អតីតមេដឹកនាំបក្សប្រឆាំងព្រមានថា មេដឹកនាំបក្សកាន់អំណាចលោក ហ៊ុន សែន បានប្រើអំណាចផ្ដាច់ការកាន់តែសាហាវ ដោយការសម្លាប់ ចាប់ដាក់គុក ឬបង្ខំឲ្យនិរទេសចំពោះអ្នកណាដែលហ៊ានប្រឆាំងនឹងអំណាចផ្ដាច់ការរបស់គាត់។
អតីតមេដឹកនាំប្រឆាំងលោក សម រង្ស៊ី សរសេរលើទំព័រហ្វេសប៊ុករបស់ខ្លួនកាលពីថ្ងៃទី២៣ ខែមករា ឆ្នាំ២០២៣ នេះថា គម្រោងបន្តអំណាចគ្រួសារមេដឹកនាំបក្សកាន់អំណាចលោក ហ៊ុន សែន បង្ហាញយ៉ាងច្បាស់ថា អំណាចផ្ដាច់ការនឹងត្រូវបន្តជារៀងរហូត ហើយទ្រព្យសម្បត្តិប្រទេសកម្ពុជានឹងត្រូវរងការប្លន់ពីគ្រួសារមួយនេះជានិច្ច ដែលនឹងធ្វើឲ្យប្រទេសជាតិ និងប្រជារាស្ត្រខ្មែរវិនាសអន្តរាយជាប្រាកដ។
លោក សម រង្ស៊ី លើកឡើងថា មេដឹកនាំបក្សកាន់អំណាចលោក ហ៊ុន សែន បើទោះជាកាន់អំណាចយូរជាងគេ ប៉ុន្តែមេដឹកនាំខ្មែររូបនេះគ្មានគោលការណ៍ និងចក្ខុវិស័យអ្វីទាំងអស់សម្រាប់ប្រទេសកម្ពុជា ក្រៅតែពីរកល្បិចដើម្បីក្រាញអំណាច ខណៈមរតកដែលលោក ហ៊ុន សែន បន្សល់ទុកសម្រាប់កម្ពុជាទៅថ្ងៃអនាគត គឺគ្រាន់តែជាគ្រាប់បែកមួយគ្រាប់ដែលនឹងផ្ទុះធ្វើឲ្យកម្ពុជារលំរលាយនៅថ្ងៃខាងមុខតែប៉ុណ្ណោះ។
អតីតមេដឹកនាំប្រឆាំងរូបនេះបញ្ជាក់ថា ការរំលាយគណបក្សសង្គ្រោះជាតិកាលពីឆ្នាំ២០១៧ គឺជារដ្ឋប្រហារប្រឆាំងរដ្ឋធម្មនុញ្ញ និងកិច្ចព្រមព្រៀងសន្តិភាពទីក្រុងប៉ារីស ឆ្នាំ១៩៩១ យ៉ាងធ្ងន់ធ្ងរ ត្បិតការរំលាយបក្សប្រឆាំងដ៏ធំនេះបានទាញប្រទេសកម្ពុជា ឲ្យវិលត្រឡប់ទៅរកការគ្រប់គ្រងក្រោមបក្សតែមួយដូចកាលពីសម័យកុម្មុយនីស្ត។
ក្រុមអ្នកតាមដានស្ថានការណ៍នយោបាយ និងអង្គការសង្គមស៊ីវិលសង្កេតឃើញថា លំហសេរីភាពនយោបាយនៅកម្ពុជាកំពុងរងនូវការរឹតត្បិតយ៉ាងខ្លាំងពីមេដឹកនាំបក្សកាន់អំណាចលោក ហ៊ុន សែន ដោយការប្តឹងរឹបអូសផ្ទះសម្បែង ដីធ្លី និងចាប់ខ្លួនអ្នកដែលប្រឆាំងនឹងការដឹកនាំរបស់លោកនៅពេលនេះ។
មេដឹកនាំនយោបាយធំៗនៅកម្ពុជាបច្ចុប្បន្ននេះត្រូវគេមើលឃើញថា មានតែលោក ហ៊ុន សែន លោក កឹម សុខា និងលោក សម រង្ស៊ី ប៉ុណ្ណោះដែលអាចធ្វើឱ្យមានការប្រែប្រួលស្ថានការណ៍នយោបាយនៅកម្ពុជាទាំងមូលបាន ប៉ុន្តែក្រោមឥទ្ធិពលនយោបាយរបស់លោក ហ៊ុន សែន បានរុញឱ្យកម្ពុជាធ្លាក់ទៅរកវិបត្តិមិនចេះចប់ម្ដងហើយម្ដងទៀតតាមល្បែងនយោបាយប្រជាភិថុតិគ្រប់រូបភាព ដើម្បីការពារអំណាចរបស់ខ្លួន។
ទោះយ៉ាងណា ក្រុមអ្នកសង្កេតការណ៍លើកឡើងថា ល្បែងនយោបាយរវាងលោក ហ៊ុន សែន និងលោក សម រង្ស៊ី សព្វថ្ងៃនេះមិនបានរកផលប្រយោជន៍ជូនជាតិមាតុភូមិនោះទេ ដោយសារមេដឹកនាំកំពូលទាំងនោះគិតតែផលប្រយោជន៍នយោបាយរៀងៗខ្លួនប៉ុណ្ណោះ ក្នុងនោះលោក សម រង្ស៊ី ក៏ធ្លាប់ជួយបំពេញផ្លូវច្បាប់ឱ្យលោក ហ៊ុន សែន ដើម្បីកែរដ្ឋធម្មនុញ្ញពី ២ភាគ៣ មក ៥០ភាគរយបូកមួយ ដែលជាហេតុនាំឲ្យបុរសខ្លាំងលោក ហ៊ុន សែន អាចក្តោបក្តាប់អំណាចកាន់តែខ្លាំងរហូតមកទល់សព្វថ្ងៃនេះ។ ចំណែកលោក ហ៊ុន សែន វិញ ក៏ធ្លាប់ចុះហត្ថលេខាសម្រួល និងលើកលែងទោសឱ្យលោក សម រង្ស៊ី អាចវិលចូលទៅធ្វើនយោបាយនៅកម្ពុជាវិញដែរ។
ប្រភពដដែលអះអាងថា ល្បែងនយោបាយរបស់មេដឹកនាំបានធ្វើឱ្យស្ថានការណ៍នយោបាយនៅកម្ពុជាវឹកវរជាច្រើនឆ្នាំមកហើយ បើទោះបីជាកម្ពុជាទទួលអនុវត្តតាមកិច្ចព្រមព្រៀងសន្តិភាពទីក្រុងប៉ារីសឆ្នាំ១៩៩១ ដើម្បីឱ្យជួយរំលត់ជម្លោះប្រដាប់អាវុធផ្ទៃក្នុងជាតិរបស់ខ្លួនអស់រយៈពេល ៣១ឆ្នាំទៅហើយក្តី ក៏កម្ពុជានៅតែមានជម្លោះផ្ទៃក្នុងជាតិឯងក្នុងចំណោមអ្នកនយោបាយដែលមានឥទ្ធិពលរហូតដល់សព្វថ្ងៃនេះ។ មិនត្រឹមតែប៉ុណ្ណោះ ពលរដ្ឋដែលគាំទ្រអ្នកនយោបាយទាំងនោះក៏បានបែងចែក និងប្រកាន់និន្នាការរៀងៗខ្លួន ដែលជាសញ្ញានៃការបែកបាក់សាមគ្គីជាតិយ៉ាងធ្ងន់ធ្ងរក្នុងពេលបច្ចុប្បន្ននេះ។
អង្គការ Freedom House បានចេញរបាយការណ៍របស់ខ្លួនកាលពីចុងឆ្នាំ២០២២ ថា ប្រព័ន្ធនយោបាយរបស់ប្រទេសកម្ពុជាត្រូវបានលោកនាយករដ្ឋមន្ត្រី ហ៊ុន សែន គ្រប់គ្រងស្ទើរតែទាំងស្រុងទៅហើយ ខណៈគណបក្សប្រឆាំង និងអ្នកតវ៉ាទាមទារសិទ្ធិសេរីភាព រងនូវការធ្វើទុក្ខបុកម្នេញជាប្រចាំដោយការបំភិតបំភ័យ ការកាត់ទោសក្រោមហេតុផលនយោបាយ និងអំពើហិង្សាដែលធ្វើឱ្យពលរដ្ឋខ្មែររស់នៅក្នុងបរិយាកាសរឹតត្បិត គាបសង្កត់ និងការភ័យខ្លាចយ៉ាងខ្លាំងក្នុងពេលបច្ចុប្បន្ននេះ៕