29 C
Phnom Penh

លោក កឹម សុខា៖ អាមេរិក​ឈរ​លើ​គុណតម្លៃ​ប្រជាធិបតេយ្យ​ក្នុង​កិច្ច​សហប្រតិបត្តិការ​ជាមួយ​កម្ពុជា​និង​ក្នុង​តំបន់

ដោយ ឌឹ ខេមបូឌា ដេលី

បទវិភាគ

លោក កឹម សុខា លើកឡើង​ថា សហរដ្ឋ​អាមេរិក​បាន​បង្ហាញ​ពី​ចេតនា​ក្នុង​ការ​បន្ត​ពង្រឹង និង​ពង្រីក​កិច្ច​សហប្រតិបត្តិការ​ទ្វេភាគី​ជាមួយ​កម្ពុជា និង​តំបន់ ដោយ​ឈរ​លើ​គុណតម្លៃ​នៃ​ប្រជាធិបតេយ្យ សិទ្ធិមនុស្ស និង​យុត្តិធម៌​សង្គម។

ប្រធាន​គណបក្ស​សង្គ្រោះ​ជាតិ លោក កឹម សុខា បាន​សរសេរ​លើ​ហ្វេសប៊ុក​របស់​លោក​ថា នា​ថ្ងៃ​អង្គារ ទី​១០ មករា នេះ ឯកអគ្គរដ្ឋទូត​សហរដ្ឋ​អាមេរិក​ប្រចាំ​កម្ពុជា លោក Patrick Murphy និង​សហការី​ដែល​បាន​ចូល​ជួប​លោក​ដល់​គេហដ្ឋាន​ក្នុង​រាជធានី​ភ្នំពេញ។

ក្នុង​ជំនួប​ទ្វេភាគី​នោះ ឯកអគ្គរដ្ឋទូត​អាមេរិក​ក៏​បាន​បញ្ជាក់​ថា ថ្នាក់​ដឹកនាំ​សហរដ្ឋ​អាមេរិក​តែងតែ​លើកឡើង​អំពី​ចេតនា​ពង្រឹង និង​ពង្រីក​កិច្ច​សហប្រតិបត្តិការ​ទ្វេភាគី​ជាមួយ​កម្ពុជា និង​ពហុភាគី​ក្នុង​តំបន់ ដើម្បី​ផល​ប្រយោជន៍​របស់​ប្រជាពលរដ្ឋ​ទាំងអស់​គ្នា ជាពិសេស​ផល​ប្រយោជន៍​របស់​ប្រជាពលរដ្ឋ​ខ្មែរ ដោយ​ឈរ​លើ​គុណតម្លៃ ដូចជា​ប្រជាធិបតេយ្យ សិទ្ធិមនុស្ស និង​យុត្តិធម៌​សង្គម​ជាដើម។

ជំនួប​រយៈពេល​ជាង ២​ម៉ោង លោក កឹម សុខា ថា​រូបលោក និង​ឯកអគ្គរដ្ឋទូត​សហរដ្ឋ​អាមេរិក លោក Patrick Murphy បាន​ផ្លាស់ប្ដូរ​ព័ត៌មាន ទស្សនៈ និង​ពិភាក្សា​គ្នា​អំពី​ព្រឹត្តិការណ៍​មួយ​ចំនួន​កាលពី​ចុង​ឆ្នាំ​២០២២ កន្លងទៅ និង​សម្រាប់​ឆ្នាំ​ថ្មី​២០២៣ បន្ត​ទៅ​នេះ ដែល​ពាក់ព័ន្ធ​នឹង​កិច្ច​សហប្រតិបត្តិការ​រវាង​សហរដ្ឋ​អាមេរិក និង​កម្ពុជា ព្រមទាំង​ដំណើរការ​ប្រជាធិបតេយ្យ សិទ្ធិមនុស្ស និង​នីតិរដ្ឋ​ផង​ដែរ។

លោក កឹម សុខា ក៏​បាន​សម្ដែង​ការ​អរគុណ​ចំពោះ​ប្រជាពលរដ្ឋ និង​រដ្ឋាភិបាល​សហរដ្ឋ​អាមេរិក ក៏ដូចជា​ប្រទេស​ផ្សេង​ទៀត​ក្នុង​សហគមន៍​អឺរ៉ុប មាន​ជាអាទិ៍ បារាំង អាល្លឺម៉ង់ បែលហ្ស៊ិក ស៊ុយអែត ហ្វាំងឡង់ ន័រវែស ឆែក និង​ប្រទេស​ជប៉ុន អង់គ្លេស កាណាដា អូស្ត្រាលី នូវែលហ្សេឡង់ ស្វីស ជាដើម ដែល​តែងតែ​ឲ្យ​ឯកអគ្គរាជទូត រដ្ឋទូត ឬ​តំណាង​ជាន់ខ្ពស់​មក​ជួប​សម្ដែង​ការ​គួរសម និង​ពិភាក្សា​ការងារ​ជាមួយ​លោក ទោះបីជា​លោក​មិនមែន​ជា​ថ្នាក់​ដឹកនាំ​រដ្ឋាភិបាល​កម្ពុជា​ក៏ដោយ។

ការ​ចូល​ជួប​ជាមួយ​មេដឹកនាំ​គណបក្ស​ប្រឆាំង លោក កឹម សុខា របស់​ឯកអគ្គរាជទូត រដ្ឋទូត​ថ្មី​ដែល​ទើប​មក​កាន់​តំណែង និង​ឯកអគ្គរាជទូត រដ្ឋទូត​ដែល​ត្រូវ​បញ្ចប់​បេសកកម្ម​នៅ​កម្ពុជា ស្រប​ពេល​ដែល​លោក​នៅ​ជាប់​បម្រាម​តុលាការ ដែល​ហាម​សិទ្ធិ​មិន​ឱ្យ​ធ្វើ​នយោបាយ​នៅឡើយ ហើយ​បច្ចុប្បន្ន លោក​ក៏​កំពុង​តតាំង​ក្ដី​នៅ​តុលាការ​ជុំវិញ​បទ​ចោទប្រកាន់ «គប់គិត​ជាមួយ​បរទេស​ចង់​ផ្ដួល​រំលំ​រដ្ឋាភិបាល»

ក្នុង​សំណុំរឿង​នេះ តុលាការ​បាន​កំណត់​យក​ថ្ងៃទី​២១ ខែ​ធ្នូ ឆ្នាំ​២០២២ ​ជា​ថ្ងៃ​ដែល​គ្រប់​ភាគី​ពាក់ព័ន្ធ​នៅ​ក្នុង​សំណុំរឿង​ព្រហ្មទណ្ឌ​ដែល​មាន​ជន​ជាប់ចោទ លោក កឹម សុខា ដើម្បី​ធ្វើ​សេចក្ដី​សន្និដ្ឋាន​ចុងក្រោយ។ ក្រោយ​បញ្ចប់​សេចក្តី​សន្និដ្ឋាន​នេះ ប្រធាន​ក្រុមប្រឹក្សា​ជំនុំជម្រះ​នៃ​សាលាដំបូង​រាជធានី​ភ្នំពេញ លោក កូយ សៅ បាន​សម្រេច​ភ្លាមៗ​ថា សាលក្រម​នៃ​រឿងក្ដី​ព្រហ្មទណ្ឌ​មួយ​នេះ​នឹង​ប្រកាស​នៅ​ព្រឹក​ថ្ងៃទី​៣ ខែ​មីនា ឆ្នាំ​២០២៣។

ពាក់ព័ន្ធ​នឹង​រឿង​ចោទប្រកាន់​លើ​លោក កឹម សុខា នេះ បណ្ដាញ​ប្រទេស​លោក​សេរី​មួយ​បាន​ជំរុញ​ឲ្យ​រដ្ឋាភិបាល និង​តុលាការ​កម្ពុជា​ទម្លាក់​ចោល​បទ​ចោទប្រកាន់ និង​បើក​សិទ្ធិ​សេរីភាព​ឲ្យ​លោក កឹម សុខា ដើម្បី​ចូលរួម​ការ​បោះឆ្នោត​ឆ្នាំ​២០២៣ ដោយ​ពួកគេ​ចាត់ទុក​ការ​ចោទប្រកាន់​លើ​មេដឹកនាំ​បក្ស​ប្រឆាំង​រូប​នេះ​ថា​ជា​រឿង​នយោបាយ៕

© 2023, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស