32 C
Phnom Penh

លោក ហ៊ុន សែន ហៅ​លោក ហូរ វ៉ាន់ ឲ្យ​វិល​ចូល​ស្រុក​វិញ​ដោយ​ការ​លើកលែង​ទោស

ដោយ ឌឹ ខេមបូឌា ដេលី

បទវិភាគ

បុរស​ខ្លាំង​កាន់​អំណាច ៣៨​ឆ្នាំ​នៅ​កម្ពុជា ជំរុញ​ឲ្យ​លោក ហូរ វ៉ាន់ ផ្ដាច់​ខ្លួន​ចេញពី​មេដឹកនាំ​បក្ស​ប្រឆាំង ហើយ​វិល​ចូល​ស្រុក​វិញ ដោយ​លោក​នឹង​លើកលែង​ទោស​ឲ្យ ព្រោះ​គោលបំណង​របស់​លោក គឺ​កម្ចាត់​អ្នក​ដឹកនាំ​នយោបាយ​ជ្រុល​និយម​ម្នាក់​តែប៉ុណ្ណោះ។

ការ​ប្រកាស​របស់​លោក ហ៊ុន សែន ធ្វើឡើង​អំឡុង​ពេល​ចុះ​ពិនិត្យ​ការ​សាងសង់​មន្ទីរពេទ្យ​ជាតិ «តេជោ​សន្ដិភាព» នា​ថ្ងៃ​ទី​១៩ មករា នេះ។

លោក ហ៊ុន សែន អះអាង​ថា បើសិន​លោក ហូរ វ៉ាន់ វិល​ចូល​កម្ពុជា​ដោយ​ផ្ដាច់​ខ្លួន​ចេញពី​មេដឹកនាំ​បក្ស​ប្រឆាំង​នោះ លោក​នឹង​លើកលែង​ទោស​ដែល​តុលាការ​បាន​កាត់​ឲ្យ​ជាប់​ពន្ធនាគារ​នា​ពេល​កន្លងមក។ លោក​បញ្ជាក់​ថា គោលដៅ​របស់​លោក គឺ​កម្ចាត់​តែ​អ្នក​ដឹកនាំ​នយោបាយ​ដែល​ជ្រុល​និយម​តែ​ម្នាក់​ប៉ុណ្ណោះ។

ក្រៅពី​ហៅ​លោក ហូរ វ៉ាន់ ឲ្យ​ចូល​ស្រុក​វិញ​ហើយ លោក ហ៊ុន សែន ក៏​បាន​បង្ហើប​មន្ត្រី​បក្ស​ប្រឆាំង​ម្នាក់​ទៀត​ដែល​ទំនង​សំដៅ​ដល់​លោក អេង ឆៃអ៊ាង ថា​គិតតែ​ពី​លេង​ល្បែង​នៅ​ក្នុង​កាស៊ីណូ​តែប៉ុណ្ណោះ។

ការ​ប្រកាស​របស់​លោក ហ៊ុន សែន នេះ ធ្វើឡើង​បន្ទាប់ពី​មន្ត្រី​ជាន់ខ្ពស់​បក្ស​ប្រឆាំង លោក ហូរ វ៉ាន់ ដែល​បច្ចុប្បន្ន​កំពុង​និរទេស​ខ្លួន​នៅ​ក្រៅ​ប្រទេស​ដើម្បី​គេច​ពី​ការ​ចាប់​ខ្លួន បន្ទាប់ពី​តុលាការ​រំលាយ​គណបក្ស​សង្គ្រោះ​ជាតិ​កាលពី​ឆ្នាំ​២០១៧។

លោក ហ៊ុន សែន ប្រកាស​លើកលែង​ទោស​បែប​នេះ ធ្វើឡើង​បន្ទាប់ពី​សាលាដំបូង​រាជធានី​ភ្នំពេញ​កាលពី​ថ្ងៃទី​២២ ខែ​ធ្នូ ឆ្នាំ​២០២២ បាន​ផ្ដន្ទាទោស​អតីត​មេដឹកនាំ និង​សកម្មជន​បក្ស​សង្គ្រោះ​ជាតិ​ដែល​ត្រូវ​តុលាការ​រំលាយ​ចំនួន ៣៦​នាក់​ជាប់​ពន្ធនាគារ​ចន្លោះ​ពី ៥ ទៅ ៧​ឆ្នាំ ក្រោម​បទ​ចោទប្រកាន់ «រួម​គំនិត​ក្បត់» ខណៈ​ម្នាក់​ក្នុង​ចំណោម​នោះ​រួច​ផុត​បទ​ចោទ​ពាក់ព័ន្ធ​ការ​ប៉ុនប៉ង និង​គាំទ្រ​ដំណើរ​វិល​ត្រឡប់​មិន​បាន​សម្រេច​របស់​អ្នកស្រី មូរ សុខហួរ។

ក្នុង​ចំណោម​មនុស្ស​ទាំង ៣៦​នាក់ គឺ​មាន​លោក សម រង្ស៊ី លោក អេង ឆៃអ៊ាង លោក ឡុង រី លោកស្រី មូរ សុខហួរ លោក ហូរ វ៉ាន់ អ្នកស្រី ជូឡុង សូម៉ូរ៉ា លោក នុត រំដួល លោក អ៊ូ ច័ន្ទឫទ្ធិ និង​មនុស្ស ៣​នាក់​ទៀត​ដាក់​ពន្ធនាគារ​ម្នាក់ៗ ៧​ឆ្នាំ​ដោយ​ដក​សិទ្ធិ​បោះឆ្នោត និង​ឈរ​ឈ្មោះ​បោះឆ្នោត។

លោក ហូរ វ៉ាន់ មិនមែន​ត្រូវ​បាន​តុលាការ​ផ្ដន្ទាទោស​តែ​មួយ​ករណី​នេះ​ទេ ប៉ុន្តែ​មន្ត្រី​បក្ស​ប្រឆាំង​រូប​នេះ​ក៏​ត្រូវ​បាន​តុលាការ​កាត់ក្តី​កំបាំង​មុខ​ក្នុង​សំណុំរឿង​ផ្សេងៗ​ទៀត​ដែរ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស