គណបក្សភ្លើងទៀនសាទរចំពោះសេចក្ដីថ្លែងការណ៍របស់គណបក្សប្រជាជនកម្ពុជា ដែលបានបញ្ជាក់ពីភាពស្អាតស្អំ ត្រឹមត្រូវ និងសេចក្ដីថ្លៃថ្នូររបស់គណបក្សប្រជាជនកម្ពុជា ដែលកំពុងកាន់អំណាច បន្ទាប់ពីលោក ហ៊ុន សែន គំរាមប្តឹងទៅតុលាការបើគណបក្សនេះមិនសុំទោសជាសាធារណៈ។
ក្នុងសេចក្ដីថ្លែងការណ៍របស់បក្សភ្លើងទៀនចេញផ្សាយជាសាធារណៈនៅថ្ងៃទី២០ ខែមករា នេះ ឱ្យដឹងថា គណបក្សនេះបានឃើញ និងអបអរនូវសេចក្ដីថ្លែងការណ៍របស់គណបក្សប្រជាជនកម្ពុជាចុះថ្ងៃទី១៩ ខែមករា ឆ្នាំ២០២៣ ដែលបញ្ជាក់ពីភាពស្អាតស្អំ ត្រឹមត្រូវ និងសេចក្ដីថ្លៃថ្នូររបស់គណបក្សប្រជាជនកម្ពុជា។
ជុំវិញសេចក្ដីថ្លែងការណ៍គណបក្សប្រជាជនកម្ពុជានេះ គណបក្សភ្លើងទៀនគាំទ្រនូវជំហរដើម្បីពង្រឹងនូវបរិយាកាសនយោបាយឱ្យបានល្អប្រសើរបំផុត សំដៅធានាឱ្យការបោះឆ្នោតជ្រើសតាំងតំណាងរាស្ត្រអាណត្តិទី៧ ថ្ងៃទី២៣ ខែកក្កដា ឆ្នាំ២០២៣ ខាងមុខ ប្រព្រឹត្តទៅដោយសេរី ត្រឹមត្រូវ និងយុត្តិធម៌។
ជុំវិញរឿងនេះ អនុប្រធានគណបក្សភ្លើងទៀន លោក សុន ឆ័យ បានថ្លែងទទួលស្គាល់ថា សេចក្ដីថ្លែងការណ៍របស់បក្សខ្លួនចេញនោះជារឿងដែលឆ្គាំឆ្គង និងមិនគួរឱ្យកើតមានទៀតនោះទេ។ គណបក្សភ្លើងទៀននឹងដកខ្លឹមសារដូចដែលមាននៅក្នុងសេចក្ដីថ្លែងការណ៍នោះចេញជាបន្ទាន់ផងដែរ ក្នុងន័យដើម្បីសម្រួលស្ថានការណ៍នេះឱ្យមានភាពប្រក្រតីឡើងវិញផងដែរ។
ការបន្ទន់ឥរិយាបថបង្ហាញជំហរគាំទ្ររបស់គណបក្សភ្លើងទៀន ធ្វើឡើងបន្ទាប់ពីលោក ហ៊ុន សែន ស្នើឱ្យបក្សភ្លើងទៀនចេញមុខសុំទោសជាសាធារណៈ បើមិនដូច្នេះទេ លោកនឹងបង្គាប់ឱ្យលោក គី តិច ដែលជាមេធាវីរបស់លោក ពិនិត្យខ្លឹមសារដែលមាននៅក្នុងសេចក្ដីថ្លែងការណ៍នោះ និងដាក់បណ្ដឹងទៅតុលាការ។
បុរសខ្លាំងកាន់អំណាច ៣៨ឆ្នាំរូបនេះអះអាងថា ការធ្វើដូច្នេះ ដើម្បីស្វែងរកយុត្តិធម៌ និងប៉ះប៉ូវការចោទប្រកាន់ដែលលោកចាត់ទុកជាការមួលបង្កាច់ខុសពីការពិតនេះ។
ក្រោយពីលោក ហ៊ុន សែន ព្រមានភ្លាមៗនោះ គណៈកម្មាធិការគណបក្សក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច ក្រសួងវប្បធម៌ ក្រសួងអប់រំ ក្រសួងសុខាភិបាល ក្រសួងរៀបចំដែនដី និងក្រសួងបរិស្ថាន ជាដើម បាននាំគ្នាចេញញត្តិគាំទ្រ និងជំរុញឱ្យរដ្ឋាភិបាលដឹកនាំដោយលោក ហ៊ុន សែន ចាត់វិធានការលើគណបក្សភ្លើងទៀន ក្រោមហេតុផលថាសេចក្ដីថ្លែងការណ៍របស់បក្សនេះប៉ះពាល់ដល់សេចក្ដីថ្លៃថ្នូរបក្សប្រជាជនកម្ពុជា។
ញត្តិគាំទ្ររបស់ក្រសួងស្ថាប័នទាំងនោះ បានចេញដាច់ដោយឡែកៗពីគ្នា ប៉ុន្តែខ្លឹមសារដូចៗគ្នា បានឱ្យដឹងថា ការថ្លែងការណ៍របស់គណបក្សភ្លើងទៀនជាការប្រមាថកាតទាន និងចោទប្រកាន់ទាំងបំពានខុសពីការពិតទៅលើគណបក្សប្រជាជនកម្ពុជា ដែលបក្សនេះមិនអាចទទួលយកបានឡើយ។
ក្រសួងស្ថាប័នទាំងនោះជំរុញ និងសំណូមពរឱ្យរដ្ឋាភិបាល រួមទាំងអាជ្ញាធរមានសមត្ថកិច្ចមានចំណាត់ការចំពោះគណបក្សភ្លើងទៀន និងគ្រប់បុគ្គលដែលបានប្រព្រឹត្តល្មើសច្បាប់ ត្រូវតែទទួលទោសទណ្ឌតាមការកំណត់នៃច្បាប់ដែលគ្រប់ប្រទេសនៅក្នុងសកលលោកក៏អនុវត្តដូចគ្នានេះដែរ។
បើតាមសេចក្តីថ្លែងការណ៍គណបក្សភ្លើងទៀន ដែលចេញកាលពីថ្ងៃទី១៨ ខែមករា បង្ហាញថា ខ្លួនប្រឆាំងដាច់ខាតលើការគាបសង្កត់ ការគំរាមកំហែង និងការធ្វើទុក្ខបុកម្នេញខាងនយោបាយពីគណបក្សកាន់អំណាច ហើយស្នើឲ្យបញ្ឈប់សកម្មភាពនោះជាបន្ទាន់។
នៅប៉ុន្មានថ្ងៃជាប់ៗគ្នានេះ គណបក្សភ្លើងទៀនបានចេញសេចក្តីថ្លែងការណ៍របស់ខ្លួនបន្តបន្ទាប់ ក្រោយពីមន្ត្រីជាន់ខ្ពស់នៅក្នុងគណបក្ស គឺលោក ថាច់ សេដ្ឋា ត្រូវបានសមត្ថកិច្ចចាប់ខ្លួនពីបទចេញមូលប្បទានប័ត្រដែលគ្មានសាច់ប្រាក់ ឬហៅថាសែកស្អុយ។
តែយ៉ាងណា ក្រោយពីសេចក្ដីថ្លែងការណ៍បានមួយថ្ងៃនោះ នៅថ្ងៃទី១៩ ខែមករា ឆ្នាំ២០២៣ លោក ហ៊ុន សែន បានព្រមានចាប់ខ្លួនអ្នករិះគន់ដាក់ពន្ធនាគារដោយមិនរុញរាទៀតឡើយ រាប់ចាប់តាំងពីថ្នាក់មូលដ្ឋានដល់ថ្នាក់ជាតិ នៅពេលរកឃើញថានៅបន្តសាបព្រោះវប្បធម៌រិះគន់គណបក្សប្រជាជនកម្ពុជា។
លោក ហ៊ុន សែន ក៏បានប្ដេជ្ញាដោយមិនឲ្យអ្នករិះគន់បក្សប្រជាជនកម្ពុជា រត់យករួចខ្លួនទៀត ទោះបីពួកគេត្រូវភៀសខ្លួនតាមមធ្យោបាយណាក៏ដោយ។ ក្រៅពីព្រមានហើយ លោក ហ៊ុន សែន ក៏ទទួលស្គាល់ថាលោកគឺជាមេដឹកនាំបែបហិង្សាដែរ៕