34 C
Phnom Penh

អ្នក​ឃ្លាំមើល​ថា​ការ​ព្រមាន​រឹបអូស​ទ្រព្យសម្បត្តិ​លោក សម រង្ស៊ី បង្ហាញ​ពី​អនុវត្ត​តាម​អ្នក​មាន​អំណាច​ជាង​អនុវត្ត​ច្បាប់

ដោយ ឌឹ ខេមបូឌា ដេលី

បទវិភាគ

មន្ត្រី​ជាន់ខ្ពស់​អង្គការ​ក្រៅ​រដ្ឋាភិបាល ថា​ការ​ព្រមាន​បន្ត​រឹបអូស​ទ្រព្យសម្បត្តិ​របស់​អតីត​មេដឹកនាំ​ប្រឆាំង លោក សម រង្ស៊ី បង្ហាញ​នូវ​ការ​អនុវត្ត​ច្បាប់​មួយ​ដែល​ធ្វើ​តាម​មហិច្ឆតា​របស់​អ្នក​មាន​អំណាច ជាជាង​ការ​អនុវត្ត​ទៅ​តាម​នីតិវិធី​ច្បាប់​របស់​ប្រទេស​កម្ពុជា។

ស្ថាបនិក​អង្គការ​អភិវឌ្ឍន៍​ផ្នត់គំនិត លោក សេក សុជាតិ ប្រាប់​សារព័ត៌មាន The Cambodia Daily នៅ​ថ្ងៃទី​១០ មករា នេះ​ថា ការ​អនុវត្ត​ច្បាប់​របស់​តុលាការ​កម្ពុជា​សព្វថ្ងៃ​នេះ​ត្រូវ​មើល​ឃើញ​ថា​មាន​ភាព​លម្អៀង​ទៅ​រក​បក្ស​កាន់​អំណាច​យ៉ាង​ខ្លាំង ជាជាង​ការ​ធានា​នូវ​ប្រព័ន្ធ​យុត្តិធម៌​របស់​ខ្លួន ព្រោះ​ថា​រាល់​ពេល​ដែល​មាន​បទបញ្ជា​របស់​មេដឹកនាំ​បក្ស​កាន់​អំណាច​លើ​បញ្ហា​ណា​មួយ តុលាការ​តែង​ចាត់​វិធានការ​លឿន រហ័ស និង​មាន​ប្រសិទ្ធភាព​បំផុត។

លោក សេក សុជាតិ លើកឡើង​ថា ដោយសារតែ​តុលាការ​ប្រកាន់​តួនាទី​បែប​នេះ​ហើយ​ទើប​មតិ​ជាតិ និង​អន្តរជាតិ​តែង​រិះគន់​ថា អំណាច​របស់​តុលាការ​មិន​បាន​បម្រើ​ឱ្យ​ប្រយោជន៍​សាធារណៈ និង​ដើម្បី​ធានា​ការពារ​នូវ​ប្រព័ន្ធ​យុត្តិធម៌​របស់​ខ្លួន​ទេ ប៉ុន្តែ​បម្រើ​តែ​មហិច្ឆតា និង​រង់ចាំ​តែ​អនុវត្ត​នូវ​បទបញ្ជា​របស់​អ្នក​មាន​អំណាច។

ស្ថាបនិក​អង្គការ​អភិវឌ្ឍន៍​ផ្នត់គំនិត​រូប​នេះ​បញ្ជាក់​ថា ការ​អនុវត្ត​របស់​ស្ថាប័ន​តុលាការ​បែប​នេះ គឺ​បញ្ច្រាស​ពី​ខ្លឹមសារ​របស់​រដ្ឋធម្មនុញ្ញ​ដែល​មាន​ចែង​ទាំងស្រុង ដែល​ជា​កត្តា​រុញច្រាន​ឱ្យ​កម្ពុជា​កាន់តែ​ឃ្លាត​ឆ្ងាយ​ពី​នីតិរដ្ឋ ទៅ​ជា​ការ​ដឹកនាំ​មួយ​តាម​បែប​បុគ្គល​និយម​ដូច​ប្រទេស​ដែល​ប្រកាន់​របប​ផ្ដាច់ការ​តែងតែ​អនុវត្ត​ដូច្នោះ​ដែរ។

កាលពី​ថ្ងៃទី​៩ ខែ​មករា ឆ្នាំ​២០២៣ ប្រធាន​ក្រុម​មេធាវី​របស់​គណបក្ស​កាន់​អំណាច លោក គី តិច អះអាង​ថា ក្រុម​មេធាវី​របស់​ដើមបណ្ដឹង​នឹង​បន្ត​ប្តឹង​រឹបអូស​ទ្រព្យសម្បត្តិ​របស់​លោក សម រង្ស៊ី បន្ត​ទៀត ត្បិត​ថវិកា​ដែល​បាន​មកពី​ការ​រឹបអូស​ផ្ទះ​របស់​គាត់ មិន​អាច​សង​ម្ចាស់​បំណុល​គ្រប់​ចំនួន​ទេ ក្នុង​នោះ​គឺ​ត្រូវ​សង​ទៅ​លោក ហ៊ុន សែន ជាង ៧​លាន ៧​សែន​ដុល្លារ​អាមេរិក សង​ទៅ​រដ្ឋ​ជាង ៤​លាន ៣​សែន​ដុល្លារ​អាមេរិក សង​ទៅ​លោក ស ខេង ជាង ៣​លាន ៨​សែន​ដុល្លារ​អាមេរិក និង​សង​ទៅ​លោក ហេង សំរិន ជាង ៤​លាន ៨​ម៉ឺន​ដុល្លារ​អាមេរិក​ផង​ដែរ។

ទាក់ទិន​នឹង​បញ្ហា​នេះ លោក គី តិច អះអាង​កាលពី​ថ្ងៃទី​៧ ខែ​មករា ឆ្នាំ​២០២៣ ថា ការ​សម្រេច​របស់​តុលាការ​ក្នុង​ការ​រឹបអូស​ទ្រព្យសម្បត្តិ​របស់​លោក សម រង្ស៉ី គឺជា​ការ​អនុវត្ត​ទៅ​តាម​ច្បាប់ ហើយ​ការ​រឹបអូស​ទ្រព្យសម្បត្តិ​ជន​ប្រព្រឹត្តិ​ល្មើស មិនមែន​មាន​តែ​នៅ​ក្នុង​ប្រទេស​កម្ពុជា ហើយ​ក៏​មិនមែន​មាន​តែ​លោក សម រង្ស៉ី នោះ​ដែរ គឺ​ត្រូវ​អនុវត្ត​គ្រប់​មនុស្ស​ទាំងអស់​ឱ្យ​តែ​ប្រព្រឹត្ត​ល្មើស​នឹង​ច្បាប់។

លោក គី តិច បញ្ជាក់​ថា ថវិកា​ដែល​បាន​ពី​ការ​លក់​ទ្រព្យសម្បត្តិ​របស់​លោក សម រង្ស៊ី នឹង​ត្រូវ​បែងចែក​ទៅ​កន្លែង​ផ្សេងៗ ដូចជា​លោក ហេង សំរិន យក​ទៅ​បរិច្ចាគ​ដល់​មន្ទីរពេទ្យ​គន្ធបុប្ផា លោក ហ៊ុន សែន ផ្តល់​ឲ្យ​ក្រុម​មេធាវី​របស់​ខ្លួន​សម្រាប់​ចំណាយ​លើ​ការ​ការពារ​ក្តី​ជូន​អ្នក​ក្រីក្រ ខណៈ​លោក ស ខេង ត្រូវ​បែងចែក​ក្នុង​ការ​កសាង​សាលារៀន និង​មណ្ឌល​កុមារ​កំព្រា​នៅ​តាម​បណ្តា​ខេត្ត​នានា​ផង​ដែរ។

មាត្រា​៣០៥ នៃ​ក្រមព្រហ្មទណ្ឌ​ចែង​ថា គ្រប់​ការ​អះអាង​បំផ្លើស ឬ​ការ​ទម្លាក់​កំហុស​ដោយ​អសុទ្ធចិត្ត​លើ​អំពើ​ណា​មួយ​ដែល​នាំ​ឲ្យ​ប៉ះពាល់​ដល់​កិត្តិសព្ទ​នៃ​បុគ្គល ឬ​ស្ថាប័ន គឺជា​ការ​បរិហារ​កេរ្តិ៍​ដែល​ត្រូវ​ពិន័យ​ជា​ប្រាក់​ពី ១​សែន​រៀល​ទៅ ១០​លាន​រៀល និង​ត្រូវ​សង​សំណង​ខូចខាត​ដល់​ជន​ដែល​រង​នូវ​ការ​បរិហារ​កេរ្តិ៍​នោះ​ថែម​ទៀត។

ក្រុម​អ្នក​ឃ្លាំមើល​សង្គម​រិះគន់​ថា ការ​រឹបអូស​ទ្រព្យសម្បត្តិ​របស់​លោក សម រង្ស៊ី យក​ទៅ​សង​ដើមបណ្ដឹង​ដែល​មន្ត្រី​ជាន់ខ្ពស់​បក្ស​កាន់​អំណាច​ក្នុង​ទំហំ​ទឹកប្រាក់​ដ៏​ច្រើន​លើសលប់​នេះ គឺ​បង្ហាញ​ពី​ការ​រំលោភ​លើ​ក្រមព្រហ្មទណ្ឌ​ដែល​បាន​ចែង​ពី​បទ​បរិហារ​កេរ្តិ៍​យ៉ាង​ធ្ងន់ធ្ងរ និង​ជា​ការ​បង្ហាញ​ឱ្យ​ឃើញ​នូវ​ការ​អនុវត្ត​ច្បាប់​របស់​តុលាការ​ផ្អែក​ទៅ​លើ​រឿង​នយោបាយ​តែប៉ុណ្ណោះ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស