29 C
Phnom Penh

អ្នក​ឃ្លាំមើល៖ ការ​មិន​អើពើ​ដោះស្រាយ​វិវាទ​ណាហ្គា​ជា​ចេតនា​គប់គិត​រវាង​ក្រសួង​ការងារ​និង​ថៅកែ

ដោយ ឌឹ ខេមបូឌា ដេលី

បទវិភាគ

ប្រធាន​សមាគម​ប្រជាធិបតេយ្យ​ឯករាជ្យ​នៃ​សេដ្ឋកិច្ច​ក្រៅ​ប្រព័ន្ធ ថា​ការ​មិន​អើពើ​ដោះស្រាយ​បញ្ហា​សហជីព​ពី​សំណាក់​ក្រសួង​ការងារ បង្ហាញ​ឱ្យ​ឃើញ​ពី​ការ​ប៉ុនប៉ង​ក្នុង​ការ​រំលាយ​សហជីព​ដែល​មាន​ការ​ឃុបឃិត​គ្នា​រវាង​ក្រសួង​ការងារ និង​ក្រុមហ៊ុន​ណាហ្គា​វើលដ៍។

ប្រធាន​សមាគម​ប្រជាធិបតេយ្យ​ឯករាជ្យ​នៃ​សេដ្ឋកិច្ច​ក្រៅ​ប្រព័ន្ធ (IDEA) លោក វន់ ពៅ ប្រាប់​សារព័ត៌មាន The Cambodia Daily នៅ​ថ្ងៃទី​១២ មករា នេះ​ថា ការ​ដោះស្រាយ​បញ្ហា​ជុំវិញ​វិវាទ​កម្មករ​និយោជិត​នៃ​ក្រុមហ៊ុន​ណាហ្គា​វើលដ៍​នេះ មិនមែន​ត្រឹមតែ​ទូទាត់​នូវ​ប្រាក់​បំណាច់​បញ្ចប់​កិច្ចសន្យា​ការងារ​ជាមួយ​ក្រុមហ៊ុន​រួច​ហើយ គឺ​ចប់​នោះ​ទេ ប៉ុន្តែ​ត្រូវ​ទាមទារ​ឱ្យ​ក្រុមហ៊ុន​ទទួលយក​បុគ្គលិក​ដែល​ខ្លួន​បាន​បញ្ឈប់​ឱ្យ​ចូល​ធ្វើការ​វិញ ព្រោះ​ថា​ការ​បញ្ឈប់​ដោយ​គ្មាន​ការ​ព្រមព្រៀង​ពី​បុគ្គលិក​សហជីព​ទាំងនោះ គឺជា​រំលោភ​លើ​មាត្រា ៩៥ នៃ​ច្បាប់​ស្ដីពី​ការងារ និង​អនុសញ្ញា​អន្តរជាតិ​លេខ ៨៧ និង ៩៨ យ៉ាង​ធ្ងន់ធ្ងរ​ផង​ដែរ។

លោក​បន្ថែម​ថា ក្រសួង​ការងារ ក៏​ត្រូវ​ជំរុញ​ឱ្យ​មាន​ការ​ដោះលែង​ប្រធាន​សហជីព​កញ្ញា ឈឹម ស៊ីថរ និង​ជំរុញ​ឱ្យ​មាន​ការ​រៀបចំ​ដំណើរការ​ឡើង​វិញ​នូវ​សហជីព​ទ្រទ្រង់​សិទ្ធិ​ការងារ​បុគ្គលិក​កម្មករ​ខ្មែរ​នៃ​ក្រុមហ៊ុន​ណាហ្គា​វើលដ៍​ថែម​ទៀត ទើប​ត្រូវ​បាន​គេ​ចាត់ទុក​ថា​ជា​ការ​ដោះស្រាយ​ចំពោះ​វិវាទ​ការងារ​នេះ។

លោក វន់ ពៅ អះអាង​ថា បើ​កម្ពុជា​នៅតែ​បន្ត​មិន​ដោះស្រាយ​វិវាទ​កម្មករ​នៃ​ក្រុមហ៊ុន​ណាហ្គា​វើលដ៍ ដោយ​បើក​ឱ្យ​សហជីព​ដំណើរការ​ឡើងវិញ ឱ្យ​មាន​ការ​ដោះលែង​មេដឹកនាំ​សហជីព និង​ទទួល​បុគ្គលិក​ដែល​ខ្លួន​បាន​បញ្ឈប់​ឱ្យ​ចូល​ធ្វើការ​វិញ​ទេ នឹង​ធ្វើ​ឱ្យ​ប៉ះពាល់​ដល់​មុខមាត់​កម្ពុជា​លើ​ឆាក​អន្តរជាតិ​ជាមិនខាន ក្នុង​នោះ​ប្រយោជន៍​សេដ្ឋកិច្ច​ដែល​កម្ពុជា​នឹង​ទទួល​បាន​ពី​ការ​អនុគ្រោះ​ពន្ធ EBA របស់​សហភាព​អឺរ៉ុប និង GSP របស់​សហរដ្ឋ​អាមេរិក នឹង​ត្រូវ​បាត់បង់​ទាំងស្រុង​ថែម​ទៀត។

កាលពី​ថ្ងៃ​ព្រហស្បតិ៍ ទី​១២ មករា ក្រសួង​ការងារ និង​បណ្តុះបណ្តាល​វិជ្ជាជីវៈ បាន​ចេញ​សេចក្តី​ប្រកាស​ព័ត៌មាន​ថា គិត​ត្រឹម​ថ្ងៃទី​១១ ខែ​មករា ឆ្នាំ​២០២៣ នេះ មាន​អតីត​បុគ្គលិក​ក្រុមហ៊ុន​ណាហ្គា​វើលដ៍​ចំនួន ២៥៥​រូប​ហើយ​ដែល​យល់ព្រម​ទទួលយក​ការ​ទូទាត់​នូវ​ប្រាក់​បំណាច់​បញ្ចប់​កិច្ចសន្យា​ការងារ​ជាមួយ​ក្រុមហ៊ុន​ណាហ្គា​វើលដ៍ ក្រោយពី​ពួកគេ​ត្រូវ​បាន​បញ្ឈប់​ពី​ការងារ។

ក្រសួង​ការងារ បញ្ជាក់​ថា ទីភ្នាក់ងារ​ជាតិ​មុខរបរ និង​ការងារ (NEA) នៃ​ក្រសួង​ការងារ និង​បណ្ដុះបណ្ដាល​វិជ្ជាជីវៈ នឹង​ត្រៀម​ខ្លួន​ដើម្បី​ជួយ​សម្របសម្រួល​ពាក់ព័ន្ធ​នឹង​ការ​ជួយ​ស្វែងរក​ឱកាស​ការងារ​ថ្មី​សម្រាប់​អតីត​បុគ្គលិក​ផង​ដែរ។

កាលពី​ថ្ងៃទី​៨ ខែ​មេសា ឆ្នាំ​២០២១ ក្រុមហ៊ុន​ណាហ្គា​វើលដ៍ បាន​ចេញ​សេចក្ដី​ថ្លែងការណ៍​ថា ក្រុមហ៊ុន​នឹង​បញ្ឈប់​កម្មករ​និយោជិត​ចំនួន ១៣២៩​នាក់ ក្រោម​មូលហេតុ​ជួប​វិបត្តិ​ហិរញ្ញវត្ថុ​ដោយសារ​ការ​រីក​រាលដាល​នៃ​ជំងឺ​កូវីដ-១៩ ប៉ុន្តែ​កម្មករ​និយោជិត​អះអាង​ថា ការ​លើកឡើង​របស់​ក្រុមហ៊ុន​គ្រាន់តែ​ជា​លេស​ក្នុង​ចេតនា​ប៉ុនប៉ង​រំលាយ​ក្រុម​សហជីព​ដែល​តែងតែ​ជួយ​ការពារ​សិទ្ធិ​កម្មករ​កន្លងមក​ប៉ុណ្ណោះ។

ទាក់ទិន​នឹង​បញ្ហា​នេះ ក្រុម​អង្គការ​សង្គម​ស៊ីវិល​លើកឡើង​ថា ការ​បញ្ឈប់​បុគ្គលិក​នៃ​ក្រុមហ៊ុន​ណាហ្គា​វើលដ៍ ភាគី​ខាង​ក្រុមហ៊ុន​មាន​ចេតនា​បំផ្លាញ​សហជីព​ឱ្យ​រលាយ​សាបសូន្យ​តែម្តង ដែល​ទង្វើ​នេះ​ផ្ទុយ​នឹង​ខ្លឹមសារ​នៃ​មាត្រា ៩៥ នៃ​ច្បាប់​ស្ដីពី​ការងារ និង​អនុសញ្ញា​អន្តរជាតិ​លេខ ៨៧ និង ៩៨ ទាំងស្រុង៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស