ប្រធានគណបក្សប្រជាជនកម្ពុជា លោក ហ៊ុន សែន បញ្ជាទៅអង្គភាពប្រឆាំងអំពើពុករលួយ (ACU) និងស្ថាប័នពាក់ព័ន្ធ ឲ្យពន្លឿននីតិវិធីរឹបអូសដី និងផ្ទះមន្ត្រីជាន់ខ្ពស់គណបក្សភ្លើងទៀន ឲ្យបានឆាប់ ស្របពេលក្រសួងការបរទេស ក៏បានប្ដឹងលោក គង់ គាំ ទៅតុលាការ ដោយទាមទារសំណង ១លានដុល្លារ។
លោក ហ៊ុន សែន ប្រធានគណបក្សប្រជាជនកម្ពុជា និងជានាយករដ្ឋមន្ត្រី បានសរសេរលើហ្វេសប៊ុកនាថ្ងៃព្រហស្បតិ៍ ទី១២ នេះ ដោយស្នើអង្គភាពប្រឆាំងអំពើពុករលួយស្រាវជ្រាវជាបន្ទាន់អំពីភាពមិនប្រក្រតីនានានៃការលួចបន្លំធ្វើប័ណ្ណសម្គាល់កម្មសិទ្ធិលើដី និងផ្ទះដែលជាកម្មសិទ្ធិរបស់ក្រសួងការបរទេស។
ការស្នើនេះ ដោយលោកថាដើម្បីពន្លឿនដំណើរការស្វែងរកការពិតជុំវិញការរៀបចំឯកសារបន្លំយកដី និងផ្ទះរបស់ក្រសួងការបរទេសធ្វើជាកម្មសិទ្ធិឯកជន ដែលប្រព្រឹត្តដោយលោក គង់ គាំ។
លោក ហ៊ុន សែន ថាដីនិងផ្ទះដែលលោក គង់ គាំ រៀបចំឯកសារបន្លំនោះជាកម្មសិទ្ធិរបស់ក្រសួងការបរទេស ដូច្នេះលោកថាត្រូវយកដី និងផ្ទះពីលោក គង់ គាំ មកវិញឲ្យបានតាមគ្រប់មធ្យោបាយ ហើយត្រូវអនុវត្តទៅតាមនីតិវិធីច្បាប់ជាធរមាន។
ទាក់ទិនរឿងនេះ រដ្ឋមន្ត្រីក្រសួងការបរទេសកម្ពុជា លោក ប្រាក់ សុខុន ក៏ប្តឹងលោក គង់ គាំ ទៅតុលាការដោយទាមទារប្រគល់ដី និងសំណងជំងឺចិត្តចំនួន ៤ពាន់លានរៀល ឬស្មើនឹង១ លានដុល្លារអាមេរិក។
វិធានការច្បាប់ និងការរឹបអូសផ្ទះរបស់លោក គង់ គាំ នាពេលនេះ ធ្វើឡើងបន្ទាប់ពីលោក ហ៊ុន សែន ប្រតិកម្មខ្លាំងៗចំពោះការថ្លែងរបស់លោក គង់ គាំ ដែលបានទម្លាយរឿងនៅពេលដែលលោកនៅជាមួយគណបក្សប្រជាជនកម្ពុជា ដែលគេបានផ្តល់ដំបូន្មានថា «ផឹកទឹកឲ្យនឹកប្រភព ជ្រកម្លប់ឲ្យនឹកអ្នកដាំ» តែថាថ្ងៃ៧មករា ទំនងជាមិនមានប្រភពនៅកម្ពុជាដូចគណបក្សភ្លើងទៀនទេ។
លោក គង់ គាំ មិនមែនរងបណ្ដឹងតែពីក្រសួងការបរទេសឡើយ កាលពីថ្ងៃទី១០ ខែមករា ឆ្នាំ២០២៣ នេះ គណៈកម្មាធិការគណបក្សប្រជាជនកម្ពុជាខេត្តត្បូងឃ្មុំ ក៏បានដាក់ពាក្យប្ដឹងឧត្ដមទីប្រឹក្សាគណបក្សភ្លើងទៀន លោក គង់ គាំ ទៅសាលាដំបូងខេត្តនេះដែរ។
ក្នុងពាក្យបណ្តឹងនោះ តំណាងគណបក្សប្រជាជនកម្ពុជាខេត្តត្បូងឃ្មុំ ស្នើឲ្យតុលាការផ្ដន្ទាទោសតាមច្បាប់ និងទាមទារសំណងចំនួន ៥០ម៉ឺនដុល្លារ ក្រោមហេតុផលថា សម្ដីលោក គង់ គាំ ដែលថ្លែងក្នុងវេទិកាសាធារណៈនៅខេត្តជាប់ព្រំដែនវៀតណាម កាលពីថ្ងៃទី៧ ខែមករា នេះ បានឆ្លុះបញ្ចាំងពីចេតនាញុះញង់។
ជុំវិញរឿងនេះ លោក គង់ គាំ បានប្រាប់សារព័ត៌មានក្នុងស្រុកថា លោកទទួលយកការដាស់តឿនពីលោក ហ៊ុន សែន ដែលឲ្យលោកបញ្ឈប់ការវាយប្រហារ និងរិះគន់គណបក្សប្រជាជនកម្ពុជានោះ។ លោកបញ្ជាក់ថា សារនយោបាយដែលបានថ្លែងក្នុងវេទិកានានា មិនមានចេតនាញុះញង់ដូចគណបក្សប្រជាជនកម្ពុជាខេត្តត្បូងឃ្មុំ ចោទប្រកាន់លើរូបលោកឡើយ ។
ចំណាត់ការលើមន្ត្រីបក្សប្រឆាំងជាបន្តបន្ទាប់នេះ ធ្វើឡើងស្របពេលដែលលោក ហ៊ុន សែន កាលពីថ្ងៃទី៧ ខែមករា ឆ្នាំ២០២៣ កន្លងទៅ បានប្រកាសកម្ចាត់អ្នកនយោបាយទាំងឡាយណាដែលលោកចាត់ទុកថាជាអ្នកនយោបាយជ្រុលនិយមឱ្យអស់ពីទឹកដីកម្ពុជា ដើម្បីធានាថាកម្ពុជាគ្មានសង្គ្រាម និងការបែកបាក់ជាតិតទៅទៀត។
លោក គង់ គាំ ជាអតីតមន្ត្រីជាន់ខ្ពស់គណបក្សសង្គ្រោះជាតិ និងក៏ជាអតីតមន្ត្រីជាន់ខ្ពស់គណបក្សប្រជាជនកម្ពុជា នៅក្រសួងការបរទេស អំឡុងទសវត្សរ៍៨០ ក៏ប៉ុន្តែក្រោយពីមានបញ្ហាក្នុងជួរបក្ស លោក គង់ គាំ បានប្រឡូកចូលក្នុងជីវភាពនយោបាយជាមួយគណបក្ស សម រង្ស៊ី របស់លោក សម រង្ស៊ី ចាប់ពីឆ្នាំ១៩៩៥ មក៕