកផ្ដល់សំណងជំងឺចិត្តដល់គណបក្សកាន់អំណាចចំនួន «៣ពាន់លានរៀល» ឬស្មើប្រមាណ «៧៥ម៉ឺនដុល្លារ» ហើយបង្គាប់ឲ្យបង់ប្រាក់ពិន័យ ៨លានរៀលចូលថវិការដ្ឋ។
ក្នុងសំណុំរឿងបរិហារកេរ្តិ៍នេះដែរ តុលាការក៏បានកាត់ឲ្យលោក សុន ឆ័យ ចាញ់ក្ដី គ.ជ.ប ដោយតម្រូវឲ្យបង់ប្រាក់ពិន័យចំនួន ៩លានរៀលបន្ថែមទៀតចូលថវិការដ្ឋ និងតម្រូវឲ្យអនុប្រធានគណបក្សភ្លើងទៀនរូបនេះធ្វើលិខិតសុំទោសទៅគណៈកម្មាធិការជាតិរៀបចំការបោះឆ្នោត (គ.ជ.ប) ជាសាធារណៈផងដែរ។
ក្រោយពីកាត់ឲ្យចាញ់ក្ដី កាលពីខែធ្នូ ឆ្នាំ២០២២ សាលាដំបូងរាជធានីភ្នំពេញក៏បានចេញដីកាសម្រេចរឹបអូសផ្ទះ ២កន្លែងរបស់លោក សុន ឆ័យ នៅរាជធានីភ្នំពេញ និងខេត្តសៀមរាប ជាបណ្ដោះអាសន្នផងដែរ៕