មេដឹកនាំបក្សកាន់អំណាច លោក ហ៊ុន សែន ចាត់ទុកអតីតមេដឹកនាំបក្សប្រឆាំងលោក សម រង្ស៊ី និងអ្នកគាំទ្រមួយចំនួនរបស់គាត់ថាលែងមានសារជាតិជាមនុស្ស ដោយសារតែមកនិន្ទា និងរុកឆ្កៀលក្រុមគ្រួសាររបស់លោកអំឡុងពេលដែលលោកកំពុងកាន់ទុក្ខប្អូនថ្លៃស្រីរបស់លោកដែលទទួលមរណភាព។
លោក ហ៊ុន សែន បានសរសេររៀបរាប់នៅលើទំព័រហ្វេសប៊ុករបស់លោកកាលពីថ្ងៃទី៥ ខែកុម្ភៈ ថា ភរិយារបស់លោក គឺអ្នកស្រី ប៊ុន រ៉ានី មានបងប្អូន ៥នាក់ ពេលនេះប្អូនស្រីពៅទទួលមរណភាពដោយរោគាពាធទៅហើយ បែរជាមានពពួកមនុស្សអាក្រក់នៅក្រៅប្រទេសដែលលោកចង់សំដៅដល់លោក សម រង្ស៊ី និងអ្នកគាំទ្ររបស់គាត់មួយចំនួន បានប្រឌិតសាច់រឿងភូតភរមហាជនថា ភរិយារបស់លោក គឺអ្នកស្រី ប៊ុន រ៉ានី កំពុងមានជំងឺធ្ងន់ធ្ងរទៅវិញ។
លោក ហ៊ុន សែន បញ្ជាក់ថា លោកសូមផ្តាំទៅមនុស្សអាក្រក់ទាំងនោះថា បើមេដឹកនាំរបស់ពួកគេជាមនុស្សអាក្រក់ ពួកគេគួរតែរក្សាខ្លួនជាមនុស្សល្អ និងខិតខំរក្សាសុខភាពរបស់ខ្លួន ជាជាងមករករឿងគ្រួសាររបស់លោកដែលកំពុងមានទុក្ខក្រៀមក្រំនៅពេលនេះ ព្រោះអ្វីដែលពួកគេបានធ្វើមិនមែនជារឿងដែលមនុស្សល្អធ្វើនោះទេ។
កាលពីថ្ងៃទី៣ ខែកុម្ភៈ ឆ្នាំ២០២៣ អ្នកស្រី ប៊ុន សុថា ត្រូវជាប្អូនស្រីបង្កើតរបស់អ្នកស្រី ប៊ុន រ៉ានី ភរិយាលោក ហ៊ុន សែន បានទទួលមរណភាពដោយរោគាពាធ។
ស្របពេលដែលអ្នកស្រី ប៊ុន សុថា ទទួលមរណភាព អតីតមេដឹកនាំបក្សប្រឆាំងលោក សម រង្ស៊ី បានសរសេរនៅលើទំព័រហ្វេសប៊ុករបស់លោកកាលពីថ្ងៃទី៥ កុម្ភៈ ថា ក្នុងជួរគ្រួសារលោក ហ៊ុន សែន មានមនុស្សសាហាវៗជាច្រើន ដូចជាករណី អ្នកស្រី ប៊ុន សុថា ដែលមានឈ្មោះដើម ប៊ុន សាមហ៊ឹង ធ្លាប់បានបញ្ជាឲ្យគេសម្លាប់ប្តីខ្លួនឯង គឺលោក កូវ សាមុត កាលពីអំឡុងឆ្នាំ១៩៩៦ ដោយសារតែជម្លោះផ្ទៃក្នុងគ្រួសាររបស់ខ្លួនដែលមានលោក ហ៊ុន សែន ជាអ្នកបញ្ជាពីក្រោយ។
អតីតមេដឹកនាំបក្សប្រឆាំងរូបនេះអះអាងថា បន្ទាប់ពីលោក កូវ សាមុត ត្រូវបានឃាតករបាញ់សម្លាប់ លោក ហ៊ុន សែន បានចោទប្រកាន់លោក ស្រ៊ុន វង្សវណ្ណៈ ដែលជាប្រធានអង្គរក្សរបស់លោកនៅពេលនោះ ថាជាអ្នកប្រព្រឹត្ត ដើម្បីឱ្យគាត់ទទួលទោសជំនួសទាំងអយុត្តិធម៌ និងដើម្បីទម្លាក់កំហុសមកលើរូបលោកដែលជាប្រធានគណបក្សជាតិខ្មែរនៅពេលនោះផងដែរ។
លោក សម រង្ស៊ី បញ្ជាក់ថា មិនត្រឹមតែអ្នកស្រី ប៊ុន សុថា នេះទេដែលមានចរិតកាចសាហាវ សូម្បីអ្នកស្រី ប៊ុន រ៉ានី ដែលមានឈ្មោះដើមថា ប៊ុន សាមហ៊ាង ជាប្រពន្ធរបស់លោក ហ៊ុន សែន ក៏ធ្លាប់បានបញ្ជាឲ្យគេសម្លាប់អ្នកស្រី ពិសិដ្ឋ ពីលិកា ក្នុងឆ្នាំ១៩៩៩ ដោយសារភ្លើងប្រច័ណ្ឌនឹងលោក ហ៊ុន សែន ដែលបានលួចបង្កាត់ភ្លើងស្នេហ៍ត្រីកោណផងដែរ។
លោកបន្ថែមថា នៅពេលអ្នកស្រី ពិសិដ្ឋ ពីលិកា រងរបួសហើយបញ្ជូនទៅមន្ទីរពេទ្យកាល់ម៉ែត (Calmette Hospital) អ្នកស្រី ប៊ុន រ៉ានី បានបញ្ជាឲ្យគ្រូពេទ្យផ្តាច់ជីវិតអ្នកស្រី ពិសិដ្ឋ ពីលិកា នៅមន្ទីរពេទ្យនោះតែម្តង។
អតីតអ្នកទោសនយោបាយ លោក មាជ សុវណ្ណារ៉ា ប្រាប់សារព័ត៌មាន The Cambodia Daily នៅថ្ងៃទី៦ កុម្ភៈ នេះថា តាមទំនៀមទម្លាប់ និងប្រពៃណីខ្មែរ សម្រាប់មនុស្សដែលលាចាកលោកទៅហើយនោះ មិនត្រូវបានគេលើកយកមកវាយប្រហារក្នុងន័យណាមួយនោះទេ គឺមានតែការអធ្យាស្រ័យ និងអហោសិកម្មសម្រាប់បុគ្គលនោះប៉ុណ្ណោះ ប្រសិនបើអ្នកដែលស្លាប់នោះមានប្រវត្តិមិនល្អពីមុនក៏ដោយ។
លោកអះអាងថា ការបើកកកាយប្រវត្តិរបស់អ្នកស្រី ប៊ុន សុថា ដែលបានទទួលមរណភាពទៅហើយនោះ វាជាទង្វើមួយដែលបង្ហាញពីភាពអគុណធម៌ក្នុងនាមជាអ្នកនយោបាយជាន់ខ្ពស់ទៅវិញ ហើយការធ្វើបែបនេះ គ្មានចំណេញអ្វីដល់ជាតិនោះទេ គឺមានតែធ្វើឱ្យកម្ដៅនយោបាយ និងគំនុំនយោបាយបុគ្គលផ្ទាល់ខ្លួនកាន់តែផ្ទុះរីកធំឡើងប៉ុណ្ណោះ។
យ៉ាងណាក៏ដោយ កាលពីថ្ងៃទី១៦ ខែកញ្ញា ឆ្នាំ២០២១ កន្លងទៅ លោក ហ៊ុន សែន អះអាងថា លោកបានធ្វើច្រើនណាស់ក្នុងការដឹកនាំជាតិរកការបង្រួបបង្រួមរវាងខ្មែរ និងខ្មែរ ប៉ុន្តែភាគីនយោបាយក្រុមប្រឆាំងមិនយល់អំពីការបង្រួបបង្រួមជាតិនេះទេ ហើយនៅពេលនេះគ្មានកិច្ចការនយោបាយណាដែលត្រូវដោះស្រាយដោយការចរចានោះឡើយ។
ទោះជាបែបនេះក្តី សហភាពអឺរ៉ុប និងបណ្តាប្រទេសលោកសេរីជាច្រើន នៅតែជំរុញឱ្យអ្នកនយោបាយខ្មែរវិលទៅរកការចរចាបញ្ចប់ជម្លោះនយោបាយ ដោយតម្កល់ផលប្រយោជន៍ជាតិឱ្យធំជាងផលប្រយោជន៍បុគ្គល ឬបក្សរបស់ខ្លួន៕