30 C
Phnom Penh

លោក ហ៊ុន សែន ព្រមាន​ប្រើ​ច្បាប់​និង​ហិង្សា​ចំពោះ​អ្នក​ចោទ​បក្ស​លោក​ជា​ចោរ​លួច​សន្លឹកឆ្នោត

ដោយ ឌឹ ខេមបូឌា ដេលី

បទវិភាគ

មេដឹកនាំ​បក្ស​កាន់​អំណាច​ដែល​ឧស្សាហ៍​ប្រើ​កណ្ដាប់ដៃ​ដែក លោក ហ៊ុន សែន ព្រមាន​ថា សម្រាប់​អ្នក​ដែល​ចោទ​ថា​គណបក្ស​ប្រជាជន​កម្ពុជា​ជា​ចោរ​លួច​សន្លឹកឆ្នោត អាច​នឹង​ប្រើ​វិធានការ​ច្បាប់ ឬ​ប្រើ​អំពើ​ហិង្សា​ដើម្បី​បញ្ចប់​វប្បធម៌​ឡាំប៉ា​ក្រោយ​ការ​បោះឆ្នោត។

បុរស​ខ្លាំង​កម្ពុជា​ដែល​ប្ដេជ្ញា​កម្ទេច​ក្រុម​ប្រឆាំង លើកឡើង​ក្នុង​ពិធី​បើក​ការដ្ឋាន​សាងសង់​កំណាត់​ផ្លូវជាតិ​លេខ​៧ ក្នុង​ខេត្ត​កំពង់ចាម នៅ​ថ្ងៃទី​៩ ខែ​មករា ឆ្នាំ​២០២៣ នេះ​ថា លោក​នឹង​មិន​ទុក​ឱ្យ​អ្នក​ដែល​ចោទ​គណបក្ស​ប្រជាជន​កម្ពុជា​ថា​ជា​ចោរ​លួច​សន្លឹកឆ្នោត​មួយ​ជីវិត​នោះ​ទេ ត្បិត​គណបក្ស​ប្រជាជន​កម្ពុជា​មិន​អាច​ទទួល​យក​បាន​ឡើយ​នូវ​ការ​ចោទប្រកាន់​នោះ​ឡើយ។

មេដឹកនាំ​បក្ស​កាន់​អំណាច​ដែល​ឧស្សាហ៍​គំរាម​ចាប់ចង​លោក ហ៊ុន សែន អះអាង​ថា អ្នក​ដែល​ចោទ​ថា​គណបក្ស​ប្រជាជន​កម្ពុជា​ជា​ចោរ​លួច​សន្លឹកឆ្នោត គឺ​ត្រូវតែ​ប្តឹង ប៉ុន្តែ​បើ​ពួកគេ​ចោទ​ថា​តុលាការ​ជា​តុលាការ​តេឡេ​របស់​រដ្ឋាភិបាល លោក​នឹង​ប្រមូល​អ្នក​គាំទ្រ​គណបក្ស​ប្រជាជន​កម្ពុជា​ធ្វើ​បាតុកម្ម ដោយ​ការ​ប្រើ​អំពើ​ហិង្សា​លើ​អ្នក​ទាំងនោះ​ដល់​ផ្ទះ​តែម្តង។

បុរស​ខ្លាំង​ដែល​សល់​ពី​សម័យ​ខ្មែរក្រហម លោក ហ៊ុន សែន បញ្ជាក់​ថា ការ​ចោទ​គណបក្ស​ប្រជាជន​កម្ពុជា​ថា​ជា​ចោរ​លួច​សន្លឹកឆ្នោត មិនមែន​ជា​សិទ្ធិ​បញ្ចេញមតិ​នោះ​ទេ ក្នុង​នោះ​លោក ហ៊ុន សែន បញ្ជា​ឱ្យ​មេធាវី​របស់​គណបក្ស​ប្រជាជន​កម្ពុជា​តាម​ខេត្ត​នីមួយៗ​ត្រូវតែ​ប្តឹង​អ្នក​ទាំងនោះ​ដោយ​គ្មាន​ករណី​លើកលែង។

អនុប្រធាន​វេទិកា​ពលរដ្ឋ លោក ម៉ែន ណាត ប្រាប់​សារព័ត៌មាន The Cambodia Daily នៅ​ថ្ងៃទី​៩ មករា នេះ​ថា ការ​លើកឡើង​របស់​លោក ហ៊ុន សែន គឺជា​ការ​ញុះញង់​ក្នុង​ចេតនា​បើក​ដៃ​ឱ្យ​មន្ត្រី​ក្រោម​បង្គាប់​របស់​គាត់​ទាំង​អ្នក​អនុវត្ត​ច្បាប់ និង​អ្នក​ដែល​ប្រើ​អំពើ​ហិង្សា​ត្រៀម​ខ្លួន​បង្ក្រាប​លើ​អ្នក​ដែល​រិះគន់​ការ​ដឹកនាំ​របស់​គាត់​គ្រប់​ពេល។ ទង្វើ​បែប​នេះ គឺជា​មូលហេតុ​ដ៏​ចម្បង​ដែល​នាំ​ឱ្យ​កើតមាន​អំពើ​ហិង្សា ការ​ចាប់​ចង ឬ​ការ​ឃុំ​ខ្លួន​យ៉ាង​អនាធិបតេយ្យ​នៅ​ក្នុង​ប្រទេស។

អនុប្រធាន​វេទិកា​ពលរដ្ឋ​រូប​នេះ​បញ្ជាក់​ថា ការ​ប្រកាស​បិទ​មាត់​អ្នក​រិះគន់​ខ្លួន​ពី​សំណាក់​មេដឹកនាំ​ប្រទេស​បែប​នេះ គឺជា​ការ​បង្ហាញ​ឱ្យ​ឃើញ​នូវ​ការ​អនុវត្ត​សិទ្ធិ​បញ្ចេញមតិ​នៅ​កម្ពុជា​ធ្លាក់​ចុះ​យ៉ាង​ធ្ងន់ធ្ងរ ដែល​ជា​ការ​ឆ្លុះបញ្ចាំង​ឱ្យ​ឃើញ​ថា រដ្ឋាភិបាល​ឯក​បក្ស​ដែល​កំពុង​ដឹកនាំ​ដោយ​បុរស​ខ្លាំង​សល់​ពី​សម័យ​ខ្មែរក្រហម​រូប​នេះ គឺ​ដូច​គ្នា​ទៅ​នឹង​ការ​ដឹកនាំ​ក្នុង​របប​ប្រល័យ​ពូជសាសន៍​ដូច្នោះ​ដែរ បើ​ទោះបី​ការ​ប្រឆាំង​នឹង​ខ្លួន​នោះ ដើម្បី​ផល​ប្រយោជន៍​ជាតិ​ក៏ដោយ។

ទាក់ទិន​នឹង​បញ្ហា​នេះ កាលពី​ថ្ងៃទី​១៤ ខែ​មិថុនា ឆ្នាំ​២០២២ គណបក្ស​ប្រជាជន​កម្ពុជា​របស់​លោក ហ៊ុន សែន បាន​ដាក់​ពាក្យ​បណ្ដឹង​ទៅ​កាន់​តុលាការ​ប្រឆាំង​នឹង​អនុប្រធាន​គណបក្ស​ភ្លើង​ទៀន លោក សុន ឆ័យ ដោយ​ទាមទារ​សំណង​ជំងឺ​ចិត្ត​ចំនួន ១​លាន​ដុល្លារ​អាមេរិក​ជុំវិញ​ការ​លើកឡើង​របស់​លោក សុន ឆ័យ ដែល​បាន​ប្រៀបធៀប​នូវ​ការ​បោះឆ្នោត​កាលពី​ថ្ងៃទី​៥ ខែ​មិថុនា ឆ្នាំ​២០២២ ថា​ដូច​គ្នា​នឹង​ចោរ​លួច​ក្របី។

ទាក់ទិន​នឹង​បញ្ហា​នេះ សាលា​ឧទ្ធរណ៍​ក្រុង​ភ្នំពេញ​ក៏​បាន​សម្រេច​ឱ្យ​លោក សុន ឆ័យ ចាញ់​ក្តី​ក្នុង​សំណុំរឿង​បរិហារ​កេរ្តិ៍​នេះ​ដែរ ដែល​តម្រូវ​ឱ្យ​មន្ត្រី​គណបក្ស​ក្រៅ​រដ្ឋាភិបាល​រូប​នេះ​សង​ជំងឺ​ចិត្ត​ទៅ​ឲ្យ​គណបក្ស​ប្រជាជន​កម្ពុជា ២៥​ម៉ឺន​ដុល្លារ​អាមេរិក​បន្ថែម​ទៀត ឱ្យ​គ្រប់ ១​លាន​ដុល្លារ​អាមេរិក​តាម​ការ​ទាមទារ​របស់​បក្ស​កាន់​អំណាច​តែម្តង៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស