ក្រសួងមហាផ្ទៃ អនុញ្ញាតឱ្យសមាគមគ្រូបង្រៀនកម្ពុជាឯករាជ្យ ហែធម្មយាត្រាក្នុងគោលបំណងលើកកម្ពស់សីលធម៌សង្គម នៅថ្ងៃទី១ ខែកុម្ភៈ ឆ្នាំ២០២៣ ប៉ុន្តែត្រូវធ្វើការសម្របសម្រួល និងសហការជាមួយរដ្ឋបាលរាជធានីភ្នំពេញ និងរដ្ឋបាលខេត្តពាក់ព័ន្ធ។
រដ្ឋមន្ត្រីក្រសួងមហាផ្ទៃ លោក ស ខេង បានចេញលិខិតនៅថ្ងៃទី២៦ ខែមករា ឆ្នាំ២០២៣ នេះដោយអនុញ្ញាតឱ្យសមាគមគ្រូបង្រៀនកម្ពុជាឯករាជ្យហែធម្មយាត្រាពីទីក្រុងភ្នំពេញ ទៅខេត្តពោធិ៍សាត់ ប៉ុន្តែប្រធានសមាគមគ្រូបង្រៀនកម្ពុជាឯករាជ្យ ត្រូវធ្វើការសម្របសម្រួល និងសហការជាមួយរដ្ឋបាលរាជធានីភ្នំពេញ និងរដ្ឋបាលខេត្តពាក់ព័ន្ធ ដើម្បីកំណត់អំពីទីតាំងជួបជុំឱ្យបានច្បាស់លាស់។
លោក ស ខេង បញ្ជាក់ថា ការស្នើឱ្យសមាគមគ្រូបង្រៀនកម្ពុជាឯករាជ្យធ្វើបែបនេះ គឺដើម្បីឱ្យអាជ្ញាធរជួយតម្រាយផ្លូវធ្វើដំណើរឆ្លងកាត់ និងទីកន្លែងបញ្ចប់ការដង្ហែក្បួនធម្មយាត្រា ក្នុងគោលបំណងដើម្បីធានាបាននូវសុវត្ថិភាពចរាចរណ៍តាមដងផ្លូវ និងសណ្ដាប់ធ្នាប់សាធារណៈ ព្រមទាំងត្រូវគោរព និងអនុវត្តនូវវិធានការសុខាភិបាលដែលបានដាក់ចេញដោយអាជ្ញាធរមានសមត្ថកិច្ច ក្នុងការប្រយុទ្ធប្រឆាំងនឹងជំងឺឆ្លងនានាផងដែរ។
ការចេញលិខិតអនុញ្ញាតនេះ ធ្វើឡើងបន្ទាប់ពីសមាគមគ្រូបង្រៀនកម្ពុជាឯករាជ្យដាក់លិខិតជូនក្រសួងមហាផ្ទៃកាលពីសប្តាហ៍កន្លងទៅ ដើម្បីហែធម្មយាត្រាក្នុងបំណងលើកកម្ពស់សីលធម៌សង្គមនៅដើមខែក្រោយនេះ។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា ប្រាប់សារព័ត៌មាន The Cambodia Daily នៅថ្ងៃទី២៦ មករា នេះថា ការបើកផ្លូវរបស់ក្រសួងមហាផ្ទៃ គឺជារឿងល្អ ត្បិតវត្ថុបំណងនៃធម្មយាត្រានេះមិនមែនត្រឹមតែលើកកម្ពស់សីលធម៌សង្គមតែម្យ៉ាងទេ ក៏មានខ្លឹមសារដើម្បីលុបបំបាត់នូវអំពើហិង្សាក្នុងសង្គមដែលមនុស្សគ្រប់រូបចង់បានដូចគ្នាផងដែរ។
លោក ស៊ឹង សែនករុណា លើកឡើងថា ក្រសួងមហាផ្ទៃក៏ត្រូវពិនិត្យ និងសម្រេចឱ្យបានជាក់លាក់ផងដែរនូវសារនានា ដែលត្រូវផ្សព្វផ្សាយអំឡុងពេលហែធម្មយាត្រា ដើម្បីឱ្យអ្នកចូលរួមអាចធ្វើកិច្ចការរបស់ពួកគេដោយរលូន ចៀសវាងនូវការហាមឃាត់ណាមួយពីសំណាក់អាជ្ញាធរជុំវិញការប្រើប្រាស់សារទាំងនោះ។
មន្ត្រីសង្គមស៊ីវិលទទួលបន្ទុកកិច្ចការសិទ្ធិមនុស្សរូបនេះ អំពាវនាវឱ្យអាជ្ញាធរមូលដ្ឋានជួយសម្របសម្រួលឱ្យក្បួនធម្មយាត្រានេះអាចប្រព្រឹត្តទៅដោយរលូន និងចូលរួមការពារឱ្យបានហ្មត់ចត់ ដើម្បីអនុវត្តឱ្យស្របគ្នាទៅនឹងការអនុញ្ញាតរបស់ក្រសួងមហាផ្ទៃ ដែលបានបើកឱកាសឱ្យមានក្បួនដង្ហែធម្មយាត្រានេះ។
កាលពីថ្ងៃទី១៦ ខែមករា ឆ្នាំ២០២៣ ប្រធានសមាគមគ្រូបង្រៀនកម្ពុជាឯករាជ្យ អ្នកស្រី អ៊ុក ឆាយ៉ាវី បានដាក់លិខិតជូនរដ្ឋមន្ត្រីក្រសួងមហាផ្ទៃ លោក ស ខេង ស្នើសុំហែក្បួនធម្មយាត្រាឆ្លងកាត់រាជធានីខេត្តចំនួន៥ ជាប់បឹងទន្លេសាប ក្នុងគោលបំណងលើកកម្ពស់សីលធម៌សង្គម នៅថ្ងៃទី១ ខែកុម្ភៈ ឆ្នាំ២០២៣ ខាងមុខនេះ ដែលនឹងចាប់ផ្តើមពីទីក្រុងភ្នំពេញត្រង់រូបសំណាកលោកយាយពេញ ហើយបញ្ចប់ក្បួនដង្ហែនៅបូជនីយដ្ឋានប្រវត្តិសាស្ត្រឧកញ៉ា ឃ្លាំង មឿង ក្នុងខេត្តពោធិ៍សាត់។
ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ (IDEA) លោក វន់ ពៅ ធ្លាប់អះអាងថា សង្គមមួយដែលសីលធម៌ធ្លាក់ចុះ នឹងបង្កទៅជាការប្រព្រឹត្តអំពើអនាចារផ្សេងៗ ត្បិតអ្នកមានអំណាច ឬអ្នកមានទ្រព្យសម្បត្តិដែលគ្មានសីលធម៌ អាចនឹងធ្វើទង្វើរំលោភបំពានច្បាប់គ្រប់បែបយ៉ាង ដើម្បីតែផលប្រយោជន៍ខ្លួនឯង ខណៈជនរងគ្រោះដែលទទួលរងនូវឥទ្ធិពលពីទង្វើអាក្រក់ទាំងនេះ នឹងរងនូវភាពអយុត្តិធម៌ឥតស្រាកស្រាន្ត ដូចជាការចាប់ខ្លួន ឬចោទប្រកាន់នរណាម្នាក់ដោយបំពានលើច្បាប់ ជាដើម៕