អតីតមេដឹកនាំបក្សប្រឆាំង លោក សម រង្ស៊ី ប្រកាសស្វាគមន៍បណ្តឹងរបស់មេដឹកនាំបក្សកាន់អំណាច លោក ហ៊ុន សែន ដែលគ្រោងប្តឹងរូបលោកជាថ្មីមកតុលាការប្រទេសបារាំង ជុំវិញការលើកឡើងរបស់លោកទាក់ទិននឹងប្រវត្តិរបស់អ្នកស្រី ប៊ុន សុថា ទាក់ទងការសម្លាប់ប្តីខ្លួនឯងកាលពីពេលកន្លងទៅ។
អតីតមេដឹកនាំប្រឆាំង លោក សម រង្ស៊ី សរសេរលើទំព័រហ្វេសប៊ុករបស់លោកកាលពីថ្ងៃអង្គារ ទី៧ កុម្ភៈ ថា លោកទទួលដំណឹងថាមេដឹកនាំបក្សកាន់អំណាចដែលត្រូវជាបងថ្លៃរបស់អ្នកស្រី ប៊ុន សុថា គ្រោងប្តឹងលោកមកតុលាការប្រទេសបារាំង បន្ទាប់ពីលោកបានរំលឹកពីប្រវត្តិប្អូនថ្លៃរបស់លោកថា បានសម្លាប់ប្តីខ្លួនឯង គឺលោក កូវ សាមុត កាលពីឆ្នាំ១៩៩៦ ដែលលោក ហ៊ុន សែន ជាអ្នកនៅពីក្រោយនៃអំពើឃាតកម្មនេះ។
លោកបន្តថា អំពើឃាតកម្មនេះកើតឡើងដោយសារតែលោក កូវ សាមុត ប្រើអំពើហិង្សាលើអ្នកស្រី ប៊ុន សុថា ក្រោយបែកធ្លាយរឿងអ្នកស្រីលួចលាក់សហាយស្មន់ជាមួយអ្នកបើកឡានរបស់ខ្លួន គឺលោក តាន់ បញ្ញាវុធ ដែលជាប្តីរបស់អ្នកស្រីបច្ចុប្បន្ននេះ។
លោក សម រង្ស៊ី លើកឡើងថា ក្រោយផ្ទុះរឿងអាស្រូវនេះ គ្រួសាររបស់លោក ហ៊ុន សែន បានរងនូវភាពអាម៉ាស់យ៉ាងខ្លាំងក្នុងនាមខ្លួនឯងជាមេដឹកនាំខ្មែរ ព្រោះរឿងនេះគឺទាក់ទងទៅនឹងភរិយារបស់គាត់ គឺអ្នកស្រី ប៊ុន រ៉ានី ដោយផ្ទាល់ ដូច្នេះជម្រើសដែលលោក ហ៊ុន សែន បិទរឿងនេះមិនឲ្យលេចឮទៅខាងក្រៅ គឺមានតែសម្លាប់លោក កូវ សាមុត ហើយទម្លាក់កំហុសលើអ្នកដទៃទាំងអយុត្តិធម៌ប៉ុណ្ណោះ។
អតីតមេដឹកនាំបក្សប្រឆាំង លោក សម រង្ស៊ី បញ្ជាក់ថា ការរំលឹកពីឃាតកម្មដែលប្រព្រឹត្តដោយមេដឹកនាំបក្សកាន់អំណាច លោក ហ៊ុន សែន នេះ គឺមានសារសំខាន់ និងសារប្រយោជន៍ខ្លាំងណាស់ក្នុងការស្វែងរកយុត្តិធម៌ឲ្យជនរងគ្រោះដែលលោក ហ៊ុន សែន បានសម្លាប់។
លោក សម រង្ស៊ី គូសបញ្ជាក់ថា ជនរងគ្រោះដែលបានស្លាប់ទាំងអយុត្តិធម៌រហូតដល់សព្វថ្ងៃនេះ គឺមានច្រើនណាស់ ក្នុងនោះមានដូចជាប្រធានសហជីពសេរីកម្មករ លោក ជា វិជ្ជា ត្រូវខ្មាន់កាំភ្លើងបាញ់សម្លាប់ក្នុងឆ្នាំ២០០៤ សកម្មជនការពារព្រៃឈើ លោក ឈុត វុទ្ធី ត្រូវឃាតករផ្តាច់ជីវិតក្នុងឆ្នាំ២០១២ និងបណ្ឌិត កែម ឡី ត្រូវគេបាញ់ប្រហារស្លាប់ក្នុងថ្លុកឈាមក្នុងឆ្នាំ២០១៦ ជាដើម ដែលឃាតកម្មក្រៅប្រព័ន្ធច្បាប់ទាំងនេះជាប់ពាក់ព័ន្ធយ៉ាងខ្លាំងទៅនឹងលោក ហ៊ុន សែន រួមទាំងក្រុមគ្រួសាររបស់គាត់។
បន្ទាប់ពីអ្នកស្រី ប៊ុន សុថា ទទួលមរណភាព អតីតមេដឹកនាំបក្សប្រឆាំង លោក សម រង្ស៊ី បានលើកឡើងលើទំព័រហ្វេសប៊ុករបស់លោកកាលពីថ្ងៃទី៥ កុម្ភៈ ថា ក្នុងជួរគ្រួសារលោក ហ៊ុន សែន មានមនុស្សសាហាវៗជាច្រើន ដូចករណីអ្នកស្រី ប៊ុន សុថា ដែលមានឈ្មោះដើម ប៊ុន សាមហ៊ឹង ជាដើម ធ្លាប់បានបញ្ជាឲ្យគេសម្លាប់ប្តីខ្លួនឯង គឺលោក កូវ សាមុត កាលពីអំឡុងឆ្នាំ១៩៩៦ ដោយសារតែជម្លោះផ្ទៃក្នុងគ្រួសាររបស់ខ្លួនដែលមានលោក ហ៊ុន សែន ជាអ្នកបញ្ជាពីក្រោយខ្នង។
ក្រោយការលើកឡើងរបស់លោក សម រង្ស៊ី មេដឹកនាំបក្សកាន់អំណាច លោក ហ៊ុន សែន បានចាត់ទុកអតីតមេដឹកនាំបក្សប្រឆាំងរូបនេះ និងអ្នកគាំទ្រមួយចំនួនរបស់គាត់ថា ពួកគេលែងមានសារជាតិជាមនុស្សទៀតហើយ ព្រោះអ្នកទាំងនោះចេះតែនាំគ្នាមកនិន្ទា និងរុកឆ្កៀលក្រុមគ្រួសាររបស់លោកទាំងដែលលោកកំពុងជួបទុក្ខមានប្អូនស្រីស្លាប់នៅពេលនេះ។
អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវ លោក សេក សុជាតិ ប្រាប់សារព័ត៌មាន The Cambodia Daily នៅថ្ងៃទី៨ កុម្ភៈ នេះថា ប្រសិនបើលោក សម រង្ស៊ី មានភស្តុតាងគ្រប់គ្រាន់ជុំវិញការអះអាងរបស់គាត់ ដែលថាមេដឹកនាំបក្សកាន់អំណាច លោក ហ៊ុន សែន នៅពីក្រោយនៃការស្លាប់របស់លោក កូវ សាមុត គាត់គួរតែដាក់ពាក្យបណ្តឹង និងភស្តុតាងទៅតុលាការ ដើម្បីរកយុត្តិធម៌ជុំវិញករណីនេះ។
លោកបន្ថែមថា បើតុលាការមិនរកយុត្តិធម៌ក្នុងរឿងនេះទេ នោះបង្ហាញកាន់តែច្បាស់ថា អ្វីដែលគាត់បានអះអាង គឺជារឿងពិត ហើយពលរដ្ឋខ្មែរច្បាស់ជាមានសុភវិនិច្ឆ័យក្នុងរឿងនេះជាមិនខាន។
លោក សេក សុជាតិ បញ្ជាក់ថា ផ្ទុយទៅវិញ បើគាត់គ្រាន់តែលើកឡើងដោយគ្មានមូលដ្ឋាន ស្របពេលដែលការបោះឆ្នោតកាន់តែខិតជិតមកដល់បែបនេះ គេអាចនឹងគិតថា លោក សម រង្ស៊ី ព្យាយាមកេងចំណេញនយោបាយក្នុងរឿងនេះច្រើនជាង។ លើសពីនេះ ក៏ជាការបញ្ជាក់ដែរថា អ្នកនយោបាយប្រឆាំងសព្វថ្ងៃនេះគ្មានការដឹកនាំនយោបាយថ្មីសម្រាប់កម្ពុជានោះទេ គឺមានតែបង្កបរិយាកាសអាប់អួរ និងភាពស្មុគស្មាញសម្រាប់កម្ពុជាទៅវិញប៉ុណ្ណោះ។
ចំណែកសកម្មជនសហគមន៍ខ្មែរនៅក្រុងឡុងប៊ិច (Long Beach) នៃរដ្ឋកាលីហ្វ័រញ៉ា (California) សហរដ្ឋអាមេរិក លោក មួង ណារ៉េត បានលើកឡើងក្នុងកម្មវិធី Idea Talk នៃសារព័ត៌មាន The Cambodia Daily កាលពីរាត្រីថ្ងៃអង្គារ ថា ប្រពៃណីខ្មែរដែលចាស់បុរាណអប់រំឲ្យប្រកាន់សីលធម៌ គឺគេតែងតែណែនាំឲ្យអហោសិកម្មដល់អ្នកដែលស្លាប់ បើទោះបីជាអ្នកនោះបានប្រព្រឹត្តខុសកាលពីនៅរស់ក៏ដោយ។
លោក មួង ណារ៉េត បញ្ជាក់ថា យ៉ាងណាក៏ដោយ ការជជីកបើកកកាយប្រវត្តិអ្នកស្លាប់ប្រហែលជាភាគីដែលគិតថាខ្លួនជាជនរងគ្រោះ គ្រាន់តែចង់ឈ្នះ ឬចង់រំដោះកំហឹងផ្លូវចិត្តរបស់ខ្លួនដែលរងអយុត្តិធម៌ពីភាគីម្ខាងទៀតដែលខ្លួនមិនអាចទាមទារយុត្តិធម៌បានប៉ុណ្ណោះ ប៉ុន្តែវិធីនេះមិនមែនជាដំណោះស្រាយទេ តែនឹងធ្វើឲ្យរឿងរ៉ាវដែលកើតមានកាន់តែរីកធំ និងស្មុគស្មាញទៅវិញ៕