32 C
Phnom Penh

លោក គឹម សុខ៖ បក្ស​ប្រជាជន​ពិត​ជា​បាន​ប្លន់​លទ្ធផល​បោះឆ្នោត​២០​ឆ្នាំ​ហើយ​ដើម្បី​ក្តាប់​អំណាច

ដោយ ឌឹ ខេមបូឌា ដេលី

បទវិភាគ

ក្រុម​អ្នក​តស៊ូ​មតិ​នៅ​ក្រៅ​ស្រុក រិះគន់​ថា ចាប់តាំងពី​បោះឆ្នោត​ជាតិ​ឆ្នាំ​១៩៩៨ រហូត​ដល់​ការ​បោះឆ្នោត​ឆ្នាំ​២០១៨ គឺ​មាន​រយៈពេល ២០​ឆ្នាំ​ហើយ​ដែល​បក្ស​ប្រជាជន​កម្ពុជា​របស់​លោក ហ៊ុន សែន មិន​ត្រឹមតែ​លួច​សន្លឹកឆ្នោត​ទេ ប៉ុន្តែ​ប្លន់​លទ្ធផល​បោះឆ្នោត​តែម្តង​ដើម្បី​កាន់​អំណាច។

អ្នក​វិភាគ​ឯករាជ្យ និង​ជា​ប្រធាន​វេទិកា​ពលរដ្ឋ លោក គឹម សុខ ប្រាប់​សារព័ត៌មាន The Cambodia Daily នៅ​ថ្ងៃទី​២០ មករា នេះ​ថា លោក ហ៊ុន សែន មិន​ត្រឹមតែ​ប្លន់​លទ្ធផល​បោះឆ្នោត​នោះ​ទេ ប៉ុន្តែ​លោក ហ៊ុន សែន បាន​បិទ​សិទ្ធិ​អ្នក​នយោបាយ​ដែល​មាន​ឥទ្ធិពល​មិន​ឱ្យ​ចូលរួម​ការ​បោះឆ្នោត​ទាំងអស់ តាមរយៈ​នៃ​ការ​ចោទ​ប្តឹង​ដោយ​អយុត្តិធម៌​ផ្សេងៗ ដូចជា​ប្តឹង​លោក កឹម សុខា លោក សម រង្ស៊ី លោក សុន ឆ័យ លោក ថាច់ សេដ្ឋា និង​លោក គង់ គាំ ជាដើម។

ជាង​នេះ​ទៀត គណៈកម្មាធិការ​ជាតិ​រៀបចំ​ការ​បោះឆ្នោត (គ.ជ.ប) សុទ្ធសឹងតែ​មាន​សមាសភាព​មកពី​បក្ស​កាន់​អំណាច​ទាំងអស់ ដូចជា​ប្រធាន គ.ជ.ប លោក ប្រាជ្ញ ចន្ទ ជាដើម។ លើស​ពី​នេះ​ទៅ​ទៀត សហគមន៍​អន្តរជាតិ​មិន​បាន​ដាក់​អ្នក​សង្កេតការណ៍​ក្នុង​ដំណើរការ​នៃ​ការ​បោះឆ្នោត​នេះ​ទេ។ ជាក់ស្តែង កាលពី​ការ​បោះឆ្នោត​ឃុំ-សង្កាត់​ឆ្នាំ​២០២២ កន្លងទៅ ក្នុង​នោះ​ពួកគេ​ក៏​មិន​បាន​ផ្តល់​ថវិកា​ដូច​អាណត្តិ​ដែល​មាន​បក្ស​ប្រឆាំង​ចូលរួម​ដែរ។

លោក គឹម សុខ លើកឡើង​ថា គណបក្ស​ប្រជាជន​កម្ពុជា​មិន​ត្រឹមតែ​លួច​សន្លឹកឆ្នោត និង​ប្លន់​លទ្ធផល​បោះឆ្នោត​ទេ ប៉ុន្តែ​ថែមទាំង​ចាប់​ជំរិត​គណបក្ស​សង្គ្រោះ​ជាតិ​ថែម​ទៀត ដូចជា​ការ​ចាប់​ខ្លួន​លោក កឹម សុខា ក្រោម​បទ​ចោទ​មិន​ពិត រំលាយ​គណបក្ស​សង្គ្រោះ​ជាតិ និង​ប្លន់​យក​កៅអី​តំណាងរាស្ត្រ​បក្ស​ប្រឆាំង​ទាំង ៥៥​អាសនៈ ព្រមទាំង​កៅអី​ក្រុមប្រឹក្សា​ឃុំ-សង្កាត់​បក្ស​នេះ​ជាង ៥​ពាន់​កន្លែង​យក​ទៅ​ចែក​ជាមួយ​គណបក្ស​រណប​របស់​ខ្លួន​ថែម​ទៀត។

អ្នកវិភាគ​ឯករាជ្យ​រូប​នេះ​បញ្ជាក់​ថា បើ​លោក ហ៊ុន សែន មិន​ចង់​ឱ្យ​មាន​ការ​រិះគន់​ថា គណបក្ស​ប្រជាជន​កម្ពុជា​ជា​ចោរ​លួច​សន្លឹកឆ្នោត ឬ​ជា​ចោរ​ប្លន់​លទ្ធផល​ការ​បោះឆ្នោត គាត់​ត្រូវតែ​អនុវត្ត​ឱ្យ​បាន​តាម​កិច្ចព្រមព្រៀង​សន្តិភាព​ទីក្រុង​ប៉ារីស ដោយ​រៀបចំ​ដំណើរការ​នៃ​ការ​បោះឆ្នោត​មួយ​ដោយ​បើក​ចំហ សេរី ត្រឹមត្រូវ និង​យុត្តិធម៌ និង​ធ្វើ​កំណែ​ទម្រង់​សមាសភាព គ.ជ.ប ព្រមទាំង​បើក​លំហ​ឱ្យ​មាន​ការ​ចូលរួម​ប្រកួតប្រជែង​ពី​គណបក្ស​នានា​ដោយ​សេរី ដោយ​មាន​អ្នក​សង្កេតការណ៍​ជាតិ និង​អន្តរជាតិ​ចូលរួម នោះ​គឺ​អាច​លុប​បំបាត់​ពាក្យ​ថា គណបក្ស​កាន់​អំណាច​ជា​ចោរ​លួច​សន្លឹកឆ្នោត​បាន​ហើយ។

កាលពី​ថ្ងៃទី​១៩ ខែ​មករា ក្នុង​ពិធី​ពិនិត្យ​ដំណើរការ​នៃ​ការ​សាងសង់​មន្ទីរពេទ្យ​ថ្មី​មួយ នៅ​ខណ្ឌ​ព្រែកព្នៅ រាជធានី​ភ្នំពេញ មេដឹកនាំ​បក្ស​កាន់​អំណាច​ដែល​ឧស្សាហ៍​គំរាម​ចាប់​ចង លោក ហ៊ុន សែន ព្រមាន​ទៅ​កាន់​អ្នកវិភាគ អ្នក​សារព័ត៌មាន ជាពិសេស​មេដឹកនាំ​បក្ស​នយោបាយ ឱ្យ​ពួកគេ​បញ្ឈប់​ការ​ចោទប្រកាន់​បក្ស​កាន់​អំណាច​ថា​ជា​ចោរ​លួច​សន្លឹកឆ្នោត​បន្ត​ទៀត បើ​មិន​ដូច្នេះ​ទេ លោក​នឹង​ប្រើ​វិធានការ​ច្បាប់ និង​អំពើ​ហិង្សា​បង្ក្រាប​អ្នក​ទាំងនោះ​ដល់​ផ្ទះ​តែម្តង។

លោក ហ៊ុន សែន អះអាង​ថា អ្នក​ដែល​ចោទ​ថា​បក្ស​ប្រជាជន​កម្ពុជា​ជា​ចោរ​លួច​សន្លឹកឆ្នោត គឺ​ត្រូវតែ​ប្តឹង ក្នុង​នោះ​លោក ហ៊ុន សែន បញ្ជា​ឱ្យ​មេធាវី​របស់​បក្ស​ប្រជាជន​កម្ពុជា​នៅ​តាម​ខេត្ត​នីមួយៗ ត្រូវតែ​ប្តឹង​អ្នក​ទាំងនោះ​ដោយ​គ្មាន​ករណី​លើកលែង ព្រោះ​ការ​ចោទប្រកាន់​បក្ស​របស់​លោក​ថា​ជា​ចោរ​លួច​សន្លឹកឆ្នោត មិនមែន​ជា​សិទ្ធិ​បញ្ចេញមតិ​នោះ​ទេ។

ទាក់ទិន​នឹង​បញ្ហា​នេះ កាលពី​ថ្ងៃទី​១៤ ខែ​មិថុនា ឆ្នាំ​២០២២ បក្ស​ប្រជាជន​កម្ពុជា​របស់​លោក ហ៊ុន សែន បាន​ដាក់​ពាក្យ​បណ្ដឹង​ទៅ​កាន់​តុលាការ​ប្រឆាំង​នឹង​អនុប្រធាន​គណបក្ស​ភ្លើង​ទៀន លោក សុន ឆ័យ ដោយ​ទាមទារ​សំណង​ជំងឺចិត្ត​ចំនួន ១​លាន​ដុល្លារ​អាមេរិក ជុំវិញ​ការ​ប្រៀបធៀប​នូវ​ការ​បោះឆ្នោត​កាលពី​ថ្ងៃទី​៥ ខែ​មិថុនា ឆ្នាំ​២០២២ កន្លងទៅ ដូច​គ្នា​នឹង​ចោរ​លួច​គោ លួច​ក្របី ក្នុង​នោះ​ផ្ទះ​របស់​លោក សុន ឆ័យ ក៏​ត្រូវ​បាន​តុលាការ​រឹបអូស​ផង​ដែរ។

ចាប់តាំងពី​ឆ្នាំ​១៩៩៣ មក កម្ពុជា​បាន​បោះឆ្នោត​ជ្រើសរើស​តំណាងរាស្ត្រ​ចំនួន ៦​លើក​រួច​មក​ហើយ ខណៈ​ការ​បោះឆ្នោត​ជ្រើសរើស​ក្រុមប្រឹក្សា​ឃុំ-សង្កាត់​បាន ៥​លើក​ផង​ដែរ ប៉ុន្តែ​ការ​បោះឆ្នោត​ជ្រើសរើស​ក្រុមប្រឹក្សា​ឃុំ-សង្កាត់​អាណត្តិ​ទី​៥ ឆ្នាំ​២០២២ កន្លងទៅ ត្រូវ​បាន​សហគមន៍​អន្តរជាតិ​បដិសេធ​ចោល​ទាំងស្រុង ដោយ​ចាត់ទុក​ថា​ជា​ការ​បោះឆ្នោត​ដែល​គ្មាន​តម្លាភាព សេរី ត្រឹមត្រូវ និង​យុត្តិធម៌​ឡើយ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស