29 C
Phnom Penh

មន្ត្រី​បក្ស​កាន់​អំណាច​ដក​បណ្ដឹង​ដែល​ប្ដឹង​លោក គង់ គាំ បន្ទាប់ពី​លោក​លាឈប់​ពី​បក្ស​ភ្លើង​ទៀន

ដោយ ឌឹ ខេមបូឌា ដេលី

បទវិភាគ

រដ្ឋមន្ត្រី​ក្រសួង​ការបរទេស និង​តំណាង​គណបក្ស​ប្រជាជន​កម្ពុជា​ខេត្ត​ត្បូងឃ្មុំ ដក​ពាក្យ​បណ្ដឹង​ដែល​ប្ដឹង​លោក គង់ គាំ វិញ​ហើយ​បន្ទាប់ពី​លោក​ប្រកាស​ទទួលស្គាល់​កំហុស និង​លាឈប់​ពី​គណបក្ស​ភ្លើង​ទៀន។

ការ​ដក​ពាក្យ​បណ្ដឹង​នេះ បាន​ធ្វើឡើង​ស្រប​ពេល​ដែល​លោក គង់ គាំ សម្រេច​លាលែង​ពី​តួនាទី និង​សកម្មភាព​ជា​ឧត្ដម​ទីប្រឹក្សា​គណបក្ស​ភ្លើង​ទៀន កាលពី​ថ្ងៃ​ទី​៣១ ខែ​មករា ឆ្នាំ​២០២៣។

លោក ប្រាក់ សុខុន រដ្ឋមន្ត្រី​ការបរទេស បាន​ដាក់​ពាក្យ​បណ្តឹង​ទៅ​កាន់​តុលាការ​ក្រុង​ភ្នំពេញ​កាលពី​ថ្ងៃទី​៣១ ខែ​មករា ឆ្នាំ​២០២៣ ដើម្បី​ដក​ពាក្យ​បណ្តឹង​ដែល​ប្តឹង​លោក គង់ គាំ។ ចំណែក​គណបក្ស​ប្រជាជន​កម្ពុជា​ខេត្ត​ត្បូងឃ្មុំ ក៏​បាន​ដាក់​ពាក្យ​ទៅ​តុលាការ​ខេត្ត​នេះ​កាលពី​ថ្ងៃទី​៣ ខែ​កុម្ភៈ ដើម្បី​សុំ​ដក​បណ្តឹង​របស់​ខ្លួន​ដែរ។

រដ្ឋមន្ត្រី​ក្រសួង​ការបរទេស លោក ប្រាក់ សុខុន ដែល​ជា​ដើមចោទ កាលពី​ថ្ងៃទី​៣១ ខែ​មករា បាន​ស្នើសុំ​ប្រធាន​សាលាដំបូង​រាជធានី​ភ្នំពេញ ដក​ពាក្យ​បណ្តឹង​មក​វិញ​ដោយ​សំអាង​ថា លោក គង់ គាំ ដែល​ជា​ចុង​ចម្លើយ​បាន​សុំ​សម្របសម្រួល​បញ្ចប់​វិវាទ និង​បាន​ប្រគល់​អចលនវត្ថុ និង​ធ្វើ​នីតិវិធី​ចុះបញ្ជី​ផ្ទេរ​កម្មសិទ្ធិ​ប្រគល់​ជូន​ភាគី​ដើមចោទ​វិញ​រួចរាល់​អស់​ហើយ។

ចំណែកឯ​លិខិត​សុំ​ដក​ពាក្យ​បណ្តឹង​របស់​ក្រុម​មេធាវី​តំណាង​ឱ្យ​គណៈកម្មាធិការ​គណបក្ស​ប្រជាជន​កម្ពុជា​ខេត្ត​ត្បូងឃ្មុំ លោក សេង ជ័យវុធ ដែល​បាន​ដាក់​ទៅ​សាលាដំបូង​ខេត្ត​ត្បូងឃ្មុំ កាលពី​ថ្ងៃទី​៣ ខែ​កុម្ភៈ ឆ្នាំ​២០២៣ ឲ្យ​ដឹង​ថា លោក គង់ គាំ បាន​សារភាព​ទទួលស្គាល់​នូវ​កំហុស និង​បាន​សុំ​អភ័យ​ទោស​ជា​សាធារណៈ​ចំពោះ​លោក ហ៊ុន សែន និង​ប្រធាន​គណបក្ស​ប្រជាជន​កម្ពុជា តាមរយៈ​លិខិត​ថ្លែង​អំណរគុណ​កាលពី​ថ្ងៃទី​៣១ ខែ​មករា កន្លងទៅ​នេះ។ ហេតុ​ដូច្នេះ​ហើយ គណៈកម្មាធិការ​គណបក្ស​ប្រជាជន​កម្ពុជា​ប្រចាំ​ខេត្ត​ត្បូងឃ្មុំ សម្រេច​ចិត្ត​ដក​ពាក្យ​បណ្តឹង​ចុះ​ថ្ងៃទី​១០ ខែ​មករា ឆ្នាំ​២០២៣ ចេញពី​សំណុំរឿង​ព្រហ្មទណ្ឌ​វិញ។

ការ​សម្រេច​ដក​ពាក្យ​បណ្ដឹង​ទៅវិញ​របស់​អនុប្រធាន​គណៈកម្មាធិការ​គណបក្ស​ប្រជាជន​កម្ពុជា​ខេត្ត​ត្បូងឃ្មុំ លោក សេង ជ័យវុធ បាន​ធ្វើ​ឡើង​ស្រប​ពេល​ដែល​លោក គង់ គាំ ប្រកាស​ទទួលស្គាល់​កំហុស និង​អំពើ​របស់​ខ្លួន។ ក្រៅពី​ប្រកាស​ទទួលស្គាល់​ហើយ លោក គង់ គាំ ក៏​បាន​សុំទោស​លោក​នាយករដ្ឋមន្ត្រី ហ៊ុន សែន ដែល​ជា​ប្រធាន​គណបក្ស​ប្រជាជន​កម្ពុជា​ផង​ដែរ។

ជាមួយ​គ្នា​នោះ លោក គង់ គាំ ក៏​បាន​សម្រេច​ចិត្ត​បញ្ចប់​តួនាទី និង​សកម្មភាព​ជា​ឧត្តម​ទីប្រឹក្សា​គណបក្ស​ភ្លើង​ទៀន ចាប់ពី​ថ្ងៃទី​៣១ ខែ​មករា ឆ្នាំ​២០២៣ កន្លងទៅ​ដែរ។

បើ​តាម​លោក គង់ គាំ បញ្ជាក់​ក្នុង​សេចក្ដី​ថ្លែង​អំណរគុណ​កាលពី​ចុង​ខែ​មករា ឆ្នាំ​២០២៣ ថា ការ​សម្រេច​របស់​លោក​ដោយសារ​លោក ហ៊ុន សែន មិន​ប្ដឹងផ្ដល់​រូបលោក​ទៅ​តុលាការ​បន្ត​ទៀត។

លោក គង់ គាំ បាន​ប្រាប់​សារព័ត៌មាន​ក្នុង​ស្រុក​ថា លោក​មិនមែន​ត្រឹមតែ​ដក​ខ្លួន​ចេញពី​គណបក្ស​ភ្លើង​ទៀន​នោះ​ទេ គឺ​ដក​ខ្លួន​ចេញពី​ជីវិត​នយោបាយ​ជា​រៀង​រហូត​តែម្តង ហើយ​រឿង​ដែល​សំខាន់​សម្រាប់​ជីវិត​ចុងក្រោយ​របស់​លោក គឺ​ការ​ថែទាំ​សុខភាព។ លោក​ថា ឥឡូវ​នេះ ទាំង​កម្លាំង​ធនធាន ទាំង​កម្លាំង​ចិត្ត ទាំង​កម្លាំង​កាយ បាត់បង់​យ៉ាង​គំហុក។

លោក ហ៊ុន សែន កាលពី​ខែ​មករា ឆ្នាំ​២០២៣ បាន​ប្រកាស​ឈប់​ប្ដឹងផ្ដល់​លោក គង់ គាំ ទៅ​តុលាការ​វិញ​បន្ទាប់ពី​លោក គង់ គាំ និង​ភរិយា បាន​ប្រគល់​ដី និង​ផ្ទះ​មួយ​កន្លែង​ដែល​មាន​តម្លៃ​ប្រមាណ ២៥​លាន​ដុល្លារ​នៅ​សង្កាត់​ទន្លេបាសាក់ ខណ្ឌ​ចំការមន រាជធានី​ភ្នំពេញ ត្រឡប់​មក​ឲ្យ​ក្រសួង​ការបរទេស​វិញ​កាលពី​ថ្ងៃទី​១២ ខែ​មករា ឆ្នាំ​២០២៣ បន្ទាប់ពី​លោក ហ៊ុន សែន បញ្ជា​ឲ្យ​ស្ថាប័ន​ក្រោម​បង្គាប់​ពន្លឿន​វិធានការ​រឹបអូស​ដី និង​ផ្ទះ។

យ៉ាងណា វិធានការ​រឹបអូស​ដី និង​ផ្ទះ​នេះ បន្ទាប់ពី​លោក គង់ គាំ បាន​ទម្លាយ​ថា កាលពី​លោក​នៅ​ជាមួយ​គណបក្ស​ប្រជាជន​កម្ពុជា គេ​បាន​ផ្តល់​ដំបូន្មាន​ថា «ផឹក​ទឹក​ឲ្យ​នឹក​ប្រភព ជ្រក​ម្លប់​ឲ្យ​នឹក​ដល់​អ្នក​ដាំ» ហើយ​ថា «ថ្ងៃ​៧​មករា» ទំនង​ជា​មិន​មាន​ប្រភព​នៅ​កម្ពុជា​ដូច​គណបក្ស​ភ្លើង​ទៀន​នោះ​ទេ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស