31 C
Phnom Penh

មេដឹកនាំ​សហភាព​អឺរ៉ុប​ស្វាគមន៍​យ៉ាង​កក់ក្ដៅ​វត្តមាន​លោក ហ្សេឡេនស្គី នៅ​ទីក្រុង​ប្រ៊ុចសែល

ដោយ ឌឹ ខេមបូឌា ដេលី

បទវិភាគ

នៅ​ថ្ងៃ​នេះ ប្រធានាធិបតី​អ៊ុយក្រែន បាន​ទៅ​ដល់​ទីក្រុង​ ប្រ៊ុចសែល ប្រទេស​បែលហ្ស៊ិក ដើម្បី​ថ្លែង​សុន្ទរកថា​ទៅ​កាន់​សភា​របស់​សហភាព​អឺរ៉ុប។

ក្នុង​ដំណើរ​ទស្សនកិច្ច​ទៅ​កាន់​ក្រៅ​ប្រទេស​ជា​លើក​ទី​២ បន្ទាប់ពី​បាន​ទៅ​ទីក្រុង​វ៉ាស៊ីនតោន ប្រធានាធិបតី​អ៊ុយក្រែន បាន​ទៅ​ធ្វើ​ទស្សនកិច្ច​នៅ​អង់គ្លេស ដោយ​បាន​ជួប​ជាមួយ​នាយករដ្ឋមន្ត្រី​អង់គ្លេស រីហ្ស៊ី ស៊ូណាក់ និង​បាន​ថ្លែង​ទៅ​កាន់​សភា​នៃ​ប្រទេស​មហាអំណាច​អឺរ៉ុប​មួយ​នេះ​ផង​ដែរ។ នៅ​ថ្ងៃ​នេះ លោក ហ្សេឡេនស្គី ត្រូវ​ថ្លែង​សុន្ទរកថា​ទៅ​កាន់​សភា​សហភាព​អឺរ៉ុប។

តាម​ការ​ចុះផ្សាយ​របស់​បណ្ដាញ​ផ្សាយ​ព័ត៌មាន​អាល្លឺម៉ង់ DW លោក ហ្សេឡេនស្គី ធ្វើ​ដំណើរ​ទៅ​ទីក្រុង​ប្រ៊ុចសែល ដោយ​អមដំណើរ​ដោយ​ប្រធានាធិបតី​បារាំង អេម៉ានូអេល ម៉ាក្រុង។

វត្តមាន​របស់​លោក ហ្សេឡេនស្គី ត្រូវ​បាន​ស្វាគមន៍​យ៉ាង​កក់ក្ដៅ​ដោយ​មេដឹកនាំ​សហភាព​អឺរ៉ុប។ យោង​តាម​ប្រភព​ព័ត៌មាន​របស់ DW ឲ្យ​ដឹង​ថា លោក ហ្សេឡេនស្គី ភ្លាមៗ​នៅ​ចំពោះ​មុខ​សមាជិក​សភា​អឺរ៉ុប​នោះ បាន​ប្រើ​ពាក្យ​ថា Glory to Ukraine ដែល​មាន​ន័យ​ថា អ៊ុយក្រែន​ដ៏​រុងរឿង ហើយ​អរគុណ​សភា​អឺរ៉ុប​ដែល​កំពុងតែ​បន្ត​គាំទ្រ​ប្រជាជន​អ៊ុយក្រែន ក្នុង​ការ​តស៊ូ​ដើម្បី​សេរីភាព និង​ធ្វើ​សង្គ្រាម​ដើម្បី​អធិបតេយ្យភាព​នៃ​ទឹកដី​អ៊ុយក្រែន ចំពោះ​ការ​ឈ្លានពាន​ពី​ប្រទេស​រុស្ស៊ី។

លោក​អះអាង​ថា វា​មាន​ន័យ​សំខាន់​ណាស់​ដែល​អ៊ុយក្រែន ជា​បេះដូង​នៃ​ប្រជាធិបតេយ្យ​មិន​ត្រឹម​សម្រាប់​ខ្លួនឯង​នោះ​ទេ គឺ​សម្រាប់​ប្រជាធិបតេយ្យ​នៅ​អឺរ៉ុប​ទាំងមូល។

លោក ហ្សេឡេនស្គី បាន​ថ្លែង​ថា នៅ​ពេល​នេះ អ៊ុយក្រែន​កំពុងតែ​ដើរ​លើ​ផ្លូវ​ជ័យជម្នះ ព្រោះ​អ៊ុយក្រែន​នឹង​ក្លាយ​ជា​សមាជិក​សហភាព​អឺរ៉ុប។

ការ​ថ្លែង​របស់​លោក ហ្សេឡេនស្គី ដូចនេះ នាំ​ឲ្យ​សមាជិក​សភា​អឺរ៉ុប​ទះ​ដៃ​ប្រាវៗ ហើយ​រន្ធត់​ចិត្ត​ជា​ខ្លាំង។ លោក​បន្ត​ថា អឺរ៉ុប​គឺជា​បេះដូង​របស់​ប្រជាជន​អ៊ុយក្រែន។ លោក​ថា អឺរ៉ុប​កំពុងតែ​សាមគ្គី​គ្នា​ដើម្បី​ការពារ​អ៊ុយក្រែន និង​អឺរ៉ុប​ទាំងមូល។

លោក​ថា សហភាព​អឺរ៉ុប​ដែល​កំពុង​បន្ត​ជួយ​ប្រជាជន​អ៊ុយក្រែន ប្រយុទ្ធ​ប្រឆាំង​នឹង​អំពើ​ឈ្លានពាន​របស់​រុស្ស៊ី នៅ​ពេលនេះ សហភាព​អឺរ៉ុប​គឺជា​ខ្នងបង្អែក​របស់​ប្រជាជន​អ៊ុយក្រែន​ដ៏​ខ្លាំងក្លា ដែល​ធ្វើ​ឲ្យ​ប្រជាជន​អ៊ុយក្រែន​មាន​កម្លាំង​ចិត្ត​ក្នុង​ការ​តស៊ូ​ដើម្បី​សេរីភាព​របស់​ខ្លួន។

បើ​តាម DW នៅ​មុន​ពេល​លោក ហ្សេឡេនស្គី ថ្លែង​សុន្ទរកថា​ទៅ​កាន់​សភា​អឺរ៉ុប សមាជិក​សភា​អឺរ៉ុប​មួយ​ចំនួន និង​នៅ​ក្នុង​សាល​ប្រជុំ​ទាំងមូល​មាន​ទង់ជាតិ​អឺរ៉ុប និង​អ៊ុយក្រែន​រួច​ទៅ​ហើយ ដោយ​ទង់ជាតិ​ទាំង​ពីរ​នេះ​គឺជា​និមិត្តរូប​បង្ហាញ​អំពី​អ៊ុយក្រែន អនាគត​នឹង​ក្លាយ​ជា​សមាជិក​សហភាព​អឺរ៉ុប។

ជាមួយ​គ្នា​នេះ សមាជិក​សភា​អឺរ៉ុប​ម្នាក់ គឺ​អ្នកស្រី Metsola បាន​ថ្លែង​ថា លោកស្រី​ចង់​ឃើញ​សភា​អឺរ៉ុប​បន្ថែម​ជំនួយ​យោធា​ថែម​ទៀត​ទៅ​ឲ្យ​អ៊ុយក្រែន ដែល​ក្នុង​នោះ​មាន​ប្រព័ន្ធ​មីស៊ីល​វង់​ប្រតិបត្តិការ​ឆ្ងាយ និង​យន្តហោះ​ចម្បាំង​ទៀត​ផង ដែល​អ្នកស្រី​ថា​ជំនួយ​នេះ​នឹង​នាំ​ឲ្យ​ប្រជាជន​អ៊ុយក្រែន​រំដោះ​ប្រទេស​របស់​ខ្លួន​បាន​ពី​ការ​ឈ្លានពាន​របស់​រុស្ស៊ី។

ស្រប​ពេលនេះ ប្រធាន​គណៈកម្មការ​អឺរ៉ុប អ្នកស្រី អ៊ុយសូឡា ហ្វុងដឺលីយ៉េន និង​ប្រធាន​ក្រុមប្រឹក្សា​អឺរ៉ុប លោក ឆាល មីឆេល បាន​ស្វាគមន៍​លោក ហ្សេឡេនស្គី ដោយ​ភាព​កក់ក្ដៅ​ជា​ខ្លាំង។

លោក ហ្សេឡេនស្គី កាលពី​ថ្ងៃទី​៨ កុម្ភៈ លោក​បាន​ជួប​នាយករដ្ឋមន្ត្រី​អង់គ្លេស រីហ្ស៊ី ស៊ូណាក់ នៅ​ទីក្រុង​ឡុងដ៍ ហើយ​ក្រោយ​មក​លោក​បាន​ថ្លែង​សុន្ទរកថា​ទៅ​កាន់​សមាជិក​សភា​ទាំង​ពីរ​ថ្នាក់​របស់​ប្រទេស​នេះ ប៉ុន្តែ​សុន្ទរកថា​របស់​លោក ហ្សេឡេនស្គី ដែល​ធ្វើ​ឲ្យ​សមាជិក​សភា​អង់គ្លេស​រំជួល​ចិត្ត​នោះ គឺ​លោក​ទទូច​សុំ​យន្តហោះ​ចម្បាំង​ពី​អង់គ្លេស ហើយ​លោក​សច្ចា​ថា​យន្តហោះ​នេះ​នឹង​ធ្វើ​ឲ្យ​ប្រជាជន​អ៊ុយក្រែន​សម្រេច​បាន​នូវ​ការ​ទាមទារ​សេរីភាព​របស់​ខ្លួន​មក​វិញ​ពី​ការ​ឈ្លានពាន​របស់​ប្រទេស​រុស្ស៊ី។

ភ្លាមៗ​ក្រោយពី​លោក ហ្សេឡេនស្គី ចាកចេញ​ពី​សភា​អង់គ្លេស លោក​បាន​ទៅ​គាល់​មហាក្សត្រ​អង់គ្លេស ខណៈ​នាយករដ្ឋមន្ត្រី រីហ្ស៊ី ស៊ូណាក់ បាន​ប្រាប់​ទៅ​រដ្ឋមន្ត្រី​ការពារ​ជាតិ បេនវ៉េល លេន ឲ្យ​ពិនិត្យ​មើល​លទ្ធភាព​នៃ​ការ​ផ្ដល់​យន្តហោះ​ចម្បាំង​តាម​សំណើ​របស់​លោក ហ្សេឡេនស្គី។

នៅ​ពេល​លោក​ទៅ​ដល់​ទីក្រុង​ប៉ារីស ទៀត​នោះ មេដឹកនាំ​អ៊ុយក្រែន​ដែល​បាន​ក្លាយ​ពី​តារា​កំប្លែង​រូប​នេះ​ក៏​បាន​ជួប​នឹង​លោក ម៉ាក្រុង។

ប្រធានាធិបតី​បារាំង សន្យា​ថា បារាំង​នៅ​ជាមួយ​ប្រជាជន​អ៊ុយក្រែន​ជានិច្ច។ លោក ម៉ាក្រុង បន្ថែម​ថា យើង​មិន​ត្រូវ​ឲ្យ​រុស្ស៊ី​ឈ្នះ​សង្គ្រាម​ជាដាច់ខាត។ ជាមួយ​គ្នា​នេះ សេចក្ដី​រាយការណ៍​របស់ AFP បាន​ឲ្យ​ដឹង​ថា លោក​ក៏​បាន​ជួប​អធិការបតី​អាល្លឺម៉ង់ Olaf Scholz នៅ​ទីក្រុង​ប៉ារីស ផង​ដែរ។

អធិការបតី​អាល្លឺម៉ង់​រូប​នេះ​បាន​ធានា​បន្ត​ការ​គាំទ្រ​ដល់​ប្រជាជន​អ៊ុយក្រែន​បន្ត​ទៀត ដែល​លោក​ថា​រុស្ស៊ី​ឈ្លានពាន​អ៊ុយក្រែន​ចាប់ផ្ដើម​ចូល​ដល់​មួយ​ឆ្នាំ​ហើយ​នៅ​ពេលនេះ ហើយ​អាល្លឺម៉ង់ និង​ដៃគូ​អាល្លឺម៉ង់​សន្យា​ថា បន្ត​គាំទ្រ​អ៊ុយក្រែន​ទាំង​ហិរញ្ញវត្ថុ ទាំង​ជំនួយ​មនុស្សធម៌ និង​សព្វាវុធ​បន្ត​ទៀត៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស