39.8 C
Phnom Penh

លោក សម រង្ស៊ី ចោទ​លោក​នាយករដ្ឋមន្ត្រី ហ៊ុន សែន ថា​ជា​មេដឹកនាំ​របប ហ្វាស៊ីស

ដោយ ឌឹ ខេមបូឌា ដេលី

បទវិភាគ

អតីត​មេដឹកនាំ​បក្ស​ប្រឆាំង​ចោទ​ថា ការ​ដឹកនាំ​របស់​លោក ហ៊ុន សែន គឺជា​ការ​ដឹកនាំ​តាម​របប ហ្វាស៊ីស ដែល​ទុក​ព្រះមហាក្សត្រ​ខ្មែរ​ជា​ស្តេច​អាយ៉ង ដើម្បី​បម្រើ​មហិច្ឆតា​របស់​ខ្លួន។

អតីត​មេដឹកនាំ​បក្ស​ប្រឆាំង លោក សម រង្ស៊ី សរសេរ​លើ​ទំព័រ​ហ្វេសប៊ុក​របស់​ខ្លួន​នៅ​ថ្ងៃទី​២៥ មករា នេះ​ថា របប ហ្វាស៊ីស ខុសពី​របប​កុម្មុយនីស្ត​នៅ​ត្រង់​ថា បុគ្គល​ដែល​ជា​មេដឹកនាំ​កំពូល​អាច​ប្រើ​អំណាច​តាម​អំពើ​ចិត្ត ខណៈ​ប្រព័ន្ធ​ឃោសនា​របស់​រដ្ឋ​ត្រូវ​បាន​ប្រើប្រាស់​ដើម្បី​លើក​តម្កើង​តែ​មេដឹកនាំ​នេះ​ប៉ុណ្ណោះ។

លោក​បន្ថែម​ថា ការ​ដឹកនាំ​បែប​នេះ គឺ​ធ្លាប់​កើត​មាន​នៅ​ប្រទេស​អ៊ីតាលី ដែល​មាន​មេដឹកនាំ​ឈ្មោះ Benito Mussolini ចំណែក​នៅ​ប្រទេស​កម្ពុជា​វិញ គឺ​មាន​លោក ហ៊ុន សែន ដែល​បាន​ដឹកនាំ​បែប​នេះ​ចាប់តាំងពី​រដ្ឋប្រហារ​ឆ្នាំ​១៩៩៧ មក។

អតីត​មេដឹកនាំ​បក្ស​ប្រឆាំង​រូប​នេះ​លើកឡើង​ថា របប ហ្វាស៊ីស គឺជា​របប​មូលធន​និយម​ដែល​ប្រមូលផ្ដុំ​ទ្រព្យសម្បត្តិ​ជាតិ​ក្តាប់​ក្នុង​កណ្ដាប់ដៃ​មនុស្ស​មួយ​ក្តាប់​តូច ដែល​មាន​មហាសេដ្ឋី​មួយ​ចំនួន​ជា​បណ្ដាញ​របស់​គេ ហើយ​របប​នេះ​តែងតែ​គាប​សង្កត់​កម្មករ និង​វាយប្រហារ​សហជីព​ដែល​ទាមទារ​រក​សេរីភាព។

លោក​បន្ត​ថា ការ​ដឹកនាំ​នៃ​របប​នេះ​គឺ​ផ្ទុយ​ពី​របប​កុម្មុយនីស្ត​ទាំងស្រុង ដែល​តែង​ការពារ​កម្មករ និង​ពលករ និង​ដឹកនាំ​ជា​សមូហភាព​តាមរយៈ​គណៈកម្មាធិការ​អចិន្ត្រៃយ៍ ឬ​ការិយាល័យ​នយោបាយ​នៃ​បក្ស​កុម្មុយនីស្ត។

អតីត​មេដឹកនាំ​បក្ស​ប្រឆាំង លោក សម រង្ស៊ី បញ្ជាក់​ថា របប​កុម្មុយនីស្ត​តែង​លុប​បំបាត់​សាសនា​ដូច​របប ប៉ុល ពត ជាដើម ប៉ុន្តែ​របប ហ្វាស៊ីស អនុញ្ញាត​ឲ្យ​មាន​សាសនា ប៉ុន្តែ​ពួកគេ​យក​សាសនា​ដើម្បី​បញ្ចុះបញ្ចូល គំរាមកំហែង ឬ​ទិញ​ទឹកចិត្ត​ថ្នាក់​ដឹកនាំ​សាសនា ដូចជា​សម្តេច​ប៉ាប នៅ​ប្រទេស​អ៊ីតាលី និង​សម្តេច​សង្ឃរាជ​នៅ​ប្រទេស​កម្ពុជា​សព្វថ្ងៃ ឱ្យ​ជឿ​តាម​ការ​ដឹកនាំ​របស់​របប​មួយ​នេះ ជាដើម។

អង្គការ​ឃ្លាំមើល​សិទ្ធិមនុស្ស​អន្តរជាតិ យូមែន រ៉ៃត៍ វ៉ច្ឆ (Human Rights Watch) ធ្លាប់​ចេញ​របាយការណ៍​របស់​ខ្លួន​កាលពី​ពេល​កន្លងទៅ​ថា កម្ពុជា​ដែល​ក្រោម​ការ​ដឹកនាំ​របស់​លោក ហ៊ុន សែន បាន​បង្កើត​ឲ្យ​មាន​ការ​សម្លាប់ និង​ការ​រំលោភ​សិទ្ធិមនុស្ស​ធ្ងន់ធ្ងរ​រាប់​មិន​អស់ ដែល​បាន​ប្រព្រឹត្ត​ទៅ​ដោយ​ពុំ​មាន​ទោស​ទណ្ឌ ក្នុង​នោះ​លោក ហ៊ុន សែន បាន​ដំឡើង​បុណ្យ​ស័ក្តិ និង​ផ្តល់​រង្វាន់​ដល់​ពួក​ឃាតករ​ទាំងនោះ​ជាច្រើន​នាក់ ឱ្យ​ដឹកនាំ​ក្នុង​រដ្ឋាភិបាល​របស់​លោក​ផង​ដែរ។

អង្គការ​ឃ្លាំមើល​សិទ្ធិមនុស្ស​អន្តរជាតិ អះអាង​ថា ករណី​ឃាតកម្ម​ទាំងនោះ​មាន​ជាប់​ពាក់ព័ន្ធ​នឹង​មន្ត្រី​ជាន់ខ្ពស់​នៃ​រដ្ឋាភិបាល​កម្ពុជា យោធា នគរបាល កងរាជ​អាវុធហត្ថ និង​បុគ្គលិក​ចារកម្ម​យ៉ាង​ច្រើន​ដែល​ពួកគេ​កំពុង​កាន់កាប់​តួនាទី​ធំៗ ហើយ​កំពុង​នៅ​ក្បែរ​លោក ហ៊ុន សែន សព្វថ្ងៃ​នេះ។

ទាក់ទិន​នឹង​បញ្ហា​នេះ កាលពី​ថ្ងៃទី​១៩ ខែ​វិច្ឆិកា ឆ្នាំ​២០១៧ លោក ហ៊ុន សែន បាន​អះអាង​ក្នុង​ពិធី​មួយ​នៅ​មជ្ឈមណ្ឌល​កោះពេជ្រ ក្នុង​ទីក្រុង​ភ្នំពេញ​ថា ប្រសិនបើ​លោក​បាន​ដឹង​ជា​មុន​អំពី​ផែនការ​របស់​គណបក្ស​សង្គ្រោះ​ជាតិ ក្នុង​ការ​ប៉ុនប៉ង​ផ្តួល​រំលំ​រដ្ឋាភិបាល​របស់​លោក​តាមរយៈ​រូបភាព​បដិវត្តន៍​ពណ៌ ម្ល៉េះ​លោក​បញ្ជា​ឲ្យ​ក្រុម​របស់​លោក​សម្លាប់​ក្រុម​អ្នក​ប្រឆាំង​ទាំងអស់​នោះ​ចោល​អស់​ទៅ​ហើយ នៅ​ពេល​ដែល​ពួកគេ​បាន​ដឹកនាំ​ធ្វើ​បាតុកម្ម​នៅ​ក្រោយ​ការ​បោះឆ្នោត​ឆ្នាំ​២០១៣ ក្នុង​ទីក្រុង​ភ្នំពេញ​នោះ។

ជាង​នេះ​ទៀត កាលពី​ថ្ងៃទី​១០ ខែ​មីនា ឆ្នាំ​២០២២ លោក ហ៊ុន សែន ក៏​ធ្លាប់​បាន​គំរាម​ផ្តាច់​ជីវិត​លោក សុខ សុគន្ធ ក្រៅ​ប្រព័ន្ធ​ច្បាប់​ផង​ដែរ បន្ទាប់ពី​អ្នក​តាមដាន​ស្ថានការណ៍​នយោបាយ​កម្ពុជា​រូប​នេះ​រិះគន់​ពី​ការ​ដឹកនាំ​មិន​ត្រឹមត្រូវ​របស់​លោក​កន្លងមក។

ក្រុម​អ្នក​ឃ្លាំមើល​សង្គម​លើកឡើង​ថា របៀប​ដឹកនាំ​របស់​លោក ហ៊ុន សែន គឺ​ប្រើ​ច្បាប់​ព្រៃ​ដែល​គាត់​ធ្លាប់​ទទួល​បាន​ការ​បណ្តុះបណ្តាល​ក្នុង​ឋានៈ​ជា​មេ​កម្មាភិបាល​របប​ប្រល័យ​ពូជសាសន៍ ប៉ុល ពត ព្រោះ​ថា​លោក ហ៊ុន សែន មិន​ដែល​ចាត់ទុក​ជីវិត​មនុស្ស​សំខាន់​ជាង​អំណាច​របស់​គាត់​ទេ ហើយ​គាត់​តែង​យក​ពាក្យ​ការពារ​សន្តិភាព​មក​បាំង​ពី​មុខ​ជានិច្ច ប៉ុន្តែ​សន្តិភាព​ដែល​លោក ហ៊ុន សែន ប្រឹង​ការពារ​សព្វថ្ងៃ​នេះ​ជា​សន្តិភាព​ក្រោម​ការ​ភ័យខ្លាច​របស់​ពលរដ្ឋ​ខ្មែរ​ប៉ុណ្ណោះ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស